ආණ්ඩුව නියම කළ මිලට ගන්නට වෙළඳපොලේ සම්බා ඇතුළු සහල් වර්ග කිහිපයක් නැත. කොළඹ පිටකොටුවේ තොග වෙළඳසැල්වලටත්, වෙනත් ප්‍රදේශවල වෙළඳසැල්වලටත් කඩා වැදී පාරිභෝගික කටයුතු අධිකාරියේ නිලධාරීන් දැක්වූ සංදර්ශන මීට සති කිහිපයකට පෙර අප දැක්කේ මාධ්‍ය මගින්ය. සහල් සැඟවූ හා සහල් වැඩිමිලට විකුණූ වෙළඳසැල්වලට එරෙහිව නඩු පවරන බවද එම සංදර්ශනවලදී පාරිභෝගික අධිකාරියේ නිලධාරීහු කීහ.

ජෙනරාල් කිච වීම

හිටපු මේජර් ජෙනරාල් ශාන්ත දිසානායකගේ නායකත්වයෙන් පොළොන්නරුවට ගිය පාරිභෝගික අධිකාරියේ නිලධාරී කණ්ඩායමේ සංදර්ශනය අරලිය සහල් හිමිකරු ඩඩ්ලි සිරිසේන අබියස කුඩුපට්ටම් වෙනවා අප දැක්කේද එම මාධ්‍ය මගින්ය. වෙළඳසැලට සහල් නිකුත් නොකර තබා ගත්තද, වැඩි මිලට සහල් වික්කද, ඒ පිළිබඳව තොරතුරු ඇති බව එම කුඩුපට්ටම් වන මාධ්‍ය සංදර්ශනයේදී හිටපු මේජර් ජෙනරාල් ශාන්ත දිසානායක කීවද, අරලිය, නිපුණ (එය අයිති හිටපු නියෝජ්‍ය අමාත්‍ය සිරිපාල ගම්ලත්ටය.) ඇතුළු මහා පරිමාණ සහල් මෝල් හිමියන්ට එරෙහිව කිසිදු පියවරක් ගැනීමට පාරිභෝගික කටයුතු අධිකාරියට හැකිවී නැත.

එම මේජර් ජෙනරාල්වරයා ඇතුළු පාරිභෝගික අධිකාරියට හැකිවී ඇති එකම කාරණය වන්නේ ඩඩ්ලි සිරිසේන ළඟ බැගෑපත් වී රුපියලක් දෙකක සුළු ලාභයට හෝ කීරි සම්බාවලින් ලාභ තිබෙන නිසා රුපියලක් දෙකක් පාඩුවට හෝ වෙළඳපොළට හාල් නිකුත් කරන ලෙස ඉල්ලීම පමණය. පාරිභෝගික අධිකාරියක සභාපතිවරයෙකුට නම් එම බැගෑපත්වීම ගැළපෙන්නේ නැත. විශේෂයෙන්ම හිටපු මේජර් ජෙනරාල් කෙනෙකු සභාපතිත්වය දරන විට එය කොහෙත්ම ඒ ගැන බලාපොරොත්තු දැල්වූ ජනතාවට ගැළපෙන්නේ නැත.

එම උදාහරණයෙන්ම රාජ්‍යයේ තනතුරු හිටපු හමුදා නිලධාරීන්ගෙන් පිරවීම ගැන ආස්වාදයට පත්වූ ජනයා උගත යුතු පාඩමක්ද තිබේ. ඒ හිටපු හමුදා නිලධාරියෙකු එම තනතුරුවලට පත්වූවේය කියා විශේෂ යමක් නොවන බවය. එමෙන්ම හිටපු හමුදා නිලධාරීන් යනු සුවිශේෂ දක්ෂතාවන් ඇති අය නොවන බවය.

මේ හිටපු හමුදා නිලධාරීන් අතිදක්ෂයන් නම් ඔවුන් සිටි කාලයේ හමුදාව ඉතිහාසයේ නොවූ විරූ තරමට විනය පිරිහුණු දේශපාලනීකරණයට ලක්වුණු හමුදාවක් වීමට කිසිසේත්ම ඉඩ නැත. ඒ සමයේ අප දැක්කේ රාජපක්ෂවරුන්ගේ මැතිවරණ ජයග්‍රහණය වෙනුවෙන් පත්‍රිකා බෙදන, පෝස්ටර් අලවන, ලියුම් තැපැල් කරන හමුදාවක්ය. එසේත් නැත්නම් දේශපාලන ප්‍රභූන්ගේ බල්ලන් කවා පොවා, වැසිකිළි කැසිකිළි කර නාවා බලාගන්නා, අලි පැටවුන් බලාගන්නා හා ප්‍රභූ බිරින්දෑවරුන්ගේ සාරි කටු ගලවන හමුදාවක්ය. මන්ද ඉහත කී සියලු වැඩ හමුදා රාජකාරී නොවන නිසාය.

ඇත්තටම අද රාජ්‍ය තනතුරුවල ඉන්නේ හමුදා සාමාජිකයන් ඉහත කී රාජකාරීමය නොවන දේශපාලන පක්කිලි කටයුතුවලට යොදවද්දී ඊට අණ දුන්, අනුමැතිය දුන්, සහයෝගය දුන් හෝ අනුමත කළ හෝ නිහඬව සිටි ඉහළ හමුදා නිලධාරීන්ය. ඔවුන්ට ඇත්තේ සුදුසුකම් තුනක් පමණය. එකක් ජනාධිපති ගෝඨාභය රාජපක්ෂ නියෝජනය කළ ශ්‍රී ලංකා යුද හමුදාවේ ගජබා රෙජිමේන්තුවේ සාමාජිකයෙකු වීමය. නැතහොත් ගෝඨාභය රාජපක්ෂ අධ්‍යාපනය ලැබූ කොළඹ ආනන්ද විද්‍යාලයේ අධ්‍යාපනය ලැබූවෙකු වීමය. ජනාධිපති ගෝඨාභය රාජපක්ෂගේ විශ්වාසය දිනාගත් හමුදා නිලධාරියෙකු වීමය.

මේ සඳහා හොඳම උදාහරණයකට ජනාධිපති ගෝඨාභය රාජපක්ෂද ගත හැකිය. ඔහු මහින්ද රාජපක්ෂ ආණ්ඩුවේ ආරක්ෂක හා නාගරික සංවර්ධන අමාත්‍යාංශ ලේකම් ලෙස කටයුතු කරන විටදී බොහෝ අයට පෙනුණේ දක්ෂයෙකු ලෙසය. ඊට හේතුව ඔහුගේ අයියාගේ ජනාධිපති බලය කිසිවෙකුට හෝ කිසිවකට යට නොවී ඔහු භාවිත කිරීමය. ඇත්තම නම් ඒ බොහෝ භාවිත කිරීම් නීතියට පටහැනි, මානව හිමිකම් උල්ලංඝනය කරන බලහත්කාරී මිලිටරි මෙහෙයුම් වූ බවය. අදද හිටපු හමුදා නිලධාරීන්ට රාජ්‍යයේ තනතුරු අතර දක්ෂයන් වීමට ඇති එකම ක්‍රමය ඇත්තේ නීතියට පටහැනි, හිමිකම් නොතකන මිලිටරි බලහත්කාරීත්වය පමණය.

ආණ්ඩුවේ වී ගැනීමේ සංදර්ශනය

පාරිභෝගික අධිකාරියේ මාධ්‍ය සංදර්ශනයට පෙර ආණ්ඩුව තවත් මාධ්‍ය සංදර්ශනයක් පෙන්නුවේය. ඒ ශ්‍රී ලංකා යුද හමුදාවද මැදිහත් වී රජයේ වී අලෙවි මණ්ඩලය වෙනුවෙන් ආණ්ඩුව සහතික කළ මිලට ගොවීන්ගේ දෙපා ළඟට ගොස් වී මිලදී ගන්නා බවය. ඒ මාධ්‍ය සංදර්ශනවලදී සැරපරුෂ වොයිස් කට් දුන්නේ ඒ සම්බන්ධව පත්කළ බ්‍රිගේඩියර්වරයෙකි.

අරලිය, නිපුණ ඇතුළු මහා පරිමාණ හාල් නිෂ්පාදකයන්ට භය වන්නට ආණ්ඩුවට කාරි නැත. සුළු හා මධ්‍ය පරිමාණ මෝල් හිමියන් මේ වන විට ආණ්ඩුවේ නියම කළ මිලට හාල් වෙළඳපොලට එවන බවට ශපථ කර ඇත. ඒ අනුව කීරි සම්බා රුපියල් 125කටද, සුදු හෝ රතු සම්බා රු. 90කටද, සුදු හෝ රතු කැකුළු සම්බා 90කටද, සුදු හෝ රතු නාඩු 90කටද, සුදු හෝ රතු කැකුළු රු. 85කටද පාරිභෝගික අධිකාරිය නියම කළ මිලට ජනතාවට ලබා ගැනීම සඳහා සිදුකළ යුත්තේ සුළු හා මධ්‍ය පරිමාණ සහල්මෝල් හිමියන්ට ශක්තියක් ධෛර්යයක් වශයෙන් ආණ්ඩුව හමුදාව යොදවා මිලදී ගත් වී තොග මුදා හැරීමය.

එහෙත් මාධ්‍ය සංදර්ශන පවත්වා හමුදාව යොදවා ගොවියාගේ දෙපා ළඟට ගොස් මිලදී ගත් එම වී තොගවල ඇත්ත තත්වය කුමක්ද? වී අලෙවි මණ්ඩලයේ සභාපති ජටාර් මාන්නප්පෙරුමට අනුව මැයි 26 දින වන විට (ලියුම්කරුට ඔහු දුන් පිළිතුරු අනුව මෙම දත්ත ලියවේ.) එම මණ්ඩලය සතුව ඇති වී ප්‍රමාණය මෙට්‍රික් ටොන් 25,600කි. එය රටේ වී අවශ්‍යතාවෙන් සීයට 10ක් වත් වන්නේ නැත. රටේ වී අවශ්‍යතාව සාමාන්‍ය වශයෙන් වසරකට වී මෙට්‍රික් ටොන් මිලියන තුනක් පමණ වන්නේය. සහල් වශයෙන් නම් සහල් මෙට්‍රික් ටොන් මිලියන දෙකකි.

වී අලෙවි මණ්ඩලය ඉතිහාසයේ කවරදාකවත් තරගකාරී වී මිලදී ගත්තෙක් නොවීය. එහි සභාපතිවරයාට අනුව ඔවුන් වී මිලදී ගන්නේ කරුණු තුනක් සාක්ෂාත් කරගැනීම උදෙසාය. එකක් ආරක්ෂිත වී තොගයක් පවත්වාගෙන යෑම සඳහාය. දෙවැන්න ගොවියාට සහතික මිලක් ලබාදීම සඳහාය. තෙවැන්න පාරිභෝගිකයාට අඩු මිලක් ලබාදීම සඳහා වෙළඳපළ පාලනය කිරීම සඳහාය.

වී අලෙවි මණ්ඩලයේ වී මිලදී ගැනීමේ සාමාන්‍ය ක්‍රමවේදය මාධ්‍ය සංදර්ශනවලදී මොනවා පෙන්නුවත්, කීවත් මෙවරද වෙනස් වී නැත. එකක් වී මිලදී ගැනීමේ ඔවුන්ගේ සහතික මිලය. සම්බා, නාඩු,  කීරි ඇතුළු ඕනෑම වී කිලෝවකට රුපියල් 50ක සහතික මිලක් නියම වී තිබී ඇත. ඊට උපරිම තෙතමනය සීයට 14යි, උපරිම අපද්‍රව්‍ය ප්‍රතිශතය සීයට 1යි, උපරිම වර්ග මිශ්‍රණය සීයට 6යි, පරිමාණය අනුව උපරිම බොල් ප්‍රමාණය සීයට 9යි යන ප්‍රමිතියද ඇතුළත් වී ඇත.

එමෙන්ම වගා කර ඇති බිම් ප්‍රමාණය අනුව මිලදී ගන්නා උපරිම වී ප්‍රමාණයද තීරණය කර ඇත. ඒ අනුව අක්කර භාගයකට අඩු වගාකරුවකුගෙන් මිලදී ගන්නා උපරිම වී ප්‍රමාණය කිලෝග්‍රෑම් 500කි. අක්කර 1ට කිලෝග්‍රෑම් 1000කි. අක්කර 2ට කිලෝග්‍රෑම් 2000කි. අක්කර 3ට කිලෝග්‍රෑම් 3000කි. අක්කර 4ට කිලෝග්‍රෑම් 4000කි. අක්කර 5ක් හෝ ඊට වැඩි කිලෝග්‍රෑම් 5000කි.

ඒද සරලව නොවේ. වී අලෙවි මණ්ඩලය ලබාදෙන වී ඇසුරුම් මල්ලක් රුපියල් 50ට මිලදී ගෙන ඒවාවල වී පුරවා බාරදිය යුතුය. (එසේ බාරදුන් පසු ඇසුරුම් මලු මුදල් ගෙවනු ලැබේ.) වී අලෙවි මණ්ඩලයේ මිලදී ගන්නා ස්ථාන වෙත වී ගෙනැවිත් බාරදිය යුතුය. (ගොවියා ළඟට ගොස් මිලදී ගන්නා හමුදා මාධ්‍ය සංදර්ශන ඇත්තේ කිහිපයක් පමණය.) අත්පිට මුදලට මුදල් නොලැබේ. ගෙවීම් නිවේදන අනුව මුදල් ගෙවන්නේ බැංකුවලින්ය.

ඉහත සඳහන් කළ සහ තවත් ඇති නීතිරීතිවලට බැඳී වී අලෙවි මණ්ඩලය ළඟට ගොස් වී අලෙවි කරන්නේ ගොවීන් ටික දෙනෙකු බව පැහැදිලිය. අරලිය, නිපුණ වැනි මහා පරිමාණ වී මෝල් හිමියන් ගොවිබිම්වලට පැමිණ රජයේ තරම් නීතිරීතිවලින් තොරව අත්පිට මුදලට වී මිලදී ගෙන යනවාට ගොවීන් කැමතිය.

දැන් ප්‍රශ්නය ඇත්තේ රටේ වී නැති නිසා නොවේ. සහල් හිඟය ඇත්තේ මහා පරිමාණ වී මෝල් හිමියන් රජයේ උපරිම සිල්ලර සහල් විකිණීම සඳහා තොග වෙළඳුන්ටත්, සිල්ලර වෙළඳුන්ටත් සාධාරණ ලාභයක් තබාගෙන සහල් විකිණීම සඳහා වූ මිලකට සහල් තොග නිදහස් නොකිරීමය.

ඩඞ්ලි සිරිසේන ඇතුළු මහා පරිමාණ වී මෝල් හිමියන් කියන්නේ රුපියල් 50ක සහතික මිලට වී මිලදී ගත්තේ රුපියල් 98කට සම්බා සහල් විකිණීමට අවසර ලබාදෙන බවට රජය දුන් සහතිකය නිසා බවය. එම සහතිකය ඩඩ්ලි සිරිසේනට ජනාධිපති ගෝඨාභය රාජපක්ෂ හෝ වෙන බලධාරියෙකු පෞද්ගලිකව ලබා දුන්නාදැයි අපි නොදනිමු. එහෙත් ආණ්ඩුව ජනතාවට පැහැදිලි කළ යුතු සත්‍යයක් ඇත්තේය. ඒ රුපියල් 50කට වී මිලදී ගෙන ප්‍රවාහනය, කම්කරු, බැංකු ණය, අනෙකුත් වියදම් හා සාධාරණ ලාභය යන කරුණුත් සමඟ සහල් කිලෝවක් විකිණිය හැකි මිල කීයද යන්නය. එය එසේ පැහැදිලි කර නොදී කීරි සම්බාවලින් වැඩි ලාභයක් ලබන බැවින් සම්බා හා අනෙකුත් සහල් සීයට 1ක් හෝ පාඩුවට ලබාදෙන ලෙස ආයාචනා කිරීම නොකළ යුත්තකි. කළ යුත්තේ කීරි සම්බා සඳහා ලබාදී ඇති අසාධාරණ උපරිම සිල්ලර මිලද පහත හෙළීමය.

සහල් කිලෝවක් නිෂ්පාදනය සඳහා යන වියදම් හා ලාභය පිළිබඳ නිවැරදි ගණනය කිරීමක් නැතත් සහල් කිලෝවක් නිෂ්පාදනය සඳහා වී කිලෝ 1 1/2ක් වැය වන බව දළ වශයෙන් කරන ගණන් බැලීමය. ඒ අනුව වී කිලෝවක් රුපියල් 50කට මිලදී ගතහොත් සහල් කිලෝවක් සෑදීම සඳහා රුපියල් 75ක වී අවශ්‍යය. එතැන් සිට රුපියල් 90 දක්වා ඇත්තේ රුපියල් 15කි. තොග වෙළෙන්දාගේ ලාභයත්, සිල්ලර වෙළෙන්දාගේ ලාභයත් මේ රුපියල් 15 තුළම විසඳාගත යුතුය. ඒ අනුව ආයාචනා නොව පැහැදිලි කිරීම් අවශ්‍ය වන්නේ ආණ්ඩුව පාර්ශ්වයෙන්ය.

විසඳුම කුමක්ද?

ඕනෑනම් ආණ්ඩුවට පැහැදිලි කිරීම්, ආයාචනා පසෙක තබා ‘තග්’ විසඳුමකට යා හැකිය. ඩඞ්ලි සිරිසේන ඇතුළු මහා පරිමාණ හාල් මෝල් හිමියන්ට එරෙහිව උපරිම සිල්ලර මිල අබිබවා වැඩි මිලට සහල් විකිණීම, සහල් තොග සඟවා තබා ගැනීම ආදිය ගැන පාරිභෝගික අධිකාරී පනත යටතේ නඩු පැවරීම කළ හැකිය.

එහෙත් ඒ මගින් පමණක් ප්‍රශ්නය විසඳෙන්නේ නැත. ක්ෂණිකව කෙටිකාලීනව ප්‍රශ්නය විසඳීමට මහා පරිමාණ වී මෝල් හිමියන්ගේ සහල් තොග එළියට ලබාගත යුතුය. ඩඩ්ලි සිරිසේන කියන්නේ ඔහුට එරෙහිව කටයුතු කළහොත් මෝල වසා දමන බවය.

මේ නිසා දැනට තිබෙන සහල් තොග ආණ්ඩුවකට එළියට දමාගත හැක්කේ සහල් නිෂ්පාදනය හා බෙදාහැරීම අත්‍යවශ්‍ය සේවාවක් බවට පත්කිරීමෙන් පමණය. අත්‍යවශ්‍ය සේවාවක් බවට මෙම කර්මාන්තය පත්කිරීම සඳහා මහජන ආරක්ෂක ආඥාපනත යටතේ ජනාධිපතිවරයා හදිසි නීතිය රට තුළ පැනවිය යුතුය. එසේ හදිසි නීතිය නොපනවා සහල් කර්මාන්තය අත්‍යවශ්‍ය සේවාවක් බවට පත්කළ නොහැකි නිසාය.

මේ සහල් හිඟය පිළිබඳව මීට පෙර ජනාධිපති කාර්යාලය නිවේදනය කළේ සෑම සහල් මෝලකම සේවා අත්‍යවශ්‍ය සේවා ලෙස ජනාධිපතිවරයා කොවිඞ්-19 වසංගත තත්වය මත නම්කර ඇති බවත් ඒ පිළිබඳව වැඩබලන පොලිස්පති, සෞඛ්‍ය සේවා අධ්‍යක්ෂ ජෙනරාල්, ආහාර කොමසාරිස් හා පාරිභෝගික කටයුතු අධිකාරියේ සභාපතිවරයා දැනුවත් කර ඇති බවත්ය. (අප්‍රේල් 10 ඬේලි නිව්ස් පුවත්පතත් මේ පිළිබඳව පළකර ඇත.)

එහෙත් එතැන් සිට මාස එකහමාරකට අධික කාලයක් ගතවීත් ආණ්ඩුවට ආයාචනා කිරීම් හැර කිසිවක් කරගත නොහැකි වී නැත. ජනාධිපති කාර්යාලයේ නිවේදනය එසේ වුවද එය කරගැනීමට නොහැකි වී ඇත්තේ රට තුළ හදිසි නීතිය ප්‍රකාශයට පත්කර නොතිබීම නිසාය.

අනෙක් කාරණය ජනාධිපති ගෝඨාභය රාජපක්ෂ හා ඩඞ්ලි සිරිසේන අතර පවතින අතිජාත මිත්‍රකමය. මීට වසර ගණනාවකට පෙර ඩුබායි රාජ්‍යයේ ඇති ඩඞ්ලි සිරිසේනගේ හෝටලයක් විවෘත කිරීමේ උත්සවයේ ප්‍රධාන අමුත්තා වූයේ ගෝඨාභය රාජපක්ෂය. පසුගිය යහපාලන යුගයේදී ගෝඨාභය රාජපක්ෂට මෙන්ම රාජපක්ෂවරුන්ට එරෙහි පරීක්ෂණ හා නඩු කටයුතු සම්බන්ධයෙන් ‘ෂේප්’ කිරීමේ අතරමැදි ගනුදෙනු සිදුකළේ ඩඞ්ලි සිරිසේන යන්නද පැතිරී ඇති කතාවකි.

මේ දෙදෙනාගේ යහළුකම ගැන ලියුම්කරු දන්නා හොඳම කතාව වන්නේ මහින්ද රාජපක්ෂ පාලන සමයේදී ජයවර්ධනපුර මාදින්නාගොඩ ප්‍රදේශයේ අක්කර දහයක ඉඩමක් ඩඞ්ලි සිරිසේනගේ අරලිය හෝටල් ව්‍යාපෘතියක් සඳහා ලබාදීමට ගෝඨාභය රාජපක්ෂ යටතේ තිබූ නාගරික සංවර්ධන අධිකාරිය කටයුතු කර තිබීමය. එම ගනුදෙනුව සඳහා රුපියල් මිලියන 255ක මුදලක්ද ගෙවා තිබී ඇති අතර යහපාලන ආණ්ඩුව බලයට පත්වීමෙන් පසු අක්කර 10ක ප්‍රමාණයම එම හෝටල් ව්‍යාපෘතිය සඳහා ලබාදිය නොහැකි බවට නාගරික සංවර්ධන අධිකාරිය දැනුම් දීමෙන් පසු ඩඞ්ලි සිරිසේන එම ඉඩම් ගනුදෙනුව අත්හැර දමා තිබේ.

මේ කරුණු මගින් පැහැදිලි වන්නේ රටේ කොතරම් සහල් හිඟයක් පැවතියත් ඊට නිසි පිළියම් යෙදීමට ජනාධිපති ගෝඨාභය රාජපක්ෂ පැකිළෙනු ඇති බවයි. ඒ ඉහත විස්තර කළ කරුණු දෙක නිසාය. එකක් ජනාධිපති ගෝඨාභය රාජපක්ෂ ඔහු සමඟ ඇති මිත්‍ර සන්ධානය නිසා ඩඩ්ලි සිරිසේනට භයය. අනෙක හදිසි නීතිය පනවන්නටත් භයය. මෙසේ හදිසි නීතිය කැඳවන්නට ජනාධිපතිවරයා බය වන්නේ හදිසි නීතිය ප්‍රකාශයට පත්කිරීමෙන් පසුව දින ගණනාවක් ඇතුළත පාර්ලිමේන්තුව රැස්කර ඒ සඳහා අවසරය ලබාගැනීමට ජනාධිපතිවරයාට සිදුවන නිසාය. පාර්ලිමේන්තුව කැඳවීම මේ වන විට ජනාධිපතිවරයාට නයාට අඳුකොළ වී ඇති තත්වය තුළ එයද බොහෝදුරට සිදුනොවනු ඇත. ඒ නිසා මේ සහල් අර්බුදය හමුවේ කිව හැක්කේ ඩඞ්ලිටත් හදිසි නීතියටත් භය ජනාධිපති ගෝඨාභය රාජපක්ෂ කියාය.

ඩඩ්ලි දිනයි. මිල වැඩිවේ

මෙම ලිපිය ලියා අවසන් වී පිටු සැකසීමෙන් පසු ලිපියෙන් මතුකර තිබූ පරිදිම සහල් සඳහා වූ උපරිම සිල්ලර මිල වෙනස් කිරීමට ආණ්ඩුව තීරණය කර ඇත. ඒ මහා පරිමාණ හාල්මෝල් හිමියන් හා ආණ්ඩුව අතර පැවති සාකච්ඡාවකදීය. ඒ අනුව රුපියල් 90ට පැවති නාඩු සහල් කිලෝවක උපරිම සිල්ලර මිල රුපියල් 96 දක්වාද රුපියල් 90ට පැවති සම්බා සහල් කිලෝවක උපරිම සිල්ලර මිල රුපියල් 98 දක්වාද වැඩිකර ඇත.

මෙම මිල වැඩිකිරීම් සම්බන්ධයෙන් සිය නිල ෆේස්බුක් පිටුවේ සටහනක් තබමින් ඩඞ්ලි සිරිසේන සඳහන් කර ඇත්තේ එම මිල වැඩිකිරීම් සම්බන්ධයෙන් ජනාධිපති ගෝඨාභය රාජපපක්ෂ, අගමැති මහින්ද රාජපක්ෂ, අමාත්‍ය චමල් රාජපක්ෂ හා බැසිල් රාජපක්ෂට ස්තූතිය පුදකරන බවය.