අත්තනෝමතික බලහත්කාරයක්

අධිකරණ සංඝනායක අත්තංගනේ රතනපාල නාහිමි

ආණ්ඩුවේ කොටස් තුනක් තියෙනවා. විධායකය, ව්‍යවස්ථාදායකය සහ අධිකරණය. 20 වැනි සංශෝධනයෙන් අපට පෙනෙන්නේ ව්‍යවස්ථාදායකයයි අධිකරණයයි දෙකම ශූන්‍ය කරලා විධායකයේ බලය වැඩි කිරීමක්. ඒකෙන් ප්‍රජාතන්ත්‍රවාදය අහෝසි වීමේ භයානක අනතුරක් තියෙනවා කියලයි රටේ හැමතැනම විද්වතුන් සාකච්ඡා කරන්නේ. ස්වාමීන් වහන්සේලා බොහෝදෙනෙක් දකින්නේත් විස්සෙන් ව්‍යවස්ථාදායකය සහ අධිකරණය දුර්වල කරන බව. අලුත් ව්‍යවස්ථාවක් හදනවා නම් විස්ස සංශෝධනයක් මොකටද. සංඝයාගේ මතයත් අලුත් ව්‍යවස්ථාවක් ඕනෑ බව. ඒ ව්‍යවස්ථාව සකස් කිරීමට උනන්දු නොවී හදිසියේ මේ කරන දේ අත්තනෝමතික බලහත්කාරයක් හැටියට තමයි පෙනෙන්නේ. විස්ස සංශෝධනය ඉස්සරහට දැමීමෙන් නව ව්‍යවස්ථාව හැදීම නොකෙරෙන්නත් පුළුවන්.

 

19න් වැඩ කරන්න බාධා නෑ

ආචාර්ය අකුරැටියේ නන්ද හිමි

අතිවිශාල ජනවරමක් ලැබුණේ ජනාධිපති ගෝඨාභය රාජපක්ෂ මැතිතුමාට අලුත් ආණ්ඩුක්‍රම ව්‍යවස්ථාවක් ගෙන එන්නට. ඒක කරනවා මිසක්, පැලැස්තර දැමීමෙන් ප්‍රයෝජනයක් නැති බව මා විශ්වාස කරනවා. අනෙක 19 වැනි සංශෝධනයෙන් ජනාධිපතිවරයාට වැඩ කරන්න බාධා තිබෙන බව මා පිළිගන්නේ නැහැ. ජනාධිපති ගෝඨාභය රාජපක්ෂ මැතිතුමා ලෝකයටම ආදර්ශයක් වෙන්න ලස්සනට කොවිඞ් මර්දනය කළා. ජනාධිපතිට ඇමතිකම් නොතිබුණත් සියලු අමාත්‍යවරුන් විධායක ජනාධිපති ධුරයේ අනුභාව හේතු කොටගෙන වැඩ කරන්න සලස්වනවා. විසි වන සංශෝධනයෙන් ජනාධිපති ලේකම් කාර්යාලය සහ අගමැති ලේකම් කාර්යාලය විගණනයෙන් ඉවත් කිරීම ගැනත් මා එකඟ නෑ. රටේ එකඟත්වයක් ජනාධිපතිවරයාට තිබුණත්, පුද්ගලයන් බලාගෙන ව්‍යවස්ථාව වෙනස් කරනවාට අපි එකඟ නෑ. වෙනත් කෙනෙකුට මේ අසීමිත බලය දුන්නොත් මොනවා වේවිද. ජනපතිට මොළේ අමාරුවක් හැදුණොත් මොනවා වේවිද. පාර්ලිමේන්තුව මහජන නියෝජිතයන්ගෙන් සමන්විත ආයතනයක්. ජනාධිපති ඒකට වගකියන්නේත් නැත්නම්, ලෝකය ප්‍රජාතන්ත්‍රවාදයට නැඹුරු වෙන යුගයක මේක හදිසියෙන් කළ යුතු කටයුත්තක් හැටියට මා දකින්නේ නැහැ.

 

මහජනතාවගේ ගෙල සිඳිනවා

උතුරුමැද දිසා සංඝනායක මහමාංකඩවල පියරතන හිමි

මෛත්‍රීපාල සිරිසේන ජනාධිපතිතුමා කරු ජයසූරිය මහතාගේ නිවසේදී වතාවක් මහා සංඝයා කැඳෙව්වා. එවැනි මොහොතක හැම හිමිනමක්ම පිරිත් නූල් බඳින්න තමයි දැඟලුවේ. ඒත් මං ඇහුවා ඔබතුමාත් බලයට ඇවිත් ව්‍යවස්ථාව අහෝසි නොකර ඉඳීවිද කියලා. ඔහු දිවුරා පොරොන්දු වුණා අහෝසි කරන බව. ඔහු දිවුරුම කඩ කළත්, 19 වැනි සංශෝධනය සම්මත කරමින් බලතල කිහිපයක් අඩු කළා. දැන් මේ ඇත්තා බලයට පත්වුණා. මිනිසුන් තුනෙන් දෙකේ බලයක් දීලා තියෙනවා. එයාලා බලය පාවිච්චි කරන්නේ ප්‍රජාතාන්ත්‍රික අයිතීන් තහවුරු කරන්න නෙවෙයි. දැන් මහජන බලය පාවිච්චි කරලා ඔවුන්ගේම ගෙල සිඳිනවා. ඒ ගැන අතිශයින් කනගාටු වෙනවා.

 

නිදහස වළ දැමෙන යෝජනා තියෙනවා

සරත් ඉද්දමල්ගොඩ පියනම

ධර්මයේ ඇසින් බලන කල ජනතාව සතු සියලු බලතල එක් පුද්ගලයෙක් තුළ කේන්ද්‍ර ගතකර ගැනීම කොතෙක් දුරට ධර්මානුකූලද? කොහෙත්ම නැහැ. ඉහළ ආගමික නායකත්වය 20 වෙනි සංශෝධනය ගැන තවමත් නිහඬව සිටීම ගැටලුවක්. පුරවැසියන්ගේ ප්‍රජාතාන්ත්‍රික අවකාශයන් පුළුල් වන ආකාරයට 19වන ව්‍යවස්ථාව සංශෝධනය විය යුතුයි. එහෙත් ප්‍රජාතාන්ත්‍රික නිදහස වළ දැමෙන යෝජනාවන් 20 වෙනි සංශෝධනයට එකතුකිරීමට යෝජනා කරලා තියෙනවා. ඒවා කිහිපයක් මෙහෙමයි. ස්වාධීන විගණන කොමිෂන් සභාව අහෝසි කිරීම, ජනාධිපති හා අගමැති කාර්යාල කටයුතු විගණනයෙන් බැහැර කිරීම, මහජන මුදල් කළමනාකරණයේ විනිවිද භාවය ඌන කිරීම, පාර්ලිමේන්තුවේ හා ස්වාධීන කොමිෂන් සභාවල බලතල දුර්වල කිරීම, අධිකරණයේ ස්වාධීනත්වය ඛාදනයට ලක්කිරීම, කැබිනට් මණ්ඩලය, ව්‍යවස්ථාදායකය, අධිකරණය හා සන්නද්ධ අංශය යන සියලුම අංශ යටපත් කරමින් සියලු බලතල එක් පුද්ගලයකු මත සංකේන්ද්‍රණය කිරීම, ද්විත්ව පුරවැසිභාවය හිමි අයට ශ්‍රී ලංකා පාර්ලිමේන්තුවේ මන්ත්‍රීධුර දැරීමට අවසර ලබා දීම එවැනි යෝජනා ලෙස සලකන්න සිදුවෙනවා.

 

පවුලක් නිසා භයානකයි

එස්. සත්‍යවේල් පියනම

මෙය ප්‍රජාතන්ත්‍රවාදී යුගයේදී නැවත වහල්කමට තල්ලු කරන්නා වූ සංශෝධනයක් විදියට මා දකිනවා. මේ වහල්කම තුළ දේශපාලනික වහල්කම, ආර්ථික වහල්කම සහ සියලු අයිතීන් උදුරාගැනීමේ වහල්කමට තල්ලු වෙනවා. 20 වැනි සංශෝධනය අඳුරු යුගයක ආරම්භයක්. හැත්තෑඅටේ ව්‍යවස්ථාවට වඩා මේක බලවත් වෙන්නේ අද පවුල් පාලනයක් තියෙන නිසා. ඒ නිසා මේ බලය පාවිච්චි කරමින් රජ පවුලක බලයක් පවත්වාගෙන යන්නට ඉඩ තියෙනවා. අපි මෙය හෙළාදකිනවා. හැට නව ලක්ෂයක් ආණ්ඩුවට ඡන්දය දෙන්න ඇති. ඒත් රටේ දෙකෝටි විසි ලක්ෂයක් ජනතාව ඉන්නවා. අපි මේ කතා කරන්නේ ඒ සම්පූර්ණ ජනතාව වෙනුවෙන්.

 

විනාශය මිස යහපතක් නෑ

මවුලවි මුනීර් මුලෆ්ෆර්

19 වැනි සංශෝධනය ගෙනාවේ ඒකාධිපති ජනාධිපතිවරයෙකුගේ බලය වැඩි කිරීම කෙතරම් අනතුරුදායකද කියන කාරණය මත. අනූහතරේ ඉඳලා පත් වූ සෑම ජනාධිපතිවරයෙක්ම ඡන්ද පොරොන්දුවක් ලෙස කීවේ විධායක ජනාධිපති ක්‍රමය අහෝසි කරනවා කියලයි. ඒත් මේ මොහොතේ හදිසියේ ඒක තිබුණාටත් වඩා ශක්තිමත් කිරීමෙන් මේ තනතුරේ විපාකය පේනවා. තනි පුද්ගලයෙක් වටා බලය ගොඩනැගීම විනාශය මිසක් රටකට යහපතක් ගෙනදුන්නේ නැති බව සාමාන්‍ය මනුස්සයෙක් වුණත් දන්නවා.■