එකම කරුණක් පිළිබඳ පරස්පර ප‍්‍රකාශ කරමින් සිය උන්මත්තකභාවය රටට ප‍්‍රකාශ කරමින් සිටින ජනාධිපති මෛතී‍්‍රපාල සිරිසේන ඊළඟ මොහොතේ සිදුකරන්නේ කුමක්දැයි යන්න ඔහුම නොදන්නා තත්ත්වයට පත්වී ඇත.

මේ සටහන ලියන නොවැම්බර් 14 වැනිදා සවස ආරංචි වූයේ ඔහු තව පැය කිහිපයකින් ජාතිය අමතන බවය. එහිදීත් ඔහු මොනවා කියනවාදැයි ඔහුවත් දන්නේ නැති බවට සැකයක් නැත. නොවැම්බර් 14 වැනිදා පෙරවරුවේ පාර්ලිමේන්තුව විවෘතවීමෙන් පසු පාර්ලිමේන්තුවේ බහුතරය ඇතැයි ඔහු විශ්වාස කළ කුරුණෑගල දිස්ති‍්‍රක් පාර්ලිමේන්තු මන්තී‍්‍ර මහින්ද රාජපක්‍ෂට එම බහුතර බලය නොමැතිබව තහවුරුවීමෙන් පසු ඔහුට ජාතිය අමතන්නට මතක්වී ඇතිවාට සැකනැත. දැන් ඔහු ජාතිය ඇමතීමද අතිවිශේෂ ගැසට් නිකුත් කරනවා වැනිම දෛනික කි‍්‍රයාවක් බවට පත්කරගෙන ඇති සෙයකි.
පැජට් පාරේ පිළිකන්නේ හොර අගමැති වූ මහින්ද රාජපක්‍ෂව පත්කිරීමත්, එතැන් සිට පිළිකන්නේ හොර කැබිනට් මණ්ඩලයක් පත්කිරීම දක්වා වූ ජනාධිපතිවරයාගේ සියළුම අතිවිශේෂ ගැසට් පත‍්‍ර අහෝසි කිරීමේ යෝජනාවට නොවැම්බර් 14 වැනිදා පෙරවරුවේ පාර්ලිමේන්තුවේ බහුතර මන්තී‍්‍ර කැමත්ත ලැබුණු අතර එම නිසා එම ගැසට් පත‍්‍රවල වලංගුභාවය අහෝසි වී ඇත. ඒ අනුව අග‍්‍රාමාත්‍යවරයා වශයෙන් මහින්ද රාජපක්‍ෂට පත්කිරීමේ අතිවිශේෂ ගැසට් පත‍්‍රයද, අග‍්‍රාමාත්‍ය රනිල් වික‍්‍රමසිංහව තනතුරෙන් ඉවත්කිරීමේ ගැසට් පත‍්‍රයද, මහින්ද රාජපක්‍ෂගේ අනුදැනුමෙන් පත්කළ හොර අමාත්‍ය මණ්ඩලයට අදාළ සියළුම අතිවිශේෂ ගැසට් පත‍්‍රද දැන් අහෝසිය.

එසේ එම අති විශේෂ ගැසට් පත‍්‍ර අහෝසි වුවද හොර අමාත්‍ය මණ්ඩලය පත් කිරීම හා හොර අමාත්‍යවරුන්ට විෂයන් පැවරීම සම්බන්ධයෙන් නිකුත් කරන ලද අතිවිශේෂ ගැසට් පත‍්‍රවල විකාර රූපී ස්වාභාවය අප සාකච්ඡුා කළ යුතුය. ඒ තමන් කටයුතු කරන්නේ කෙසේද යන්න පිළිබඳ නිශ්චිතතාවයකින් තොරව ජනාධිපතිවරයා කටයුතු කළ ආකාරය පිළිබඳව ඒ මඟින්ද අපට හොඳ චිත‍්‍රයක් මැවෙන බැවින්ය.

පිළිකන්නේ හොර අගමැති මහින්ද රාජපක්ෂව ඔක්තෝබර් 26 වැනිදා රාති‍්‍රයේ පත් කිරීමෙන් පසු ඔහුගේ හොර කැබිනෙට්ටුව පත්කිරීමට ජනාධිපතිවරයාට සැහෙන කාලයක් ගත වන්නේය. ඒ පාර්ලිමේන්තුව විසුරවීමේ ව්‍යවස්ථා විරෝධී අතිවිශේෂ ගැසට්ටුව නිකුත් කරන තෙක් සති දෙකක කාලයක්ය. ඇත්ත වශයෙන්ම එම සතිදෙකක කාලය ඒ ආකාරයට ගෙවුණේ පාර්ලිමේන්තුවේ බහුතරය අල්ලස් ගෙවා බිලිබාගැනීමේදී අල්ලස් ඇමට අසුවන උන්ට අමාත්‍ය තනතුරු ප‍්‍රදානය කිරීම සඳහාය. වාර අවසානකරන ලද පාර්ලිමේන්තුව නොවැම්බර් 14 වැනිදා යළි ආරම්භවීමට නියමිතව තිබීමත් අල්ලස් ඇමට අසුවීමට තවත් කිසිවකුත් ඉතිරි වී නොසිටීමත් මත තවදුරටත් පාර්ලිමේන්තුව තුළ පරාජයවීමෙන් වැළකීම සඳහා ව්‍යවස්ථා විරෝධීව පාර්ලිමේන්තුව විසුරුවීම සිදුනොකළේ නම් හොර අමාත්‍ය මණ්ඩලය පත්කිරීම හා ඔවුන්ට අයත් විෂයන් පවරාදීමේ අතිවිශේෂ ගැසට් සෙල්ලම තව බොහෝ කාලයක් දිග ඇරෙන්නට වුවද තිබුණි.

එමෙන්ම පාර්ලිමේන්තුව විසුරුවීමකදී ඡුන්දයකින්ද නැවත අලූත් පාර්ලිමේන්තුවක් පත් වී නව අග‍්‍රාමාත්‍යවරයෙකු යටත් නව කැබිනට් මණ්ඩලයක් පත්වන තෙක් රාජ්‍ය පාලනය පාර්ලිමේන්තුව විසුරුවන අවස්ථාවේ සිටි අග‍්‍රාමාත්‍යවරයා හා කැබිනට් මණ්ඩලයට පැවරෙන බවට වූ ව්‍යවස්ථා විධිවිධානය නොතිබුණේ නම් ද මේ අතිවිශේෂ ගැසට් සෙල්ලමට තව ආයුෂ ලබාගැනීමේ හැකියාව තිබුණි.

ඒ නිසාම ව්‍යවස්ථා විරෝධීව පාර්ලිමේන්තුව විසුරවීමේ අතිවිශේෂ ගැසට් නිවේදනය නොවැම්බර් 9 වැනිදා රාති‍්‍රයේ නිකුත් කිරීමට පෙර උපරිම සංඛ්‍යාව 30 ක් වූ තනි ආණ්ඩුවක කැබිනට් අමාත්‍යධුර සංඛ්‍යාව පිරවීමේදීද එම විකාරරූපී තත්ත්වය මනාසේ ප‍්‍රදර්ශනය විය.

ඒ එම නොවැම්බර් 9 දිනයේදී පමණක් අමාත්‍යවරුන් පත් කිරීමේ අතිවිහේෂ ගැසට් නිවේදන දෙකක් නිකුත් කිරීම මඟින්ය. ඉන් පළමුවැන්න පාර්ලිමේන්තු මන්තී‍්‍ර විමල් වීරවංශව පත්කිරීමය. දෙවැන්න පාර්ලිමේන්තු මන්තී‍්‍රවරුන් වන ජොන්ස්ටන් ප‍්‍රනාන්දු, සි.බී. රත්නායක, උදය ගම්මන්පිල, ගාමිණී ලොකුගේ, මහින්ද යාපා අබේවර්ධන, එස්.එම් චන්ද්‍රසේන හා එම්.එල්.ඒ. එම් හිස්බුල්ලාව පත්කිරීමය.

කැබිනට් මණ්ඩල සාමාජිකයන් 20න් 8ක්ම එදින රාති‍්‍රයේ අවසන් මොහොතේ පත්කරන්නේ පාර්ලිමේන්තුව විසිරවීමෙන් පසු කි‍්‍රයාත්මක වීම සඳහාය. ජනාධිපතිවරයා අරමුණුකර තිබු මහමැතිවරණය කාලසීමාවේදී රාජ්‍ය දේපලත් රාජ්‍ය සම්පතුත් සිතු සිතූ ලෙස අවභාවිත කරමින් දූෂිත මැතිවරණයක යෙදෙන්නටය.

රාජ්‍ය සම්පත් හෝ රාජ්‍ය දේපළ පිළිබඳ කථාව පසෙකට දැමු විට අවසන් මොහොතේ පත් කළ මේ මන්තී‍්‍රවරුන්ද 8 දෙනාගේ පත්කිරීමේ තුළ උත්ප‍්‍රාසාත්මක බවක් ද දිස්වේ. ඒ මෙසේ අවසන් මොහොතේ කැබිනට් අමාත්‍යවරුන් ලෙස දිව්රුම් දුන් අප අතර සිටිනා එම්.එල්. ඒ.ඒම් හිස්බුල්ලා, එස්.එම්.චන්ද්‍රසේන හා සී.බී. රත්නායක ඊට පෙර රාජ්‍ය අමාත්‍යවරුන් ලෙස වෙනත් විෂයන් යටතේ දිවුරුම් දුන් අයවීම නිසාය.

ඔක්තෝබර් 26 රාති‍්‍රයේ පිළිකන්නේ හොර අගමැති මහින්ද රාජපක්‍ෂව පත්කිරීමෙන් පසු හොර කැබිනට් මණ්ඩලයේ මුල්ම පත්වීම් ගැසට් කරනු ලබන්නේ ඔක්තෝබර් 29 වැනිදාය. ඒ මහින්ද රාජපක්‍ෂ ඇතුළු 11 දෙනෙකු සම්බන්ධයෙන්ය. එම 11 දෙනා අතර එජාපයෙන් ආ විජයදාස රාජපක්‍ෂෂ, වසන්ත සේනානායක හා එක්සත් ජනතා නිදහස් සන්ධාන ලැයිස්තුවෙන් පත්වූ ලංකා කම්කරු කොංග‍්‍රසයේ ආරුමුගන් තොන්ඩමාන්ද, ඊපීඞීපී සංවිධානයේ ඩග්ලස් දේවානන්දා වේ. අනෙකුත් අය ශී‍්‍රලනිපය මෛතී‍්‍රපාල සිරිසේන හිතවතුන් වශයෙන් කටයුතු කළ නිමල් සිරිපාල ද සිල්වා, සරත් අමුණුගම මහින්ද සමරසිංහ, මහින්ද අමරවීර, රංජිත් සියඹලාපිටිය, විජිත් විජයමුණි සොයිසා හා ෆයිසර් මුස්තාපා යන අයය. මහින්ද රාජපක්‍ෂගේ කල්ලියේ සාමාජිකයන්ට එහි ඉඩ නැති බව හෝ ඔවුන් මුල් අවස්ථාවේදී තනතුරු ගැනීමට අකමැතිවූ බව ඉන් පෙනී යයි.

තවදුරටත් එම ගැසට් පත‍්‍රයේ එජාපයෙන් බිලිබාගත් වඩිවෙල් සුරේෂ් රාජ්‍ය ඇමතිවරයෙකු වශයෙන් හා ආනන්ද අලූත්ගමගේ නියෝජ්‍ය ඇමතිවරයෙකු වශයෙන් සිටී.

ඉන් පසු තවත් හොර ඇමතිවරු දෙදෙනකු පත්වන්නේ නොවැම්බර් 1 වැනිදා අති විශේෂ ගැසට්ටුව මඟින්ය. ඒද මෛතී‍්‍රපාල හිතවතුන් වූ දුමින්ද දිසානායක හා දයාසිරි ජයසේකරය. එම ගැස්ට්ටුවේ හිස්බුල්ලා ඇතුළු රාජ්‍ය ඇමතිවරුන් 5 ක්සිටී. එරජාපයේ බිලිබාගත් අංගජන් රාමනාදන් ඇතුළු නියෝජ්‍ය ඇමතිවරුන් 6 සිටී. මේ ගැසට්ටුවෙත් සියල්ලන්ම මහින්ද රාජපක්‍ෂගේ ඒකාබද්ධ විපක්ෂයට ගිය අය නොවේය.

මහින්ද රාජපක්‍ෂවාදීන් දෙදෙනෙකු හොර කැබිනට්ටුවට එන්නේ නොවැම්බර් 04 දින දිව්රුම් දී නොවැම්බර් 05 දින ගැසට්ටුව මඟින්ය. ඒ වාසුදේව නානයක්කාර හා දිනේෂ් ගුණවර්ධනය. නොවැම්බර් 02 වැනිදා දිව්රුම් දුන් එජාපයෙන් බිලිබාගත් එස්.බී. නාවින්න හොර අමාත්‍යවරයෙකු වශයෙන් එම ගැසට්ටුවේ සිටී.

එම ගැසට්ටුවවේම ඇති අනෙක් උත්ප‍්‍රාසය වන්නේ හොර ආණ්ඩුවේ කැබිනට් ප‍්‍රකාශකයෙකු වශයෙන් නම් කළ ඒකාබද්ධ විපක්ෂයේ මහින්දවාදී කෙහෙළිය රඹුක්වැල්ලට රාජ්‍ය ඇමති ධූරයකින් සෑහීමට පත්වීමට සිදුවීමටය. ඒ අනුව කැබිනට් මණ්ඩලය නියෝජනය නොකළ කැබිනට් මාධ්‍ය ප‍්‍රකාශකයෙකු වශයෙන් කොහෙළිය රඹුක්වැල්ල ඉදිරියේ වාර්තාවක් ලියැවෙනු ඇත. එහි අනෙක් රාජ්‍ය ඇමතිවරයා ඒ.එච්.එම්. ෆවුසිය.

නියෝජ්‍ය ඇමතිධූර දෙකක් එම ගැසට්ටුවෙන් ලැබී ඇත්තේ දෙමළ ජාතික සන්ධානයෙන් බිලිබාගත් සත්‍යසිවම් වියාලේන්දිරන් හා එජාපයෙන් බිලිබාගත් අශෝක පි‍්‍රයන්තටය.

මහින්ද රාජපක්‍ෂගේ අයියා වූ එමල් රාජපක්‍ෂටත්, ඡන්දයෙන් පැරදී මෛතී‍්‍රපාල සිරිසේන විසින් ජාතික ලැයිස්තුවෙන් පත්කරගත් එස්.බී.දිසානායකටත් හොර අමාත්‍ය තනතුරු ලැබෙන්නේ නොවැම්බර් 7 දින ගැසට්ටුව මඟින්ය. ඒත් මහින්ද රාජපක්‍ෂ වෙනුවෙන් මරාගෙන මැරෙන ප‍්‍රකාශ සිදුකරන පවිත‍්‍රා වන්නිආරච්චිට එයින් ලැබෙන්නේ හොර රාජ්‍ය ආමත්‍යධුරයක් පමණය.

රුපියල් දෙදහස් පන්සීයකින් මාසයකට ජීවත්වීමේ හැකියාව ප‍්‍රගුණ කළ මහින්දවාදී බන්දුල ගුණවර්ධනට හා පැත්ත කොයිදැයි සෙවීම අසීරු සුසිල් පේ‍්‍රම් ජයන්තට හොර අමාත්‍යධුර ලැබෙන්නේ නොවැම්බර් 8 වැනිදා ගැසට් පත‍්‍රය මඟින්ය. එහි පසුව හොර ඇමතිකම් ලැබූ එස්.එම්.චන්ද්‍රසේන, සී.බී. රත්නායක ඇතුළු පස්දෙනෙකු රාජ්‍ය ඇමතිවරුය. මුලින් කී පරිදි මහින්දවාදී පිරිසෙන් කැබිනෙට්ටුව පුරවන්නේ අවසන් මොහොතේය.

ඒ අනුව ඔක්තෝබර් 29 දින සිට නොවැම්බර් 09 දින දක්වා තටම තටම හොර කැබිනට් මණ්ඩලය පත්කිරීම සඳහා ජනාධිපති මෛතී‍්‍රපාල සිරිසේන විසින් නිකුත් කර ඇති අතිවිශේෂ ගැසට් සංඛ්‍යාව 07 කි. ව්‍යවස්ථා විරෝධීව පාර්ලිමේක්තුව විසුරුවාලීමේ ගැසට් පත‍්‍රයක් නිකුත් කරන්නට නොසිදුවුණේ නම් නම් මේ අතිවිශේෂ ගැසට්පත‍්‍ර සංඛ්‍යාව මීට වඩා වැඩිවන බව සැකයක් නැත.

එසේ කියන්නට තවත් හේතුවක්ද ඇත. ඒ හොර අමාත්‍යවරුන්ට අයත් විෂයන් වෙන්කිරීමේ ගැසට් පත‍්‍රද එම කාලය තුළ කිහිපයක්ම නිකුත් කර තිබීමය. එම අතිවිශේෂ ගැසට් පත‍්‍රවල ඇති විශේෂත්වය වන්නේ හොර අමාත්‍යවරුන් පත්කරන පත්කරන වාරයක් පාසා ඔවුන් බොහෝ දෙනෙකුට අයත් විෂයන් වෙනස්වීමය. ජනාධිපති මෛතී‍්‍රපාල සිරිසේන ඔහු යටතේ ඇති ආරක්ෂක අමාත්‍යාංශයට හා මහවැලි සංවර්ධන හා පරිසර අමාත්‍යාංශයට මෙතෙක් එම අමාත්‍යාංශවලට අයත්ව නොතිබූ විෂයන් පවරාගෙන ඇත. වෙනත් සමහර අමාත්‍යාංශවලට නොගැළපෙන විෂයන් වෙන්කර ඇත.
විෂයන් පැවරීමේ සිය පළමු ගැසට් පත‍්‍රයෙන්ම ජනාධිපතිවරයා මෙතෙක් අග‍්‍රාමාත්‍යවරයා යටතේ තිබූ ජාතික මාධ්‍ය මධ්‍යස්ථානය ඔහු යටතට ගෙන තිබේ. නීතිය හා සාමය අමාත්‍යාංශය යටතේ තිබූ පොලිසිය හා අන්තරාකාර ඖෂධ පාලක ජාතික මණ්ඩලය ඔහු යටතට ගෙන තිබේ. මෙතෙක් මහවැලි සංවර්ධන හා පරිසර අමාත්‍යාංශයට නොතිබූ ශී‍්‍ර ලංකා ඉන්ජිනේරුවන්ගේ සභාව ඔහු යටතට ගෙන තිබේ.

ඉන් පසුව නොවැම්බර් 9 වැනිදා නිකුත් කළ ගැසට්ටුවකින් රජයේ මුද්‍රණ දෙපාර්තමේන්තුව ජනාධිපතිවරයා යටතේ ඇති ආරක්ෂක අමාත්‍යාංශය යටතට ගෙන තිබේ. ඔහුට හිතු හිතු ආකාරයට අතිවිශේෂ ගැසට් ඉදිරියේදී නිකුත් වන බවට එමඟින් අපට අනතුරු හඟවා ඇත.

නොවැම්බර් 09 වැනිදා රාතී‍්‍රයේ නිකුත් කළ අමාත්‍යාංශ විෂයන්ට අදාළ අවසන් ගැසට්ටුවෙන් ජනාධිපතිවරයා මෙතෙක් මහවැලි සංවර්ධන හා පරිසර අමාත්‍යාංශය යටතේ නොතිබූ වෙනත් අමාත්‍යාංශයක් වශයෙන් විශාල කාර්යභාරයක් පවරා තිබූ ඉඩම් අමාත්‍යාංශයට අයත් විෂයන්ද ඔහු යටතට ගෙන තිබේ. ඉඩම් කොමසාරිස් ජෙනරාල් දෙපාර්තමේන්තුව, ඉඩම් ප‍්‍රතිසංස්කරණ කොමිසන් සභාව, ඉඩම් නිරවුල් කිරීමේ දෙපාර්තමේන්තුව, මිනුම්පති දෙපාර්තමේන්තුව, මිනින්දෝරු හා සිතියම් ආයතනය, ඉඩම් මැනුම් සභාව, ඉඩම් පරිහරණ ප‍්‍රතිපත්ති, සැලසුම් දෙපාර්තමේන්තුව ආදීය එම ආයතනය.

තමා සතු විධායක බලය තමාම කප්පාදු කරගත් ලෝකයේ එකම රාජ්‍ය නායකයා වශයෙන් පුරසාරම් දෙඩු කුමන්ත‍්‍රණකාරී ජනාධිපති මෛතී‍්‍රපාල සිරිසේන මේමඟින් තවදුරටත් අපට පෙනුනම් කර ඇත්තේ ඔහු ඉදිරියට යන්නේ ඔහුට තව තවත් බලතල අත්පත් කරගනිමින් හා ඔහු සතු විධායක බලය බවය, ඒ මඟින් ඔහු සතු නැති බලතලත් පාවිච්චි කරමින් අන්ත ඒකාධිපති ගමනකට බවය.

ඒ නිසාම මේ ඒකාධිපති විකාරරූපී ස්වාභාවයට නොගැළපීම් පෙනෙන්නේ නැත. නිපුනතා සංවර්ධන හා වෘත්තීය පුහුණු අමාත්‍යාංශය යටතට ජනමාධ්‍ය අමාත්‍යාංශය යටතේ තිබූ ප‍්‍රවෘත්ති දෙපාර්තමේන්තුව, ශී‍්‍ර ලංකා පුවත්පත් මණ්ඩලය, ශී‍්‍ර ලංකා ගුවන් විදුලි සංස්ථාව, ශී‍්‍ර ලංකා රූපවාහීනි සංස්ථාව, ස්වාධීන රූපවාහිනී සේවය, ලේක්හවුස් ආයතනය, ලංකා පුවත් ආයතනය, සැලසිකේ ආයතනය, තොරතුරු දැනගැනීමේ කොමිෂන් සභාව, ආදීය ඇතුළත් කරන්නේ ඒ නිසාය. අදමේ හොර අමාත්‍ය මණ්ඩලයේ ජනමාධ්‍ය අමාත්‍ය ධුරයක් නැත.

මෙම විකාරරූපී ස්වභාවය තවදුරටත් උත්ප‍්‍රාසායක් බවට පත්වන්නේ බුද්ධශාසන හා ආගමික කටයුතු අමාත්‍යංශය යටතට ශී‍්‍ර ලංකා කාන්තා කාර්යංශය, කාන්තාවන් පිළිබඳ ජාතික කමිටුව, පරිවාස හා ළමා රක්ෂක සේවා දෙපාර්තමේන්තුව, ජාතික ළමාරක්ෂක අධිකාරිය, ළමා ලේකම් කාර්යාලය, ජාතික තරුණ සේවා සභාව, ජාතික යොවුන් සේනාංකය, ජාතික යෞවන තිළිණ අධිකාරිය හා සීමාසහිත ජාතික තරුණ සේවා සමුපකාර නායකත්ව සංවර්ධන ජාතික මධ්‍යස්ථානය ආදිය ඇතුළත් කිරීමෙන්ය.

ඉතිං මේ වූ කලී අතිවිශේෂ ගැසට්වලින් රාජ්‍ය පාලනය ගෙනයන උන්මත්තක විකාර රූපි ස්වරූපය නොවේද? මේ උත්ප‍්‍රාසයට අප සිනා සිය යුතුද නැතිනම් හැඬිය යුතුද?