සීඅයිඞීය අධිකරණයට කියයි

බොරු පැමිණිලි, බොරු ප‍්‍රකාශ සහ බොරු මාධ්‍ය වාර්තා උපයෝගි කරගනිමින් වෛද්‍ය සාෆි ෂියාබ්දීන් නිකරුණේ අසාධාරණ ලෙස රඳවාගෙන ඇතැයි පසුගිය 27 වැනි දින කුරුණෑගල මහේස්ත‍්‍රාත් උසාවියට බී වාර්තාවක් මගින් අපරාධ පරීක්ෂණ දෙපාර්තමේන්තුව කරුණු දක්වා ඇත.

එම වෛද්‍යවරයාට අදාළ චෝදනා පිළිබඳව පරීක්ෂණ කරන අපරාධ පරීක්ෂණ දෙපාර්තමේන්තුව පිටු 216ක බී වාර්තාවක් ගොනු කරමින් අධිකරණයට දන්වා ඇත්තේ වෛද්‍යවරයාට විරුද්ධව තිබෙන එකුදු පැමිණිල්ලක් හෝ සනාථ කිරීමට තොරතුරු නැති බවය. ඔහු කිසිදු ත‍්‍රස්ත ක‍්‍රියාවකට හෝ ත‍්‍රස්ත කණ්ඩායමකට හෝ සම්බන්ධ නැතැයි මෙතෙක් කරනු ලැබූ විමර්ශනවලින් ඔප්පු වී ඇතැයි එම දෙපාර්තමේන්තුව අධිකරණයට කරුණු දක්වා ඇත.

මේ අනුව හදිසි නීතිය යටතේ රඳවා සිටින එම වෛද්‍යවරයා නිදහස් කිරීම පිළිබඳව ඉදිරියේදී කටයුතු කරනු ඇතැයි ප‍්‍රකාශ කළ අපරාධ පරීක්ෂණ දෙපාර්තමේන්තුවේ ප‍්‍රකාශකයෙකු වැඩිදුරටත් ප‍්‍රකාශ කළේ මෙම සාවද්‍ය ප‍්‍රකාශ, පැමිණිලි සහ මාධ්‍ය වාර්තා කළේ කාගේ අවශ්‍යතා මතදැයි දැන් සොයා බලමින් සිටින බවය.

වෛද්‍යවරයා අත්අඩංගුවට ගත්තේ කුමන පදනමකින් දැයි කුරුණෑගල පොලිසියෙන් අපරාධ පරීක්ෂණ දෙපාර්තමේන්තුව විමසූ විට පරීක්ෂණය සිදුකරන නිලධාරීන් පවසා ඇත්තේ වෛද්‍යවරයා අත්අඩංගුවට ගැනීමට පෙර දින එනම් මැයි 24 වන දින ලැබුණු පැමිණිලි 4ක් මත අත්අඩංගුවට ගත් බවය. ඒ සම්බන්ධයෙන් අපරාධ පරීක්ෂණ දෙපාර්තමේන්තුව කළ පරීක්ෂණයේදී අනාවරණය වී ඇත්තේ පැමිණිලි කළා යැයි සඳහන් වී ඇති පුද්ගලයන් එදින කුරුණෑගල නගරයේ සිට නැති බවය. එම හඳුනාගැනීම කර ඇත්තේ එම පුද්ගලයන්ගේ ¥රකථන ඇමතුම් පරීක්ෂා කිරීම මගින්ය.

අපරාධ පරීක්ෂණ දෙපාර්තුමේන්තුව එම පුද්ගලයන් 4 දෙනා ගෙන්වා ප‍්‍රකාශ සටහන් කරගෙන ඇති අතර ඔවුන් කියා ඇත්තේ මැයි 26 දින තමන් කුරුණෑගල පොලීසියට ගොස් පැමිණිලි ඉදිරිපත් කළ බවය. ඒ අනුව කුරුණෑගල පොලීසියෙන් පැමිණිලි බාරගෙන ඇත්තේ වෛද්‍ය සාෆි ෂියාබ්දීන් අත්අඩංගුවට ගෙන අපරාධ පරීක්ෂණ දෙපාර්තමේන්තුවට බාරදීමෙන් පසුව බව හෙළිවෙයි.

කේ. සංජීව/ රේඛා නිලූක්ෂි හේරත්