ආණ්ඩුවට එරෙහි විශ්වාසභංග යෝජනාව විවාදයට ගැනීමෙන් පසුව 20 වැනි සංශෝධනය ඉදිරියට ගැනීමට බලාපොරොත්තු වෙන බව අනිද්දා සමඟ අදහස් දැක්වූ ජවිපෙ පාර්ලිමේන්තු මන්ත‍්‍රී බිමල් රත්නායක පැවසීය.

මේ වනවිට පාර්ලිමේන්තුවේ න්‍යායපත‍්‍රයට විධායක ජනාධිපති ක‍්‍රමය අහෝසි කිරීම සඳහා ජවිපෙ පෞද්ගලික මන්ත‍්‍රී යෝජනාවක් ලෙස ඉදිරිපත් කළ 20 වැනි ආණ්ඩුක‍්‍රම ව්‍යවස්ථා සංශෝධන යෝජනාව ඇතුළත් කර ඇතත්, තවමත් ඒ පිළිබඳව විවාද කිරීම සඳහා දිනයක් නියම කර නැත. එහෙත්  ඕනෑම මොහොතක එය විවාදයට ගැනීමට නීතිමය බාධාවක් නැත.

20 වැනි සංශෝධන යෝජනාව විවාදයට ගැනීම ප‍්‍රමාද වීම පිළිබඳව පැහැදිලි කරමින් බිමල් රත්නායක මන්ත‍්‍රීවරයා ප‍්‍රකාශ කළේ පාස්කු ඉරිදා ත‍්‍රස්ත ප‍්‍රහාරයෙන් පසුව පැවති තත්වය නිසා එය ප‍්‍රමාද වූ බවයි. මහජනතාවගේ අවධානය රටේ ආරක්ෂාව දෙසට යොමුවී තිබුණු නිසා ඒ අවස්ථාව ආණ්ඩුක‍්‍රම ව්‍යවස්ථා සංශෝධනයක් විවාදයට ගැනීමට නුසුදුසු බව ඔහු ප‍්‍රකාශ කළේය.

කෙසේ වෙතත් ඉදිරියේදී 20 වැනි සංශෝධනය පිළිබඳ වැඩසටහන් පවත්වමින්, විධායක ජනාධිපති ක‍්‍රමය අහෝසි කිරීම පිළිබඳ සංවාදය ඉදිරියට ගෙනයෑමටත්, 20 වැනි සංශෝධනය පාර්ලිමේන්තුවේ විවාදයට ගැනීම සඳහා දිනයක් ලබාගැනීමටත් බලාපොරොත්තු වන බව ඔහු කීය. කෙසේ වෙතත් මේ දිනවල විශ්වාසභංග යෝජනාව පිළිබඳ වැඩි අවධානයක් යොමුකරන බවද ඔහු කීය.

මේ වනවිට දේශපාලන පක්ෂ සමඟ විශ්වාසභංග යෝජනාව පිළිබඳ සාකච්ඡුා පවත්වා ඇති බවද ඔහු ප‍්‍රකාශ කළේය. ඒ අනුව ජවිපෙ හා දෙමළ ජාතික සන්ධානය අතර විශ්වාසභංගය පිළිබඳ සාකච්ඡුාවක් දැනටමත් පවත්වා ඇත.