‘‘සල්ලි කොයි බැංකුවෙද තැන්පත් කරන්නේ’’

‘‘ඒක නම් මම දන්නේ නැහැ. ඒක අහන්න  ඕනෑ රක්ෂණ සංස්ථාවෙන්’’

ඉහත ප‍්‍රශ්නය අසනු ලබන්නේ සිරස මාධ්‍ය ජාලයේ වාර්තාකරුවෙකු විසිනි.  පිළිතුර ලබාදෙන්නේ අධ්‍යාපන අමාත්‍ය අකිල විරාජ් කාරියවසම්ය. ඒ පසුගිය අගෝස්තු 01 වැනිදා කොළඹ විවේකානන්ද විද්‍යාලයේ පැවති උත්සවයකින් අනතුරුවය. එම දිනයට පෙර එනම් ජූලි 31 වැනිදා සිදුවන්නේ  අධ්‍යාපන අමාත්‍යාංශයත් ශී‍්‍ර ලංකා රක්ෂණ සංස්ථාවත් අතර සිදුවූ සුරක්ෂා රක්ෂණයේ ප‍්‍රතිඵලයක් වශයෙන් කරළියට ගෙනෙනු ලැබුවා යැයි කියන අරමුදලකට අදාළ ගිවිසුම් අත්සන් කිරීමය.

එම අරමුදල ඇතිකිරීමේ ගිවිසුම් අත්සන් කිරීම එසේ සිදුවුවද පාසල් සිසුන් සඳහා ඇතිකර ඇති සුරක්ෂා රක්ෂණයෙන් නිල වශයෙන් ලැබෙන කොමිස් මුදලින් අරමුදලක් ඇති කරන බව අධ්‍යාපන අමාත්‍ය අකිල විරාජ් කාරියවසම් ප‍්‍රකාශ කර තිබුණේ එම රක්ෂණය නිල වශයෙන්  ආරම්භ කර තිබූ පසුගිය 2017 වර්ෂයේ ඔක්තෝබර් 02 වැනිදාය. ඒ බව අධ්‍යාපන අමාත්‍යාංශ වෙබ් අඩවියද වර්ණනා සහිතව පළ කර තිබුණි.

එම රක්ෂණ ගණුදෙනුවේ 90%ක ප‍්‍රමාණයක් ප‍්‍රතිරක්ෂණය කිරීම සැකසහිත ගනුදෙනුවක් බව අපගේ නිරීක්‍ෂණය වූ අතර ඒ පිළිබඳව  ‘ආරක්ෂාව පිටරටට දුන් මිලියන 2250ක සුරක්ෂා රක්ෂණය යනුවෙන්’ ජූලි 22 දින අප පුවත්පතේ විශේෂ හෙළිදරව්වක් පළකරනු ලැබිණ. එහි දිගුවක් ලෙස ඊට පසු සතියේදී අධ්‍යාපන අමාත්‍ය අකිල විරාජ් කාරියවසම් අපට දුරකථනයට සම්බන්ධකර ගැනීමට හැකිවූ අතර එහිදී අප විමසා සිටියේ රක්ෂණය වෙනුවෙන් ලැබෙනවායැයි කියූ රුපියල් මිලියන 100ක කොමිස් මුදල ලැබුණාද යන්නය. ඒ අනුව අධ්‍යාපන අමාත්‍ය අකිල විරාජ් කාරියවසම් මහතා සිය අමාත්‍යාංශ ලේකම්වරයා අපගේ ¥රකථන සංවාදයට සම්බන්ධ කරගනිමින් ලේකම්වරයා කළ තහවුරු කිරීම අනුව ප‍්‍රකාශ කළේ, එම රුපියල් මිලියන 100ක මුදල ලැබී ඇති බවය.

අධ්‍යාපන අමාත්‍යවරයාගේ එම තහවුරු කිරීම අනුව ජුලි 29 දින පුවත්පතේ ප‍්‍රවෘත්තියක් වශයෙන් අප පළකළේ ‘මිලියන 100ක් කොමිස් ලැබුණා’ යනුවෙන් අධ්‍යාපන අමාත්‍යවරයා අපට කළ තහවුරු කිරීමය. මෙම තහවුරු කිරීමත් අපගේ පළමු හෙළිදරව්වක් නිසා එම සුරක්ෂා රක්ෂණය පිළිබඳව දැඩි කථාබහක් ඇති වූ අතර ලංකා ගුරු සංගමය ප‍්‍රවෘත්ති සාකච්ඡුාවක් පවත්වමින් ඒ පිළිබඳව විධිමත් පරීක්‍ෂණයක් සිදුකළ යුතු බව පැවසීය.

මෙම ලිපිය ආරම්භයේදීම සඳහන් කර ඇති ප‍්‍රශ්නය එම වාර්තාකරු අසන්නේ සුරක්ෂා රක්ෂණයෙන් ලැබුණා යැයි කියූ රුපියල් මිලියන 100ක මුදල තැන්පත් කළ ගිණුම් පිළිබඳව දැනගන්නටය. එහෙත් අධ්‍යාපන ඇමතිවරයාගේ උත්තරය නම් හරි අපූරුය. එම මුදල් ලැබුණේ ඔහුට හෙවත් අධ්‍යාපන අමාත්‍යාංශයට නම් මුදල් ලැබුණේ අධ්‍යාපන අමාත්‍යාංශයේ ගිණුමකට බව කියන්නට ඔහු මෙතරම් පැකිළෙන්නේ ඇයි? එය වාර්තාකරු විසින් රක්ෂණ සංස්ථාවෙන් අසා දැනගත යුතු කාරණාවක් නොවේ. අධ්‍යාපන අමාත්‍යවරයාගේ මේ ම`ගහැරීම තුළම ඇත්තේ ලැබුණා යැයි කියූ රුපියල් මිලියන 100ක මුදල පිටුපස සැඟවූ අතිවිශාල රහසක් ඇති බවය.

එම සැඟවූ රහසට අදාළ මතුපිටට ආ කරුණ වූයේ අධ්‍යාපන අමාත්‍යාංශයත් ශී‍්‍ර ලංකා රක්ෂණ සංස්ථාවත් මේ කොමිස් මුදල් කථාව පිළිගැනීමෙන් පසු ජුලි 31 වැනිදා හදිසියේම එම කොමිස් මුදලින් අරමුදලක් හැදීම පිළිබඳව ගිවිසුමකට එළඹීමය. කොමිස් මුදල වේලාසනින් ලැබී එය හෙළිදරව්වීමෙන් පසු කොමිස් මුදලෙන් කරන කටයුතු ගැන ගිවිසුමක් අත්සන් කිරීම ලදබොළඳ රඟපෑමක් මිස එම සැක ගනුදෙනුවේ සැකසහිතභාවය වසාගැනීමට සමත් ගරුගාම්භිර රඟපෑමක් නොවේ. මේ ගිවිසුම අත්සන් කිරීමත් සමගම රාජ්‍ය ආයතන දෙකක් වශයෙන් ශී‍්‍ර ලංකා රක්ෂණ සංස්ථාවක් අධ්‍යාපන අමාත්‍යාංශයත් රටට පිළිතුරු දිය යුතු ප‍්‍රශ්න කිහිපයක් තිබේ. ඒ මෙම ගිවිසුමට පෙර ශී‍්‍ර ලංකා රක්ෂණ සංස්ථාව රුපියල් මිලියන 100ක මුදලක් අධ්‍යාපන අමාත්‍යාංශයට ලබාදුන්නේ ඇයි? එසේ මුලින් මුදල් ගෙවා පසුව ගිවිසුමක් අත්සන් කළේ ඇයි? අධ්‍යාපන අමාත්‍යාංශයට ලැබුණ මුදල තැන්පත් කරනු ලැබුයේ කිනම් ගිණුමේද?  ගිවිසුමෙන් පසු එම මුදල අරමුදල සඳහා ආරම්භ කළ ගිණුමක තැන්පත් කළේද? අරමුදලේ ගිණුමට මුදල් ආවේ කිනම් ගිණුමකින්ද යන්නය.

අනෙක් අතට මේ ගිවිසුමට අත්සන් කරන කාලය වන විටත් ශී‍්‍ර ලංකා රක්ෂණ සංස්ථාවත්, අධ්‍යාපන අමාත්‍යාංශයත් අතර වූ සුරක්ෂා රක්ෂණයේ ගිවිසුම අවසන් වන්නට නියමිතව තිබූ බවද අප සැලකිල්ලට ගත යුතුය. 2017 ඔක්තෝබර් 01 වැනිදා සිට 2018 සැප්තැම්බර් 30 වැනිදා දක්වා වූ එම ගිවිසුම් කාලයෙන් පසු ඊළඟ වසර සඳහා සුරක්ෂා රක්ෂණය වෙනුවෙන් අධ්‍යාපන අමාත්‍යංශය දැනටමත් පුවත්පත් දැන්වීම් පළකර යෝජනා කැඳවා තිබේ. ඒ අනුව ශී‍්‍ර ලංකා රක්ෂණ සංස්ථාවට එම රක්ෂණය නැවත ලැබේද නැද්ද යන්න තවමත් කිව නොහැකි කරුණක්ය.

එසේ තිබියදී දෙපාර්ශ්වය අරමුදලක් වෙනුවෙන් රක්ෂණ ගිවිසුම් අවසන් වන මොහොතේ තවත් ගිවිසුමකට එළඹීම හොරකමක් වසා ගැනීමට කළ දෙයක් වශයෙන් මිස වෙන එකක් වශයෙන් හඳුනාගත නොහැකිය.

මේ ආකාරයේ සැකකටයුතු ගනුදෙනු පිළිබඳ විස්තර පිටතට ගෙනයෑමේ තර්ජනය ශ‍්‍රී ලංකා රක්ෂණ සංස්ථාව විසින් දැනටමත් එහි සේවකයන්ට ලිඛිතව දන්වා තිබේ. ඉන් කියා ඇත්තේ ආයතනයේ තොරතුරු තීන්දු තීරණ හා ලියවිලි තුන්වන පාර්ශ්වයක් අතට පත්කිරීම සපුරා තහනම් බවය. එම තහනම කඩ කරන සේවකයන්ට විරුද්ධව අනිවාර්ය නිවාඩු යැවීම වැනි දැඩි දඬුවම් ලබාදෙන බවය.

තර්ජනය එසේ වුවද ශී‍්‍ර ලංකා රක්ෂණ සංස්ථාව රැුකගැනීම වෙනුවෙන් ඉතිහාසය පුරා දැඩි අරගලයක නිරතවූ රක්ෂණ සේවක සංගමය අගෝස්තු 02 දින මාධ්‍ය නිවේදනයක් නිකුත් කරමින් සඳහන් කළේ මෙම රක්ෂණ ගනුදෙනුව තුළ සැකකටයුතු සිදුවීම් රාශියක් සිදුවී ඇති බවය.

රක්ෂණ සේවක සංගමයේ නිවේදනයේ ඇති පරිදි ඒවායින් සමහරක් මෙසේය.

  1. රක්ෂණ යෝජනාවක් ඉදිරිපත් වූ විට එහි අවදානම නිවැරදි ලෙස තක්සේරු කළ යුතුය. (ප‍්‍රාරක්ෂණය කිරීම) ඒ සඳහා ජීවගණකඥ (Actuarial)සහාය සහ ආයතනයේ හෝ ඉන් බාහිර අත්දැකීම් දත්ත හා තොරතුරු ලබාගත යුතුය. එය නිවැරදිව සිදුවී නැත. අනුමාන මත රක්ෂණ වාරික ගණනය සිදුනොවේ.
  2. ඉහත සඳහන් ලෙස ප‍්‍රාරක්ෂණ කාර්යය නිවැරදිව සිදුවී නම්, ප‍්‍රතිරක්ෂණය සඳහා 90%ක තරම් ඉහළ ප‍්‍රතිශතයක් යෙදවිය යුතු නොවේ.
  3. ශී‍්‍ර ලංකා රක්ෂණ සංස්ථාව ප‍්‍රතිරක්ෂණයෙන් ලබාගන්නා කොමිස් ආදායම වෙනත් කිසිවකට යෙදවිය නොහැකිය. එනම් රුපියල් මිලියන 100ක් අධ්‍යාපන අමාත්‍යාංශයේ අරමුදලකට යෙදවිය නොහැකිය. එසේ කිරීම සඳහා අධ්‍යාපන අමාත්‍යාංශයට හෝ ශී‍්‍ර ලංකා රක්ෂණ සංස්ථාවට හෝ බලයක් හිමි වී නැත.

රුපියල් මිලියන 100ක කොමිස් මුදලට අදාළ මේ සැකසහිත කරුණු සහ වටපිටාව නිසාම නැවත වරක් තවදුරටත් පැහැදිලි කරගැනීම සඳහා අධ්‍යාපන අමාත්‍යවරයා හා අධ්‍යාපන අමාත්‍යාංශ ලේකම්වරයා ¥රකථනයට සම්බන්ධ කරගැනීම සඳහා අප පසුගිය සතියේ කළ උත්සාහය ව්‍යර්ථ විය. එහෙත් අධ්‍යාපන අමාත්‍යාංශ මාධ්‍ය ලේකම් කල්ප ගුණරත්න දුරකථනයට සම්බන්ධ කර ගැනීමට අපට හැකි විය. එහිදී අප ඔහුගෙන් ඇසූවේ නිශ්චිත ප‍්‍රශ්න කිහිපයක් පමණය. ඒ මෙම රක්ෂණය යටතේ අධ්‍යාපන අමාත්‍යාංශයට රුපියල් මිලියන 100ක මුදල ලැබුණේ කවදාද? එම මුදල බැර කරනු ලැබූවේ අධ්‍යාපන අමාත්‍යාංශයේ කිනම් ගිණුමකටද? හා ශී‍්‍ර ලංකා රක්ෂණ සංස්ථාව සතු කිනම් ගිණුමකින් එම මුදල් ලැබුණේද? යන්නය.

කල්ප ගුණරත්න මහතා ඒ පිළිබඳව සොයාබලා අපට පිළිතුරු දෙන බව පැවසූ අතර පසුව කථාකර ඔහු පැවසුවේ ශී‍්‍ර ලංකා රක්ෂණ සංස්ථාවේ රුවනි ධර්මවර්ධනගෙන් මා ඇසූ ප‍්‍රශ්නවලට පිළිතුරු ලබාගන්නා ලෙසය. ඒ අනුව අප රුවනි ධර්මවර්ධන ඇමතූ කළ ඇගේ පිළිතුර වූයේ අරමුදලක් ඇතිකර ගැනීමේ ගිවිසුම් පිළිබඳව මිස මාගේ ප‍්‍රශ්නවලට අදාළව පිළිතුරු ලබාදීමේ හැකියාවක් ඇයට නොමැති බවය. ශී‍්‍ර ලංකා රක්ෂණ සංස්ථාවේ ප‍්‍රධාන විධායක නිලධාරි චන්දන අලූත්ගම අමතා පිළිතුරු ලබාගන්නා ලෙස ද දැන්වීය. චන්දන අලූත්ගමවද ඇමතීමු. නිශ්චිත ප‍්‍රශ්නද ඇසීමු. ඔහු කීවේ අපගේ ප‍්‍රශ්නවලට පිළිතුරු දෙන්නට කෙනෙකු සම්බන්ධ කරන බවය. කියූ පරිදිම ඉන්පසු නම සඳහන් නොකළ තැනැත්තියක අපට කථා කර පැවසුවේ අපගේ ප‍්‍රශ්න රුවනි ධර්මවර්ධනට යොමුකරන ලෙසය. අප ඇයට කීවේ, එම ප‍්‍රශ්නවලට පිළිතුරු ලබාදීමට රුවනි ධර්මවර්ධනට නොහැකි බව ඇය අපට පැවසූ බවත් ප‍්‍රධාන විධායක නිලධාරී අමතන ලෙස කීවේද ඇය බවත්ය. ඒ අනුව අපට නැවත කථා කරනවා යැයි පැවසූ ඇය නැවත දැනුම්දුන්නේ අපට අදාළ ප‍්‍රශ්න නිල වශයෙන් ලිඛිතව රුවනි ධර්මවර්ධනට යොමු කරන ලෙසය. ඒ අනුව අපගේ නිශ්චිත ප‍්‍රශ්න තුන අප පුවත්පත් සමාගමේ ලිපි ශීර්ෂයකින් රුවනි ධර්මවර්ධනගේ ඊමේල් ලිපිනයට යැව්වෙමු. ඒ අගෝස්තු 03 වැනි සිකුරාදාය. මේ සටහන ලියන්නේ අගොස්්තු 08 වැනිදා සවසය. ඒත් තවමත් පිළිතුරු නැත.

රුවනි ධර්මවර්ධන යනු ශී‍්‍ර ලංකා රක්ෂණ සංස්ථාවේ තොරතුරු නිලධාරිනිය වශයෙන්ද කටයුතු කරන තැනැත්තියය. මේ සුරක්ෂා රක්ෂණ පිළිබඳව මීට පෙර ලංකා ගුරු සංගමයේ ප‍්‍රධාන ලේකම් ජෝශප් ස්ටාලින් තොරතුරු දැනගැනීමේ පනත යටතේ කරන ලද ඉල්ලීමක් සංවේදී ව්‍යාපාරික තොරතුරු වශයෙන් සඳහන් කර ප‍්‍රතික්ෂේප කිරීමේ ඉතිහාස කථාවක්ද ඇත. අධ්‍යාපන අමාත්‍යාංශයත් ශී‍්‍ර ලංකා රක්ෂණ සංස්ථාවත් ඒකාබද්ධව බොහෝ වටයක් අප ගෙන ගොස් එම තොරතුරු නිලධාරිනියගෙන්ම අවශ්‍ය පිළිතුරු ලිඛිතව ඉල්ලා ලබාගන්නා ලෙස දැනුම් දුන්නේ එම ඉතිහාස කථාව නැවත පුනරුච්චාරණය කිරීමට වන්නට පුළුවන.

රුපියල් මිලියන 100ක මුදලක් ලබාදුන් හා ලබාගත් රාජ්‍ය ආයතන දෙකක් එහි තොරතුරු සැඟවීම සඳහා මෙතරම් මහන්සියක් ගන්නේ ඇයි? ඒ නිසාම මෙම ගනුදෙනුව ආශ‍්‍රයෙන් අපට තවත් ප‍්‍රශ්න රාශියක්ද  දැන් පැන නැගී ඇත. ඒ මෙම මුදල් මුලින්ම බැරවූයේ දේශපාලනඥයෙකුගේ නමින් ඇති පදනමකටද යන්න, එම මුදල් ගෙවනු ලැබූයේ ප‍්‍රතිරක්ෂණ බ්‍රෝකර්වරයාද යන්න හා ඇත්තටම මෙම රක්ෂණය රාජපක්ෂ සමයේ සිදුවූ සුප‍්‍රකට ඛණිජ තෙල් සංස්ථා රක්ෂණය මෙන් ප‍්‍රතිරක්ෂණය සිදුනොකර ප‍්‍රතිරක්ෂණ බ්‍රෝකර්වරයෙකු මගින් ගනුදෙනු සිදුකළ පුද්ගලයන් මුදල් බෙදාගත් අතිදැවැන්ත වංචාවක්ද යන්නය.