මහා මැතිවරණයට ඉදිරිපත් වූ වියත්මග සංවිධානයේ අපේක්ෂකයන් නවදෙනෙකු අතරින් අටදෙනෙකු ජයගෙන ඇති අතර ජාතික ලැයිස්තු මන්ත්‍රීධුර දෙකක් සමග වියත්මග සංවිධානයෙන් පාර්ලිමේන්තු මන්ත්‍රීවරුන් 10ක් තේරී පත්වනු ඇති බව වාර්තා වේ.

ගම්පහ දිස්ත්‍රික්කයෙන් ආචාර්ය නාලක ගොඩහේවා, කොළඹ දිස්ත්‍රික්කයෙන් සරත් වීරසේකර, මාතලේ දිස්ත්‍රික්කයෙන් නාලක කෝට්ටේගොඩ, අනුරාධපුර දිස්ත්‍රික්කයෙන් මහාචාර්ය චන්න ජයසුමන, කුරුණෑගල දිස්ත්‍රික්කයෙන්                    

මහාචාර්ය ගුණපාල රත්නසේකර, මහනුවර දිස්ත්‍රික්කයෙන් නීතිඥ උදයන කිරිඳිගොඩ, හම්බන්තොට දිස්ත්‍රික්කයෙන් වෛද්‍ය උපුල් ගලප්පත්ති, දිගාමඩුල්ල දිස්ත්‍රික්කයෙන් වෛද්‍ය තිලක් රාජපක්ෂ ජයගෙන ඇත.

ජාතික ලැයිස්තුවෙන් නාමයෝජනා ලබාදුන් අජිත් නිවාඞ් කබ්රාල් සහ සීතා අරඹේපොල යන අපේක්ෂකයන්ටද මන්ත්‍රීධුර ලබාදීමට තීරණය කර ඇති බව වාර්තා වේ.

වියත්මග සංවිධානයෙන් ඉදිරිපත්ව පරාජයට පත් වී ඇත්තේ කොළඹ දිස්ත්‍රික්කයෙන් ඉදිරිපත් වූ අනුර ප්‍රනාන්දු පමණි.

වියත්මග සංවිධානය 2019 ජනාධිපතිවරණයට පෙර ගෝඨාභය රාජපක්ෂගේ ප්‍රධානත්වයෙන් ආරම්භ කළ සංවිධානයකි. ගෝඨාභය රාජපක්ෂ 2019 ජනාධිපතිවරණයට නාමයෝජනා ලබාදීමේදී ඔහු වියත්මග සංවිධානයේ සාමාජිකයෙකු ලෙස හැඳින්වූ අතර ඔහු ශ්‍රී ලංකා පොදුජන පෙරමුණේ සාමාජිකත්වය ලබාගත්තේ නැත. ජනාධිපතිවරණ ජයග්‍රහණයෙන් පසු සෑම දිස්ත්‍රික්කයකටම වියත්මග සංවිධානයේ සාමාජිකයන් දෙදෙනා බැගින් ඉදිරිපත් කරන බව එම සංවිධානයේ ප්‍රධානීන් ප්‍රකාශ කර තිබුණත්, මහමැතිවරණය ප්‍රකාශයට පත්කළ පසු දිස්ත්‍රික් මට්ටමෙන් නාමයෝජනා ලබාදී තිබුණේ නවදෙනෙකුට පමණි.■