මන්ත‍්‍රී මහින්ද රාජපක්‍ෂගේ නීති විරෝධී ආණ්ඩුව, තමන්ට නැති බලයක් ආරෝපණය කරගෙන, මුලින්ම කරන ලද පත්වීම්වලින් එකක් වන්නේ ශී‍්‍රලංකන් ගුවන් සමාගමේ සභාපති තනතුරට, එහි හිටපු ප‍්‍රධාන විධායක නිලධාරියකු වූ කපිල චන්ද්‍රසේන පත්කිරීමයි. මේ පුද්ගලයා මීට පෙර ශී‍්‍ර ලංකන් ගුවන් සමාගමේ ප‍්‍රධාන විධායක නිලධාරියා ලෙස තනතුර දැරූ, 2011 සිට 2015 දක්වා අවුරුදු හතරක කාලය තුළ ශ‍්‍රී ලංකන් ගුවන් සමාගම ලබා ඇති ශුද්ධ අලාභය රුපියල් බිලියන 93කි.

එයින්, 2011/2012 ගිණුම් වර්ෂය තුළ ශ‍්‍රී ලංකන් ලබා ඇති ශුද්ධ අලාභය රුපියල් මිලියන 383කි. 2012/2013 කාලය තුළ ශුද්ධ අලාභය බිලියන 19කි. 2013/2014 කාලය තුළ ශුද්ධ අලාභය රුපියල් බිලියන 26කි. 2014/2015 කාලය තුළ රුපියල් බිලියන 32කි. 2015/2016 ගිණුම් වර්ෂය තුළ ශුද්ධ අලාභය රුපියල් බිලියන 16කි.

මේ කරුණු හෙළිදරව් වුණේ, රාජපක්‍ෂ ආණ්ඩුව කාලයේ ශ‍්‍රීලංකන් හා මිහින් ලංකා ගුවන් සමාගම්වල සිදුවුණු අක‍්‍රමිකතා හා දූෂණ සොයාබැලීම සඳහා ජනාධිපති මෛත‍්‍රිපාල සිරිසේන පත්කළ, මේ වන විට අක‍්‍රිය වී ඇති, ජනාධිපති කොමිසම හමුවේ ඉදිරිපත්වුණු සාක්‍ෂිවලිනි.

එම කොමිසම කොමිසම හමුවේ සාක්‍ෂි දෙමින් ශ‍්‍රීලංකන් ගුවන් සමාගමේ ලේකම් ඩැල්රින් තිරුකුමාර් මහත්මිය ඉදිරිපත් කළ ලේඛනවලට අනුව මේ කරුණු එළිදරව් විය.

විශ‍්‍රාමලත් ශ්‍රේෂ්ඨාධිකරණ විනිසුරු අනිල් ගුණරත්න, අභියාචනාධිකරණ විනිසුරු ගාමිණී අමරසේකර, විශ‍්‍රාමලත් මහාධිකරණ විනිසුරු පියසේන රණසිංහ ඇතුළු පස්දෙනකුගෙන් සමන්විත වූ මෙම ජනාධිපති කොමිසම, ජනාධිපති මෛත‍්‍රීපාල සිරිසේන විසින් පත්කරන ලද්දේ, මහබැංකු බැඳුම්කර වංචාව සෙවීමට පත්කළ ජනාධිපති කොමිසමට පසුවය.

මේ සා අලාභයක් අවුරුදු හතරක සිය සේවා කාලය තුළ ශ‍්‍රීලංකන් සමාගමට අත්කරදුන් කපිල චන්ද්‍රසේන, යළිත් එහි සභාපතිවරයා ලෙස පත්කිරීම, ජනාධිපති මෛත‍්‍රීපාල සිරිසේනගේ කනට ගැහුවාක් වැනි පත්කිරීමක් නොවේද? තමාම පත්කළ කොමිෂන් සභාව ඉදිරියේ හෙළිදරව් වන මේ කම්පනය කරවනසුලූ කරුණු පසුගිය කාලය පුරාම පුවත්පත්වල පිටු ගණන් පළවී තිබෙද්දීත්, ජනාධිපති සිරිසේන කපිල චන්ද්‍රසේනගේ පත්කිරීමට එරෙහි නොවන්නේ ඇයි? මහබැංකුවේ අධිපති ලෙස අර්ජුන් මහේන්ද්‍රන් දෙවැනි වරටත් පත්කිරීමට විරුද්ධව මහ මෙහෙයුමක් කළ ජනාධිපතිවරයා, දැන් මහින්ද රාජපක්‍ෂ කරන මේදූෂිත පත්කිරීම් සම්බන්ධයෙන් මුනිවත රකින්නේ, රාජපක්‍ෂවරුන්ට ආත්මයෙන්ම යටත්වී සිටීමේ සංසාර පුරුද්දේ කොටසක් හැටියටද?

කපිල චන්ද්‍රසේන ගැන ජනාධිපති කොමිසමේදී එළිදරව් වුණේ ඔහුගේ කාලය තුළ එම සමාගම ලද පාඩුව ගැන පමණක් නොවේ.

ඔහු ශ‍්‍රීලංකන් එයාර්ලයින්ස්හි ප‍්‍රධාන විධායක නිලධාරි ලෙස කටයුතු කරමින් මසකට රුපියල් ලක්‍ෂ 15ක වැටුපක්ද ලබාගත් බවයි. වැදගත් කරුණ එය නොවේ. ශ‍්‍රීලංකන්හි එම තනතුරේ එම වැටුප ලබනා අතරම ඔහු ශ‍්‍රී ලංකා ටෙලිකොම් හා මොබිටෙල් යන ආයතනවලද වැඩබලන ප‍්‍රධාන විධායක නිලධාරි ලෙස කටයුතු කළ බවයි. එහෙත් තමා ටෙලිකොම්හි හා මොබිටෙල්හි තනතුරු දරන බව ඔහු කිසිවිටෙකත් ශ‍්‍රීලංකන් කළමනාකාරිත්වය වෙත හෙළිදරව් කර නොතිබිණි. ඒ, ශ‍්‍රීලංකන් සමාගමේ අධ්‍යක්‍ෂවරුන් පූර්ණකාලීනව සමාගම වෙනුවෙන් පමණක් කාලය යෙදවිය යුතුයැයි ඒ වන විට මුදල් අමාත්‍යාංශය කර තිබුණු නියමයෙන් මගහැරීම සඳහාය. පසුව ඔහු උපදේශකයකු හැටියට ටෙලිකොම් වෙතින් හා මොබිටෙල් වෙතින් රුපියල් ලක්‍ෂ 4,50,000ක දීමනාවක් වෙනම ලබාගෙන ඇති බවද කොමිසම හමුවේ එළිදරව් විය.

කොමිසම හමුවේ සාක්‍ෂි දෙමින් ශ‍්‍රීලංකන් ලේකම් ඩැල්රින් තිරුකුමාර් කියාසිටියේ, තමා මිහිාන් ලංකා සමාගමේද අධ්‍යජෂ දුරයක් දරන බව පමණක් කපිල චන්ද්‍රටෙස්න ශ‍්‍රීලංකන් සමාගම වෙත දැනුම් දී තිබුණු බවයි.
එම කොමිසම ඉදිරියේ ටෙලිකොම් සභාපති සිරිසේන කුමාරසිංහ ඉදිරිපත් කළ ලේඛනවලින් පැහැදිලි වුණේ, කපිල චන්ද්‍රසේන නීති විරෝධී ලෙස, එකවර රාජ්‍ය ආයතන තුනක ඉහළ තනතුරු දරමින්, එම තනතුරුවලට අදාළ දීමනා මෙන්ම අනෙකුත් පහසුකම්ද ලබාගෙන ඇති බවයි.

එම ලේඛනවලට අනුව කපිල චන්ද්‍රසේන ටෙලිකොම් සමාගමේ හා මොබිටෙල් සමාගමේ වැඩබලන විධායක නිලධාරි තනතුරට පත්වී තිබුණේ, 2013 අපේ‍්‍රල් 29 වැනිදාය. ඒ වෙනුවෙන් ඔහුට මසකට රුපියල් ලක්‍ෂ 5ක දීමනාවක් ටෙලිකොම් වෙතින් ගෙවා තිබේ. ඊට අමතරව ඔහුගේ දරුවන්ගේ පාසල් ගාස්තුද, සොඛ්‍ය රක්‍ෂණ සඳහාද මුදල් ගෙවා ඇත්තේ ටෙලිකොම් විසිනි.

2014 ජුනි 24වැනිදා සිට, කපිල චන්ද්‍රසේන ටෙලිකොම් හා මොබිටෙල් සඳහා උපදේශකයකු හැටියට කටයුතු කර ඇති අතර, ඒ වෙනුවෙන් ඔහුට ගෙවන ලද මාසික දීමනාව රුපියල් 4,50,000කි. මේ තනතුරේ සිටිමින් ඔහු කර ඇත්තේ ටෙලිකොම් සභාපතිවරයාට විවිධ කාරණා සම්බන්ධයෙන් උපදෙස් සැපයීමයි.

2011 වසර වන තුරු ශ‍්‍රීලංකන් හා මිහින් ලංකා ගුවන් සමාගම්වල අධ්‍යක්‍ෂවරයකු ලෙස පමණක් කටයුතු කළ කපිල චන්ද්‍රසේන, ශ‍්‍රීලංකන්හි ප‍්‍රධාන විධායක තනතුරට පත්කෙරෙන්නේ, 2011 මැයි 3වැනිදා පැවැති විශේෂ අධ්‍යක්‍ෂ මණ්ඩල රැුස්වීමකදීය. එහෙත් ඊට පෙර ප‍්‍රධාන විධායක නිලධාරි තනතුර පුරප්පාඩුවී ඇති බවට පුවත්පත් දැන්වීමක් හෝ පළකර නොතිබිණි. ඔහු එවැනි තනතුරක් සඳහා අයැදුම් කොට ද නොතිබුණු අතර, ඒ නිසාම එම තනතුරට ඔහු සුදුස්සකුද කියාවත් ලේඛනවලින් හා සහතිකවලින් දැනගන්නට අධ්‍යක්‍ෂ මණ්ඩලයට හැකියාවක් තිබුණේද නැත. ඒ අනුව බලන කල, ඔහු සමාගමේ විධායක නිලධාරි ධුරයට පත්කර ඇත්තේ, බඳවාගැනීමේ පටිපාටියට පටහැණිවය.

ශ‍්‍රී ලංකන් සමාගමේ බඳවාගැනීමේ පටිපාටියට අනුව, එහි ප‍්‍රධාන විධායක නිලධාරි තනතුර සඳහා මූලික උපාධියක් හෝ පශ්චාත් උපාධියක් හෝ අදාළ ව්‍යාපාරික ක්‍ෂෙත‍්‍රයට අදාළ උපාධියක් ලබා තිබිය යුතුය. ඒ වාගේම, වාණිජ ගුවන්ගමන් සමාගමක අවුරුදු 15කට වැඩි සේවා පළපුරුද්දක් තිබිය යුතුය. වාණිජ ගුවන්ගමන්, ගුවන්යානා ඉංජිනේරු විද්‍යාව, ගුවන්ගමන් කළමනාකරණය ගැන ගැඹුරු දැනීමක්ද තිබිය යුතුය. 2008දී ප‍්‍රධාන විධායක නිලධාරි ලෙස මනෝජ් ගුණවර්ධන පත්කිරීමේදී මේ සියලූ බඳවාගැනීමේ සුදුසුකම් සලකා බලන ලද නමුත් කපිල චන්ද්‍රසේනගේ පත්වීමේදී ඒවා කිසිවක් සලකා තිබුණේ නැත.

ශ‍්‍රීලංකන්හි ප‍්‍රධාන විධායක නිලධාරී වශයෙන් මුල් අවුරුදු තුනේදී ඔහුට රුපියල් ලක්‍ෂ 15ක වැටුපක්ද ගෙවා ඇත. ඒ අසීමිත ඉන්ධන දීමනාවක්ද, පෞද්ගලික රියැදුරකු සමග කාර් එකක්ද, ක‍්‍රීඩා සමාජ සාමාජිකත්වය සඳහා වසරකට රුපියල් 24,000ක්ද, නිවසේ දුරකථනය හා ජංගම දුරකථනයේ සියලූ බිල් ශ‍්‍රීලංකන් සමාගම විසින් ගෙවාදැමීම ඇතුළු පහසුකම් රැසකට අමතරවය.

2014දී, ඔහුගේ පළමු කොන්ත‍්‍රාත් සේවා කාලය අවසන්වුණු පසුව, ශ‍්‍රීලංකන්හි අධ්‍යක්‍ෂ මණ්ඩලය තවත් අවුරුදු4ක් සඳහා ඔහුගේ සේවා කොන්ත‍්‍රාත්තුව අලූත් කළේය. සාමාන්‍යයෙන් පෞද්ගලික සමාගමක ප‍්‍රධාන තනතුරක් දරන්නකුගේ සේවා කාලය දිගු කෙරෙද්දී, ඔහු එතෙක් සේවය කළ ආකාරය ගැන අංශක 360ක ඇගැයීමක් කරන නමුත්, කපිල චන්ද්‍රසේන සම්බන්ධයෙන් එවැනි කිසිදු ඇගයීමක්ද නොවීය. එහෙත්, ඔහුගේ සේවා කොන්ත‍්‍රාතුව දිගු කිරීමේදී ඔහු එතෙක් ලැබූ වැටුප හා අනෙකුත් දීමනාවලට සියයට පහක වැඩිවීමක් නම් ඇතුළත් විය. ඊටත් අමතරව 2012-2013 වසර සඳහා ඔහුට, ‘ව්‍යාපාරික වශයෙන් වැදගත් පුද්ගලයන්ට’ ගෙවන රුපියල් මිලියන 16ක අතිරේක දීමනාවක්ද ගෙවන ලදි. 2011-2012 වසර සඳහා එම දීමනාව වුණේ මිලියන 6ක් පමණි.

පෞද්ගලික සමාගම්වල ගිණුම් පහසුව සඳහා සාමාන්‍යයෙන් වියදම් මධ්‍යස්ථාන (cost centre)  හෙවත් එක් එක් අංශයට යන වියදම ගණන් බැලීමක් සිදුවෙයි. කපිල චන්ද්‍රසේනගේ ප‍්‍රධාන විධායක නිලධාරී කාර්යාලය සඳහා වියදම 2011/2012 වසර සඳහා රුපියල් මිලියන 13කි. 2012/2013 සඳහා මිලියන 29කි. 2013/2014 සඳහා මිලියන 28කි. 2014/2015 සඳහා මිලියන 26කි.

කපිල චන්ද්‍රසේනගේ අවභාවිතයන් එතැනින් අවසන් නොවේ. බෙලිඅත්තේ, මහින්ද රාජපක්‍ෂගේ සමීප නෑදෑයන්වූ පිරිසකට අයත්, එකම පවුලේ සමාගම් දෙකක් ලෙස ලියාපදිංචි කර ඇති කුමා ස්ටිකර්ස් හා විහඟ මාර්කටින් යන සමාගම් දෙකට නීති විරෝධී ආකාරයෙන් ශ‍්‍රීලංකන්හි ප‍්‍රචාරක පුවරු සවිකිරිමේ ව්‍යාපෘතිය භාරදී ඇත්තේද කපිල චන්ද්‍රසේනය. මේ ප‍්‍රචාරණ සමාගම දෙක සඳහා ශ‍්‍රී ලංකන් සමාගම විසින් ගෙවා ඇති මුදල රුපියල් මිලියන 415ක් හෙවත් රුපියල් ලක්‍ෂ 4,150කි. කිසිම ටෙන්ඩර් කැඳවීමකින් තොරව, ශ‍්‍රීලංකන් ප‍්‍රචාරක පුවරු සවිකිරිම සඳහා අදාළ සමාගම් දෙක තෝරා ගෙන ඇති අතර, සමකාලීන මිල අනුව ඔවුන්ට ගෙවා ඇති මුදල ඉතා වැඩිය. ඒ ඔවුන්ගේ අධික අයකිරිම් නිසාය. හමුවුණු එකම එක ටෙන්ඩර් පත‍්‍රිකාවකින් එළිවුණේ, වෙළෙඳ ප‍්‍රචාරක පුවරු සවිකිරීම සඳහා නැගෙනහිර පළාතේ සමාගමක් රුපියල් 7,90,000ක මිලගණන් ඉදිරිපත් කර තිබෙද්දී, කුමා ස්ටිකර්ස් සමාගමේ මිලගණන රුපියල් 9,90,000ක් වූ බවයි. කොමිසම ඉදිරියේ සාක්‍ෂි දුන් ශ‍්‍රීලංකන් නිලධාරීන්ට අනුව, සෑම ව්‍යාපෘතියක්ම කුමා ස්ටිකර්ස් වෙත ලබා දෙන ලෙස කපිල චන්ද්‍රසේන ඔවුන්ට බලකර තිබේ.

අවුරුදු 9ක් පුරා ලංකාව දූෂිතයන්ගේ දේශයක් බවට පත්කළ රාජපක්‍ෂවරුන්ට නැවතත් රට පාලනය නීති විරෝධීව භාරදී මෛත‍්‍රීපාල සිරිසේන ජනාධිපතිවරයා කර ඇත්තේ, 2015දී සිංහාසනයෙන් පලවා හැරි ¥ෂිතයන් සියල්ලන්ටම තමාගේ ආශීර්වාදය ඇතිව යළිත් සිංහාසනාරූඪ වීමට මග පෑදීම බව මේ වන විට ඉවත් කර ඇතිවා වුණත්, කපිල චන්ද්‍රසේනගේ පත්වීමෙන්ම පමණක් වුණත් පැහැදිලි නොවන්නේද?

 අරුණ ජයවර්ධන