පොහොට්ටුව ලකුණ වෙනුවට වෙනත් ලකුණකින් තරග කිරීමට ගෝඨාභය රාජපක්ෂ ඇතුළු පොහොට්ටුවේ ප්‍රබලයන් රැසක් අකැමති වීම නිසා පොදුජන පෙරමුණ හා ශ්‍රීලනිපය අතර සන්ධානයක් ඇති කරගැනීම පිළිබඳ සාකච්ඡා අසාර්ථක වනු ඇතැයි එම පක්ෂ දෙකේ ප්‍රබලයෝ කියති.


පොහොට්ටුව ලකුණට අමතරව ශ්‍රීලනිපය නව සන්ධානයක් සඳහා ඉදිරිපත් කළ කොන්දේසි ගණනාවකට කැමැත්ත පළකිරීම අසීරු බව පොදුජන පෙරමුණ පාර්ශ්වයෙන් අදහස් දැක්වූ නායකයෝ පැවසූහ. පක්ෂ දෙක අතර සාකච්ඡා සිතාමතාම අඩපණ කිරීමේ අරමුණෙන් ශ්‍රීලනිපය දැඩි කොන්දේසි ඉදිරිපත් කර ඇති බව පොදුජන පෙරමුණේ මතය වන බවත්, එම මතය ඉදිරියේදී පක්ෂ දෙකේ සාකච්ඡා අසාර්ථක වූ පසුව ප්‍රචාරය කරන බවත් පොදුජන පෙරමුණේ ප්‍රකාශකයෙක් අනිද්දා සමඟ කීය.


ජනාධිපතිවරණයේදී පවතින පක්ෂවල ලකුණු වෙනස් කළ නොහැකි නිසා පවතින පක්ෂයක ලකුණකින්ම ඉදිරිපත් විය යුතුය. ශ්‍රීලනිපයේ මහලේකම් දයාසිරි ජයසේකර පොදුජන පෙරමුණට යෝජනා කර ඇත්තේ ශ්‍රීලනිපය සමඟ සන්ධානයක් ඇති කරගෙන ගෝඨාභය රාජපක්ෂ මහතා ජනාධිපතිවරණයට ඉදිරිපත් වෙන්නේ නම් පොහොට්ටුව ලකුණ වෙනුවට පොදුජන එක්සත් පෙරමුණේ පුටුව ලකුණ හෝ එක්සත් ජනතා නිදහස් සන්ධානයේ ලකුණ වන බුලත් කොළය යන ලකුණු දෙකෙන් එකක් ලකුණ ලෙස තෝරාගත යුතු බවය.
එහෙත් එම ලකුණු ගැන සාකච්ඡාවලදී ගෝඨාභය රාජපක්ෂ හා ඒකාබද්ධ විපක්ෂයේ සාමාජිකයන් ඊට අකැමැත්තක් දක්වා ඇත. ලකුණ ගැන සලකා බලන්නට එකඟ වී ඇත්තේ බැසිල් රාජපක්ෂ පමණක් බව ශ්‍රීලනිප ප්‍රකාශකයෙක් පැවසීය.


ලකුණ පොහොට්ටුවම විය යුතු බව කියනවා නම් ශ්‍රීලනිපයට සන්ධාන සාකච්ඡාවලට එක්විය නොහැකි බව ඒ පිළිබඳව විමසීමකදී ශ්‍රීලනිප ප්‍රකාශකයෙක් පැවසීය. ඉදිරි පාර්ලිමේන්තුවකදී ශ්‍රීලනිපයට ලබාදිය යුතු ආසන ආදි කොන්දේසි ගණනක් ශ්‍රීලනිපයෙන් ඉදිරිපත් කර ඇතැයිද ඔහු කීය.


කෙසේ වෙතත් මේ ගැන කළ විමසීමකදී ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ ප්‍රකාශ කළේ ලකුණ ඇතුළුව ශ්‍රී ලංකා නිදහස් පක්ෂය ඉදිරිපත් කළ කොන්දේසි පිළිබඳව ඉදිරියේදී සලකා බැලීමට බලාපොරොත්තු වන බවයි. පක්ෂයක ලකුණක් වෙනස් කිරීම පාර්ලිමේන්තු මැතිවරණයකදී නම් කළ හැකි බව ඔහු කීය. එහෙත් ජනාධිපතිවරණයකදී ලකුණක් වෙනස් කළ නොහැකි නිසා පවතින පක්ෂයක ලකුණක් ඉදිරිපත් කළ යුතු බවත්, එසේ ඉදිරිපත් කළ යුතු ලකුණ කුමක්දැයි ගැටලුවක් ඇති බවත් ඔහු කීය.


මේ පිළිබඳ අදහස් දක්වමින් ශ්‍රීලනිප මහලේකම් දයාසිරි ජයසේකර පැවසුවේ ජනාධිපතිවරණයකදී පොදුජන පෙරමුණේ ලකුණ ප්‍රවර්ධනය කිරීමෙන් ශ්‍රීලනිපය මහමැතිවරණයකදී අමාරුවේ වැටෙන බවයි. ඒ නිසා පොහොට්ටුව ලකුණට එකඟ වීම ඒ නිසා කළ නොහැකි බව කීය. මහමැතිවරණය වෙද්දී අලුත් ලකුණක් සමඟ පක්ෂයක් හදාගත හැකි නිසා තාවකාලික පිළියමක් ලෙස පොහොට්ටුව ලකුණෙන් ඉදිරිපත් වීමට පොදුජන පෙරමුණ පැත්තෙන් යෝජනා කළ බවද ඔහු පැවසීය. එහෙත් රාජපක්ෂලා දෙන එවැනි වචන මත පමණක් විශ්වාසය තැබිය නොහැකි බව ඔහු කියයි. එසේ විශ්වාස කර පොහොට්ටුව ලකුණට එකඟ වුණොත් මහමැතිවරණයක් වෙද්දී ශ්‍රීලනිපයේ සාමාජිකයන් පොදුජන පෙරමුණට බඳවාගැනීමෙන් ශ්‍රීලනිපය දියවෙනු ඇතැයි ඔහුගේ අදහසය.