■ කිතුසර කණ්ඩායම

පෘථිවි ගෝලයටත් එහි ජීවයටත් ආදරය කරන ශ්‍රී ලාංකීය පුරවැසියන් පිරිසක් ලෙස, 2021 ලෝක පරිසර දිනයේ පැවැති ‘පරිසර අර්බුදය’ මූලය හා විසඳුම්’ නම් කතිකාවතින් මතු වූ අදහසක් අනුව මෙම ආයාචනය ඉදිරිපත් කිරීමට තීරණය කළේමු.

අපගේ මේ ආයාචනය,

– අප රට තුළ ජීවත්වන,

– අප රටින් බැහැර රටවල ජීවත්වන සියලු ජාතින්ට අයත් ශ්‍රී ලාංකේය බුද්ධිමතුන් වෙත කෙරෙන විවෘත ආයාචනයකි.

පසුගිය කාලය පුරාම අප රට තුළ ඇති වූ අර්බුද අවස්ථාවලදී මෙන්ම සාමාන්‍ය ප්‍රශ්න වලදීද මෙරට පොදු ජනයා මුහුණ දෙන ගැටලුවක් වන්නේ ඇත්ත විද්‍යාත්මක අදහස කුමක්ද යන්න තෝරා බේරා ගැනීමයි.

නිදසුන් ලෙස ඉතා මෑතක ඇති වූ විෂ පොල්තෙල් පිළිබඳ ප්‍රශ්නය, පර්ල් එක්ස්ප්‍රස් නැව ගිනි ගැනීමේ ප්‍රශ්නය ආදියේ දී ද, ලොක් ඩවුන් කළ යුත්තේ කෙසේ ද ? කෝවිඩ් සිරුරු භූමදානය කරනවාද ? නැද්ද ? ආදි විවිධ ප්‍රශ්නවලදී මෙරට පොදු ජනයාට පිළිගත හැකි විද්‍යාඥ අදහස ප්‍රකාශ කරන ස්වාධීන විද්‍යාඥ මණ්ඩලයක අවශ්‍යතාවය තදින් ම දැනී ඇත.

එවන් ස්වාධීන අදීන විද්‍යාඥ හා බුද්ධිමතුන් මණ්ඩලයක් නිසි මැදිහත්වීමක් අවශ්‍ය අවස්ථාවලදී අප්‍රමාදව කළේ නම් අපේ රටේ තත්ත්වය මේ සා දුක්ඛීත නොවනු ඇත.

මෙහිදී විද්වත් යන ලේබලය යටතේ විවිධ පක්ෂවල පටු දේශපාලන අරමුණු වලට අනුව ගොනුවු පිරිස් නිසා ජනතා තුළ විද්වතුන් කෙරෙහිද බරපතල අප්‍රසාදයක්, විරෝධයක් මතු වී ඇති අතර ‘විද්වත්’ යන්න හාස්‍යයට ලක්වන තත්ත්වයක් ඇති වී ඇත.

නමුත් අප අදහස් කරන්නේ මිථ්‍යාව වෙනුවට විද්‍යාව ජන සමාජයක යහපත් පැවැත්මට අත්‍යාවශ්‍ය මග පෙන්වීම විය යුතු බවයි. එසේම ඒ විද්‍යාව පවතින දුෂ්ඨ ක්‍රමය සාධනීයව වෙනස් කිරිම අවැසි බව දකිනා ඓන්ද්‍රීය බුද්ධිමතුන් විසින් පෙන්වා දිය යුතු බවයි. ක්‍රමය පවත්වා ගැනීමට ක්‍රියා කරන සම්ප්‍රදායක බුද්ධිමතුන් සිදු කරන්නේ තත්ත්වය තවත් නරක අතට හැරවීම බවද අපි දකිමු.

ශ්‍රී ලංකාව රටක් ලෙස පර්යේෂණ සඳහා අවම පිරිවැයක් දරණ රටක් වන නිසාත්, දේශපාලන බලපෑම් මත නිදහසේ වැඩ කිරීමට ඉඩකඩ අවම වීම නිසාත් මේ රටින් පිට සේවය කරන විද්‍යාඥයින් රැසක්ද සිටින බව අපි දනිමු.

එසේම බොහෝ විද්‍යාඥයින්ට, බුද්ධිමතුන්ට තම ජීවිත යහපත්ව පවත්වා ගැනීමට තරම් ආදායම් ඇති හෙයින්ද තමන් නිරත වන ක්ෂත්‍රය තුළ ඉටුකරන කාර්යයන් තුළින් සමාජ පිලිගැනීමක් හා වටිනාකමක් නිතැනින්ම උරුම වන නිසා ද, මුදලට ගැතිවීම හෝ ලාභ ජනප්‍රියත්වය හඹා යෑම හෝ අවශ්‍ය නොවන බව අපි දනිමු.

බර්ටෝල්ට් බ්‍රෙෂ්ට් කලාකරුවන් ගැන කියු ප්‍රකාශයකින් කරන අවධාරණයක් අපගේ මෙම ප්‍රස්තුතයට අදාලව ඉදිරිපත් කළොත්,

“මේ සා අඳුරු යුගයක් තිබුණි දැයි අනාගත පරපුර නොඅසනු ඇත. එහෙත් ඒ අඳුරු යුගයේදී බුද්ධිමතුන් විද්‍යාඥයින් කුමක් කළේ දැයි ඔව්හූ අසනු ඇත”

එබැවින් අප රටේත්, අනාගත පරපුරේත් පාරිසරික උරුමයේත් නාමයෙන් අපි ඉල්ලා සිටින්නේ ඔබට මේ යුගය විසින් පවරා තිබෙන මෙහෙවරක් ලෙස සළකා ඔබගේ කාලයෙන් ශ්‍රමයෙන් යම් කොටසක් කැප කර ‘ස්වාධීන විද්‍යාඥ මණ්ඩලක් පිහිටුවා ගෙන අප රටේ පාරිසරික හා සමාජ ප්‍රශ්නවලදී මහජනයාට නියම සත්‍ය ඉක්මනින් සන්නිවේදනය කරන ලෙසයි. එය ඔබ උපන් දේශයට ඔබ කරන අගනාම සේවය වනු ඇත. එපමණක් නොව එය ඔබටද ඔබේ පවුල්වලටද ආශිර්වාදයක් වනු ඇත. එවැන් කාර්යයන් සඳහා අවශ්‍ය පිරිවැය රට තුළින් හා විදේශයන් තුළ සිටින අවංක පිරිස් තුළින් සම්පාදනය කරගත හැකි වනු ඇත.

අප රටත්, මානව සමාජයක් ඉදිරියට ගෙනයා හැක්කේ පටු දේශපාලකයින්ටවත් ඔවුන්ගේ ව්‍යාපෘතිවල ඉත්තන් බවට පත් වු ඊනියා විද්වතුන්ටවත්, පවතින දුෂ්ට ක්‍රමය පවත්වා ගැනීමට මත දක්වන සම්ප්‍රදායික බුද්ධිමතුන්ටවත් නොවේ. සෑම ක්ෂෙත්‍රයකම සිටින ඓන්ද්‍රීය බුද්ධිමතුන්ටය. එබැවින් ඔබගේ මැදිහත්විම යුග අවශ්‍යතාවයක් බව නැවත අවධාරණය කරමින් ඒ සඳහා ඉදිරිපත් වන ලෙස ඉල්ලා සිටිමු. ඒ සඳහා පෙරමුණ ගන්නා ලෙස හෘදය සාක්ෂිය කතා කරන අය සැමට ආයාචනා කරමු.■