අගෝස්තු 08 වැනිදා පැවති ශ්‍රී ලංකා නිදහස් පක්ෂ මධ්‍යම කාරක සභා රැස්විමේදී ආණ්ඩුවෙන් ඉවත්විම පිළිබඳව වූ යෝජනාව සාකච්ඡාවට නොගත් බව ශ්‍රීලනිප මහලේකම් මහාචාර්ය රෝහණ ලක්ෂ්මන් පියදාස මහතා පැවසීය.

අදාල මධ්‍යම කාරක සභා රැස්වීම ජනාධිපති මෛත්‍රීපාල සිරිසේන මහතාගේ නිල නිවසේදී පවත්වා තිබුණි.

ආණ්ඩුවෙන් ඉවත්විය යුතු බවට ශ්‍රි ලංකා නිදහස් පක්ෂයට බලපෑම් කරන බව ශ්‍රිලනිප 16 දෙනාගේ කණ්ඩායම ප්‍රකාශ කර තිබුණි. එම කණ්ඩායම නියෝජනය කරන පාර්ලිමේන්තු මන්ත්‍රී එස්.බී. දිසානායක මහතා ප්‍රකාශ කර තිබුණේ ආණ්ඩුවෙන් ඉවත්වීම පිළිබඳ ඉදිරියේදී පක්ෂය තුළ සාකච්ඡා කරන බවයි. එසේ වුවද එම මධ්‍යම කාරක සභා රැස්විමට සහභාගි වි තිබුණේ 16 කණ්ඩායම නියෝජනය කරන එස්.බි. දිසානායක, දයාසිරි ජයසේකර, ඩිලාන් පෙරේරා සහ තිලංග සුමතිපාල යන මන්ත්‍රිවරුන් සිව්දෙනා පමණි.

ආණ්ඩුවෙන් ඉවත්විම පිළිබඳව මධ්‍යම කාරක සභාවේදී සාකච්ඡා නොකළ බවට ශ්‍රීලනිප මහලේකම්වරයා කළ ප්‍රකාශය පිළිබඳව එස්.බී. දිසානායක මන්ත්‍රීවරයාගෙන් අනිද්දා පුවත්පත කරුණු විමසීය. එහිදී එස්.බී. දිසානායක අමාත්‍යවරයා ප්‍රකාශ කළේ මධ්‍යම කාරක සභාවේදි සාකච්ඡා කරන කරුණු මාධ්‍යවලට ප්‍රකාශ නොකරන බවය.