කොවිඞ් 19  වසංගතය හමුවේ ලංකාව පුරා සේවය කරන සෞඛ්‍ය ක්ෂේත‍්‍රයේ නිලධාරීන්ට ප‍්‍රමාණවත් අන්දමෙන් සෞඛ්‍යාරක්ෂිත පීපීඊ ඇඳුම් කට්ටල සහ මුහුණු ආවරණ (ෆේස් මාස්ක්) නොමැති බවත් එම නිලධාරීන් අනාරක්ෂිත තත්වයක් මුහුණ දී ඇති බවත් වාර්තා වේ.

අප සමඟ අදහස් දැක්වූ හෙද නිලධාරීන් කිහිපදෙනෙකු කීවේ බොහෝ නිලධාරීන් තමන් අතැති මුදල්වලින් කුඩ මසන රෙදි මිලදී ගෙන විකල්ප ඇඳුම් කට්ටල ඇඳ සේවය කරන බවය.

රජයේ හෙද නිලධාරීන්ගේ සංගමයේ සභාපති සමන් රත්නප‍්‍රිය ඒ බව තහවුරු කළේය. ඇතැම් නිලධාරීන් පරිත්‍යාගශීලීන් ලබාදුන් ඇඳුම් කට්ටල භාවිත කරන බවත් තම සංගමයේ මුදල්වලින්ද හැකි තරම් සෞඛ්‍ය නිලධාරීන්ට අවශ්‍ය ඇඳුම් කට්ටල මසා රෝහල් වෙත ලබා දීමට කටයුතු කරන බවත් ඔහු පැවසීය.

මේ බව කොළඹ ජාතික රෝහලේ බාහිර රෝගී අංශයේ සහ හදිසි අනතුරු ඒකකයේ සෞඛ්‍ය නිලධාරීහු කිහිපදෙනෙක්ද, වෛද්‍යවරු කිහිප දෙනෙක්ද තහවුරු කළේය.