ජනාධිපති මෛත‍්‍රීපාල සිරිසේනගේ සමනළ කතාව ඔස්සේ පසුගිය සතියේ දැවැන්ත සංවාදයක් ගොඩනැඟු‍ණේය. ජනාධිපතිවරයා සමනළයන්යැයි කීවේ සුළුතර ලිංගික ප‍්‍රජාවන්ටය.
ලෝක ඉතිහාසයේ ප‍්‍රසිද්ධ සමනළයෝ බොහෝ දෙනෙක් සිටින්නෝය. ඉතිහාසයේද සිටියෝය. පරිගණක විද්‍යාවේ පියා වන ඇලන් ටියුරින් සමකාමියෙකි. අතිශය ප‍්‍රසිද්ධ ගායන ශිල්පීන් වන ෆ්‍රෙඞී මර්කරි හා සර් එල්ටන් ජෝන් සමකාමීහුය. ඔස්කා වයිල්ඞ් සමකාමියෙකි. ආතර් කොනන් ඩොයිල් පවා සමකාමියෙක් බව කියයි.
ප‍්‍රසිද්ධියේ ප‍්‍රකාශ නොකරන නමුත් සමකාමීන්යැයි සමාජය විසින් පිළිගන්නා අය බොහෝදෙනෙක් සිටිති. ජනාධිපති මෛත‍්‍රීපාල සිරිසේන විසින් විහිළුවට ලක් කළේ සමාජය ඉදිරියේ ප‍්‍රසිද්ධියේ සමකාමීන් ලෙස පෙනී සිටින පුද්ගලයන් නොවේ. කෙසේ වෙතත් ප‍්‍රසිද්ධ කලාකරුවෙකු හෝ වෙනත් ප‍්‍රසිද්ධ අයෙකු සමාජය ඉදිරියේ විවෘතව තමන් සුළුතර ලිංගි ක ප‍්‍රජාවකට අයත් බව ප‍්‍රකාශ කිරීම විශාල අභියෝගයක් සහ විශාල ධෛර්යයක් අවැසි ක‍්‍රියාවක් ලෙස සලකයි. කෙසේ වෙතත් මේ වෙද්දී සමකාමීන් ඒ බව ප‍්‍රසිද්ධියේ ප‍්‍රකාශ කිරීම රැුල්ලක් බවට පත්ව තිබෙන අතර ලෝකය පුරා කලාකරුවෝ තමන්ගේ අනන්‍යතාව නිර්භයව ප‍්‍රකාශ කරමින් සිටිති. සමකාමී කලාකරුවන්ගේ ලැයිස්තුවට තව තවත් ප‍්‍රසිද්ධ පුද්ගලයන් එක්වෙද්දී සමකාමීන්ගේ අයිතිවාසිකම් පිළිබඳ සටන පුළුල් වෙයි.
ලංකාවේ මෙන්ම ඇමෙරිකාවේද දැන් සිටින්නේ තමන් කියන දේ පිළිබඳවවත් කිසිදු වගකීමක් නැති, කටට එන ඕනෑ දෙයක් කියන ජනාධිපතිවරයෙකි. මෛත‍්‍රීපාල සිරිසේන මෙන්ම ඩොනල්ඞ් ට‍්‍රම්ප්ද සමකාමීන්ට විරුද්ධ වීම පිළිබඳව ප‍්‍රකටය. ඩොනල්ඞ් ට‍්‍රම්ප් අකමැතිම රංගන ශිල්පිනියක් සිටියි. ඒ ක‍්‍රිස්ටීන් ස්ටුවර්ට් ය. ජනාධිපති වීමට පෙර සිට වසර කිහිපයක් තිස්සේ ඩොනල්ඞ් ට‍්‍රම්ප් වරින් වර 11 වතාවක් ක‍්‍රිස්ටීන් ගැන ට්විටර් පණිවුඩ තබා තිබුණි. ඇය 2017 පෙබරවාරි 05 ‘සැටඬේ නයිට් ලයිව්’ නම් අතිශය ජනප‍්‍රිය රූපවාහිනී වැඩසටහනට සහභාගී වුණාය. එදින ඇය ට‍්‍රම්ප් අල්ලාගෙන විහිළුවක් කරමින්, තමන් සමකාමී කාන්තාවක් බව ප‍්‍රසිද්ධියේ ප‍්‍රකාශ කළාය.
ජනාධිපති ඩොනල්ඞ් ට‍්‍රම්ප් නිතර හාස්‍යයට ලක් කළ වැඩසටහනක් වන සැටඬේ නයිට් ලයිව් වැඩසටහනේ ආරාධිත මෙහෙයවන්නියක ලෙස එක්වූ ඇය ජනාධිපති ඩොනල්ඞ් ට‍්‍රම්ප් තමන්ට අකැමති බව පවසා ඇය සම්බන්ධයෙන් ජනාධිපතිවරයාගේ අකැමැත්ත තවත් වැඩිවෙනු ඇතැයි කීවාය. එයට හේතුව ලෙස ඇය කීවේ ‘මම සැටඬේ නයිට් ලයිව් ඉදිරිපත් කරනවා. අනෙක මම ගොඩක් සමකාමීයි.’ කියාය. ඒ ප‍්‍රකාශයෙන් ඇය ප‍්‍රසිද්ධියේ තමන් සමකාමී බව ප‍්‍රකාශ කළ ප‍්‍රකට තරු අතරට එක්වූවාය. ඒ වෙද්දීත් ඇය සමකාමී සම්බන්ධයක් ආරම්භ කරමින් සිටි බව මාධ්‍යවලින් වාර්තා කර තිබුණි.
ක‍්‍රිස්ටීන් ස්ටුවර්ට් තමන්ගේ ජීවිතය ගැන අවදානම් සහගත රහසක් ප‍්‍රසිද්ධ කරද්දී ඇගේ වයස අවුරුදු 27ක්වත් නොවීය. ලොව ප‍්‍රවීණ තරු පවා ප‍්‍රසිද්ධියේ තමන් ලිංගික සුළුතරයට අයත් බව නොකියන්නේ අනන්‍යතාව හෙළිකළ පසුව තමන්ගේ අනාගතයට බරපතළ හානි සිදුවීමේ ඉඩක් ඇති නිසාය. එහෙත් ක‍්‍රිස්ටීන් ස්ටුවර්ට් නිර්භීත පියවක් ගනිමින් තමන්ගේ අනන්‍යතාව හෙළි කළාය.
ක‍්‍රිස්ටීන් තරුණ වයසේදීම ජනප‍්‍රියත්වය ලැබූ තරුවකි. ඇගේ පේ‍්‍රම කතා සියල්ල පැපරාසින්ගේ අවධානයට ලක්විය. ට්විලයිට් සාගා චිත‍්‍රපටි මාලාවෙන් පළමුව ලොව පුරා තරුණයන්ගේ ආදරය දිනාගනිද්දී ඇය පාසලෙන් පිටවී තිබුණේද නැත. ඇය මුලින්ම රංගනයට එක්වුණේ වයස අවුරුදු නවයක් පමණ තිබියදීය. ඒ 1999 දීය.
ක‍්‍රිස්ටීන්ගේ මව සහ පියා යන දෙපළම කලා ලෝකයට අයත් පුද්ගලයන්ය. ජෝන් ස්ටුවර්ට් නම් ක‍්‍රිස්ටීන්ගේ පියා ෆොක්ස් නාලිකාවේ හා කොමඩි සෙන්ට‍්‍රල් නාළිකාවේ සේවය කර ඇති වේදිකා පරිපාලකවරයෙකි. ඇගේ මව වන ජුල්ස් ස්ටුවර්ට් තිර පිටපත් රචිකාවියකි. මව විසින් චිත‍්‍රපටියක්ද අධ්‍යක්ෂණය කර ඇත.
ක‍්‍රිස්ටීන් රංගනයට යොමුවීමේ ආශාවකින් සිටි දරුවෙක් නොවූ බව ඇය කියන්නීය.
‘මිනිස්සුන්ගේ අවධානයට යොමුවෙන්න මට ආසාවක් තිබුණේ නැහැ. මට ඕනෑ වුණේ ලියන්න. මම ගොඩක් කියෙව්වා.’ කෙසේ වුව ළමා කාලයේදීම පාසැලේ නත්තල් නාට්‍යයක කළ රංගනයක් දැකීමෙන් පසුව ඇයව ‘ද තර්ටීන්ත් ඉයර්’ නම් ඩිස්නි නාලිකාවේ චිත‍්‍රපටියකට රඟපෑමට තෝරාගෙන තිබුණි. ඉන්පසුව චිත‍්‍රපටි කිහිපයකම රඟපෑ ඇයට වයස අවුරුදු 12 ක්ව තිබියදී ‘පැනික් රූම්’ නම් 2002 දී තිරගත වූ චිත‍්‍රපටියෙහි රඟපෑම නිසා ඉහළ ජනප‍්‍රියත්වයක් ලැබීය. සම්මානද ලබන්නට එම චරිතයෙන් ඇයට හැකි විය. ඉන්පසුව 2007 තිරගත වූ ‘ට්විලයිට්’ චිත‍්‍රපටියෙන් ඇය ජනප‍්‍රියත්වයට පත්විය. ඇයට ඒවෙද්දී වයස අවුරුදු 17කි.
ස්ටුවර්ට්ගේ ලිංගික අනන්‍යතාව නිශ්චිතව කිවහොත් එය ද්විලිංගික අනන්‍යතාව ලෙස හැඳින්විය හැකිය. එනම්, ඇය පිරිමි සහ ගැහැනු දෙපාර්ශ්වයම පිළිබඳ ලිංගික ආකර්ෂණයක් ඇති කාන්තාවකි. ඇය මුලින්ම පිරිමි පෙම්වතුන් කිහිපදෙනෙක්වම ආශ‍්‍රය කළාය. මයිකල් ආන්ගාරනෝ නම් රංගන ශිල්පියා සමඟ ප‍්‍රථමයෙන් සම්බන්ධයක් පැවැත්වීය. ඉන්පසුව ට්විලයිට් චිත‍්‍රපටි මාලාවේදී ඇගේ පෙම්වතාට රඟපෑ රොබර්ට් පැටින්සන් සමග ආදර සම්බන්ධයක් පැවැත්වීය. ඉන්පසුව රුපට් සැන්ඩර්ස් නම් අධ්‍යක්ෂවරයා සමග සම්බන්ධයක් පැවැත්වීය.
ඉන්පසුව ඇය පෙම්වතියන් ආශ‍්‍රය කරන්නට පටන්ගත් බව මාධ්‍ය විසින් වාර්තා කරන්නට විය. එහෙත් ඇය ඒ ගැන ප‍්‍රසිද්ධියේ කතා නොකළාය. ඇලීසියා කාර්ගයිල් නම් තරුණියක්, ප‍්‍රංශ ගායිකාවක් වන සොකො හා ඇනී ක්ලාර්ක් සමඟ ඇය සම්බන්ධතා පැවැත්වූ බව මාධ්‍ය වාර්තා කර තිබුණි. ඇය තමන්ගේ ලිංගික අනන්‍යතාව ප‍්‍රසිද්ධියේ හෙළි කරද්දී ඇගේ පෙම්වතිය වුණේ ස්ටෙලා මැක්ස්වෙල් නම් නිරූපිකාවය.
‘මම සම්බන්ධතා පවත්වපු සියලූ‍දෙනා සමග මම තදින් බැඳිලා හිටියෙ. පිරිමි අය සමග මම බොරුවක් කළේ නැහැ. මම හැමවෙලාවෙම බොරු කිරීමට අකැමති වුණා. මම පිරිමි අය සමග කරපු ආදරයේ හැම මොහොතක්්ම මම විශ්වාස කළා. මට අභ්‍යන්තර අරගලයක් තිබුණෙ නැහැ.’ ඇය තමන් පිරිමි පෙම්වතුන් සමග පැවැත්වූ සම්බන්ධතා පිළිබඳව එසේ කියන්නීය.
තමන් නැවතත් පිරිමි පෙම්වතුන් සමඟ පේ‍්‍රමයක් ආරම්භ කිරීමේ ඉඩක් ඇති බවද ඇය කියන්නීය. ‘වෙනස් අය ඉන්නවානෙ. අනිවාර්යයෙන්ම මම පිරිමි පෙම්වතෙක්ව මුණගැසේවි.’
ලොව පුරා සමකාමී ප‍්‍රජාවට ක‍්‍රිස්ටීන් ස්ටුවර්ට්ද තවත් එක් පරමාදර්ශයකි. එහෙත් ප‍්‍රසිද්ධියේ ලිංගි ක අනන්‍යතාව හෙළිකිරීම පොදු පේ‍්‍රක්ෂක ප‍්‍රජාව අතරින් ඇයට සිටින රසිකයන් ප‍්‍රමාණය දැවැන්ත ලෙස අඩු කරගැනීමක්ව තිබුණි. විශේෂයෙන්ම ට්විලයිට් චිත‍්‍රපටි මාලාව නිසා ඇයට ආදරය කළ තරුණයන් ඇගේ ලිංගික අනන්‍යතාව පිළිබඳව වධ වෙන්නට පටන්ගෙන තිබුණි. කෙසේ වෙතත් ඇය ගෙන තිබුණු නිර්භීත තීරණය අනාගතය වෙනුවෙන් දැවැන්ත පියවරකි.

අනුරංග ජයසිංහ