අමාත්‍යාංශ හිටපු ලේකම් අශෝක පීරිස්

පාර්ලිමේන්තුව නැවත නොකැඳවා ප්‍රමාද කිරීමෙන් මැයි 01 වැනිදා සිට මුදල් වියදම් කිරීමට අදාලව ව්‍යවස්ථාමය අර්බුදයක් ඇතිවන බවත්, එය විසඳාගැනීමට ඇති පහසුම ක්‍රමය පාර්ලිමේන්තුව කැඳවා අතුරු සම්මත ගිණුමක් අනුමත කිරීම බවත් අමාත්‍යාංශ හිටපු ලේකම් අශෝක පීරිස් සඳහන් කරයි.

අනිද්දා කළ විමසීමකදී අදහස් දක්වමින් ඔහු ඒ බව පැවසීය.

සාමාන්‍ය ජනතාව පාර්ලිමේන්තුව කැඳවන්නැයි ඉල්ලා නොසිටින බව සැබෑවක් නමුත් ආණ්ඩුකරණය හා ප්‍රජාතන්ත්‍රවාදය පැත්තෙන් මෙය බරපතළ තත්වයක් බව ඔහු කීය.

ඔහු පෙන්වාදෙන්නේ පාර්ලිමේන්තුව නැවත කැඳවීමට සියලු මන්ත්‍රීවරුන් එක්රැස්වීම අවශ්‍ය නොවන බවත් වසංගතය වර්ධනය නොවන ආකාරයට පාර්ලිමේන්තුව කැඳවීමට ක්‍රමවේද ගණනාවක් තිබෙන බවත්ය.

අශෝක පීරිස් මහතාගේ ප්‍රකාශය මෙසේය.

‘පසුගිය වසරේ දෙසැම්බර් 10 වැනිදා පමණ චීනයෙහි වසංගතය ආරම්භ වුණා. දෙසැම්බර් 31 වැනිදා වන විට මෙය ලෝකයේ වෙනත් රටවලට පැතිර යා හැකි වසංගතයක් බව ලෝක සෞඛ්‍ය සංවිධානය අනතුරු හැඟවූවා. පෙබරවාරි මාසයේදී තවත් රටවල් කිහිපයකට රෝගය පැතිරුණා. ලංකාවටත් අවදානම ආවා.

ඒ අතරේ ජනාධිපති ගෝඨාභය රාජපක්ෂ මහතා අගෝස්තු මාසය දක්වා කාලය තිබුණු පාර්ලිමේන්තුව මාර්තු 02 වැනිදා විසුරුවා හැරියා. හැකි ඉක්මනින් ජනාධිපතිවරණයට යෑම ජනාධිපතිවරයාගේ වුවමනාව බව පෙනුණා. එහෙත් කොවිඩ්-19 වසංගතය ලංකාවටත් ආවා. මැතිවරණය පැවැත්වීමට නොහැකි තත්වයක් උදා වුණා. එවැනි තත්වයක් යටතේ වුණත් මැතිවරණය කල් දැමීමට ජනාධිපතිවරයා කටයුතු කළේ නැහැ. මැතිවරණ කොමිෂන් සභාවට නාමයෝජනා කැඳවන්න සිද්ධවුණා. ඉන්පසුව කොමිසම මැතිවරණය කල් දැම්මා. ලෝකයේ ප්‍රධාන රටවල් ගණනාවකට රෝගය පැතිරෙනකොටත් ලංකාවේ මැතිවරණ ක්‍රියාවලිය ඉදිරියට ගියා. සාක් කලාපීය නායකයන් එක්ක සාකච්ඡාවේදී පවා ජනාධිපතිවරයා කීවේ මැතිවරණය පවත්වන්න පුළුවන් කියලා. එහෙත් අප කතාකරන මොහොත වන විට රෝගීන් 189 ක් හා මරණ 7ක් දක්වා තත්වය බරපතළ වෙලා තියෙනවා.

මේ අතරතුර ඇඳිරි නීතිය පැනවීම වගේ සාධනීය පියවර වසංගතය නැවැත්වීම සඳහා ගෙන තිබෙනවා. සැක සහිත ගම්මාන පිටින් නිරෝධායනයට ලක් කරමින් ඉන්නවා. මේවා යහපත් පියවර.

ඒ අතරතුරේ තමයි පාර්ලිමේන්තුව ගැන ව්‍යවස්ථාමය සාකච්ඡාවක් මතුවුණේ. මේ ගැන මුලින්ම ප්‍රසිද්ධියේ කතාකළේ පාර්ලිමේන්තු මන්ත්‍රී එම්.ඒ. සුමන්තිරන්. ඒ අනුව දැන් පවතින සාකච්ඡාව තමයි අප්‍රේල් 30 වැනිදා දක්වා දැනට පවතින අතුරු සම්මත ගිණුම ක්‍රියාත්මක වුණත්, එදායින් පසුව වියදම් කිරීම සඳහා පාර්ලිමේන්තුවෙන් මුදල් අනුමත වී නොතිබීම.

ඒ අනුව මින් ඉදිරියට රජයේ වැටුප් ගෙවීම ඇතුළු කටයුතු සඳහා මුදල් වියදම් කරන්නේ කොහොමද? විශේෂයෙන්ම කොවිඩ්-19 මර්දනය කිරීම සඳහාත් සහනාධාර ලබාදීම සඳහාත් මුදල් සම්මත කරගන්නේ කොහොමද?

දැනට ආණ්ඩුක්‍රම ව්‍යවස්ථාවේ 70 වැනි ව්‍යවස්ථාව යටතේ මෙවැනි අවස්ථාවක ජනාධිපතිවරයාට කටයුතු කළ හැකි ආකාරය සඳහන් වෙනවා. 70(7) අනුව පාර්ලිමේන්තුව විසුරුවා හැර ඇති අවස්ථාවක නැවත කැඳවීමට නියමිත දිනයට කලින් හදිසි තත්වයක් උදාවී තියෙනවා කියලා ජනාධිපතිවරයා සෑහීමට පත්වුණොත් නැවත පාර්ලිමේන්තුව කැඳවන්න පුළුවන්. ඒ අනුව දැන් කොවිඩ්-19 මර්දනය සඳහාත් ආණ්ඩුව ඉදිරියට ගෙනයෑම සඳහාත් අවශ්‍ය මුදල් ලබාගැනීමට පාර්ලිමේන්තුව කැඳවලා මුදල් අනුමත කරගැනීමේ හැකියාවක් ජනාධිපතිවරයාට තියෙනවා.

දැන් ආණ්ඩුව නිල වශයෙන් ඒ සංවාදය ගැන සම්පූර්ණ නිහැඬියාවක ඉන්නවා. ඒ අතරේ ස්වාමීන් වහන්සේලා ඉදිරියට ඇවිත් පාර්ලිමේන්තුව කැඳවන්න ඕනෑ නැති බව කියනවා. දෙරණ හා හිරු නාලිකා ඇතුළු මාධ්‍ය සමාජගත කරන ඇතැම් මත රටට අහිතකරයි. පාර්ලිමේන්තුව නැවත කැඳවීමට එරෙහිව සමාජ මතයක් නිර්මාණය කිරීමට ඒ මාධ්‍ය ආයතන පාවිච්චි කරනවා. සාමාන්‍යයෙන් ඒ මාධ්‍ය ආයතනවලින් අප වැනි අයගේ අදහස්වලට ඉඩ ලැබෙන්නේ නැහැ.

ආණ්ඩුවේ නිහැඬියාවෙන් පෙනෙන විදියට එක්කෝ පාර්ලිමේන්තුව කැඳවන්නට බැරි බව ඔවුන් නොකියා කියනවා. නැත්නම් ඔවුන් පාර්ලිමේන්තුව කොහොමත් කැඳවන්නේ නැති බව ඒකෙන් අවබෝධ කරගන්න සිද්ධවෙනවා.

ඇතැම්විට නායකයන්ගේ ආණ්ඩුවේ දැනුම් තේරුම් හැටියට ඔවුන් හිතනවා ඇති පාර්ලිමේන්තුව නැවත කැඳවීම ඔවුන්ගේ පරාජයක් හෝ ආපස්සට යෑමක් කියලා.

එහෙත් ඔවුන් පාර්ලිමේන්තුව නොකැඳවා සිටියහොත් අනිවාර්යයෙන්ම මැයි 01 වැනිදා සිටි ව්‍යවස්ථාමය අර්බුදයක් ඇතිවෙනවා. මැයි 01 වැනිදා සිට මුදල් වියදම් කරන්නේ කොහොමද කියන එක ගැන ගැටලුවක් ඇති වෙනවා.

මේ මොහොතේ සාමාන්‍ය ජනතාව පාර්ලිමේන්තුව කැඳවන්න කියලා ඉල්ලන්නේ නැති බව අපි දන්නවා. ඔවුන් ඉල්ලන්නේ කොවිඞ්-19 වසංගතය මර්දනය කරන්න කියලා. ඒ සඳහා ව්‍යවස්ථාවට පිටින් ආණ්ඩුව මුදල් වියදම් කළත් සාමාන්‍ය ජනතාව නිහඬව ඉඳීවි. ඒක පුදුමයට කාරණයක් නෙවෙයි.

ඒ වගේම ලංකාවට ගුවන් තොටුපොළ ගණනාවක් නැති නිසාත්, ලංකාව දූපතක් නිසාත් ඇඳිරි නීතිය හා නිරෝධායන නීති තදින් ක්‍රියාත්මක කළොත් වසංගතය මර්දනය කරන්නත් ආණ්ඩුවට හැකි වෙන්න පුළුවන්.

මෙහි බරපතළ ගැටලුව මතු වෙන්නේ ව්‍යවස්ථානුකූල ආණ්ඩුකරණයට අදාළවයි.

150 වැනි ව්‍යවස්ථාවෙහි හදිසි අවස්ථා අරමුදලක් ගැන සඳහන් වෙනවා. කෙසේ වෙතත් හදිසි අවස්ථා අරමුදල යටතේ කරන සම්පූර්ණ මුදලට සමාන වටිනාකම් පසුව පරිපූරක ඇස්තමේන්තුවක් ලෙස පාර්ලිමේන්තුවට ඉදිරිපත් කොට සම්මත කරගන්න ඕනෑ.

ඒ අනුව දැනට ලෙහෙසිම ක්‍රමය විදියට පෙනෙන්නේ ආණ්ඩුව පාර්ලිමේන්තුව කැඳවලා අතුරු සම්මත ගිණුමක් සම්මත කරගැනීම.

පාර්ලිමේන්තුව නැවත කැඳවීමට 225 දෙනෙක්ම එක තැනකට එකතු කරගන්න ඕනෑ නැහැ. දැනටමත් සුමන්තිරන් හිටපු මන්ත්‍රීවරයා පෙන්වාදී තිබෙනවා වසංගත තත්වය යටතේ පාර්ලිමේන්තුව නැවත කැඳවීමට ක්‍රම කිහිපයක්ම. ඒ වගේම ලෝකයේ වෙනත් රටවල් පාවිච්චි කරපු ක්‍රම තියෙනවා. අවශ්‍යතාවක් තිබේ නම් විකල්ප ගණනාවක්ම තියෙනවා.

ඒ ක්‍රම පාවිච්චි කරමින් පාර්ලිමේන්තුව රැස් නොකළොත් ආණ්ඩුකරණය ගැන දීර්ඝකාලීනව ගැටලු මතුවෙන්න ඉඩ තියෙනවා. ඒක ප්‍රජාතන්ත්‍රවාදයට අහිතකරයි.’