මාසිකව රුපියල් පන්දහසේ දීමනාව ලබාදීම සඳහා පාවිච්චි කර ඇත්තේ සමෘද්ධි සංවර්ධන දෙපාර්තමේන්තුව යටතේ ඇති සමෘද්ධි ප්‍රජාමූල බැංකුවලින් සහ සමෘද්ධි සංවර්ධන දෙපාර්තමේන්තුවේ සුභසාධන අරමුදල්වලින් බව සති දෙකකට පෙර අනිද්දා පුවත්පත හෙළිදරව් කළේය. ඒ පිළිබඳව විවිධ දේශපාලන සංවාද ආදියෙහි දේශපාලනඥයන් කරුණු මතුකර තිබුණි. අනිද්දා පුවත වෙබ් අඩවි ගණනාවකින් උපුටාගෙන තිබුණි. අප කතාකරන මොහොත දක්වා ආණ්ඩුව එය ප්‍රතික්ෂේප කර නැත.

එම ගනුදෙනු සිදුවූ ආකාරය පිළිබඳව තොරතුරු අප සතුව ඇති නිසා එය ප්‍රතික්ෂේප කිරීමේ හැකියාවක්ද නැත. සහනාධාර මුදල් ගෙවීම සඳහා රටේ විවිධ ප්‍රදේශවල පිහිටි සමෘද්ධි බැංකුවල හා සමෘද්ධි සංවර්ධන දෙපාර්තමේන්තුවේ අරමුදල්වලින් මුදල් ලබාගෙන තිබුණි. සමෘද්ධි සංවර්ධන දෙපාර්තමේන්තුවේ අපගේ ආරංචි මාර්ග සඳහන් කළ ආකාරයට මෙම රුපියල් 5000 දීමනා ගෙවීම සඳහා රුපියල් මිලියන 26,000ක් හෙවත් කෝටි 2600ක පමණ මුදලක් සමෘද්ධි අරමුදල් භාවිත කර තිබුණි. සමෘද්ධි සංවර්ධන දෙපාර්තමේන්තුවේ අධ්‍යක්ෂ ජෙනරාල්වරයාගේ නමින් ලංකා බැංකුවේ ඇති අංක 7041562 දරන ගිණුම මගින් එම මුදල් ගෙවීම් කර තිබුණු රටේ විවිධ ප්‍රදේශවල සමෘද්ධි බැංකු ගිණුම්වල ඇති මුදල් එම ගිණුමට බැර කර තිබුණි.

ලංකා බැංකුවේ අංක 76488889 දරන ස්ථාවර තැන්පත් ගිණුමෙන්ද මුදල් ලබාගෙන තිබෙන අතර සමෘද්ධි සංවර්ධන දෙපාර්තමේන්තුව නමින් ලංකා බැංකුවේ ඇති අංක 3417925 දරන ගිණුමෙන්ද සමෘද්ධි සංවර්ධන දෙපාර්තමේන්තුවේ අධ්‍යක්ෂ ජෙනරාල්වරයාගේ නමින් ඇති පෙර කී ගිණුමට මුදල් බැර කර තිබෙන බව අපේ මුල් හෙළිදරව් වේ සඳහන් විය. ඒ අනුව අප්‍රේල්  03 වැනිදා රුපියල් මිලියන 2,940ක්, අප්‍රේල්  09 වැනිදා රුපියල් මිලියන 55ක්, රු. මිලියන 936ක්, රු. මිලියන 1,435ක් වශයෙන් කොටස් තුනක්, අප්‍රේල් 15 රුපියල් මිලියන 1,435ක්, අප්‍රේල් 17 වැනිදා රුපියල් මිලියන 9,721ක් ආදි වශයෙන් මුදල් යොමු කර ඇතැයි අපි සඳහන් කළෙමු.

මෙලෙස සමෘද්ධිලාභීන්ගේ යහපත වෙනුවෙන් ඇති මුදල්වලින් ගෙවා ඇති 5000 සහනාධාරය උපරිම ඵලදායී ලෙස, සහනාධාර ලැබිය යුතු අයටම ලැබුණා නම් ගැටලුවක් නැත. එහෙත් ඒ වෙනුවට එය දේශපාලන සෙල්ලමක්ව ඇති බව දැන් රටම පිළිගත් කාරණාවකි.

සමෘද්ධි බැංකු ගිණුම්

පසුගිය සතියේ සමෘද්ධි සංවර්ධන දෙපාර්තමේනුවේ අධ්‍යක්ෂ ජෙනරාල්වරයා මාධ්‍ය වෙත කියා තිබුණේ මැයි මාසයේදී රුපියල් 5000 සහනාධාරය ලබාගැනීමට කැමති පුද්ගලයන් සමෘද්ධි බැංකුවක ගිණුමක් විවෘත කළ යුතු බවත්, එම ගිණුමට මුදල් බැර කරන බවත්ය. ඒ අනුව සාමාජිකයන් නොවන අය ආරම්භ කරන අන්දමේ ඉතිරිකිරීමේ ගිණුමක් ඔවුන් ආරම්භ කළ යුතුය. සමෘද්ධිලාභීන් හෝ සමෘද්ධි බැංකුවල ගනුදෙනුකරුවන් නොවන අයත්, රුපියල් සීයක් බැංකුවට බැර කොට එවැනි ගිණුමක් විවෘත කළ යුතුය.

මෙලෙස බැංකු ගිණුම් ඇති කොට, එයට මුදල් බැර කිරීමට හේතුව ලෙස සමෘද්ධි සංවර්ධන දෙපාර්තමේන්තුවේ අධ්‍යක්ෂ ජෙනරාල්වරයා කියන්නේ අප්‍රේල් මාසයේ මුදල් ලබාදීමේදී එකම පුද්ගලයා තොරතුරු විකෘති කිරීමේ සිදුවීම් තිබීම නිසා බැංකුවලින් මුදල් දෙන බවය.

ගමේ සිටින නිලධාරීන් කිහිපදෙනෙකු හා ප්‍රාදේශීය මහජන නියෝජතයා සිටින කමිටුවකින් නම් පරීක්ෂා කළ පසුවත්, එකම පුද්ගලයා දෙවතාවක් මුදල් ගෙන තිබේ නම් වරද කාගේද? ගමේ සිටින නිලධාරීන්ට පුද්ගලයන් හඳුනාගැනීමේ අසීරුවක් තිබෙනවායැයි ආණ්ඩුවට ඇති උපකල්පනය ප්‍රාදේශීය මහජන නියෝජිතයන්වත් කමිටුවට එකතු කරන්නට හේතුවක් විය. එයින් පසුවත් එකම කෙනාට දෙවතාවක් මුදල් ගෙවූ බව සමෘද්ධි සංවර්ධන දෙපාර්තමේන්තුවේ අධ්‍යක්ෂ ජෙනරාල්වරයා කියයි. එහි වරද ඇත්තේ කොතැනදැයි අමුතුවෙන් කිව යුතු නැත. ගමේ ඉන්න මිනිසුන් දන්නේ නැතිද? එකම කෙනා දෙවතාවක් මුදල් ගත් බව කියන්න බැරිද?

ඊටත් වඩා වැදගත් කාරණාව වන්නේ මුදල් ලබාගැනීමේදී එවැනි අක්‍රමිකතා සිදුවෙනවා නම් සමෘද්ධි බැංකුවලින් මුදල් ලබාදීම කිසිදු විසඳුමක් නොවන බවය. සමෘද්ධි බැංකු කියන්නේද අක්‍රමිකතා ගුහාය. (ඒ ගැන මේ සටහනේ ඉදිරියේදී වැඩිදුර විස්තර කරන්නෙමු.) සමෘද්ධි සංවර්ධන නිලධාරීන් පවසන ආකාරයට දැනටමත් ඔවුන්ට වාචිකව උපදෙස් ලැබී ඇත්තේ බැංකු ගිණුමක් පටන්ගැනීමට අයදුම්පත් ඉදිරිපත් කොට, එම ගිණුමේ තැන්පත් කිරීමට රුපියල් සීයක මුදලක් ලබාදුන් අයට රුපියල් පන්දාහේ සහනාධාරය ලබාදෙන ලෙසය. ව්‍යාජ තොරතුරු ඉදිරිපත් කොට දෙවතාවක් මුදල් ලබාගැනීමේ සිද්ධි කලින් වාර්තා වුණා නම්, අයදුම්පතේ වැරදි තොරතුරු දමා දෙවතාවක් මුදල් ගැනීමේ සිදුවීම් නැවත වාර්තා විය හැකිය.

වාර්තා වන ආකාරයට සමෘද්ධි ප්‍රතිලාභ ගිණුම් තිබෙන සමෘද්ධි සහනලාභීන් හා අනෙකුත් සහනාධාරවලට හිමිකම් කී අය සඳහා දැනටමත් රුපියල් පන්දාහේ දීමනාව ලබාදෙමින් සිටී. ඒ පිළිබඳව මාධ්‍ය වලින් විවිධ ප්‍රදේශවලට අදාළව කරුණු වාර්තා වී ඇත.

එහෙත් සමෘද්ධිලාභී පොරොත්තු ලේඛනයේ සිටින පවුල්, ජීවනෝපාය අහිමි වූ පවුල්, අභියාචනා ඉදිරිපත් කර ඇති පවුල්, වැඩිහිටි දීමනාලාභීන්, ආබාධිත දීමනාලාභීන්, වකුගඩු දීමනාලාභීන්, සියවස් සපිරි අය ඇතුළු පුද්ගලයන්ට දීමනා ලබාගත හැක්කේ රුපියල් සීයක් ගෙවා ගිණුම් අරඹන්නට අයදුම්පත් බාරදීමෙන් පසුවය. ඒ අනුව මුදල් ඔවුන්ගේ අතට ලබාදෙනවා වෙනුවට, ඔවුන්ගේ ගිණුමට නිකුත් කළ බව ප්‍රකාශ කරන්නට ඉඩ ඇත.

ප්‍රායෝගිකව මෙය ගමන් කරන්නේ කොතැනටදැයි අපට අනුමාන කළ හැකිය. ඒ බව පැහැදිලි කිරීමට වෙනත් කතාවක් කිව යුතුය.

කැබිනට් පත්‍රිකාවක්

මැයි 14 වැනිදා කැබිනට් තීන්දු දැනුම්දීමේ මාධ්‍ය හමුවේදී කැබිනට් මාධ්‍ය ප්‍රකාශක බන්දුල ගුණවර්ධන කීවේ මැයි මාසයේදී රුපියල් 5000 දීමනාව ලබාදීම සඳහා රුපියල් කෝටි 2572ක මුදලක් වෙන් කරගැනීම සඳහා සෞඛ්‍ය ඇමතිනි පවිත්‍රා වන්නිආරච්චි ඉදිරිපත් කළ කැබිනට් පත්‍රිකාවකට අනුමැතිය ලැබුණු බවය. ඒ අනුව මැයි මාසයේදී දීමනාව ගෙවන්නට සූදානම්ව ඉන්නේ සමෘද්ධි බැංකුවල ඇති මුදල්වලින් නොවේ. කැබිනට් අනුමැතිය මත ඒකාබද්ධ අරමුදලෙන් නිකුත් කළ මුදල්වලින් එම සහනාධාරය ගෙවීමට නියමිත බව පෙනේ.

ඒ මුදල් බැංකුවලට

අපට පෙනෙන ආකාරයට සමෘද්ධි බැංකු ගිණුම් ආරම්භ කරන්නැයි කියා, එම බැංකු ගිණුම්වලට මුදල් නිකුත් කරන බව ඇත්තේ සමෘද්ධි බැංකුවලට මුදල් එකතු කිරීමේ උත්සාහයක් ලෙසය. අප්‍රේල් මාසයේදී මුදල් ගෙවන්නට බැංකුවලින් දැවැන්ත මුදලක් ඉවත් කරගත් පසුව, බැංකුවලට නැවත යම් මුදල් ප්‍රමාණයක් එකතු කිරීමට මැයි මාසයේ ආධාර බැංකුවලට නිකුත් කිරීමෙන් උත්සාහ කරනවා විය හැකිය.

සමෘද්ධි ගිණුම්වලට ඒ මුදල් බැර කළ පසුව, බැංකු ගිණුමෙන් මුදල් නොගන්නා අය සැලකිය යුතු ප්‍රමාණයක් සිටිය හැකි නිසා යම් මුදලක් ඉතිරි වනු ඇත. දැනටත් මැයි මාසය අවසන්ය. අලුත් ගිණුම් විවෘත කිරීමටත්, ඒවාට අදාළ ගිණුම් පොත් ඇතුළු ලිපිගොනු සැකසීමටත් කල් ගත වන බව සමෘද්ධි සංවර්ධන දෙපාර්තමේන්තුවේ වෘත්තීය සමිති පවා පෙන්වාදී තිබේ. ඒ අනුව මෙම වසංගතයෙන් ආපදාවට ලක්වූවන්ගේ ආර්ථික අසීරුතා අඩු වීමෙන් පසුව බැංකුවට මුදල් වැටුණත් එය හදිසියේ ඉවත් කර නොගනු ඇත. ඒ අනුව මීට පෙර බැංකුවලින් ඉවත් කරගත් මුදල් යම් තරමකට ආවරණය කරගත හැකිවනු ඇත.

සමෘද්ධි බැංකුවේ අරමුණු

සමෘද්ධි ප්‍රජාමූල බැංකු ඇතුළු සමෘද්ධි සංවර්ධන දෙපාර්තමේන්තුවේ අරමුදල්වලින් රුපියල් 5000 සහනාධාරය ගෙවා තිබීම ගැටලුවක් නොවන බව කෙනෙකුට තර්ක කළ හැකිය. එහෙත් දිවයින පුරා ඇති 1000කට මඳක් වැඩි සමෘද්ධි ප්‍රජාමූල බැංකු පිහිටුවා ඇත්තේ අරමුණු රැසක් සමඟය. සමෘද්ධි සහනාධාර ලබන පුද්ගලයන්ගේ සකසුරුවම්කම, ඉතිරිකිරීම් හා ඔවුන් ආයෝජනය සඳහා පෙළඹවීම එක් අරමුණකි. විවිධ කටයුතු සඳහා ණය ලබාදීම, රක්ෂණ ක්‍රම ක්‍රියාත්මක කිරීම ආදි සමෘද්ධිලාභීන්ගේ ජීවන තත්වය ඉහළ නැංවීමේ කටයුතු රැසක් සමෘද්ධි ප්‍රජාමූල බැංකුවලින් කළ යුතුය.

සමෘද්ධි සහනය ලබාදීමට අරමුණක් තිබෙනවා නම් ඒ අරමුණ විය යුත්තේ තාවකාලික සහනයක් දීම පමණි. සමෘද්ධි දෙපාර්තමේන්තුවේ සැබෑ අරමුණ විය යුතු, දිළිඳු පුද්ගලයන් දිළිඳුකමින් ඉහළ නංවා, ඔවුන් ආර්ථික වශයෙන් ඉහළ නැංවීමේ වගකීම ඇත්තේ සමෘද්ධි ප්‍රජාමූල බැංකුවලටය. සරලව කීවොත් සමෘද්ධි බැංකුවල මුදල් ඇත්තේ මිනිසුන්ගේ දුප්පත්කම තුරන් කිරීමටය.

එහෙත් 2018 වර්ෂයේ විශේෂ විගණකාධිපති වාර්තාවක විශේෂයෙන්ම සඳහන් වන පරිදි, දුප්පත්කම තුරන් කරමින්, සමෘද්ධිලාභීන්ට සහනාධාර නොලබා ස්වයංපෝෂිත තත්වයට පත් කරන්නටත් සමෘද්ධි සංවර්ධන දෙපාර්තමේන්තුව ප්‍රතිපත්ති සකසා නැත. ඒ සඳහා වැඩපිළිවෙළක් නැත. එය සමෘද්ධි බැංකුවල කාර්යභාරය වුණත්, එය ඉටු කරන්නේ නැත. සරලව කීවොත්, මාසෙන් මාසෙට සහනාධාර බෙදනවා මිස සමෘද්ධි දෙපාර්තමේන්තුව තමන්ගේ ඇත්තම රාජකාරිය කරන්නේ නැත.

හොර ගුහා

සමෘද්ධි ප්‍රජාමූල බැංකු විගණනයට ලක් කිරීමේ හැකියාව විගණකාධිපති දෙපාර්තමේන්තුවට නැත. සමෘද්ධි සංවර්ධන දෙපාර්තමේන්තුවේ ඇති තොරතුරු අනුව විගණකාධිපති දෙපාර්තමේන්තුව සිය 2018 වාර්තාවෙන් පෙන්වන්නේ 2002 සිට 2018 දක්වා සමෘද්ධි බැංකුවල නිලධාරීන් කර ඇති මූල්‍ය අපරාධ ස්වරූපයේ ගනුදෙනු 107ක් සම්බන්ධයෙන් පියවර ගෙන නොමැති බවය. ඒ කියන්නේ, සමෘද්ධි බැංකුවල වංචා දූෂණ ගැන පියවර ගැනීමේ සංස්කෘතියක් නැත.

එලෙස පියවර නොගත් සිදුවීම් අතර සමෘද්ධිලාභීන්ට බලපෑම් කොට කොඩි අලෙවි කිරීම් ආදියෙන් මුදල් එකතු කිරීම්, අරමුදල් අවභාවිත කිරීම්, ප්‍රතිලාභීන්ට ණය දෙන බවට ව්‍යාජ ලේඛන සකස් කොට මුදල් වංචා කිරීම් ආදි මුදල් අක්‍රමිකතා සහ අපරාධ ඇත.

සමෘද්ධි ප්‍රජාමූල බැංකුවල මුදල් විවිධ දේශපාලන කටයුතු සඳහා එම ගිණුම්වල මුදල් යොදාගැනීම සඳහා මීට පෙරද චෝදනා එල්ල වී තිබුණි. 2018 වර්ෂයට අදාළ විගණකාධිපති වාර්තාවකින් පෙන්වාදී ඇත්තේ සමෘද්ධි ප්‍රජාමූල බැංකුවල ගිණුම් හිමියන්ගේ ලැබීම්, ගෙවීම්, පොලී ලැබීම් සටහන් නොකර ශේෂය පමණක් සටහන් කිරීම, එය මාස කිහිපයකට වතාවක් සිදුකිරීම, බැංකු පොත්වල අක්‍රමවත් ආකාරයට ගිණුම් ශේෂය සටහන් කිරීම ඇතුළු ගැටලු තිබී ඇති බවයි.

මේ අක්‍රමිකවත් බව ගැන ප්‍රශ්න කිරීමට තරම් දැනුමක් හෝ අවබෝධයක් සමෘද්ධිලාභීන්ට නැත. ඒ අනුව සමෘද්ධි ප්‍රජාමූල බැංකුවල විනිවිදභාවය ඉතා දුර්වලය. එම විගණකාධිපති වාර්තාවේම බැංකු පොත් නිකුත් නොකිරීම ඇතුළු හේතු නිසා තමන්ගේම බැංකු ගිණුමේ ඇති මුදල් ලබාගැනීමට සමෘද්ධි ප්‍රතිලාභීන්ට නොහැකි වූ බව වාර්තා කර තිබුණි. ඔවුන් කළ නියැදි පරීක්ෂාවලදී ගිණුම් විශාල සංඛ්‍යාවක එවැනි වැරදි තිබී ඇත.

විගණකාධිපති වාර්තාවේ සඳහන් කර ඇත්තේ ප්‍රජාමූල බැංකු හා බැංකු සමිති පද්ධතිය තුළ 2014ට පෙර  ‘අනාවරණය කරගත්’ මූල්‍ය වංචාවල වටිනාකම පමණක් රුපියල් මිලියන 12කි. ඒ අනුව අනාවරණය නොවූ වංචා කොපමණ විය හැකිද?

ඊට අමතරව සමෘද්ධි සංවර්ධන භාර අරමුදලේ මුදල්ද එම අරමුදලේ අරමුණුවලට පිටින් යෙදවීමේ සිදුවීම් වාර්තා වී ඇත. යහපාලන ආණ්ඩුව පැවති 2017 වර්ෂයේදී විගණකාධිපති දෙපාර්තමේන්තුව රුපියල් මිලියන 107ක් වටිනා එවැනි ගනුදෙනු නිරීක්ෂණය කර තිබුණි.

විගණකාධිපති වාර්තාවේ නිගමනවල ඇත්තේ මූල්‍ය වංචා සම්බන්ධයෙන් කාර්යක්ෂමව කටයුතු නොකිරීමත්, සමෘද්ධිලාභීන් වෙනුවෙන් ගොඩනඟා ඇති අරමුදල් ප්‍රතිලාභීන්ව නගාසිටුවීමට පිටින් වෙනත් අරමුණුවලට යොදවා ඇති බවත්ය. සරලව අපට පෙනෙන්නේ සමෘද්ධි ප්‍රජාමූල බැංකු හොරගුහා බවට පත්ව තිබුණත්, ඒවා ගැන නිසි ක්‍රියාමාර්ග ගෙන නොමැති බවය.

සමෘද්ධි බැංකුවලින් මුදල් ඇදීමත්, නැවත සමෘද්ධි බැංකු හරහා මුදල් ගෙවීමත් කරන්නේ එවැනි පසුබිමකය. පරණ සිදුවීම් ගැන සලකා බලන විට මේවා ගැනත් පරීක්ෂණ සිදු නොවනු ඇති බව පැහැදිලිය.

අප්‍රේල් මාසේ 5000 ගෙවන්න කෝටි 4815ක් වැය වුණාද?

අප අප්‍රේල් 17 අනිද්දා පුවත්පතේ මුල් පුවතින් හෙළිදරව් කළ පරිදි රුපියල් පන්දහසේ සහනාධාර ලබාදීම සඳහා රටේ විවිධ ප්‍රදේශවල ඇති සමෘද්ධි ප්‍රජාමූල බැංකු, ස්ථාවර තැන්පතු ආදියෙන් මුදල් ලබාගෙන ඇත්තේ සමෘද්ධි අධ්‍යක්ෂ ජෙනරාල්වරයාගේ තනතුරු නාමයෙන් ඇති සෙත්සිරිපාය ලංකා බැංකු ශාඛාවේ ගිණුමකටය. ගිණුම් අංකය 7041562 වේ. කෙසේ වෙතත් එම මුල් පුවතෙහි බැංකු ගිණුමේ මුදල් ගනුදෙනු සිදුවී ඇති ආකාරය විස්තරාත්මකව සඳහන් කර තිබුණේ නැත.

ගනුදෙනු සංඛ්‍යාව විශාල නිසා විස්තරාත්මකව කරුණු සඳහන් කළ නොහැකි වුණත්, උදාහරණ ලෙස ගනුදෙනු කිහිපයක් සඳහන් කිරීම වටී. අප්‍රේල් මාසය ආරම්භ වන විට එම ගිණුමේ තිබී ඇති ආරම්භක ශේෂය රුපියල් 3000ක් පමණි. අප්‍රේල් මාසය අවසානයේදී ගිණුමේ රුපියල් මිලියන 16.71ක් තිබී ඇත.

එහෙත් ඒ අතර මැද්දේ කෝටි ගණන් මුදල් එහේ මෙහේ ගමන් කර ඇත. ඒ මාසය ඇතුළත රුපියල් මිලියන 48,174ක් හෙවත් රුපියල් කෝටි 4817ක් ගිණුමට ලැබී ඇත. මාසය ඇතුළත රුපියල් මිලියන 48,157ක් හෙවත් කෝටි 4815ක් ඉවත් කරගෙන ඇත.

මුදල් ලැබී ඇත්තේ එක් තැනකින් නොවේ. ලංකාවේ විවිධ ප්‍රදේශවල සමෘද්ධි බැංකු සිය ගණනකින්ය. ඒ මුදල් ඉවත් කර ඇත්තේද එක් තැනකට නොවේ. ලංකාවේ එක් එක් දිස්ත්‍රික්කවල ඇති විවිධ ගිණුම්වලට කොටස් වශයෙන් මුදල් යවා ඇත. ඒ මුදල් යවා ඇත්තේ ආධාර බෙදන්නට බව පැහැදිළිය.

රුපියල් 3000ක් තිබුණු ගිණුමකට ලංකාවේ හතරවටෙන් අප්‍රේල් මාසය ඇතුළත මුදල් ලැබීමත්, ඒ මුදල් සියල්ලම පාහේ ඉවත් කරගැනීමත් නිසා කෙනෙකුට ඒ ගැන සැකයක් ඇතොත් තහවුරු කරගත හැකිය. ඊටත් අමතරව මුදල් එවා ඇත්තේ 5000 සහනාධාරය වෙනුවෙන් නොවේදැයි ඇති සැකය තහවුරු කරගත හැකි වන්නේ ඇතැම් අවස්ථාවල සමෘද්ධි බැංකු කළමණාකරුවන් මුදල් එවීමේදී සටහනක් ලෙස ‘කොවිඞ්-19 5000’ යනුවෙන් හෝ ‘කොවිඞ්-19 ආධාර’ යනුවෙන් ඉංග්‍රීසි බසින් යොදා තිබීම නිසාය.

මෙලෙස සිදුව ඇති ගනුදෙනු සංඛ්‍යාව සිය ගණනක් වුණත්, ඉන් ගනුදෙනු කිහිපයක් උදාහරණ ලෙස දැක්විය හැකිය.

මාසයේ මුල් දින කිහිපයෙහි සමෘද්ධි සංවර්ධන දෙපාර්තමේන්තුවේ ගිණුම් වලින් මුදල් ලබාගෙන ඇත. උදාහරණයක් ලෙස අප්‍රේල් 08 වැනිදා දිවිනැගුම දෙපාර්තමේන්තුවේ ගිණුමකින් රුපියල් මිලියන 2,940ක් ගිණුමට තැන්පත් කර ඇත. එදිනම අනුරාධපුරට රුපියයල් මිලියන 1,579ක් යවා ඇත. අප්‍රේල් 09 වැනිදාත් අනුරාධපුරට මිලියන 583ක් යවා ඇත. අප්‍රේල් 20 වැනිදා අනුරාධපුරට මිලියන 4,414ක් යවා ඇත.

අප්‍රේල් 20 වැනිදා ගම්පහට මිලියන 202ක් යවා ඇත. අප්‍රේල් 24 වැනිදා කෑගල්ලට මිලියන 340ක් යවා ඇත. මෙලෙස රටේ දිස්ත්‍රික්ක ගණනාවකට මුදල් යවා ඇත. අප්‍රේල් 30 වැනිදා රුපියල් මිලියන 217ක් ලබාගත් අවස්ථාවේ සටහනක් ලෙස ‘Covid-19 5000’ යනුවෙන් යොදා ඇත.

ඊට අමතරව සමෘද්ධිලාභීන් වෙනුවෙන් සමෘද්ධි සංවර්ධන දෙපාර්තමේන්තුව නමින් තිබූ ස්ථාවර තැන්පතු වසා දමා ඒවායේ මුදල්ද ලබාගෙන තිබේ. අප්‍රේල් 24 වැනිදා 85184577 අංකය දරණ ස්ථාවර තැන්පතුව වසා රුපියල් මිලියන 1,627ක් ලබාගෙන තිබේ. එදිනම අංක 8192315 දරණ ස්ථාවර තැන්පතුව වසා රුපියල් මිලියන 650ක් ලබාගෙන ඇත.

රටේ විවිධ ප්‍රදේශවල සමෘද්ධි බැංකු වලින් මුදල් එවා ඇත්තේ ඇතැම්විට ලක්ෂයක් හෝ දෙකක්ය. තවත් විටෙක ලක්ෂයකට පවා අඩුය. බැංකු අතොළොස්සක් මිලියනයට වැඩි මුදල් එවා ඇත. ලංකාවේ සමෘද්ධි බැංකු තමන්ට ඇති හැටියට, මේ දේශපාලන මුදල් බෙදීමට දායක වී ඇති සේය.

කටියාව සමෘද්ධි බැංකුවෙන් අප්‍රේල් 24 වැනිදා මිලියන 1.6ක් තැන්පත් කර ඇත. බුලත්කොහුපිටියේ සමෘද්ධි බැංකුවේ මැනේජර්වරයා අප්‍රේල් 24 වැනිදා රුපියල් ලක්ෂ 6ක් තැන්පත් කරද්දී ‘කොවිඩ් 19 5000’ යනුවෙන් සටහනක් යොදා තිබේ. දෙහිඅත්තකණ්ඩියේ සමෘද්ධි බැංකුවෙන් රුපියල් මිලියන 1.1කි.

අප මුලින් කී පරිදි මාසය පුරා වරින් වර රුපියල් කෝටි 4815ක් ඉවත් කර ඇත. කෙසේ වෙතත් එම සම්පූර්ණ මුදල රුපියල් 5000 සහනාධාරය ලබාදීමට පමණක් වැයවුණාදැයි නොදනිමු. මුලින් පවුල් ලක්ෂ 78ක් සඳහා ආධාර ලබාදුන් බව කියා තිබුණි. රටේම සිටින මුළු පවුල් සංඛ්‍යාවට වඩා ඒ සංඛ්‍යාව වැඩිය. එහෙත් පුද්ගලයන් ලක්ෂ 78කට මුදල් දුන්නායැයි සිතමු. රුපියල් 5000 ගාණේ එතරම් පිරිසකට මුදල් බෙදන්නට කෝටි 3900ක් වැය වේ. ඒ අනුව තවත් කෝටි 1000කට ආසන්න මුදලක් මෙම ගිණුම හරහා කොහේ ගියාදැයි තවදුරටත් විමසිය යුතුව තිබේ.