පළාත් සභා මැතිවරණය නව ව්‍යවස්ථාවක් සම්මත කරන තුරු නොපැවැත්විය යුතු බව ශ්‍රී ලංකා පොදුජන පෙරමුණේ බහුතර මතය බව අනිද්දා සමඟ අදහස් දැක්වූ ආණ්ඩුවේ නායකයෝ කිහිපදෙනෙක් පැවසූහ.
ආණ්ඩුවේ එක් ප්‍රබල අමාත්‍යවරයෙකු කීවේ මේ වන විට පවතින අභ්‍යන්තර බෙදීම් නිසා පළාත් සභා මැතිවරණය ඉක්මනින් පැවැත්වීමට ආණ්ඩුවේ උනන්දුවක් නොමැති බවය. පසුගිය සතියේ පළාත් සභා මැතිවරණයක් පිළිබඳ පුවත් පළවුණේ ජිනීවා මානව හිමිකම් කවුන්සිල සැසිවාරය සහ ඉන්දියාවෙන් එල්ල වූ බලපෑම් නිසා බවද ඔහු කීය.
මාර්තු 03 වැනිදා පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන්ගෙන් මාධ්‍යවේදීන් කිහිපදෙනෙකු කළ විමසීමකදී අමාත්‍යවරයා කියා තිබුණේ පළාත් සභා මැතිවරණය පැවැත්වීමක් ගැන තමන් නොදන්නා බවත්, තමන් එය දැනගත්තේ පුවත්පත්වලින් බවත්ය.■