මෙතෙක් ස්වදේශ කටයුතු අමාත්‍යාංශය යටතේ පැවති ප්‍රාදේශීය ලේකම් කාර්යාල සහ දිස්ත්‍රික් ලේකම් කාර්යාල ආරක්ෂක අමාත්‍යාංශයට පවරාගැනීම පිළිබඳ ජාතික වෘත්තීය සමිති එකමුතුව සිය විරෝධය පළ කරයි.

අගෝස්තු 13 වන දින කොළඹ ගුරුමැදුරේදී මාධ්‍ය සාකච්ඡාවක් පවත්වමින් මෙම විරෝධය දැක්වීම වෘත්තීය සමිති එකමුතුවේ නියෝජිතයන් කරනු ලැබූ අතර එහිදී අදහස් දැක්වූ ලංකා ගුරු සංගමයේ ලේකම් ජෝසෆ් ස්ටාලින් පවසා ඇත්තේ ස්වදේශ කටයුතු අමාත්‍යාංශය යනු සිවිල් පරිපාලන ව්‍යුහයක් බවත් එය ආරක්ෂක අමාත්‍යාංශය යටතට ගැනීමෙන් සිවිල් කටයුතුවලට මිලිටරිමය බලපෑම් එල්ලවිය හැකි බවත්ය. ආරක්ෂක අමාත්‍යාංශයේ ලේකම්වරයා හමුදා නිලධාරියෙකු වීම පිළිබඳවත් එහිදී පෙන්වාදී ඇත.

ඊට අමතරව 19 වැනි සංශෝධනය අහෝසි කිරීමට එරෙහිවද එම මාධ්‍ය සාකච්ඡාවේදී ජෝස්ෆ් ස්ටාලින් මහතා විරෝධය පළ කර ඇත. ස්වාධින කොමිෂන් සභා, තොරතුරු දැනගැනීමේ අයිතිය වැනි කාරණා ගෙන එමින් ස්වාධීන කළ රාජ්‍ය සේවය දහනවවැනි සංශෝධනය අහෝසි කළහොත් අහිමිව යන බව ඔහු කියා ඇත.

ජාතික වෘත්තීය සමිති එකමුතුවේ සෞඛ්‍ය වෘත්තීයවේදීන්ගේ විද්වත් කමිටුව, තැපැල් වෘත්තීය සමිති එකමුතුව, රාජ්‍ය කළමනාකරණ සහකාර සේවා නිලධාරීන්ගේ සංගමය, ලංකා ගුරු සංගමය, ලංකා වෙළඳ කාර්මික හා පොදු සේවක සංගමය, වාරිමාර්ග පොදු සේවක සංගමය, ආණ්ඩුවේ කම්කරු සමිති සම්මේලනය ඇතුළු වෘත්තීය සමිති 24 කින් සමන්විතය.■