– රජයේ වෛද්‍ය නිලධාරීන්ගේ සංසදය

කොවිඩ්-19වසංගතය පාලනයට අදාළව උපදෙස් ලබාගැනීමේදී රජය වෘත්තීයවේදී අධ්‍යයන සංගමයක් යනු කුමක්දැයි වටහානොගෙන, එම සංගම්වලින් උපදෙස් ලබාගැනීමට කටයුතු නොකිරීම කනගාටුවට කාරණයක් බව රජයේ වෛද්‍ය නිලධාරීන්ගේ සංසදය නිවේදනයක් නිකුත් කරමින් සඳහන් කර ඇත.

එම සංසදයේ සභාපති රුක්ෂාන් බෙල්ලනගේ අත්සනින් යුතුව අප්‍රේල් 08 වැනිදා නිකුත් කරන ලද නිවේදයක මේ බව සඳහන් කර තිබේ.

ශ්‍රී ලංකාව සෞඛ්‍ය ව්‍යසන හමුවේ මීට පෙර සාර්ථකව ජයගත් රටක් බවත් බෝවන රෝග ගණනාවක් තුරන් කිරීමට ශ්‍රී ලංකාව මීට පෙර සමත් වූ බවත් එමගින් පෙන්වාදෙයි. මෙතෙක් පැවති සියලු ව්‍යසනවලදී රටේ සෞඛ්‍ය අමාත්‍යවරයා, සෞඛ්‍ය අමාත්‍යාංශයේ විශේෂඥයන් සහ රාජ්‍ය නායකයා අතර ශක්තිමත් ඍජු සම්බන්ධතාවක් පැවති බව එම සංසදය සඳහන් කර ඇත.

ඒ අනුව රජය සැමවිටකම මෙවැනි අවස්ථාවලදී කටයුතු කළේ ඍජුවම සෞඛ්‍ය ක්ෂේත්‍රයේ සිටින්නාවූ විශේෂඥ වෘත්තිකයන් හා වෘත්තීයවේදී සංගම් හා විශ්වවිද්‍යාල මහාචාර්යවරුන් හා ඇදුරන් සමඟ බව වැඩිදුරටත් ඔවුන් පෙන්වාදී ඇත.

එහෙත් කොවිඩ්-19වසංගතය හමුවේ අවශ්‍ය නිපුණත්වය හා හැකියාව ඇති විශේෂඥ වෛද්‍යවරුන් සමඟ රජය ඍජුවම කටයුතු නොකළ බවත්, තැරැව්කාර වෘත්තීය සමිති සමග බවත් එම සංගමය චෝදනා කර තිබේ. කොවිඩ්-19වසංගතය උත්සන්න වුවහොත්, එයට වගකිව යුතු ප්‍රධාන පාර්ශ්වය වන්නේ රජය බවත් එයට ආසන්නම හේතුව වන්නේ විශේෂඥ සුදුසුකම් නොමැති වෘත්තීය සමිතියක නායක කණ්ඩායමක් පෙරටු කරගෙන රජය එම ප්‍රශ්නයට මුහුණදීම බවත් රජයේ වෛද්‍ය නිලධාරීන්ගේ සංසදයේ අදහස වී තිබේ.

මේ වන විට රටේ විශේෂඥයන් ඉදිරිපත් කරන යෝජනා සහ අදහස් රජයේ නායකයන් වෙත ඍජුවම ඉදිරිපත් කළ නොහැකි බව එම යෝජනා එක් වෘත්තීය සමිතියක් හරහා ඉදිරිපත් කිරීමට සිදුව ඇති බවත් මෙලෙස තැරැව්කරුවන් හරහා යෝජනා ඉදිරිපත් කිරීමට සිදුවීම ගැටලුසහගත බවත් රජයේ වෛද්‍ය නිලධාරීන්ගේ සංසදය වැඩිදුරටත් සඳහන් කර ඇත.

සෞඛ්‍ය ක්ෂේත්‍රයේ සිටි විශේෂඥ කණ්ඩායම් වන වෛද්‍ය පරිපාලකයන්, ප්‍රජා සෞඛ්‍ය විශේෂඥයන්, වසංගත රෝග විශේෂඥයන්, කායික හා ළමා රෝග විශේෂඥයන්, නිර්වින්දන වෛද්‍යවරුන්, ප්‍රසව හා නාරිවේද විශේෂඥයන්, දැඩි සත්කාර විශේෂඥයන්, ක්ෂුද්‍ර ජීවී අංශයේ විශේෂඥයන් කැපී පෙනෙන භූමිකාවක් ඉටු කළ බව එහි සඳහන්ව ඇත. ඊට අමතරව ශ්‍රී ලංකාවේ කාර්යක්ෂම හා ශක්තිමත් සෞඛ්‍ය වෛද්‍ය සේවා හෙවත් එම්ඕඑච් යාන්ත්‍රණයක් ක්‍රියාත්මක වූ බවද එමගින් පෙන්වාදෙයි. රාජ්‍ය තන්ත්‍රය තුළ සෑම ගමකම පරිපාලන කටයුතු ඉටු කිරීම සඳහා බිම් මට්ටමේ ග්‍රාම නිලධාරීන් 14,000ක් කටයුතු කරන බව එම නිවේදනයෙන් පෙන්වාදී තිබේ.