ආරක්ෂක මාණ්ඩලික ප්‍රධානී රවීන්ද්‍ර විජේගුණරත්න කොටුව මහේස්ත්‍රාත් අධිකරණය විසින් රිමාන්ඞ් භාරයට පත්කරනු ලැබීමෙන් පසු ජනාධිපතිවරයා විසින් ආරක්ෂක අමාත්‍යාංශයට මෑතකදී පත්කරන ලද ඉහළ නිලධාරියකු විසින් අපරාධ පරීක්ෂණ දෙපාර්තමේන්තුවේ ඉහළ පොලිස් නිලධාරීන්ට දූරකථන ඇමතුම් ලබාදී තර්ජනයක් කර ඇතැයි වාර්තාවේ.

එම ඉහළ නිලධාරියා ‘ඕගොල්ලො දන්නේ නැහැ මම කවුද කියලා’ යනුවෙන් පවසමින් එම දූරකථන ඇමතුම් අපරාධ පරීක්ෂණ දෙපාර්තමේන්තුවේ නිලධාරීන්ට ලබාදී තිබේ.

එසේම ජනාධිපති මෛත්‍රීපාල සිරිසේනද ආරක්ෂක මාණ්ඩලික ප්‍රධානි අද්මිරාල් රවීන්ද්‍ර වි‍ජේගුණරත්න රිමාන්ඞ් භාරයට පත්කරන ලෙසට කොටුව මහේස්ත්‍රත් අධිකරණය ලබාදුන් තීන්දුවෙන් පසු අපරාධ පරීක්ෂණ දෙපාර්තමේන්තුවේ ඉහළ නිලධාරීන්ට කථා කොට සිදුවුණේ කුමක්දැයි විමසා තිබෙන බව වාර්තා වෙයි.

ආරක්ෂක අමාත්‍යාංශයේ එම ඉහළ නිලධාරියා කවුදැයි කියා තමන් දන්නා බවත් කලෙක පාතාලයේ, ගෝඞ් ෆාදර් වශයෙන් සැලකූ නාවල නිහාල් හෙවත් නිහාල් වික්‍රමසිංහගේ ඥාතියකු බවත්, ඒ බව පොලිස් දෙපාර්තමේන්තුවම දන්නා බවත් අනිද්දා සමග අදහස් දක්වමින් පොලිස් නිලධාරීහු පැවසූහ.

ඉඳුවර බණ්ඩාර