ශ‍්‍රීලනිපය ගෝඨාභය රාජපක්ෂ මහතාට සහාය දක්වන්නට තීන්දු කළහොත් ශ‍්‍රීලනිපය සුරැුකීමේ සංවිධානයෙන් පාර්ලිමේන්තු මන්ත‍්‍රී කුමාර වෙල්ගම ජනාධිපතිවරණයට ස්වාධීන අපේක්ෂකයෙකු ලෙස ඉදිරිපත් කිරීමට සැලසුම් කර ඇතැයි ශ‍්‍රීලනිපය සුරැුකීමේ සංවිධානයේ ආරංචිමාර්ග පවසයි.

ඒ පිළිබඳව කළ විමසීමකදී එම සංවිධානයේ ලේකම් නීතිඥ රජික කොඩිතුවක්කු ප‍්‍රකාශ කළේ අපේක්ෂකයා ලෙස කුමාර වෙල්ගම මහතාව ඉදිරිපත් කරනවාද නැද්ද යන්න දැන්ම නිශ්චිතව ප‍්‍රකාශ නොකරන බවත්, ශ‍්‍රීලනිප පාර්ලිමේන්තු මන්ත‍්‍රීවරයෙක්ව හෝ හිටපු පාර්ලිමේන්තු මන්ත‍්‍රීවරයෙක්ව ඉදිරිපත් කරන බව පමණක් දැනට නිශ්චිතව කිව හැකි බවත්ය.

ඔක්තෝබර් 05 වැනිදා රාත‍්‍රියේදී පවත්වන්නට නියමිත ශ‍්‍රීලනිප මධ්‍යම කාරක සභා රැුස්වීමේදී එම පක්ෂයේ ඉදිරි පියවර තීන්දු කරනු ඇති බවත්, ඊට පසු දිනයේ තම කණ්ඩායම තීන්දුවක් ගන්නා බවත් ඔහු පැවසීය. ඔක්තෝබර් 06 වැනිදාට අපේක්ෂකයන්ට ඇප තැන්පත් කළ හැකි බව ඔහු පෙන්වාදුන්නේය.

ශ‍්‍රීලනිපය ගෝඨාභය රාජපක්ෂ මහතාට සහාය දැක්වීම වෙනුවට වෙනත් තීන්දුවක් ගතහොත් තම කණ්ඩායමේ සහයෝගය ශ‍්‍රීලනිපයේ තීන්දුවට ලැබෙන බව ඔහු කීය. එසේ වුවහොත් වෙනම අපේක්ෂකයෙක් ඉදිරිපත් නොකරන බව ඔහු පැවසීය.