ෆීල්ඞ් මාෂල් සරත් ෆොන්සේකාට තමන් කිසිසේත්ම පොලිස් දෙපාර්තමේන්තුව හෝ එම දෙපාර්තමේන්තුව අයත්වන නීතිය හා සාමය පිළිබඳ අමාත්‍යාංශය ලබා නොදෙන බව ජනාධිපති මෛත්‍රීපාල සිරිසේන එජාප නායකයන් සමඟ කියා ඇතැයි වාර්තා වෙයි.

අප්‍රේල් 30 වැනිදා ජනාධිපතිවරයා හා එජාප නායකයන් පිරිසක් අතර පැවති සාකච්ඡාවකදී මේ බව කියා ඇත. අග්‍රාමාත්‍ය රනිල් වික්‍රමසිංහගේ ප්‍රධානත්වයෙන් අමාත්‍යවරුන් වන ලක්ෂ්මන් කිරිඇල්ල, රාජිත සේනාරත්න, මලික් සමරවික්‍රම, කබීර් හෂීම් එම සාකච්ඡාවට සහභාගි වී තිබේ. සාකච්ඡාවට සහභාගි වූ එජාප ඇමතිවරයෙක් අනිද්දා සමඟ අදහස් දක්වමින් මේ බව කීය.

ෆීල්ඞ් මාෂල් ෆොන්සේකා මහතාට වෙනත් අමාත්‍යධුරයක් ලබාදිය හැකි බව එහිදී ජනාධිපතිවරයා කියා ඇත. ඊට අමතරව ආරක්ෂක අමාත්‍යාංශයේ උපදේශක තනතුරක් ලබාදී ආරක්ෂක මණ්ඩලයේ රැස්වීම්වලටද සහභාගි කරගත හැකි බව ජනාධිපතිවරයා කියා ඇත. එහෙත් පොලීසිය ෆීල්ඞ් මාෂල්වරයාට ලබාදුනහොත් තමන්ගේ ජීවිතය පිළිබඳවද විශ්වාස නැතැයි කියා ඇත.

අනිද්දා සමඟ අදහස් දැක්වූ එජාප ඇමතිවරයාට අමතරව ජනාධිපතිවරයාට හිතවත් ආරංචිමාර්ග හා පොලිස් දෙපාර්තමේන්තුවේ ඉහළ නිලධාරීන්ද අනිද්දා සමඟ අදහස් දක්වමින් ප්‍රකාශ කළේ ජනාධිපති මෛත්‍රීපාල සිරිසේන මේ වෙද්දී ත්‍රස්තවාදයට එරෙහිව කටයුතු කළ නායකයා ලෙස ගෞරවය ලබාගැනීමේ අපේක්ෂාවෙන් පොලීසිය ඇතුළු ආයතන තමාගේ යටතේ තබාගෙන කටයුතු කිරීමට උත්සාහ කරමින් සිටින බවය. මීළඟ ජනාධිපතිවරණයට ඉදිරිපත්වීමේ වුවමනාවෙන් ජනාධිපතිවරයා මෙසේ කටයුතු කරන බව ඔවුන්ගේ අදහසය. ■