සමගි ජන බලවේගයෙන් මහමැතිවරණය සඳහා නාමයෝජනා බාරදී ඇති පළාත් පාලන ආයතන සභිකයන්ගේ එම ධුර එක්සත් ජාතික පක්ෂ සාමාජිකත්වය ඉවත් කිරීමත් සමඟ අහෝසි වන බව එජාපයේ හිටපු පාර්ලිමේන්තු මන්ත්‍රී ආශු මාරසිංහ පවසයි.

සමගි ජන බලවේගයෙන් නාමයෝජනා ලබාදී ඇති එම පිරිසගෙන් ඒ සම්බන්ධයෙන් දැනට නිදහසට කරුණු විමසා ඇති බවත්, මැයි 29 වැනිදා පැවැත්වෙන පක්ෂ කෘත්‍යාධිකාරී මණ්ඩල රැස්වීමේදී එම පිරිසගේ පක්ෂ සාමාජිකත්වය අහෝසි කිරීමේ අවසන් තිරීණය ගෙන මැතිවරණ කොමිසමට දැනුම්දීම සිදුකරන බවත් ආශු මාරසිංහ මහතා පවසයි. ඒ අනුව එම පළාත් පාලන සභික ධුර සඳහා අලුත් අය පත්කරන බවද ඔහු පවසයි.

එමෙන්ම සමගි ජන බලවේගයෙන් නාමයෝජනා ලබාදී ඇති හිටපු පළාත් සභා හා පාර්ලිමේන්තු මන්ත්‍රීවරුන්ගේද පක්ෂය තුළ දැරූ සියලු තනතුරු හා ආසන සංවිධායක ධුර පක්ෂ සාමාජිකත්වය අහෝසි කිරීමත් සමඟ අහෝසි වන බවත්, එම තනතුරු හා සංවිධායක ධුරවලට අලුත් අය පත්කරන බවත් ඔහු වැඩිදුරටත් පැවසීය.

සමගි ජන බලවේගයෙන් මහමැතිවරණයට නාමයෝජනා ලබාදීම සම්බන්ධයෙන් එජාප මහලේකම් අකිල විරාජ් කාරියවසම් එහි සාමාජිකයන් 102 දෙනෙකුගෙන් නිදහසට කරුණු විමසා තිබුණි.■