ශ්‍රී ලංකා පොදුජන පෙරමුණෙන් මහා මැතිවරණයට ඉදිරිපත් වූ ශ්‍රීලනිප අපේක්ෂකයන් 13 දෙනෙකු මෙවර මහමැතිවරණයෙන් ජයගෙන ඇති බව වාර්තා වේ.

පොලොන්නරුව දිස්ත්‍රික්කයෙන් මෛත්‍රිපාල සිරිසේන, බදුල්ල දිස්ත්‍රික්කයෙන් නිමල්සිරිපාල ද සිල්වා සහ චාමර සම්පත් දසනායක ජයගෙන ඇත. ඊට අමතරව කුරුණෑගල දිස්ත්‍රික්කයෙන් දයාසිරි ජයසේකර සහ ශාන්ත බණ්ඩාර, හම්බන්තොට දිස්ත්‍රික්කයෙන් මහින්ද අමරවීර, කෑගල්ල දිස්ත්‍රික්කයෙන් රංජිත් සියඹලාපිටිය සහ සාරතී දුෂ්මන්ත, ගම්පහ දිස්ත්‍රික්කයෙන් ලසන්ත අලගියවන්න, ගාල්ල දිස්ත්‍රික්කයෙන් ශාන් විජයලාල්, වන්නි දිස්ත්‍රික්කයෙන් කාදර් මස්තාන්, මොනරාගල දිස්ත්‍රික්කයෙන් ජගත් පුෂ්පකුමාර තේරී පත්වී ඇත.

පොලොන්නරුව හා බදුල්ල යන දිස්ත්‍රික්ක දෙකේම පොදුජන පෙරමුණු ලැයිස්තුවේ පළමු තැනට තේරී පත්ව ඇත්තේ ශ්‍රීලනිප අපේක්ෂකයන් වන මෛත්‍රීපාල සිරිසේන හා නිමල් සිරිපාල ද සිල්වාය.

ඊට අමතරව යාපනය දිස්ත්‍රික්කයෙන් ශ්‍රීලනිප යටතේ තරග කොට අංගජන් රාමනාදන් පත්විය.

ශ්‍රීලනිපයට ජාතික ලැයිස්තු මන්ත්‍රීධුරයක් ලැබීමට නියමිත බවත් ඒ අනුව ශ්‍රීලනිප මන්ත්‍රී කණ්ඩායම 15 දෙනෙකුගෙන් සමන්විත වන බවත් එම පක්ෂයේ නායකයෙක් අනිද්දා සමග පැවසීය. මහාචාර්ය රෝහණ ලක්ෂ්මන් පියදාස ශ්‍රීලනිපය නියෝජනය කරමින් පොදුජන පෙරමුණේ ජාතික ලැයිස්තුවේ අපේක්ෂකයෙකු ලෙස නම් කර සිටියේය.

මහා මැතිවරණයට පෙර ශ්‍රීලනිප අපේක්ෂකයන් පරාජය කළ යුතු බව ප්‍රසන්න රණතුංග, රොෂාන් රණසිංහ ඇතුළු පොදුජන පෙරමුණේ අපේක්ෂකයන් ප්‍රචාරය කර තිබුණු අතර මහින්ද රාජපක්ෂ මහතා සහභාගි වූ රැස්වීමකදී ජගත් පුෂ්පකුමාර මහතාට ‘හූ’ කියා තිබුණි.■

අනුරංග ජයසිංහ