ජනාධිපති මෛත‍්‍රීපාල සිරිසේනට, ඉදිරි ජනාධිපතිවරණය සඳහා කිසිම ප‍්‍රධාන දේශපාලන පක්‍ෂයකින් අපේක්‍ෂක නාමයෝජනාව ලැබෙන්නේ නැත. එසේ තිබියදීත්, ඔහු දැන් සිය ජනාධිපතිවරණ ප‍්‍රචාරක ව්‍යාපාරය ආරම්භ කොට තිබේ. කනගාටුවට කරුණ නම්, ඒ සඳහා ඔහුගේ පෞද්ගලික මුදල් වැය නොකොට රජයේ, එනම් මහජනතාවගේ බදු මුදල් වැයකිරීමයි. අපේ‍්‍රල් 3වැනිදා, රටේ සියලූම පුවත්පත්වල මුල් පිටුව ජනාධිපතිවරයා විසින් වෙන්කරගනු ලැබ තිබිණි. ඒ ඔහුගේ මත්ද්‍රව්‍යවලට එරෙහි යුද්ධය ගැන ප‍්‍රචාරණය සඳහාය. එක පිටුවකට අඩුම ගණනේ රුපියල් ලක්‍ෂ 4කට වැඩියෙන් වියදම් කිරීම අවශ්‍ය වන ඒ ප‍්‍රචාරණය අවසන් වන්නේ ජනාධිපති සිරිසේනගේ ජනාධිපතිවරණ ප‍්‍රචාරයෙන් බව අලූතෙන් කිවයුතු නැත. ඒත් කමක් නැත, ඔහුට නාමයෝජනා ලැබෙන්නේ නම්.


මේ දිනවල කොළඹ තාප්ප පුරා ඇලවී තිබෙන පෝස්ටරයකින් කියැවෙන්නේ, ‘පොලිසිය භාරගෙන දින 140යි. මත්ද්‍රව්‍ය වැටලීම් 1400’යි බවයි. එහි පණිවුඩය වන්නේ මේ ‘වික‍්‍රමය’ කළ ජනාධිපතිවරයාට ජාතියේ ගෞරවය හිමිවිය යුතු බව කියමින් හා ඔහුත් සමග ‘එකට සිටිමු’ යන්නයි.


මෑත කාලය තුළ අතිවිශාල වශයෙන් මත්ද්‍රව්‍ය තොග සහ මත්ද්‍රව්‍ය ජාවාරම්කරුවන් අත්අඩංගුවට ගැනුණු බව රහසක් නොවේ. හැමදාම පාහේ මෙපමණ මත්ද්‍රව්‍ය තොගයක් හා අහවල් පුද්ගලයන් අත්අඩංගුවට ගැනුණු බවට ‘නිව්ස් ඇලර්ට්‘ එකක් දෙකක්වත් ජංගම ¥රකථනවලට ලැබේ. එදින විද්‍යුත් මාධ්‍යවලද, පසුදින පුවත්පත්වලද, ඒ ගැන ඉහළින් සඳහන් වේ. ඇත්ත වශයෙන්ම මත්ද්‍රව්‍ය ඇල්ලීම ‘ඇඟට දැනෙන’ පරිදි සිදුවන බවක් දැන් අපට පෙනේ.


පොලිස් වෙබ් අඩවියේ සංඛ්‍යාලේඛනවලට අනුව, 2019 මුල් මාස දෙක තුළ අත්අඩංගුවට ගැනුණු හෙරොයින් ප‍්‍රමාණය කිලෝග‍්‍රෑම් 533කි. කංසා ප‍්‍රමාණය කිලෝග‍්‍රෑම් 1309කි. එම සංඛ්‍යා ලේඛනවලට අනුව, 2018 ජනවාරි 1 සිට මැයි 31 දක්වා කාලය තුළ හෙරොයින් කිලෝග‍්‍රෑම් 30ක්ද, කංසා කිලෝග‍්‍රෑම් 2213ක්ද, හෂිස් කිලෝග‍්‍රෑම් 17ක්ද, කොකේන් ග‍්‍රෑම් 856ක්ද අත්අඩංගුවට ගෙන තිබේ. පොලිස් මාධ්‍ය ප‍්‍රකාශකවරයා පසුගිය දිනෙක කිව්වේ, 2018 අවුරුද්දේ අඩුම වශයෙන් හෙරොයින් කිලෝග‍්‍රෑම් 800කට වැඩි ප‍්‍රමාණයක් අත්අඩංගුවට ගැනුණු බවය. එහෙත් ඔහු අවධාරණය කළේ, 2019 වසරේ මේ වන තෙක් ගතවී ඇති මාස තුනක කාලය තුළ පමණක්, 2018 වසරේ අත්අඩංගුවට ගත් ප‍්‍රමාණයට වඩා ප‍්‍රමාණයක් අත්අඩංගුවට ගෙන ඇති බවයි. මේ ආකාරයට ජනාධිපතිවරයාගේ ජනාධිපතිවරණ අභිලාෂය වෙනුවෙන් වුණත්, මත්ද්‍රව්‍ය විශාල ප‍්‍රමාණයක් පසුගිය කාලය තුළ අත්අඩංගුවට ගෙන ඇති බව පැහැදිලිය.


ඒ අතර, කොකේන් කිලෝග‍්‍රෑම් 769ක් අපේ‍්‍රල් 1වැනිදා විනාශ කර දමනු මාධ්‍ය විසින් සජීවීව රටටම පෙන්වන ලදි. දෙන ලද අතිවිශාල ප‍්‍රචාරය අනුව මේ මත්ද්‍රව්‍ය, ජනාධිපතිතුමා, පොලිසිය අයත් නීතිය හා සාමය අමාත්‍යාංශය තමා වෙතට පවරාගත් දිනයෙන් පසු, එනම් 2019 දෙසැම්බරයෙන් පසු අත්අඩංගුවට ගන්නා ලද මත්ද්‍රව්‍ය තොග බවට කෙනකුට වැරදි ලෙස පෙනී යා හැකිය.


එහෙත් එසේ විනාශ කරන ලද්දේ, 2019ට පෙර අත්අඩංගුවට ගැනුණු ඒවාය. හරියටම කියනවා නම්, 2016 ජූනි 21 වන දින ඔරුගොඩවත්ත, බහලූම් අංගණයේදී සොයාගත් කොකේන් කිග‍්‍රෑ 301, ග‍්‍රෑම් 235ක්, 2016 නොවැම්බර් 09 වන දින කැලණිය පෙතියාගොඩ ප‍්‍රදේශයේදී සොයාගත් කොකේන් කිග‍්‍රෑම් 31, ග‍්‍රෑම් 844 ක් සහ 2016 නොවැම්බර් 24 වන දින ඔරුගොඩවත්ත, රේගු අංගණයේදී අත්අඩංගුවට ගත් කොකේන් කිග‍්‍රෑම් 219, ග‍්‍රෑම් 950ක් සහ 2018 ජූනි 19 වන දින රත්මලාන ආර්ථික මධ්‍යස්ථානයේදී අත්අඩංගුවට ගත් කොකේන් කිග‍්‍රෑම් 216, ග‍්‍රෑම් 435 කි.


මෙවැනි ඈත කාලයක අත්අඩංගුවට ගනු ලැබූ මත්ද්‍රව්‍ය තොග පවා, ජනාධිපතිතුමා, මැති ඇමතිවරුන්, රාජ්‍ය නිලධාරීන් ඇතුළු විශාල පිරිසක් සහභාගි වන මාධ්‍ය සංදර්ශනයක ආකාරයෙන් විනාශ කරන්නේ ජනාධිපතිතුමාගේ ජනාධිපතිවරණ සිහිනය අනුව බව පැහැදිලිය. නැතිනම් මෙවැනි දේ විනාශ කිරීම සඳහා අවශ්‍ය වන්නේ මහේස්ත‍්‍රාත්වරයකු හෝ මහේස්ත‍්‍රාත්වරියක වැනි අධිකරණ සේවයේ පහළම ස්තරයේ නිලධාරියකු ඉදිරියේ එය කිරීම පමණකි.


කොහොම වුණත්, වැදගත් ප‍්‍රශ්නයක් තිබේ. පසුගිය මුළු වසර තුළම අත්අඩංගුවට ගැනුණු මත්ද්‍රව්‍ය ප‍්‍රමාණයට වඩා වැඩි ප‍්‍රමාණයක් මේ අවුරුද්දේ ගතවුණු කාලය තුළ අත්අඩංගුවට ගත් බව පොලිස් මාධ්‍ය ප‍්‍රකාශකවරයා කියන විට, පසුගිය අවුරුද්දේ ඒ තරම් අඩු ප‍්‍රමාණයක් අත්අඩංගුවට ගැනුණේ ඇයි? යන ප‍්‍රශ්නයයි. ඒ වාගේම, යහපාලන ආණ්ඩුවේ පාලන කාලය තුළ, එනම් 2015 සිට මේ දක්වා මේ තරම් විශාල මත්ද්‍රව්‍ය තොග සහ දැවැන්ත මත්ද්‍රව්‍ය ජාවාරම්කරුවන්, ඔවුන්ගේ සහචරයන් අත්අඩංගුවට ගැනීමට බැරිවුණේ ඇයි? යන ප‍්‍රශ්නයයි.
එයින් පැනනැගෙන තවත් ප‍්‍රශ්නයක් නම්, යහපාලන ආණ්ඩුවේ නීතිය හා සාමය පිළිබඳ ඇමතිවරුන්. එනම්, තිලක් මාරපන හා සාගල රත්නායක, මත්ද්‍රව්‍ය ජාවාරම්කරුවන් හා ඔවුන්ගේ ජාවාරම් වෙනුවෙන් යම්කිසි සහනශීලී පිළිවෙතක් අනුගමනය කළේ ද යන්නයි.


වැඩි කලක් නීතිය හා සාමය පිළිබඳ ඇමතිධුරය දැරූ සාගල රත්නායක මහතාගේ ධුර කාලය තුළ මේ තරම් වැටලීම්, අත්අඩංගුවට ගැනීම් සිදුවුණේ නැත. ඒ ඇයි? ගලගොඩඅත්තේ ඥානසාර භික්‍ෂුව සම්බන්ධයෙන්, ඇමති සාගල රත්නායක සහනශීලී පිළිවෙතක් අනුගමනය කළාක් මෙන්, (ඇමති සාගලගේ මැදිහත්වීමෙන් ඥානසාර භික්‍ෂුව අත්අඩංගුවට පත්විය යුතු අවස්ථාවල ඉන් මිදී ඇප ලබා ගෙදරද ගියේය.* මේ මත්ද්‍රව්‍ය ජාවාරම්කාරයන් සම්බන්ධයෙන්ද ඔහු සමාන ලෙස ක‍්‍රියාත්මක වුණා වෙන්නට බැරිද?


මේ ප‍්‍රශ්නවලට හිටපු ඇමති සාගල රත්නායක පිළිතුරු දිය යුතුය. තමාගේ ධුර කාලය තුළ මේ තරම් විශාල වැටලීම් නොකිරීම ගැනත්, මේ තරම් තොග සහ පුද්ගලයන් අත්අඩංගුවට නොගැනීම ගැනත් හිටපු ඇමතිවරයා මහජනතාව ඉදිරියේ පැහැදිලි කළ යුතුය. තමාගේ කාලයේ මේ හා සමාන වැටලීම් වුණා නම් ඒ බවත්, නොවුණා නම් ඊට හේතුත්, දැන් ජනාධිපතිවරයා හුදු මාධ්‍ය සංදර්ශනයක් පමණක් පවත්වන්නේ නම් ඒ බවත් රටට පැහැදිලි කළ යුත්තේ සාගල රත්නායක ඇමතිවරයාය.x

ප‍්‍රියන්ත හේවගේ