විසි වන සංශෝධනයට පක්ෂව ඡන්දය ප්‍රකාශ කළ සමගි ජන බලවේගය නියෝජනය කරමින් තේරී පත් වූ මන්ත්‍රීවරුන් හය දෙනාගේ මන්ත්‍රීධුර අහෝසි කිරීමට කටයුතු කරන බව අනිද්දා සමග අදහස් දැක් වූ සමගි ජන බලවේගයේ ප්‍රබලයන් කිහිපදෙනෙකු පැවසීය.
සමගි ජන බලවේගය නියෝජනය කරන සියළු දේශපාලන පක්ෂ 20 වන සංශෝධනයට එරෙහි වීමට නිල වශයෙන් තීන්දු කර ඇති බවත්, සමගි ජන බලවේගයෙන් තේරී පත්ව විසි වන සංශෝධනයට පක්ෂව ඡන්දය ලබා දුන් මන්ත්‍රීවරුන් හය දෙනාට එරෙහිව පියවර ගැනීමේ හැකියාව තිබෙන බවත් ඔවුහු පෙන්වාදුන්හ.
පක්ෂයේ තීන්දුවට පටහැණිව ඡන්දය ප්‍රකාශ කළ පුද්ගලයන්ට එරෙහිව ප්‍රථමයෙන් විනය පියවර ගෙන, එයින් පසු පක්ෂ සාමාජිකත්වය අහෝසි කොට එම පුද්ගලයන්ගේ මන්ත්‍රීධුර අහෝසි කිරීම සඳහා මැතිවරණ කොමිෂන් සභාවට දැනුම් දෙන බවත් ඔවුහු පැවසූහ.
ඔක්තෝබර් 22 වැනිදා පාර්ලිමේන්තු පරිශ්‍රයේදී රූපවාහිනී මාධ්‍යවේදීන් කිහිපදෙනෙකු කළ ප්‍රශ්න කිරීම්වලට පිළිතුරු දෙමින් සමගි ජන බලවේගයේ මහලේකම් රංජිත් මද්දුමබණ්ඩාර ප්‍රකාශ කර තිබුණේ ජාතික ලැයිස්තුවෙන් තේරී පත් වූ මන්ත්‍රිනී ඩයනා ගමගේට එරෙහිව නීතිඥයන් සමඟ කතාබහ කොට පියවර ගන්නා බවය.
සමගි ජන බලවේගය නියෝජනය කරමින් තේරී පත් ව විසි වන සංශෝධනයට පක්ෂව ඡන්දය ප්‍රකාශ කළ මන්ත්‍රීවරුන් හය දෙනා මෙසේය. ජාතික ලැයිස්තුවෙන් තෝරා පත් කරගත් මන්ත්‍රී ඩයනා ගමගේ, බදුල්ල දිස්ත්‍රික්කයෙන් දෙවැනි ස්ථානයට තේරී පත් වූ දෙමළ ප්‍රගතිශීලී සන්ධානයේ සාමාජික අරවින්ද් කුමාර්, දිගාමඩුල්ල දිස්ත්‍රික්කයෙන් පළමු ස්ථානයට තේරී පත් වූ මුස්ලිම් කොංග්‍රසයේ සාමාජික ෆයිසාල් කාසිම්, එම දිස්ත්‍රික්කයෙන්ම තේරී පත් වූ මුස්ලිම් කොංග්‍රසයේ සාමාජික මොහොමඞ් හාරිස්, ත්‍රිකුණාමලය දිස්ත්‍රික්කයෙන් තේරී පත් වූ මුස්ලිම් කොංග්‍රසයේ සාමාජික එම්.එස්.එම්. තවුෆීක් සහ අනුරාධපුර දිස්ත්‍රික්කයෙන් තේරී පත් වූ සමස්ත ලංකා මුස්ලිම් කොංග්‍රසයේ සාමාජික ඉෂාක් රහුමාන්ය.
ඒ අනුව දිගාමඩුල්ල දිස්ත්‍රික්කයෙන් තේරී පත් වූ සමගි ජන බලවේගයේ මන්ත්‍රීවරුන් දෙදෙනාම විසි වන සංශෝධනයට පක්ෂව ඡන්දය ප්‍රකාශ කර ඇත.
ඊට අමතරව මුස්ලිම් කොංග්‍රසය නියෝජනය කරමින් මඩකලපු දිස්ත්‍රික්කයෙන් තේරි පත් වූ නසීර් අහමඞ් සහ මුස්ලිම් ජාතික සන්ධානය යටතේ පුත්තලම දිස්ත්‍රික්කයෙන් තේරී පත් වූ අලි සබ්රි මොහොමඞ් රහීම් විසි වන සංශෝධනයට පක්ෂව ඡන්දය ප්‍රකාශ කළේය.
මුස්ලිම් කොංග්‍රසයේ නසීර් අහමඞ් මීට පෙර නැගෙනහිර පළාත් සභාවේ මහ ඇමතිවරයාව සිටි අතර ඔහු ශ්‍රී ලංකා මුස්ලිම් කොංග්‍රසයේ උප සභාපතිවරයෙකු විය. අලි සබ්රි මොහොමඞ් රහීම් තේරී පත් වූ මුස්ලිම් ජාතික සන්ධානය යනු ශ්‍රී ලංකා මුස්ලිම් කොංග්‍රසය සහ සමස්ත ලංකා මුස්ලිම් කොංග්‍රසය එක්ව ඇති කරගත් සන්ධානයකි.
කාරක සභා අවස්ථාවේදී ද්විත්ව පුරවැසිභාවයට අදාල වගන්තියට පමණක් රිෂාඞ් බදියුදීන්ගේ සමස්ත ලංකා මුස්ලිම් කොංග්‍රසයේ මන්ත්‍රී මොහොමඞ් මුෂාරෆ් පක්ෂව ඡන්දය ප්‍රකාශ කළේය.■