කොවිඩ්-19 සඳහා ප්‍රතිකාර ලබාදෙන රෝහල්වල සේවය කරන හෙද නිලධාරීන්ට ලබාදුන් ප්‍රවාහන පහසුකම් මැයි 12 වැනිදා සිට නවතා දමා ඔවුන්ට පොදු ප්‍රවාහන පහසුකම් පාවිච්චියට ගන්නා ලෙස කර ඇති දැනුම්දීම නිසා රෝගය පැතිරීමේ අවදානමක් මතුවී ඇතැයි රජයේ හෙද නිලධාරීන්ගේ සංගමයේ සභාපති සමන් රත්නප්‍රිය පැවසීය.

පසුගිය සතියේ සෞඛ්‍ය අමාත්‍යංශයේ ලේකම් මේජර් ජෙනරාල් සංජීව මුණසිංහ සමඟ කළ සාකච්ඡාවකදී එම පහසුකම් නැවත ලබාදෙන බවට එකඟ වුණත්, එම එකඟතාව ක්‍රියාත්මක කර නොමැති බව ඔහු කීය.

එම හෙද නිලධාරීන් පීසීආර් පරීක්ෂණයට ලක් කර නොමැති නිසාත් නිතිපතා පරීක්ෂණ කිරීමේ ක්‍රමයක් නොමැති නිසාත් රෝගීන් සමඟ ළඟින්ම සම්බන්ධතා පවත්වන නිසාත් ඔවුන්ට රෝගය වැළඳුණහොත් ඒ බව නිශ්චිතව කිව නොහැකි බව ඔහු පැවසීය.

පේරාදෙණිය සහ සිරිමාවෝ බණ්ඩාරනායක රෝහලේ  සේවය නියුතු  හෙද නිලධාරීන් ඇතුළු සෞඛ්‍ය කාර්ය මණ්ඩලයේ නිලධාරීන් 40 ක් පමණ කිලෝමීටරයක් පමණ දුරක් පයින් ගමන්  කර ඇති බවත්  රත්නප්‍රිය මහතා පැවසීය.