ඉදිරියේදී රට තුළ ඇතිවිය හැකි බලශක්ති අර්බුදයට ස්ථිරසාර විසඳුම සූර්ය බලශක්තිය ප‍්‍රවර්ධනය කිරීම බව විදුලිබල බලශක්ති ඇමති, බලශක්ති හා ව්‍යාපාර සංවර්ධන අමාත්‍ය රවී කරුණානායක ජුනි මස අගදී ප‍්‍රකාශකර තිබුණි.


ඒ වන විට ජාතික විදුලිබල පද්ධතියට පුනර්ජනනීය බලශක්තිය මෙගාවොට් 628ක් එකතුකර ඇති තිබෙන බවත් ඕනෑම ආයතනයක් එකක 2000ට වැඩියෙන් විදුලිය පාවිච්චි කරන්නේ නම් එයින් 25ක් සදහා පුනර්ජනනීය බලශක්තිය එකතුකළ යුතු බවත් රවී කරුණානායක අමාත්‍යවරයා එහිදී පවසා තිබුණි.


ඔහු එම අදහස් ප‍්‍රකාශකර තිබුණේ සූර්යබල ව්‍යාපෘති සහ පුනර්ජනනීය විදුලිබල ව්‍යාපෘති ඇතිවීම අවහිර කිරීම සඳහා හා වැඩි මිල පරිසර හිතකාමී නොවන තාප විදුලි ව්‍යාපෘති සඳහා ඔහු කි‍්‍රයා කරන බවට එම දිනවල පැවැති මාධ්‍ය වාර්තාකරණයන්ට ප‍්‍රතිචාර දක්වමින්ය.
දැනට ලංකා විදුලි බල මණ්ඩලය සූර්ය බලශක්තිය වෙනුවෙන් අනුගමනය කරන ක‍්‍රම තුනක් පවතී. ඒ නෙට් මීටරින්, නෙට් එකවුන්ටින් හා නෙට් ප්ලස් යන ක‍්‍රමවේද තුනය. මෙහිදී සිදුවන්නේ සූර්ය බලශක්ති පැනලය ගෘහස්ථව හෝ ගෘහස්ථ නොවන ස්ථානවල සවිකර ගැනීමේ ක‍්‍රමවේදයන්ය.


එහිදී නෙට් මීටරින් ක‍්‍රමවේදය යටතේ යම් විදුලිපාරිභෝගිකයෙකු සම්බන්ධ වුවහොත් ඔහු සවිකරගන්නා විදුලි පැනලය මගින් නිෂ්පානය කරනු ලබන විදුලි ඒකක ගණන එම ස්ථානයේ පාරිභෝජනයට වඩා වැඩිනම් එම වැඩිපුර නිපදවන විදුලි ඒකක ගණන වසර දහයක කාලයක් දක්වා භාවිත කිරීමේ හැකියාව එම පාරිභෝගිකයාට ලැබේ.


නෙට් එකවුන්ටින් ක‍්‍රමවේදයේදී සිදුවන්නේ සූර්ය පැනලය සවිකරණ විදුලි පාරිභෝගිකයා නිෂ්පාදනය කරනු ලබන විදුලි ඒකක ප‍්‍රමාණය එම ස්ථානයේ පරිභෝජනයට වඩා වැඩිනම්, එසේ ජාතික විදුලි පද්ධතියට එකතුවන අතිරික්ත විදුලි ඒකකයකට රුපියල් 22ක මුදලක් ගෙවන නමුදු, එම ගෙවීම ලැබෙන්නේ වසර 7ක කාලයකට පමණක්ය. ඉන්පසු වසර 8 සිට වසර 25 දක්වා එවැනි අතිරික්තයකට ලැබෙන්නේ රුපියල් 15.50ක් පමණය


නෙට් ප්ලස් ක‍්‍රමයේදී සිදුවන්නේ සූර්ය පැනල මගින් නිපදවන විදුලිය සම්පූර්ණ වශයෙන්ම එකකයක් රුපියල් 22 බැගින් ලංකා විදුලිබල මණ්ඩලය මිලදී ගැනීමය. එම මිල පළමු අවුරුදු 7 සඳහාය. අවුරුදු 8 සිට අවුරුදු 25 දක්වා ඉතිරි කාලයට ගෙවීම වන්නේ එකකයට රුපියල් 15.50ක මුදලකි. මෙහිදී විදුලි පාරිභෝගිකයා ඔහු විසින් පාවිච්චි කෙරෙන විදුලි ඒකක ගණන වෙනුවෙන් සාමාන්‍ය විදුලි පාරිභොගිකයන් මෙන් මාසික බිල්පත් ගෙවිය යුතුය.
විදුලිබල අමාත්‍යාංශයේ මාධ්‍ය ප‍්‍රකාශක ලෙස කටයුතු කරන එම අමාත්‍යංශයේ අතිරේක ලේකම් සුලක්ෂණ ජයවර්ධනට අනුව ඒ ආකාරයේ සූර්ය පැනල භාවිත කරන විදුලි පාරිභෝගිකයන් 21,000ක් පමණ රට පුරා සිටියි. ඉන් 14000ක් පමණ නෙට් මීටරින් ක‍්‍රමයටද 6000ක් පමණ නෙට් එකවුන්ටින් ක‍්‍රමයටද ඉතිරි පිරිස නෙට් ප්ලස් ක‍්‍රමයටද ලංකා විදුලිබල මණ්ඩලය හා සම්බන්ධ වී සිටිති.


අප පුවත්පත මීට සති කිහිපයකට පෙර වාර්තාකරනු ලැබූයේ නෙට් එකවුන්ටින් ක‍්‍රමවේදයට ලංකා විදුලිබල මණ්ඩලය සමග ගිවිසුම් අත්සන් කර සූර්ය පැනල සවිකරගත් පාරිභෝගිකයන් පිරිසකට මාසිකව ඔවුන් ගණනය කර ජාතික විදුලි බල පත්ධතියට ලබාදුන් අතිරේක විදුලි ඒකක වෙනුවෙන් මුදල් ගෙවා නැති බවයි. සාමාන්‍යයෙන් ලංකා විදුලිබල මණ්ඩලය සමග සම්බන්ධ වී මාස තුනක පමණ කාලයකින් අතිරේක විදුලිය වෙනුවෙන් මුදල් ලැබීම් සිදුවෙතත් ඒ පිරිසට මාස 6ක කාලයක් ඉකුත්වී තිබියදීත් මුදල් ලැබී තිබුණේ නැත.


ඔවුන් ඒ පිළිබඳ දැනගෙන තිබුණේ බැංකුවලින් ණය වාරික නොගෙවීම් පිළිබඳ කරන ලද විමසීම්වලින් පසුය. සුර්ය පැනල භාවිත කරන බොහෝ පිරිස් එම සූර්ය පැනල මිලදීගෙන තිබුණේ බැංකු ණය මගින්ය. සූර්ය බල සංග‍්‍රාමය යටතේ බැංකුවලින් අඩු පොලී ණය ඔවුන්ට ලබා දී ඇත. ඒ ආණ්ඩුවේ උපදෙස් පරිදිය. ඔවුන් සිතා ඇත්තේ ලංකා විදුලිබල මණ්ඩලය සමග ඇති ගිවිසුම් ප‍්‍රකාරව ගණනය කරන අතිරික්ත විදුලිය වෙනුවෙන් වූ මුදල් ඔවුන්ගේ ගිණුම්වලට බැරවන බවයි.

කෙසේ වෙතත් විදුලිබල අමාත්‍යාංශයේ අතිරේක ලේකම් සුලක්ෂණ ජයවර්ධනට අනුව නෙට් අකවුන්ටින් පාරිභෝගිකයන්ට මුදල් නොගෙවීමක් පිළිබඳ ඔවුන්ට පැමිණිලි ලැබී නැත. එම මුදල් අත්හිටුවීමකින් තොරව ගෙවන බව ඔහු කියයි.


එමෙන්ම නෙට් මීටරින්, නෙට් එකවුන්ටින් හෝ නෙට් ප්ලස් සම්බන්ධව හා අලූතින් ලබාදීම නැවත කෙරෙන බවද ඔහු පවසයි. එම ක‍්‍රමවේද නැවැත්වීමට තීරණයක් ගෙන නැති බවද ඔහු පවසයි.


එහෙත් සූර්ය බලශක්ති ආයෝජන සංගමයේ ලක්මාල් ප‍්‍රනාන්දු මහතා පවසන්නේ සූර්ය පැනල භාවිතාවෙන් ජාතික විදුලිබල පද්ධතියට විදුලිය ගණනය කරදෙන පාරභෝගිකයන්ට විදුලි ඒකකයක් සඳහා දැනට ලබාදෙන මුදල අඩුකිරීමට ලංකා විදුලිබල මණ්ඩලයේ විදුලි ගාස්තු පිළිබඳ කමිටුව යෝජනා සකස්කර ඇති බවයි.


ඒ පිළිබඳ සාකච්ඡුාවලට ඔහු සහභාගි වූ බවද එහිදී එම කරුණු අනාවරණය වූ බවද ඔහු පවසයි. ඒ අනුව දහවල් කාලයේ ගණනය කරනු ලබන විදුලිය අඩු මිලකට ලංකා විදුලිබල මණ්ඩලය මිලදී ගැනීමටත් රාත‍්‍රි කාලයේ පාවිච්චි කරන විදුලිය වෙනුවෙන් වැඩි මිලක් එම පාරිභෝගිකයන්ගෙන්ම අය කරගැනීමටත් ලංකා විදුලිබල මණ්ඩලය සැලසුම් කර ඇත. එසේම සූර්ය පැනලවල නිෂ්පාදනය කරනු ලබන විදුලි ධාරිතාව අනුව (කිලෝ වොට් එකක් සඳහා* බදදක් අය කිරීමටද විදුලිබල මණ්ඩලය තීරණය කර ඇත. ලක්මාල් ප‍්‍රනාන්දු මහතා පවසන්නේ එම හිරු බද්දට තමන් විරුද්ධ වූ බවය. ඔහු වැඩිදුරටත් අවධාරණය කරන්නේ විදුලි ගාස්තු පිළිබද කමිටුව සකස්කර ඇති එම යෝජනා ඉදිරියට කි‍්‍රයාත්මක වුවහොත් සුර්ය බලශක්තිය සඳහා කිසිදු අයකු උනන්දුවක් නොදක්වනු ඇතිබවත්ය.


සූර්ය බල සංග‍්‍රාමයට හා පුනර්ජනනීය බලශක්ති ප‍්‍රභව ගැන විෂයභාර අමාත්‍ය රවී කරුණානායකට ඒ සදහා වුවමනාවක් ඇත්නම් ඔහු ඉහත කරණු ගැන සොය බැලිය යුතුය. ඒ බොහෝ සූර්ය පැනල පාරිභෝගිකයන් ආණ්ඩුවේ ප‍්‍රචාරණය මත ආණ්ඩුව විසින්ම හඳුන්වා දුන් සහන ණය ගෙන ඒ සඳහා යොමුවී ඇති නිසාය.