මහමඟදී වාහනයක් පදවාගෙන යන සාමාන්‍ය විනයගරුක රියැදුරෙකුගේ පසුපසට වේගයෙන් පැමිණෙන ඉහළ මිලකින් යුතු වාහනයකි. විශාල හදිසියක් පෙන්වන පසුපස රියැදුරා නළාව වේගයෙන් නාද කරමින් වාහනය ඉදිරිපිට ඇති එල්ඊඞී ෆ්ලෑෂ් බල්බ දල්වන්නට පටන්ගනියි. ඉදිරිපස වාහනය පදවන්නාගේ ඇස්වලට පැති කණ්ණාඩිවලින් පසුපස වාහනයේ ෆ්ලෑෂ්ලයිට් වැදීම මහත් අපහසුතාවක් ගෙනදෙයි. අනෙක් අතට හෙඞ් ලයිට් නොවන මෙවැනි විශේෂ බල්බයක් දල්වන්නේ යම්කිසි ඉහළ තනතුරක් දරන පුද්ගලයෙකු හෝ දේශපාලනඥයෙකු නිසාදැයි ඉදිරිපස රියැදුරාට සැකයක් ඇතිවෙයි. ඒ නිසා වාහනය මාර්ගය අයිනට කොට පසුපස වාහනයට ඉඩකඩ විවෘත කරයි.

ඇතැම් විට පසුපසින් වදින එවැනි ආලෝක ධාරාවක් නිසා දෑස් නිලංකාර වීමෙන් අනතුරු සඳහා පවා ඉඩ විවෘත වෙයි.
ඉහත කී සිදුවීමට අඩුවැඩි වශයෙන් සමාන සිදුවීම්වලට මේ වෙද්දී බොහෝ රියැදුරෝ මුහුණදෙති. ඒ මේ වනවිට බොහෝ වාහන සවි කරගෙන ඇති ‘වීඅයිපී ලයිට්’ යනුවෙන් සමාජ වහරේ හඳුන්වන විදුලි බල්බ වර්ගයක් මහමඟ වාහන බොහොමයක සවි කරගෙන සිටින නිසාය. වාහනයේ වින්ඞ් ස්ක‍්‍රීන් එක ඉදිරිපසින් සවි කරගෙන සිටින මෙම විදුලි බල්බවලින් කෙරෙන්නේ ඉහත කී ලෙස පැති කණ්ණාඩිවලින් ඉදිරිපස රියැදුරාගේ ඇස්වලට දරාගත නොහැකි තරම් විශාල ආලෝක ධාරාවක් එල්ලකොට මාර්ගයේ ඉඩ ලබාගැනීමයි.
අප විසින් පසුගිය කාලයේදී කළ නිරීක්ෂණ අනුව දකින්නට ලැබුණේ ලංකාවේ රජයේ ඇමතිවරුන් කිහිපදෙනෙකුගේම වාහනවල මෙවැනි බල්බ දක්නට ඇති බවයි. අමාත්‍යාංශ ලේකම්වරුන් ඇතුළු ඉහළ රාජ්‍ය නිලධාරීන්ගේ වාහනවලද එවැනි බල්බ ඇත. මේ පුරුද්ද ආරම්භ කළේ එවැනි බලවතුන් විසින්ය. නීති කඩන්නට පටන්ගන්නේ ඔවුන්ය.

මෙවැනි ලයිට් පහසුවෙන්ම ගරාජ හරහා හෝ අන්තර්ජාලය හරහා මිලදී ගැනීමට දැන් පහසුකම් ඇත. රුපියල් 2000 සිට ඉහළට අලෙවි කරන මෙම ලයිට් මේ වෙද්දී බොහෝ දෙනෙක් මිලදී ගැනීමට පෙළඹෙති. සාමාන්‍ය මෝටර් රථ, ත‍්‍රීවීලර් සහ මෝටර් බයිසිකල්වලටත් මෙවැනි බල්බ ලබාගත හැකිය. නිල් සහ රතු පැහැයෙන් මෙවැනි බල්බ දැල්වෙයි. ඇස් නිලංකාර වන දැවැන්ත ආලෝකයක් එල්ල වෙයි.
‘‘මේක දාගන්නෙ හදිසි ගමනක් යන්න ඕනෑ වුණාම. නැත්නම් ලංකාවෙ පාරෙ යන්න බැහැනේ. දන්නවනෙ ඉතිං.’’ වීඅයිපී ලයිට් ගැන විමසද්දී එක්තරා අමාත්‍යාංශයක ඉහළම නිලධාරියෙකු කීවේ එසේය.

වීඅයිපී ලයිට්යැයි එවැනි ලයිට් පාවිච්චි කරන අය විසින්ම හඳුන්වාගන්නා මේ ලයිට් වර්ගය ලංකාවේදී නීත්‍යනුකූලදැයි බොහෝ දෙනෙකු නිවැරදිව දන්නේ නැත. ලංකාවේ කිසිදු වාහනයකට එවැනි විශේෂ බල්බ වාහනවලට සවි කරගැනීමට නීත්‍යනුකූල අයිතියක් නැත. ඒ නිසා ඒවාට විරුද්ධ වීමේ සම්පූර්ණ අයිතිය රියැදුරන්ට ඇත. විශේෂ බල්බ සවිකිරීම පමණක් නොව හෙඞ්ලයිට්වල අලෝකය තීව‍්‍ර කරමින් වෙනත් රියැදුරන්ට බාධා කිරීම පවා නීති විරෝධීය. එවැනි පසුබිමක කිසිසේත්ම මෙවැනි ලයිට්කාරයන්ට පාරේ ඉඩ දිය යුතු නැත. සමාජය තුළින් දරුණු විරෝධයක් එවැනි පුද්ගලයන්ට එල්ලකළ යුතුය. පාරේ ඉඩ ලබානොදීම නිසා ගැටුමකට එන අයෙක් වෙතොත් ඔවුන් සමඟ වාද කරන්නට රියැදුරන් බිය නොවිය යුතුය. අවශ්‍ය නම් පොලීසියේ පිහිට පැතීම කළ යුතුය. දැන් නීති විරෝධී ක‍්‍රියා හිතුමතේ කළ නොහැකිය. තමන්ගේ ජංගම දුරකථනයෙන් එවැනි සිදුවීමක් වීඩියෝ හෝ හඬපට හරහා පටිගත කොට අන්තර්ජාලයට මුදාහැරීම වුව කළ හැකිය.

වීඅයිපී ලයිට් නොමැති වුණත් වීඅයිපී යැයි කියමින් පාරේ ඉඩ ඉල්ලන පුද්ගලයන්ට විශේෂයෙන් ඉඩ ලබා දිය යුතු නැත. වීඅයිපී යැයි කියාගැනීම පාරේ ඉඩ ලබන්නට නීත්‍යනුකූල හේතුවක් නොවන අතර ගිලන් රථ වැනි නීත්‍යනුකූල හදිසි අවශ්‍යතා සඳහා පමණක් පාරේ ඉඩ දිය යුතුය.ඔළුව උදුම්මාගත් වීඅයිපීකාරයන්ගෙන්ද, ඔවුන්ගේ පසුපස යමින් තමන්ගේ වාහනවල මෙවැනි ලාම්පු සවිකරගත් සාමාන්‍ය පුරවැසියන්ගෙන්ද මාර්ග මුදවා ගැනීම නීතිගරුක පුරවැසියන්ගේ එකමුතුවෙන් සිදුකළ හැකි බව අපගේ අදහසය.

ඒවා
තහනම්
දැක්කොත්
අල්ලනවා.

රුවන් ගුණසේකර
පොලිස් මාධ්‍ය ප‍්‍රකාශක

වීඅයිපී ලයිට් යැයි කියාගත්ත එල්ඊඞී ලයිට් වර්ගයක් දැන් පාරේ තියෙන වාහන පාවිච්චි කරනවා. ඒ ලයිට් වර්ගය පාවිච්චි කිරීමට නීතියෙන් අවසර තියෙනවාද?
නැහැ. ඒ ලයිට් වර්ග තහනම්. වාහනයක් ලියාපදිංචි කරද්දී වාහනයට අවශ්‍ය ලාම්පු වර්ග සඳහන් වෙනවා. එවැනි ලාම්පු හැර වෙනත් අමතර ලාම්පු සවි කරනවා නම් මෝටර් ප‍්‍රවාහන අධිකාරියෙන් අනුමැතියක් ලබාගන්න ඕනෑ. ඒ වගේ විශේෂ අනුමැතියක් දෙන්නේ පොලිස් වාහන, ගිලන් රථ, ගිනි නිවන රථ වගේ විශේෂ වාහනවලට.

කෙනෙක් පසුපසින් එහෙම එල්ඊඞී ලයිට් දැල්වුවොත් මාර්ගයේ ඉඩ දෙන්න ඕනෑද?
එහෙම ඉඩ දෙන්න අවශ්‍යතාවක් නෑ. ඉඩ දෙන්න අවශ්‍ය නම් පොලිස් වාහනයක්, ගිලන් රථයක් වගේ අත්‍යවශ්‍ය හේතු නිසා මෝටර් ප‍්‍රවාහන අධිකාරියෙන් අවසර දීලා තියෙන වාහනයකට පමණක් ඉඩ දෙන්න ඕනෑ. කවුරු හරි ඉඩ ලබාගන්න එහෙම කරනවා නම් වැරදියි. එහෙම දෙයක් දැක්කොත් ඒ පිළිබඳ පොලීසියට දැනුවත් කරන්න ඕනෑ.

දැන් මේ ලයිට් ප‍්‍රසිද්ධියේ විකුණන්නත් තියෙනවා….
ඒක අපට පාලනය කරන්න බැහැ. අපට පුළුවන් මහමඟදී දැක්කාම නීතිමය පියවර ගන්න. මට කියන්න පුළුවන් අපි පියවර ගන්නා බවයි. අපි තරාතිරම නොබලා පියවර ගන්නවා.

රජයේ ඉහළ නිලධාරීන් සහ දේශපාලන බලය ඇති පුද්ගලයන් මෙවැනි ලාම්පු පාවිච්චි කරනවා…
නැවත නැවත ඇහුවත් මට කියන්න තියෙන්නේ එකම උත්තරය. මම ඉහතින් කිව්ව වර්ගයේ විශේෂ අවසරයක් ඇති ආයතනවලට හැර කිසි කෙනෙක්ට අයිතියක් නැහැ එවැනි ලයිට් පාවිච්චි කරන්න. පොලීසිය ඕනෑම කෙනෙක්ව අල්ලනවා. දඩ ගහනවා. ඒත් මේක සම්පූර්ණයෙන් නවත්වන්න බැරිවෙලා තියෙනවා.