ජේආර් ප්ලස්

ඩී.ඩබ්ලිව්. සුබසිංහ –  ලංකා වෘත්තිය සමිති සම්මේලනය 

විසිවැනි සංශෝධන කෙටුම්පත අධ්‍යනය කරද්දී අපි කම්පනයට පත්වුණා. මේ ආණ්ඩුව ඇතුළෙන්ම කෙටුම්පත වෙනස් කරන්න කියලා කතාබහ කළා. ජනාධිපති ළඟට බලය කේන්ද්‍ර කරගැනීම ජේ.ආර්.ටත් එහා ගිහින්. අගමැති බලතල අඩු කරලා, ඒ තනතුරට තත්වයක් නැති කරලා. අගමැති අස් කිරීමටත් ජනාධිපබලය තියෙනවා. මේක ජේආර් ප්ලස් ව්‍යවස්ථාවක්. 

 

අපි එකතුවෙන්න ඕනෑ

ජෝසෆ් ස්ටාලින්- ලංකා ගුරු සංගමය

මේක රටේ ප්‍රජාතන්ත්‍රවාදී ගමන ආපසු හැරවීමක්. රාජ්‍ය සේවයේ ස්වාධීනතාවය සම්පූර්ණයෙන් විනාශ කිරීමක්. මේ රටේ ජනතාවගේ අභිලාෂය තිබුණේ විධායක ජනාධිපති ක්‍රමය අහෝසි කිරීමට. දහඅටවැනි ව්‍යවස්ථා සංශෝධනයෙන් ඔවුන් බලය තහවුරු කරගත්තා. ඒක නැවත ආපස්සට ගැනීමක් දහනවවැනි සංශෝධනයෙන් කළේ. ජනතාව තමන්ගේ ප්‍රජාතන්ත්‍රීය අයිතීන් වෙනුවෙන් එකතුවෙන්න ඕනෑ. අපි විශේෂයෙන් මේ ආණ්ඩුවට ඡන්දය දුන්න අයගෙන් ඉල්ලීමක් කරනවා. මේකට විරුද්ධව එකතු වෙන්න කියලා.

 

අපේ අදහස්වලට ඉඩදෙන්න

ඇන්ටන් මාකස් – නිදහස් වෙළඳ කලාප හා පොදු සේවා සේවක සංගමය

විසිවැනි සංශෝධන කෙටුම්පත පිළිබඳ වෘත්තිය 27 ක් එකතුවෙලා  පොදු ස්ථාවරයක් අරන් ඉන්නවා. ලංකාවේ ආණ්ඩුක්‍රම ව්‍යවස්ථා සියල්ලම පාහේ ජනතාව අතරින් ආපු ඒවා නෙවෙයි. ඒවා සීමිත පිරිසකට සීමා වෙලා හදපුවා. අපේ වෘත්තිය සමිති 27 ජනාධිපතිවරයාගෙන් ඉල්ලා සිටියා 20 වැනි සංශෝධනය සාකච්ඡා කරන්නට කලින් ජනතාව අතර කථිකාවකට ලක් කරන්න කියලා. එහෙම කරලා හැදෙන ව්‍යවස්ථාවක් එක්ක තමයි ජනතාව ඉන්නේ. එහෙම නැති නිසා තමයි ව්‍යවස්ථා සංශෝධන ගැන ජනතා උනන්දුවක් නැත්තෙ,

 

පිළිගන්න බැහැ

සිල්වෙස්ටර් ජයකොඩි- ලංකා වෙළඳ කම්කරු සහපොදු සේවක සංගමය (සීඑම්යූ)

සීඑම්යූ එක හැත්තෑඅටේ ව්‍යවස්ථාවට විරුද්ධව කටයුතු කරපු වෘත්තිය සමිතියක්. අපි අසූදෙකේ ජනමතවිචාරණයටත් එරෙහි වුණා. ජේ.ආර්. ජයවර්ධන ඉවරවෙලා චන්ද්‍රිකා එනකොටත් අපි විධායක ජනාධිපති ක්‍රමය අහෝසි කරන්න කියලයි ඉල්ලුවේ. 19වැනි සංශෝධනය ගෙනාවේ කලින් තිබුණ ඒකාධිපති ස්වරූපය අඩු කරන්න. දහනවය අහෝසි කරන ආණ්ඩුවේ තර්කයට ඒ තරම් එකඟ වෙන්න බෑ. රජයේ ස්ථාවරත්වයට, ජාතික ආරක්ෂාවට විස්ස ගේනවා කියන එක පිළිගන්න බැහැ.

 

එකහෙළා විරුද්ධ වෙනවා

රවී කුමුදේශ්  -පරිපූරක වෛද්‍ය සේවා ඒකාබද්ධ බලමණ්ඩලය

එක් පුද්ගලයෙක් වටා බලය ගොනු කරගැනීම ප්‍රතික්ෂේප වෙමින් තියෙනවා. සාමූහික තීන්දු ගැනීම තමයි ලෝකය ශිෂ්ඨ විදියට සලකන්නේ. වෘත්තිය සමිති ව්‍යාපාරය විදියට අපට 19 වැනි සංශෝධනයේ තියෙන ප්‍රජාතන්ත්‍රවාදය හා ශිෂ්ඨත්වය ආරක්ෂා කරන කොමිෂන් සභා සම්බන්ධයෙන් පෙනී ඉන්නට සිද්ධවෙනවා. ඒවා අහෝසි කිරීමට අපි එකහෙළා විරුද්ධ වෙනවා.

 

 

දැඩි ක්‍රියාමාර්ගවලට යනවා

චින්තක බණ්ඩාර – ඒකාබද්ධ තැපැල් වෘත්තීය සමිති සන්ධානය

දහනවවැනි සංශෝධනයේ තිබුණු කරුණු අතරින් බහුතරය මේ රටේ පොදු මහජන සුභසිද්ධිය සඳහා බලපෑ කාරණා. සමාජ සාධාරණය වෙනුවෙන්, මහජන දේපළ ආරක්ෂාව හා යහපාලනය වෙනුවෙන් දැඩි බලපෑමක් කරලා තමයි දහනවවැනි සංශෝධනයේ බහුතර දේවල් සම්මත කරගත්තේ. පොදු යහපතට හේතුවෙච්ච දේවල් 20 සංශෝධනයෙන් අහෝසි වෙනවානම් ඒක මහජනතාවට බරපතල හානියක්. දැන් තියෙන ව්‍යවස්ථාවේ කුමන හෝ දුර්වලතාවක් වෙනස් කරනවානම් ඒකේ ගැටළුවක් නෑ. එහෙත් දහනවය අහෝසි කිරීමේ අරමුණෙන් විස්ස ගේනවානම් අපේ දැඩි විරෝධය. වැඩකරන පන්තිය, පොදුජනතාව සමග අපි ඉදිරියේදී දැඩි ක්‍රියාමාර්ගවලට යනවා.

 

සුභදායී නැහැ

මහින්ද ජයසිංහ –  ලංකා ගුරු සේවා සංගමය

පහුගිය කාලේම අඩුපාඩු මැද වුණත් ස්වාධීන කොමිෂන් සභා තිබුණු නිසා අපි බොහෝ දේවල් විසඳාගත්තා. විශේෂයෙන් ආණ්ඩුවේ වුවමනාවට තනතුරු දෙනකොට ඒවා වළක්වාගත්තා. ජාතික පාසල් 302ක පුරප්පාඩු තමන්ගේ කට්ටියගෙන් පුරවන්න යූඇන්පී-ශ්‍රීලංකා හවුල් ආණ්ඩුව දිගටම උත්සාහ කළා. රාජ්‍ය සේවා කොමිසම තිබුණ නිසා ඒක වැළකුණේ. අගමැති රනිල් කොමිසමේ සාමාජිකයන් අරලියගහ මන්දිරයට ගෙන්වලා බලපෑම් කරන්න උත්සාහ කළත් කොමිසම ස්වාධීන නිසා රනිල්ගේ බලපෑම් නැවතුණා.

 

රූප පෙට්ටිවල බහුබූත විතරයි

එස්. නන්දලාල් – රක්ෂණ සේවක සංගමය

දැන් පවතින ව්‍යවස්ථාවේ දෝෂ ඉවත් කරලා ප්‍රජාතන්ත්‍රවාදය ශක්තිමත් කරනවානම් අපි එය අගය කරනවා. එසේ සිදුවන්නේයැයි සමාජයට සහතිකයක් තියෙන්න ඕනෑ. එවැනි සහතිකයක් දෙන්න පුලුවන්  සමාජ කතිකාවකට යොමු කිරීමෙන්.  ආණ්ඩුව අද විස්ස කැබිනට් එකට දාලා හෙට පාර්ලිමේන්තුවට දැමීම. සමාජ කතිකාවකට ගේනවා කියලා රූප පෙට්ටිවල බහුබූත ටිකක් කරනවා විතරයි. සැබෑ ජනතා අදහස් ලබාගැනීමේ වුවමනාවක් නැහැ.

 

නායකයන් රෙදි ඇඳගෙනද?

ලාල් බංගමුව – ස්වාධීන වරාය සේවක සංගමය

 අපේ රටේ පරණ යැයි කියන දේශපාලන නායකයන් රෙදි ඇඳගෙනද දන්නෑ මේවා කරන්නේ. ජේආර් නරුමයෙක් කියාපු මිනිසුන් අද තුනෙන් දෙකක් අරගත්තා කියලා මේ කරන්න යන්නේ ජනතාවගේ සහ වැඩකරන පන්තියේ අයිතිවාසිකම් වළපල්ලට දැමීමක්. අධිකරණ ක්ෂේත්‍රයේ නිදහස හා අනෙකුත් සියළුම නිදහස වළලන්න යනවානම් වෘත්තිය සමිති වශයෙන් අපි විරුද්ධ වෙනවා.■