පළාත් සභා හා පළාත් පාලන රාජ්‍ය ඇමතිවරයා ලෙස පත්කර සිටින සරත් වීරසේකර පළාත් සභා ගැනත් පළාත් සභා පිහිටවූ 13 වැනි ව්‍යවස්ථා සංශෝධනය ගැනත් විවිධ කරුණු එම ධුරය බාරගත් දින සිටම කියන්නට පටන්ගෙන ඇත.

ඉන් එකක් ලෙස ඔහු කියා ඇත්තේ පළාත් සභාවල කාර්යසාධනය ගැන වාර්තාවක් ලබාදෙන ලෙසට තමා කමිටුවක් පත්කර ඇති බවයි. එම කරුණ තවදුරටත් පැහැදිලි කරමින් ලංකාදීප පුවත්පතට සාකච්ඡාවක් ලබා දෙමින් ඔහු මෙසේ කියා ඇත.

‘පළාත් සභා කියන්නේ සුදු අලියෙක් බව දැන් ඔප්පුවෙලා. කවුරුත් ඒක පිළිගන්නවා. පළාත් නවයේ සේවකයන් හා නිලධාරීන් විතරක් ලක්ෂ හතරකට වඩා ඉන්නවා. ඒවා නඩත්තු කරන්න විශාල මුදලක් වැය වෙනවා. ඒ තරමට දෙයක් මේවායින් රටට වෙනවද කියන එක බලන්න ඕනෑ.’

කාර්යසාධනය පැත්තෙන් බැලුවහොත් ජනාධිපති කාර්යාලය පාර්ලිමේන්තුව ඇතුළුව රටේ කිසිදු රාජ්‍ය ආයතනයක් නොතිබිය යුතු බවට වාර්තා ලැබෙනු නිසැකය. එය පළාත් සභාවට පමණක් සුවිශේෂ වූ එකක් නොවේ. එමෙන්ම පළාත් සභා ක්‍රමය ගෙන ආවේ සුවිශේෂ කරුණක් නිසා බව වීරසේකර මහතාට නොදැනීම ඔහුගේ ප්‍රශ්නයකි.

උපුටා දැක්වූ ඔහුගේ අනෙක් ප්‍රකාශයද විහිළු සහගතය. අධ්‍යාපනය, සෞඛ්‍ය වැනි විෂයන්  විමධ්‍යගත කිරීමෙන් පසු ගුරුවරුන් ඇතුළු අධ්‍යාපන සේවකයන්ද, සෞඛ්‍ය සේවකයන්ද ඉන්නේ පළාත් සභා යටතේය. පළාත් පාලන ආයතන සේවකයන්ද අයත් වන්නේ පළාත් රාජ්‍ය සේවයටය.

මුළු රාජ්‍ය සේවක සංඛ්‍යාව යනු මේ සියල්ලේම එකතුවකි.

සරත් වීරසේකර රාජ්‍ය ඇමතිවරයාගේ පැහැදිලි කිරීම අනුව තුන්සිය පනහක් වන ජාතික පාසල් හැරුණු විට ඉතිරි නවදහස් ගණනක පාසල් පද්ධතිය වැඩක් නැත. ඒවාහි ගුරුවරු වැඩක් නැත. මධ්‍යම රජය යටතේ ඇති රෝහල් ස්වල්පය හැරුණුකොට ඉතිරි රෝහල් වැඩක් නැත. ඒවාහි සෞඛ්‍ය කාර්ය මණ්ඩලයද වැඩක් නැත.

පළාත් සභා අහෝසි කර ඉහත සඳහන් කළ හා නොකළ ඒ යටතේ පවතින ආයතන මධ්‍යම රජය යටතට ගත්තා කියා අමුතු වෙනසක් වන්නේ නැති බව පළාත් සභා හා සුළුජන අයිතිවාසිකම් විරෝධී සරත් වීරසේකර රාජ්‍ය ඇමතිවරයා දැනගත යුතුය. ඒ ගැන ඔහුට හොඳින්ම මැනගැනීමට අවශ්‍ය නම් පළාත් සභාවලට පෙර එම ආයතන හා ඒවාහි සේවකයන් පිළිබඳ හැදෑරීමෙන් දැනගත හැකිය.

පළාත් සභා යනු උතුරු නැගෙනහිර  ජනවාර්ගික ප්‍රශ්නයකට ලබාදුන් දේශපාලන විසඳුමක් බවත්, දේශපාලන බලය යන්න සුළු ජනවාර්ගිකයන්ට පමණක් නොව මහ ජාතියේම දේශපාලනඥයන්ටත් තමන්ගේ මහජාතියේ දේශපාලන බලයක් යටතේ පවා අවශ්‍ය බවත් සරත් වීරසේකර රාජ්‍ය ඇමතිවරයා නොදන්නවා නම් දැනගත යුතුය. ඔහු ඒ සඳහා කියවිය යුත්තේ නව ආණ්ඩුක්‍රම ව්‍යවස්ථාවක් සැකසීම සඳහා අදහස් විමසීමේදී පළාත් සභා මහ ඇමතිවරුන් දැක්වූ අදහස්ය.

13 වැනි සංශෝධනය යටතේ පළාත් සභාවලට ලැබිය යුතු බලයවත් තවම මධ්‍යම ආණ්ඩුව පළාත් සභාවලට ලබාදී නැත. පාර්ලිමේන්තුව කළ යුත්තේ බෝක්කු පාලම් හැදීම වැනි කටයුතු නොවේ. රාජ්‍ය ප්‍රතිපත්ති සකස් කිරීමත්, නීති සම්පාදනය කිරිමත්, රාජ්‍ය මුදල් පිළිබඳ සුපරීක්ෂණ වගකීම ඉටුකිරීමත්ය.■