පාස්කු ඉරිදා ත්‍රස්ත ප්‍රහාරයෙන් පසුව මාධ්‍ය කටයුතු කළ ආකාරය සම්පූර්ණයෙන්ම ආචාරධර්ම විරෝධී මෙන්ම වගකීම් විරහිත බව අමුතුවෙන් කිව යුතු නැත. මෙම ත්‍රස්ත ප්‍රහාරයෙන් පසුව සටහන ලියැවෙන මොහොත වෙද්දී විවිධ හේතු මත අත්අඩංගුවට ගැනුණු සිය ගණනකි. එහෙත් ත්‍රස්ත ක්‍රියාවට සම්බන්ධ බව තහවුරු වී සැකපිට ප්‍රශ්න කරන්නේ 73 දෙනෙකු පමණි.


එහෙත් පසුගිය කාලයේදී රාත්‍රී ප්‍රවෘත්ති හෝ දිනපතා පුවත්පත් නැරඹූ අය දිනකට පමණක් ත්‍රස්තවාදීන් පණහක් හැටක් හසුවෙන බව විශ්වාස කරනු ඇත. ලංකාව පුරාවට ත්‍රස්තවාදීන් සිටින බව සැක කරන්නට සිදුවෙන අන්දමේ තොරතුරු දකින්නට ලැබෙනු ඇත. ප්‍රවෘත්ති නරඹන්නෙකු අද ඉන්නේ දැඩි බියකිනි. ඒ මාධ්‍යවලින් දුටු වැටලීම් සංදර්ශන නිසාය.


ආරක්ෂාව වඩාත් තහවුරු කිරීම සඳහා දිවයින පුරා මුස්ලිම් ජාතිකයන් ඉලක්ක කරගනිමින් සෝදිසි මෙහෙයුම් මාලාවක් සිදුකර තිබුණි. සාමාන්‍ය ජනතාව බියට පත්වෙන තොරතුරු ආවේ ඒ වැටලීම් මාධ්‍යවලින් වාර්තා කළ ආකාරය නිසාය. මෙසේ සෝදිසි මෙහෙයුම් කිරීම යහපත් තත්වයකි. එස්.ටී.එෆ්. හා හමුදා කණ්ඩායම් විසින් මෙවැනි මෙහෙයුම් වැඩි වශයෙන් සිදුකර තිබුණි. එම කණ්ඩායම් අත්අඩංගුවට ගත් පුද්ගලයන් අදාල ප්‍රදේශවල පොලිස් ස්ථානවලට බාරදීම සිදුකරයි. එලෙස අත්අඩංගුවට ගත් පුද්ගලයන්ගෙන් සැලකිය යුතු පිරිසක් අත්අඩංගුවට ගත් දිනයේම නිදහස් කර තිබුණි. එයට හේතුව ඔවුන් සැක කිරීමට හේතු නොවීමයි.


එලෙස අත්අඩංගුවට ගත් පුද්ගලයන් අතර අනන්‍යතාව තහවුරු කළ නොහැකි පුද්ගලයෝ, පුපුරන ද්‍රව්‍ය ළඟ තබාගත් පුද්ගලයෝ, විවිධ පොත්පත් ආදිය ළඟ තබාගත් පුද්ගලයෝ සිටිති. ඊට අමතරව හමුදා ඇඳුමට සමාන ඇඳුම්, සුදු ඇඳුම් හා චීවර ළඟ තබාගත් පුද්ගලයන්ද අත්අඩංගුවට ගෙන තිබුණි. සිම් කාඞ්පත් කිහිපයක් ළඟ තබාගත් අය, දුරකථන කිහිපයක් තබාගත් අය පවා අත්අඩංගුවට ගෙන තිබුණි. ඇඳිරි නීතිය බලපැවැත්වූ අවස්ථාවේ පොදු ස්ථානවල රැඳී සිටි පුද්ගලයෝ සිටිති. එවැනි අය තමන්ගේ අනන්‍යතාව හා තමන් ළඟ තිබුණු බඩුභාණ්ඩවලට අදාළ ලියකියවිලි ඉදිරිපත් කිරිමෙන් පසු බොහෝදෙනෙකු නිදහස් කර තිබුණි.

මෙලෙස පුද්ගලයන් අත්අඩංගුවට ගෙන නිදහස් කිරීම සාමාන්‍ය තත්වයකි. හදිසි තත්වය නිසා සැකපිට අත්අඩංගුවට ගැනීම් කරන්නට සිදුවෙයි. එහෙත් ගැටලුව වුණේ මේ වැටලීම්වලින් සැලකිය යුතු ප්‍රමාණයක් ප්‍රාදේශීය මාධ්‍යවේදීන්ගේ කැමරා සමඟ කිරීමය. ඒ ප්‍රාදේශීය මාධ්‍යවේදීන් පුද්ගලයන්ගේ පෞද්ගලිකත්වයත්, ආරක්ෂාවත් ආක්‍රමණය කරමින් මාධ්‍ය වාර්තා කර තිබුණේ, ඒ පුද්ගලයන් පසුව නිර්දෝෂී බව තහවුරු වුවද ඔවුන්ගේ ජීවිත විනාශ වෙන ආකාරයටය. විවිධ ප්‍රදේශවල ජීවත්වෙන පුද්ගලයන්ට තම ප්‍රදේශයේ ජීවත්වීමට බිය හිතෙන අන්දමටය. එවැනි වාර්තා ගණනාවක් ඇතත්, සිදුවීම් කිහිපයක් මෙසේය.


අප්‍රේල් 22 වැනිදා හිරු ටී.වී. ඇතුළු ප්‍රවෘත්ති නාලිකා කිහිපයකින්ම කොච්චිකඬේ පුපුරවාගැනීම කළ පුද්ගලයා වසර කිහිපයකට පෙර මාධ්‍ය සාකච්ඡාවක පෙනී සිටි බව කියමින් පුද්ගලයෙකුගේ වීඩියෝවක් විකාශය කර තිබුණි. කෙසේ වෙතත් ඒ වීඩියෝව මොහොමඞ් ෆර්සාන් නම් පුද්ගලයෙකුගේ විය. ඒ නිසා ඔහු දැඩි අපහසුතාවකට පත්වී තිබුණු අතර ත්‍රස්ත ක්‍රියාවට කිසිදු සම්බන්ධයක් නැති, ජීවතුන් අතර සිටින්නෙකු වූ ඔහු දැඩි පීඩාවකට ලක්වී තිබුණි.


අප්‍රේල් 26 වැනිදා කොම්පඤ්ඤ වීදියේ පල්ලියක නවාතැන් ගෙන සිටි තරුණයෙකු යුද හමුදා නිලඇඳුම් සමඟ අත්අඩංගුවට ගත් බව මාධ්‍ය වාර්තා කර තිබුණද, එම තරුණයා එම ඇඳුම් සිය පියාගේ වෙළඳසැලෙහි අලෙවි කිරීම පිණිස තවත් වෙළඳසැලකින් මිලදී ගත් ඇඳුම් තොගයකි. එම තරුණයාගේ මුහුණ සම්පූර්ණයෙන්ම මාධ්‍යවලින් පෙන්වා තිබුණි. එහෙත් පසුව එම තරුණයා නිදහස් කර තිබේ.


මාතර හක්මන ප්‍රදේශයේදී සිංහල භාෂාවෙන් ලියැවුණු ඉස්ලාම් ධර්මය ගැන තවුහිත් ජමාත් මතවාදය රැගත් පොත්පත්, පැරණි ගුවන් බලපත්‍රයක් ආදිය ගිනි තබමින් සිටියදී පුද්ගලයන් හතරදෙනෙකු හා කාන්තාවක අත්අඩංගුවට ගෙන තිබුණි. මේ පුද්ගලයන් එම භාණ්ඩ ගිනි තබා තිබුණේ අත්අඩංගුවට පත්වේයැයි බියෙනි. එහෙත් ඔවුන් ත්‍රස්ත ක්‍රියාවකට සම්බන්ධ වී තිබුණේ නැත. එහෙත් ඔවුන් නිවෙස් තුළට කඩාවැදුණු කැමරාකරුවන් ඔවුන්ව ත්‍රස්තවාදීන් බවට පත්කර තිබුණි.


අප්‍රේල් 28 වැනිදා රත්මලානේදී වෝකිටෝකි තොගයක් එස්.ටී.එෆ්. කණ්ඩායමකින් අත්අඩංගුවට ගෙන තිබුණි. එහෙත් එම තොගය හවස් වරුව වෙද්දී පොලීසියේදී නිදහස් කර තිබුණේ ඒවා නීත්‍යනුකූලව බලපත්‍ර සහිතව තබාගත් ඒවා නිසාය. එහෙත් වැටලීම් සජීව පටිගත කළ මාධ්‍යවේදීන් මාධ්‍ය ආයතනවලට ප්‍රවෘත්තිය යවා තිබුණු අතර හවස් වරුවේ නිදහස් කළ වෝකිටෝකි ගැන රාත්‍රී ප්‍රවෘත්තිවල විකාශය විය.


සයින්දමරුදු ප්‍රදේශයේ පිපිරීම්වලින් පසුව අප්‍රේල් 29 වැනිදා පන්සල්වලට පහරදීමේ ඉඩක් ගැන මාධ්‍යවලින් වාර්තා කර තිබුණි. සැබෑ ලෙසම ඉහත කී ත්‍රස්තවාදී කණ්ඩායමට එවැනි සැලසුමක් තිබී ඇතැයි සයින්දමරුදු ප්‍රදේශයේ වැටලීමෙන් පසුව ආරක්ෂක අංශවලින් පවසයි. එම වැටලීම්වලදී සුදු ඇඳුම් කිහිපයක් හමුවීම සැකයට හේතුව වී තිබුණි. එහෙත් ත්‍රස්තවාදී කල්ලිය අත්අඩංගුවට පත්වෙද්දී එවැනි පිපිරීමක් සිදුකිරීමට හැකියාවක් ත්‍රස්තවාදී කණ්ඩායමට තිබුණේ නැත. එසේ වුව අප්‍රේල් 29 වැනිදා ගලගොඩඅත්තේ ඥානසාර හිමි පන්සල් 50කට පහරදීමේ සැලැසුමක් ඇතැයි කරන ලද ප්‍රකාශයක් මාධ්‍යවලින් වාර්තා කර තිබුණි. ඉන්පසුව පන්සල් පහරදීමේ සැකය ගැන සාමාන්‍ය ජනතාව අතර බියක් ඇතිකිරීමේ පැහැදිලි සැලසුමක් මාධ්‍ය ආයතනවලට තිබුණි. අප්‍රේල් 30 වැනිදා ප්‍රවෘත්ති විකාශවලදී හිරු ප්‍රවෘත්ති ඇතුළු මාධ්‍ය ආයතන තුවක්කු, උණ්ඩ ආදිය හමුවීම ගැන ප්‍රවෘත්ති වාර්තා කරද්දී, ස්ථාන හැඳින්වුවේ අනුරාධපුර ශ්‍රාවස්තිපුර විහාරස්ථානය අසල, ගොඩගම නාරම්මල විහාරස්ථානය අසල ආදි වශයෙන් අසල ඇති පන්සල් ඉදිරියට දමමිනි.


මෙලෙස හමුවූ කඩු, බෝර 12 තුවක්කු, රිවෝල්වර්, යුද හමුදාව පාවිච්චි කරන ආයුධවල උණ්ඩ හා බෝම්බ ආදිය ළඟ තබාගැනීම නීති විරෝධීය. එහෙත් එවැනි ආයුධ ලංකාවේ ඕනෑ ජනවර්ගයකට අයත් පුද්ගලයන් නීතිවිරෝධීව සඟවා තබාගන්නා බව නොරහසකි. මෑතක දියතලාවේදී එවැනි බෝම්බයක් පුපුරා ගිය බවද මතක තබාගත යුතුය. නීති විරෝධී එවැනි ආයුධ ළඟ තබාගත් අයට නීතිය ක්‍රියාත්මක වනු ඇත. එහෙත් ත්‍රස්තවාදී ක්‍රියාව සමඟ ඒවා පටලවමින් සාමාන්‍ය ජනතාව බිය වැද්දීමේ මාධ්‍ය ආයතන න්‍යාය පත්‍රවලට හසුවිය යුතු නැත.


ජනප්‍රිය වීමේ ආශාවෙන් වැටලීම් සිදුකළ හමුදා සහ පොලිස් නිලධාරීන්ද මාධ්‍යවේදීන් රැගෙන වැටලීම්වලට යන බව පැහැදිලිව දකින්නට ලැබුණි. එහෙත් හමුදාව මෙන්ම පොලීසියද කියන්නේ මාධ්‍යවේදීන් රැගෙන නොයන ලෙස උපදෙස් දුන් බවය.


යුද හමුදා මාධ්‍ය ප්‍රකාශක බි්‍රගේඩියර් සුමිත් අතපත්තු අප සමඟ ප්‍රකාශ කළේ හමුදාව සිදුකරන වැටලීම්වලදී මාධ්‍යවේදීන් රැගෙන නොයන ලෙස පැහැදිලිව උපදෙස් දී තිබෙන බවය. තමන් දන්නා පරිදි එවැනි සිදුවීම් කිසිවක් සිදු වී නොමැති බවද ඔහු කීය. හමුදා මාධ්‍ය ප්‍රකාශකවරයා එසේ පැවසුවද, හමුදාවේ ඉහළ නිලධාරීන්ගේ උපදෙස් පිළිපදිමින් හෝ නැතිව හමුදා නිලධාරීන් සිය මෙහෙයුම්වලට මාධ්‍යවේදීන් රැගෙන ගොස් තිබුණි. අප්‍රේල් 30 වැනිදා රාත්‍රී ප්‍රවෘත්ති විකාශවලින් අම්පාර ප්‍රදේශයේ ප්‍රාදේශීය මාධ්‍යවේදියෙකු වන වසන්ත චන්ද්‍රපාල හමුදා ට්‍රක් රියක නැඟී, මයික්‍රෆෝනය අතැතිව හමුදා මෙහෙයුම් පිළිබඳව විස්තර කරන අන්දමේ වීඩියෝවක්ද පෙන්වීය. වසන්ත චන්ද්‍රපාල දිගින් දිගටම හමුදාව සමඟ හමුදා සෙබළෙකු මෙන් වැටලීම්වලට සහභාගී වූ මාධ්‍යවේදියෙකි. ඔහු පැහැදිලිවම එම වැටලීම්වලට ගියේ හමුදා සෙබලුන්ගේ සහයෝගය මතය.


පොලිස් මාධ්‍ය ප්‍රකාශක රුවන් ගුණසේකර පැවසුවේද පොලිස් ස්ථානවලට මාධ්‍යවේදීන් රැගෙන නොයන ලෙස පැහැදිලිව උපදෙස් දී ඇති බවය.


‘මම මේ වෙද්දී එස්.ටී.එෆ්., යුද හමුදාව හා පොලිස් ස්ථානවලින් සිදුකර තිබෙන අත්අඩංගුවට ගැනීම් පිළිබඳ සංඛ්‍යාලේඛන ප්‍රසිද්ධ කරන්නේ නැහැ. මොකද එහෙම දත්ත ප්‍රකාශ කරද්දී වරදින්නට ඉඩ තියෙනවා. හමුදාව හා එස්.ටී.එෆ්.වලින් අත්අඩංගුවට ගන්නා අයවත් එවන්නේ පොලිස් ස්ථානවලට. එතකොට එකම පුද්ගලයාව දෙවරක් ගණනය වෙන්න ඉඩ තියෙනවා. ඒ වගේම අත්අඩංගුවට ගන්න සියලුදෙනාම ත්‍රස්ත ක්‍රියාවලට සම්බන්ධ බව කියන්න බැහැ. ඒ නිසා සාමාන්‍ය ජනතාව බියට පත් නොකළ යුතු නිසා මම සංඛ්‍යා දත්ත කියද්දීත් පරෙස්සම් වෙනවා.
මේ වෙද්දී බෝම්බ ප්‍රහාරයට සැකපිට අපරාධ පරීක්ෂණ දෙපාර්තමේන්තුවෙන් 54 දෙනෙක්ව ප්‍රශ්න කරමින් සිටිනවා. ත්‍රස්ත විමර්ශන කොට්ඨාසය 19 දෙනෙක්ව ප්‍රශ්න කරමින් සිටිනවා. එතකොට සමස්තයක් විදියට 73 දෙනෙකු ඉන්නවා. ඒ අය තමයි මේ ත්‍රස්ත ක්‍රියාවට සම්බන්ධ ප්‍රධාන සැකකරුවන්. එහෙත් පොලිස් ස්ථානවල ඇතැම් නිලධාරීන් වගකීම් විරහිත ලෙස මාධ්‍යවේදීන්ද රැගෙන මෙහෙයුම් කරන බව පේනවා. මෙතැනදී පොලීසිය පැත්තෙන් ලොකු ප්‍රශ්නයක් වෙනවා. මේ විදියට අත්අඩංගුවට ගැනීම්වලදී වීඩියෝ කිරීම පැමිණිලි පාර්ශ්වයට ලොකු අවාසියක්. ඒ නිසා පරීක්ෂණ ඉදිරියට ගෙනයන්න අමාරුයි. අනෙක් පැත්තෙන් අත්අඩංගුවට පත්වෙන අයගේ පෞද්ගලිකත්වයට ලොකු ප්‍රශ්නයක්. මිනිස්සු නිවෙස්වලට අඳින ඇඳුම්වලින් ඉන්නේ. ඔවුන්ගේ පෞද්ගලික ජීවිත අනවසරයෙන් කැමරා වෙනවා. සමහර සැකකරුවන් අත්අඩංගුවට ගනිද්දී සිටියේ යට ඇඳුම් පිටිනුයි. ඒ දර්ශන පවා මාධ්‍යවලින් වාර්තා කළා. ඔවුන් අත්අඩංගුවට පත්වුණත් ඔවුන් තවම සැකකරුවන්. ඒ නිසා අපි උපදෙස් දීලා තියෙන්නේ කැමරා කණ්ඩායම් රැගෙන යන්න එපා කියලයි. ඒ උපදෙස් කඩකරලා කටයුතු කරන්න ගිහින් ප්‍රශ්නයක් ඇතිවුණොත් අදාල ප්‍රදේශවල පොලිස් ස්ථානාධිපතිවරුන් වගකියන්න ඕනෑ.’ ■