ශ‍්‍රී ලංකාවේ ජනාධිපතිධුරයට ගෝඨාභය රාජපක්ෂ මහතා පත්වීමෙන් පසුව ශ‍්‍රී ලංකාව තුළ මානව හිමිකම් පිළිබඳව ඇති ගෞරවය තීරණාත්මක ලෙස අවදානමකට ලක්ව ඇතැයි හියුමන් රයිට්ස් වොච් සංවිධානයේ නවතම වාර්තාවෙහි සඳහන් කර ඇත.

ජනාධිපති ගෝඨාභය රාජපක්ෂ සහ අගමැති මහින්ද රාජපක්ෂ යන දෙදෙනා මීට පෙර ආණ්ඩු සමයේදී මාධ්‍යවේදීන් හා සිවිල් ක‍්‍රියාකාරීන් ඇතුළු පුරවැසියන්ගේ මානව හිමිකම් කඩකිරීමේ සිදුවීම් ගණනාවක් පිළිබඳ චෝදනා ලබා ඇති බව එම වාර්තාවෙන් පෙන්වාදෙයි. ආරක්ෂක අමාත්‍යාංශයේ ලේකම්වරයා ලෙස කටයුතු කළ ගෝඨාභය රාජපක්ෂට යුද අපරාධ පිළිබඳ චෝදනාද ඇති බව එම වාර්තාවේ සඳහන් කර ඇත.

ඊට අමතරව යුද අපරාධ පිළිබඳ චෝදනා ලැබූ ශවේන්ද්‍ර සිල්වා මහතා යුද හමුදාපතිධුරයේ රැුඳී සිටීම මානව හිමිකම් පිළිබඳ අවදානම් සහගත තත්වයක් බවද එහි සඳහන් කර තිබේ.

අපේ‍්‍රල් 21 ත‍්‍රස්ත ප‍්‍රහාරය නිසා ශ‍්‍රී ලංකාවේ 250කට අධික පිරිසක් ඝාතනයට ලක්වූ බවත්, එම සිදුවීමෙන් පසුව නිසි චෝදනා නැතිව ත‍්‍රස්තවාදය වැළැක්වීමේ පනත යටතේ පුද්ගලයන් අත්අඩංගුවට ගෙන රඳවා තබාගැනීම් වාර්තා වූ බවත් එම වාර්තාවෙහි සඳහන් කර ඇත. ඊට අමතරව සංවිධානාත්මක පහරදීම්ද වාර්තා වී ඇතැයි එහි සඳහන්ය. ශ‍්‍රී ලංකාවේ සිටින සරණාගතයන් හා මුස්ලිම් ජනතාව ප‍්‍රධාන ධාරාවේ මාධ්‍යවලින් හා සමාජ මාධ්‍යවලින් සතුරන් ලෙස හඳුන්වා ඇති බවද එහි සඳහන් වෙයි.

මීට අමතරව සුළුතර ලිංගික ප‍්‍රජාවන්ගේ අයිතිවාසිකම් ආරක්ෂා නොකිරීම, මරණ දඬුවම යළි ක‍්‍රියාත්මක කිරීමට උත්සාහ කිරිම, සංක‍්‍රාන්තික යුක්තිය සඳහා වූ ප‍්‍රතිසංස්කරණ ප‍්‍රමාණවත් නොවීම, මානව හිමිකම් ක‍්‍රියාකාරීන්ට සුදුසු පරිසරයක් නොතිබීම ඇතුළු ශ‍්‍රී ලංකාවේ මානව හිමිකම් ක්ෂේත‍්‍රයට අදාළ කරුණු එම වාර්තාවෙහි සඳහන් කර ඇත.

පිටු 652කින් යුතු මෙම වාර්තාව ලොව පුරා රටවල් 100ක මානව හිමිකම් පිළිබඳ තත්වය ඇතුළත් වාර්තාවකි. එය වාර්ෂිකව නිකුත් කරන අතර මෙවර නිකුත් කර ඇත්තේ එහි 30 වැනි වාර්තාවය.

වාර්තාවෙන් ලෝක දේශපාලනයට අදාළව මතු කර තිබුණු ප‍්‍රධානම කාරණාව වන්නේ ලොව පුරා රටවල මානව හිමිකම් ආරක්ෂා කිරීමේ ක‍්‍රියාවලියට චීන රජය තර්ජනයක් වී තිබෙන බවයි. චීනය තමන්ගේ රට අභ්‍යන්තරයෙහි මානව හිමිකම් කඩ කිරිමත්, තම රටෙහි ආර්ථික ශක්තිය පාවිච්චි කරමින් මානව හිමිකම් වෙනුවෙන් පෙනී සිටින ලොව ප‍්‍රමුඛ පෙළේ ආයතන දුර්වල කිරීමත් කරන බව එම වාර්තාවෙන් පෙන්වාදී තිබේ. තමන් සතු මූල්‍යමය ශක්තිය පාවිච්චි කරමින් චීනය මානව හිමිකම් ආරක්ෂාවට එරෙහිව ලෝකය පුරා රටවල් දිරිමත් කරන බවද එහි සඳහන්ය.

අනුරංග ජයසිංහ