තරිඳු උඩුවරගෙදර

විධායක ජනාධිපති ක‍්‍රමය තවමත් අහෝසි නොකරන්නේ මන්දැයි තමන්ට නොවැටහෙන බවත්, ප‍්‍රජාතන්ත‍්‍රවාදී ආණ්ඩුකරණයක් සඳහා වැඩිපුරම ගැළපෙන්නේ පාර්ලිමේන්තු ක‍්‍රමයක් බවත් ඒකාබද්ධ විපක්ෂයේ පාර්ලිමේන්තු මන්ත‍්‍රී කුමාර වෙල්ගම අනිද්දා සමඟ පැවසීය.

‘විධායක ජනාධිපති ක‍්‍රමය කියන්නෙ ඒකාධිපති ක‍්‍රමයක්.’යැයි ඔහු වැඩිදුර අදහස් දක්වමින් කීවේය. එක් පුද්ගලයෙකුට තනි බලයක් ලැබීම ප‍්‍රජාතන්ත‍්‍රවාදයට නොග ැළපෙන බවත් තමා වුව විධායක ජනාධිපති ධුරයට පත්ව කාලයක් සිටියහොත් බලය අනවශ්‍ය ලෙස පාවිච්චි කරනු ඇති බවත් ඔහු ප‍්‍රකාශ කළේය. විධායක ජනාධිපති ක‍්‍රමය අහෝසි කිරීමෙන් සමස්ත පාර්ලිමේන්තුවට බලය ලැබෙන බවත්, එය වඩා යහපත් බවත් ඔහු කීය.
විධායක ජනාධිපති ක‍්‍රමය අහෝසි කිරීමට ඇති බාධාව ජනවාර්ගික ප‍්‍රශ්නය හා දහතුන්වැනි සංශෝධනයෙන් ජනාධිපතිවරයාට පැවරී ඇති බලතල නම් ඒ පිළිබඳව සාකච්ඡුා කොට තීරණයක් ගැනීම අපහසු දෙයක් නොවන බවද ඔහු පෙන්වා දුන්නේය. ආණ්ඩුකාරවරුන් පත්කිරීම, පළාත් සභා බෙදීයෑමට ඉඩ නොදීම වැනි කටයුතු සඳහා ව්‍යස්ථාමය විකල්ප ඉදිරිපත් කළ හැකි බවද ඔහු කීය.
‘මම ජනාධිපති වුණා නම් මාස හයෙන් විධායක ජනාධිපති ක‍්‍රමය අහෝසි කරලා නාමික ජනාධිපතිවරයෙක් බවට පත්වෙනවා.’ කුමාර වෙල්ගම මහතා කියයි.
ඒකාබද්ධ විපක්ෂය හෝ මහින්ද රාජපක්ෂ මහතා විධායක ජනාධිපති ක‍්‍රමය ගැන පැහැදිලි අදහසක් දක්වා නැත්තේ ඔවුන් දේශපාලන තත්වය පිළිබඳව සහ විධායක ජනාධිපති ක‍්‍රමය අහෝසි කිරීමේ යෝජනා පිළිබඳව සැලකිලිමත් වී තීන්දුවක් ගත යුතු නිසා බව ඔහු පෙන්වා දුන්නේය. එසේ වුවද තමන්ට එවැනි බාධා නැති නිසා විධායක ජනාධිපති ක‍්‍රමය අහෝසි කිරීමේ අවශ්‍යතාව තමන් දැඩිව පෙන්වාදෙන බවත් ඔහු කීය.
කෙසේ වෙතත් ඒකාබද්ධ විපක්ෂය සමඟ සිටින ජාතිකවාදී කණ්ඩායම් මේ වනවිටත් විධායක ජනාධිපති ක‍්‍රමය රටට අනතුරක් වන බව ප‍්‍රකාශ කරමින් සිටියි.