හැංගි හැංගි වෙස් බැන්දත් නටන්න වෙන්නේ එළිපිට යැයි අපේ කියමනක් තිබේ. එම කියමන දැන් ජනාධිපති ගෝඨාභය රාජපක්ෂගේ අනීතික ක්‍රියාවක් සම්බන්ධයෙන්ද ගැළපී තිබේ.

ඒ ජනාධිපතිවරයා ජුලි මස 09 දින අංක 2183/41 යටතේ 1968 අංක 32 දරන පුද්ගලයන් ලියාපදිංචි කිරීමේ පනත ප්‍රකාරව නිකුත් කර ඇති අතිවිශේෂ ගැසට් පත්‍රය නිසාය.

එම ගැසට් පත්‍රයෙන් ජනාධිපතිවරයා කර ඇත්තේ පුද්ගලයන් ලියාපදිංචි කිරීමේ පනත යටතේ මීට පෙර එම විෂය බාරව සිටි අමාත්‍යවරයෙකු වූ එස්.බී. නාවින්න නිකුත් කර තිබූ නියමයක් තවදුරටත් 2020 දෙසැම්බර් 31 දක්වා දිගු කිරීමය. අවශ්‍ය යටිතල පහසුකම්, වැඩපිළිවෙළ හා තාක්ෂණික ක්‍රමවේද සකස් කරන තුරු පුද්ගලයන් ලියාපදිංචි කිරීමේ පනතට 2016 අංක 08 දරන සංශෝධිත පනත මගින් ගෙනෙන ලද සංශෝධන කිහිපයක් ක්‍රියාත්මක වීමේ දිනය විෂයභාර අමාත්‍යවරුන් කල් දමා ඇති අතර, ජනාධිපතිවරයා ඉහත කී අතිවිශේෂ ගැසට් පත්‍රයෙන්ද කර ඇත්තේ එම සංශෝධන ක්‍රියාත්මක වීමේ දිනය දිගු කිරීමය.

මෙහිදී ජනාධිපතිවරයා එම සංශෝධන ක්‍රියාත්මක කළ යුතු කාලය දිගු කරන්නේ, ජනාධිපතිවරයා වශයෙන් 2016 අංක 08 දරන පුද්ගලයන් ලියාපදිංචි කිරීමේ (සංශෝධන) පනතේ 34 වන වගන්තිය යටතේ ඔහුට පැවරී ඇති බලතල ප්‍රකාරව යැයි සඳහන් කරමින්ය.

පුද්ගලයන් ලියාපදිංචි කිරීමේ පනත හා සංශෝධිත පනත කියවා බැලූ විට පැහැදිලි වන කාරණය වන්නේ එහි කිසිදු තැනක විෂයභාර අමාත්‍යවරයාට මිස ජනාධිපතිවරයාට රෙගුලාසි පැනවීමේ හෝ නියමයන් කිරීමේ බලයක් ලබා දී නැති බවය.

මේ වූ කලි ජනාධිපතිවරයා මීට පෙර කාර්ය සාධක බලකා පිහිටුවීමේදී එම අතිවිශේෂ ගැසට් පත්‍රවල සඳහන් කළ ආකාරයේ ආණ්ඩුක්‍රම ව්‍යවස්ථාවේ 33 වැනි ව්‍යවස්ථාවෙන් ඔහුට පැවරී ඇති බලතල ප්‍රකාරව එම කාර්යසාධක බලකා පිහිටුවන බවට කරන ලද බොරුවට සමාන බොරුවක්ම අතිවිශේෂ ගැසට් පත්‍රයක් මගින් ප්‍රකාශයට පත් කිරීමක්ය.

ජනාධිපති ගෝඨාභය රාජපක්ෂ ධුරයට පත්වීමෙන් පසු අමාත්‍යාංශ 29ක් ස්ථාපනය කරනු ලැබූ අතර ඒ සඳහා අමාත්‍යවරුන් 16 දෙනෙකු පත් කළේය. එම පිරිසෙන් ආරුමුගන් තොණ්ඩමාන් අමාත්‍යවරයා මියයෑම නිසා එම බලතල අග්‍රාමාත්‍ය මහින්ද රාජපක්ෂට පැවරීම තුළ දැන් සිටින අමාත්‍ය මණ්ඩල සාමාජිකයන් සංඛ්‍යාව 15කි. එම අමාත්‍යාංශ 29 අතරින් ප්‍රබලම හා රටේ ප්‍රමුඛම අමාත්‍යාංශයක් වූයේ ආරක්ෂක අමාත්‍යාංශයය. ආරක්ෂක අමාත්‍යාංශය යටතට රටේ ප්‍රබලම දෙපාර්තමේන්තු හා ආයතන 37ක් අයත් වූ අතර ඊට පෙර ආරක්ෂක අමාත්‍යාංශය යටතේ නොතිබුණු ආයතනද ඊට ඈඳාගනු ලැබීය.

ඒ අතරින් ප්‍රධාන එකක් වූයේ පුද්ගලයන් ලියාපදිංචි කිරීමේ දෙපාර්තමේන්තුවය. එම දෙපාර්තමේන්තුවද ඇතුළත් මුදල් අමාත්‍යාංශයට පමණක් දෙවැනි වූ විශාලතම ආයතන සංඛ්‍යාවක් තිබූ ආරක්ෂක අමාත්‍යාංශය පවත්වාගෙන යෑමට අමාත්‍යාංශ ගොඩනැගිල්ලක්ද විශ්‍රාමික මේජර් ජෙනරාල් කමල් ගුණරත්න නම් වූ අමාත්‍යාංශ ලේකම්වරයෙකු ඇතුළු අතිරේක ලේකම්වරුන් හා අනෙකුත් නිලධාරීන්ගෙන් සමන්විත කාර්ය මණ්ඩලයක්ද තිබුණද ඊට අමාත්‍යවරයෙකු සිටියේ නැත. සැබෑවටම අමාත්‍යවරයෙකු පත් කළේ නැත.

ඒ සඳහා හේතු වූයේ ජනාධිපති ගෝඨාභය රාජපක්ෂ නිල නොවන ආකාරයට එම අමාත්‍යාංශය ඔහු යටතේ තබා ගැනීමය. වත්මන් ආණ්ඩුක්‍රම ව්‍යවස්ථාව අනුව ජනාධිපතිවරයා රටේ නායකයා, සේනාධිනායකයා හා කැබිනට් මණ්ඩල ප්‍රධානියා වූවාට අමාත්‍යධුරයක් ඔහුට දැරිය නොහැකිය. එම බාධකය ජය ගැනීම සඳහා ජනාධිපතිවරයා අනුගමනය කළ හොර පාර හෙවත් නීති විරෝධී ක්‍රියාව වුයේ ආරක්ෂක අමාත්‍යාංශ විෂය සඳහා අමාත්‍යවරයෙකු පත් නොකිරීමය. ආරක්ෂක අමාත්‍යාංශයේ නිල නොවන අමාත්‍යවරයා ලෙස ඔහු කටයුතු කිරීමය. පරිපාලන නිලධාරියෙකු නොවන ඔහුට හිතවත් විශ්‍රාමික මේජර් ජෙනරාල්වරයෙකු අමාත්‍යාංශ ලේකම්වරයා ලෙස ඔහු පත්කරගත්තේ ඒ නිසාය.

එහෙත් එම නීති විරෝධී ක්‍රියාව තවදුරටත් හැංගි හැංගී කිරිම අවසන් කරන බාධකයක් ඔහු හමුවේ ප්‍රාදුර්භූත වී ඇත. ඒ ඉහත සඳහන් කළ පුද්ගලයන් ලියාපදිංචි කිරීමේ පනතේ සංශෝධනය යටතේ ක්‍රියාත්මක කළ යුතු කාර්යයන් ආරම්භ වීමේ දිනය දීර්ඝ කිරීමය.

ආරක්ෂක විෂය භාර අමාත්‍යවරයෙකු නැති කලඑම කටයුත්ත කරන්නට වන්නේ ආරක්ෂක විෂයභාර ‘හොර ඇමති’ ජනාධිපතිවරයාටය. එම කටයුත්තට ‘විෂයභාර අමාත්‍ය’ යන යෙදුම නිල වශයෙන් යෙදීමේ හැකියාවක් ඔහුට නැති නිසා ඔහු කරන්නේ බොරුවක් වසා ගන්නට තවත් බොරුවක් ගොතන ආකාරයට බොරුවක් ගෙතීමය. ඒ ‘පුද්ගලයන් ලියාපදිංචි කිරීමේ සංශෝධිත පනත යටතේ ජනාධිපතිවරයාට පැවරී ඇති බලතල ප්‍රකාරව’ යැයි සඳහන් කරමින් එම පනත යටතේ සංශෝධන කිරීමේ කාලය දිගු කිරීමේ නියමයන් කිරීමය.

ආරක්ෂක අමාත්‍යවරයා ලෙස හැංගි හැංගි වෙස් බැඳි ජනාධිපතිවරයාට එළිපිට නටන්න සිදුවී ඇත්තේ එම ගැසට් නිවේදනය නිසාය.

යුක්තිගරුක, නීතිගරුක රටක් හදන්නට පේවී සිටි රාජපක්ෂවාදී වියතුන් මේ මැතිවරණ සමයේදී මෙම හැංගි හැංගි වෙස් බැඳීම ගැන හා එළිපිට නැටීම ගැන යමක් කිවහොත් හොඳය. විපක්ෂයද මේ එළිපිට නැටීම ගැන කුමක් හෝ කළහොත් හොඳය. මන්ද ජනාධිපතිවරයාගේ මෙම ගැසට් නිවේදනය නීති විරෝධී එකක් වන බැවිනි.■