අධිකරණයට අපහාස කළ බවට චෝදනා කරමින් හිටපු අගවිනිසුරු සරත් එන්. සිල්වාට එරෙහිව චන්ද්‍රගුප්ත තේනුවර, හේවාවඩුගේ සිරිල් සහ ප්‍රශාන්ත ගුණවර්ධන යන මහාචාර්යවරුන් ගොනු කර ඇති පෙත්සම සලකා බැලීම සඳහා පෙබරවාරි 07 වැනිදා කැඳවන ලෙස ශ්‍රේෂ්ඨාධිකරණය නියම කර තිබේ.
මෙම පැමිණිල්ල ජනවාරි 23 වෙනි දින ශ්‍රේෂ්ඨාධිකරණය හමුවේ කැඳවනු ලැබීය. විජිත් මලල්ගොඩ, මුර්දු ප්‍රනාන්දු සහ එස්. තුරේරාජා යන ත්‍රිපුද්ගල විනිසුරු මඬුල්ල හමුවේ මෙම පැමිණිල්ල සලකා බලනු ලැබීය.
එහිදී වගඋත්තරකාර හිටපු අගවිනිසුරු සරත් එන්. සිල්වා අධිකරණය හමුවේ පෙනීසිටි අතර ඔහු වෙනුවෙන් පෙනීසිටි ජනාධිපති නීතිඥ රොමේෂ් ද සිල්වා අධිකරණයට දන්වා සිටියේ තම සේවාදායකයා මෙම නඩුව විභාගයට ගැනීම සඳහා සූදානම් බවයි.
අප විසින් සිදු කරන ලද විමසීමේදී මහාචාර්ය චන්ද්‍රගුප්ත තේනුවර සඳහන් කළේ මහින්ද රාජපක්ෂ මහතා නැවත අගමැති බවට පත් වීම නීති විරෝධී බව පවසමින් අභියාචනාධිකරණය නිකුත් කරන ලද අතුරු වාරණ නියෝගය සහ පාර්ලිමේන්තුව විසුරුවා හැරීමට විරුද්ධව ලබා දුන් තීන්දුව සම්බන්ධයෙන් දෙසැම්බර් තුන් වෙනි දින මරදානේ පැවති රැස්වීමකදී අධිකරණයට අපහාස කළ බැවින් මෙම පැමිණිල්ල ගොනු කළ බවයි.
එම රැස්වීමේදී සරත් එන්. සිල්වා මහතා ප්‍රකාශ කොට තිබෙන්නේ, ‘අතුරු වාරණ නියෝගයක් ද පාර්ලිමේන්තුව විසුරුවා හැරීමට විරුද්ධව තීන්දුවක් ද එල්ලලා තියෙනවා’ යනුවෙනි. මේ අයුරින් ශ්‍රේෂ්ඨාධිකරණය ලබා දුන් නියෝග සම්බන්ධයෙන් ‘එල්ලලා තිබෙනවා’ යන වදන කීප වතාවක්ම භාවිතා කොට අධිකරණයට අපහාස කොට තිබෙන බව පෙත්සම්වල දැක්වෙයි.
කෙසේ වෙතත් මෙහිදී ශ්‍රේෂ්ඨාධිකරණ විනිසුරුවරුන් පෙන්වා දුන්නේ මෙම චෝදනා විභාග කිරීම සඳහා නීතිපතිවරයාගේ සහාය ද ලබා ගැනීම අවශ්‍ය බවයි.
ඒ අනුව මෙම පැමිණිල්ල ලබන 07 වනදා සලකා බැලීමට නියම විය.
එදින නීතිපති දෙපාර්තමේන්තුවේ නියෝජිතයකුටද අධිකරණ හමුවේ පෙනීසිටින්නැයි දන්වා අධිකරණය නොතීසි නිකුත් කළේය.

බාසුරු ජයවර්ධන