හිටපු යුද හමුදාපති ලුතිනන් ජෙනරාල් මහේෂ් සේනානායක සිය ධුරයෙන් විශ්‍රාම ගිය පසු 23වැනි යුද හමුදාපති ලෙස පැත්වීම් ලැබුවේ මහේෂ් සේනානායක යටතේ දෙවෙනියා ලෙස සිටි මේජර් ජෙනරාල් ශවේන්ද්‍ර සිල්වා ය. ඒ ලුතිනන් ජෙනරාල් නිළයට උසස්වීම් ලබමින් ය. මෙම පත්වීම කරන්නේ ජනාධිපතිවරයා විසින් ය. මෙහිදී අදාළ තනතුර ජේ්‍යෂ්ඨයාටම දියයුතු යැයි නියමයක් නැත. එහෙම දුන් ඉතිහාසයක්ද නැත. මේ පත්වීම මෙලෙස අප ප්‍රශ්න කරන්නේ ඇයි? මෙම තනතුර මෙම පුද්ගලයාට දෙන්නට ජනපති තීරණය කර ඇතැයි යන්න සැලවූ වහාම අපහට නැගුණු ප්‍රධාන ප්‍රශ්නය වන්නේ යුද අපරාද චෝදනා බරපතළ ලෙස, දේශීයව මෙන්ම විදේශීයවද එළ්ලවන පුද්ගලයෙකුට මෙම තනතුර ලබාදීම තුළින් 2015 ජනවාරි 08ට පසුව මානව හිමිකම් පිළිබඳව ලෝකය පුරා අප විසින් ගොඩනගාගත් ප්‍රතිරූපයට කුමන ඇබැද්දියක් වෙනු ඇතිද කියන එකය. ඊළඟ ප්‍රශ්නය වුණේ නොයෙක් කූටඋපාය උපක්‍රම මතින් ජනපති සටනට පැනගෙන තිබෙන හිටපු ආරක්ෂක අමාත්‍යාංශ ලේකම් ගෝඨාභය රාජපක්ෂගේ සමීපතම හමුදා නිළධාරියෙකු හමුදාපති නිළයට පත් කරන්නේ කෙසේද යන්නයි. අබමල් රේණුවක බුද්ධියක් තිබෙන පාලකයෙකු නම් කවදාවත් මෙවැනි තීරණයක් ගන්නේ නැත. කෙසේ හෝ බුද්ධියෙන් තොර මෙම තීරණය නිසා ජී එස් පී බදු සහනය ඇතුළු ලෝකයෙන් අපිට ලැබෙන බොහෝ දේ නැතිවී යාමේ අවදානමක් ඇතිවී ඇත. ඊටත් වඩා දේශීයව අප දිනාගෙන සිටි අසල්වැසි දෙමළ ජනයාගේ සිත් අප මෙම තීරණය සමගින් බිඳ ඇත. එය රට තුළ සහජීවනමය අනාගතයට හොඳ නැත.

සතර අතින් විරෝධය


මෙම පත්කිරීම පිළිබඳව මේ වන විට ලෝකයේ සතර අතින් දැවැන්ත විරෝධයක් ගලාගෙන එමින් තිබෙයි. එය බරපතළ ප්‍රශ්නයක් ය. එහෙත් අගමැති රනිල් වික්‍රමසිංහ ද ඔහේ බලාගත් අත බලාගෙන සිටින්නේය. ඇවන්ගාඞ් චෝදනා නිසා කාලයකට කලින් ඇමති පට්ටම ගැලවී දැන් විදේශ අමාත්‍යවරයා සේ කටයුතු කරන තිලක් මාරපන නම් මේක ස්වෛරීත්වය පිළිබඳ ප්‍රශ්නයක් යැයි ප්‍රකාශ කරමින් අන්තර්ජාතික මතය අප ගණන් ගන්නේ නැති බව ලෝකයට පෙන්වා ඇත.


මෙම පත්වීමත් සමග එක්සත් ජාතීන්ගේ මානව හිමිකම් පිළිබඳ මහකොමසාරිස් කාර්යාලය නිවේදනයක් නිකුත් කළේය. එහිදී එහි මහ ලේකම් මිෂෙල් බැචලේ ප්‍රකාශ කරන්නේ මෙම පත් කිරීම බරපතළ ප්‍රශ්නයන් සහ මානව හිමිකම් පිළිබඳ සැකසංකා තමන් තුළ ඇති කරන බවය. එහිදී ඇය අවධාරණය කරන්නේ එක්සත් ජාතීන්ගේ සාම සාධක හමුදා ක්‍රියාන්විතයන් සඳහා ලංකාවේ සන්නද්ධ හමුදා යෝදාගැනීම පිළිබඳවද මේ නිසා බරපතළ ප්‍රශ්න ඇතිවෙන බවය.
මෙම පත් කිරීම සම්බන්ධයෙන් සිය දැඩි අවධානය යොමු කරන බව ප්‍රකාශ කරන ඇමරිකා එක්සත් ජනපදය ප්‍රකාශ කරන්නේ, එක්සත් ජාතීන්ගේ සංවිධානය සහ වෙනත් රාජ්‍ය නොවන සංවිධාන සංවිධාන ලේඛනගත කර ඇති ආකාරයට ශවේන්ද්‍ර සිල්වාට එරෙහිව මානව හිමිකම් උල්ලංඝනය කිරීම් පිළිබඳ බරපතළ චෝදනා ඇති බව සහ එම චෝදනා විශ්වසනීය බවය. සංහිඳියාව හා සමාජ සමගිය සඳහා වන උවමනාව අතිශය ලෙස පවතින අවස්ථාවක, මෙම පත්වීම ශ්‍රී ලංකාවේ කීර්තිනාමය, යුක්තිය සහ වගවීම ප්‍රවර්ධනය කිරීම සඳහා වූ කැපවීම් හෑල්ලුවට ලක් කරන බවය.


කොළඹ ඇමරිකා එක්සත් ජනපද තානාපති කාර්්‍යාලය මෙම නිවේදනය නිකුත් කළ පමාවෙන් සිංහල බෞද්ධ විමල් වීරවංස ප්‍රමුඛ කල්ලිය එකින් එක ප්‍රකාශ නිකුත් කරන්නට විය. තවමත් යැංකි බව රැකගෙන සිටින පුද්ගලයෙකු ජනාධිපති පුටුවට ඔසවාගෙන යමින් සිටින ඔවුන් මෙවැනි විරෝධතා දැක්වීම විහිළුවක්මය.


මේ පිළිබඳව යුරෝපා සංගමයද බරපතළ නිවේදනයක් නිකුත් කළ අතර එහිදී ඔවුන් කියා සිටියේ සංහිඳියාව ඇති කිරීම සහ වගවීම යන කාරණා මෙමගින් බරපතළ ලෙස ප්‍රශ්න කෙරෙන බවය. ඉන්පසුව කැනඩාවද මෙවැනි බරපතළ ප්‍රකාශයක් කරමින් සංහිඳියාව සහ යුක්තිය වගවීම පිළිබඳව මෙරට ගෙනයන වැඩ පිළිවෙළ පිළිබඳව සිය සැකසංකා ජනිත කර ඇත. මෙම අන්තර්ජාතික තත්ත්වයන්ට ලංකාව ළදරු ලෙස ප්‍රතිචාර දක්වමින් සිටීම ප්‍රශ්නය තව තවත් උග්‍ර කරනු ඇත.

දෙමළ ජනතාව

මෙම පත් කිරීම පිළිබඳව උතුරේ දෙමළ ජනතාව තුළ සැකය ජනිත කර ඇත. අතුරුදන් වූ දෙමාපියන්, දරුවන්, නෑදෑයින් සොයා යමින් ද ඔවුන්ට යුක්තිය ඉටු කර ගැනීම උදෙසා ද නොනවතින අරගලයක නිරත උතුරේ මිනිසුන් මෙම පත් කිරීම නිසා නැවත සිංහල සමාජය දෙස කෝපයෙන් බලන තත්ත්වයක් උදාවී ඇත. ඔවුන්ගේ දේශපාලන නියෝජිතයන් වන ද්‍රවිඩ ජාතික සන්ධානය මෙම පත් කිරීමට සිය දැඩි විරෝධය, ආණ්ඩුව හමුවේ පළකර ඇත. ට්විටර් පණිවිඩයක් යොමුකරන එම සන්ධානයේ මාධ්‍ය ඒකකය, මෙම පත් කිරීම පිළිකුලෙන් යුතුව හෙලා දකිමින් ප්‍රකාශ කරන්නේ, මේ පත්වීම උතුරේ දෙමළ ජනතාවට කළ අවමානයක් සේ සලකන බවය.

මෙලෙස වර්තමාන යුද හමුදාපතිවරයාට චෝදනා ගොනුවෙන්නේ ඇයි සොයා බැලිය යුතුය. හමුදාපති තනතුරට ඔහු සුදුසු නැති බව කියන්නේ ඇයි? සොයා බැලිය යුතුය.

යුද අපරාධ චෝදනා


ශවේන්ද්‍ර සිල්වාට එරෙහිව යුද අපරාධ සහ මානව වර්ගයාට එරෙහි අපරාධ සඳහා නඩු පැවරීමට ප්‍රමාණවත් සාක්ෂි තිබෙන බව දකුණු අප්‍රිකාවේ සිට ක්‍රියාත්මක ශ්‍රී ලංකාවේ සත්‍ය සහ යුක්තිය සඳහා ව්‍යාපෘතිය (ෂඔන්‍ඡ), ශවේන්ද්‍ර සිල්වා පිළිබඳ පිටු 137ක සවිස්තර වාර්තාවක් පළකරමින් කියා සිටී. ඔවුන් එම වාර්තාව ප්‍රකාශයට පත්කරන්නේ ශවේන්ද්‍ර සිල්වා යුද්ධ හමුදාවේ දෙවැනි නිළයට නැතිනම් හමුදා මාණ්ඩලික ප්‍රධානී තනතුරට පත් කළ පසුගිය ජනවාරියේ දීය. ලංකාවේ උසස් හමුදා නිළධාරියෙකුට එරෙහිව යුද අපරාධ සම්බන්ධයෙන් පළකරනු ලැබූ සවිස්තරම වාර්තාව සහ තොරතුරු ගොනුව මෙය බව මෙම ව්‍යාපෘතිය භාරව කටයුතු කරන අන්තර්ජාතිකව නමක් දිනාගෙන සිටින නීතිවේදිනියක වන යස්මින් සූකා මහත්මිය ප්‍රකාශ කරන්නීය. යස්මින් සූකා යනු ශ්‍රී ලංකාවේ යුද්ධයේ අවසන් අදියරේදී සිදුවූ දේවල් පිළිබඳව සොයා බැලීමට 2010දී එක්සත් ජාතීන්ගේ මහලේකම්වරයා පත් කරනු ලැබූ නීතිවේදීන් තිදෙනාගෙන් කෙනෙකි.


ඔවුන්ගේ මෙම සවිස්තර තොරතුරු ගොනුව තුළ 2008/2009 කාලයේ ශවේන්ද්‍ර සිල්වාගේ අණ යටතේ 58 සේනාංකය උතුරේ ගම් සහ නගර තුළ එල්ල කළ ප්‍රහාර පිළිබඳව සාක්ෂි සහිත සවිස්තර වාර්තා පළ කරයි. කිසිදු වගවිභාගයකින් තොරව සාමාන්‍ය ජනතාවට හිතාමතාම ප්‍රහාර දියත් කිරීම, රෝහල් සහ වෛi කාර්්‍ය මණ්ඩල ප්‍රහාරවල ඉලක්ක බවට පත් කරගැනීම, තහනම් අවි යොදාගැනීම ආදී වූ වපසරීන් ගණනාවක් ආවරණය කරමින් මෙම තොරතුරු සම්පිණ්ඩනය කර ඇත. මෙහිදී ඔවුන් පවසන්නේ ජාත්‍යන්තර නීතියට අනුව මෙම යුද නිළධාරියා ඍජුව වගකීමෙන් බැඳෙන බවය. තමන් යටතේ සිටින කාර්ය මණ්ඩලයට නීති විරෝධී ක්‍රියාමාර්ග ගන්නා ලෙස අණ කිරීම, ඔහු යටතේ සිටින කාර්ය මණ්ඩලයේ පුද්ගලයින් නීති විරෝධී ක්‍රියා සිදුකරන විට එයට එරෙහිව කටයුතු නොකිරීම යන ප්‍රධාන කරුණු දෙක ඔස්සේ ඔහුට මෙහිදී චෝදනා එල්ල කර ඇත.

මෙහිදී සිවිල් ජනතාවට එරෙහිව හිතාමතාම ප්‍රහාර එල්ල කළ බවට සාක්ෂි සපයන එම වාර්තාව කියන්නේ කිලිනොච්චිය රෝහල්වලට සහ එක්සත් ජාතීන්ගේ ආයතනවලට දිගින් දිගටම ප්‍රහාර එල්ල කරන විට සහ කිලිනොච්චිය අල්ලා ගන්නා විට එම සේනාංකය (58) සඳහා ශවේන්ද්‍ර සිල්වා අණ දුන් බවය. පුදුකුඩුඉරිප්පු අල්ලා ගැනීමේ 58 සේනාංකයේ මෙහෙයුම පිළිබඳ තොරතුරු සහ සාක්ෂි සම්පිණ්ඩනය කරන එම වාර්තාව කියන්නේ හඳුනාගැනීම සඳහා ඕනිවාටත් වඩා හැකියාව තිබියදී හමුදා සේනාංකය රෝහල් තුළට ප්‍රහාර එල්ල කළ බවය. පුදුමාතලන්, වල්ලියාමඩම්, මුල්ලිවයිකාල් ආදී ප්‍රදේශ තුළ 58 සේනාංකය සිවිල් ජනතාවට එරෙහිව ඉවක් බවක් නොමැතිව එල්ල කළ ප්‍රහාර මාලාව සහ ඒ සඳහා ඔවුන් තහනම් අවි භාවිත කිරීම පිළිබඳව සාක්ෂි සහ තොරතුරු රාශියක් මෙම වාර්තාව ඉදිරිපත් කරයි. මෙහිදී සමහර ස්ථානවලදී මෙම ප්‍රහාර නිසා මියගිය පුද්ගලයන්ගේ සංඛ්‍යා දත්තද ඔවුන් ඉදිරිපත් කරනු ලබයි. එලෙස සඳහන් කරමින් ඔවුන් ප්‍රකාශ කරන්නේ පුදුකුඩුඉරිප්පු රෝහල තුළ ප්‍රහාරවලින් 60ක් පමණ සිවිල් වැසියන් මිය ගිය බවය.


වට්ටුකාල් පාලමේදී ජනතාව 58 සේනාංකයට බාර වුණ බව එක්සත් ජාතීන්ගේ වාර්තා ප්‍රකාශ කරන බව පවසන මෙම තොරතුරු ගොනුව, පසුව මෙම බාර වූ පිරිසේ මළ සිරුරු වට්ටුකාල් පාලමේ අනික් පස තිබෙනු දැක ඇති අයගේ සාක්ෂි ඉදිරිපත් කරයි. එහි එක තැනක පුද්ගලයෙක් ප්‍රකාශ කරන්නේ මෙහිදී බාර වූ එල් ටී ටී ඊ නායකයින් ශවේන්ද්‍ර සිල්වා විසින් අතට අතදී බාර ගත් බවය. වාර්තාවේ තව තැනක තිබෙන්නේ මෙසේ 58 සේනාංකයට බාර වූ එල් ටී ටී ඊ නායකයින් අතර නඬේෂන්, පුලිදේවන් සහ නඬේෂන්ගේ සිංහල බිරිඳ විනීතා ද සිටි බවය. එහෙත් අද මොවුන් ආගිය අතක් නැත. මෙම වාර්තාවේ තව තැනක තිබෙන්නේ හමුදාවට යටත් වී පැමිණි පිරිස අතර සිටි එල්. ටී. ටී. ඊ සාමාජිකයින් 500 දෙනෙකුගේ නම් කතෝලික පියනමක් විසින් හමුදාවට ලබා දුන් පසුව, මෙගා හෝන් එකක් භාවිත කරමින් ඔවුන්ගේ නම් අඬගසා බස් රථවලට නග්ගාගෙන රැගෙන ගිය බවය. එම අවස්ථාවේ එම ස්ථානයේ ශවේන්ද්‍ර සිල්වා, ජගත් ජයසූරිය වැනි හමුදාවේ උසස් නිළධාරීන් සිට ඇති බව එම වාර්තාව කරුණු ඉදිරිපත් කරයි.

යුද මුක්ත කලාපයේ සිටිනු ලැබූ සාමාන්‍ය සිවිල් ජනතාව ඉලක්ක කරමින් 58 සේනාංකය එල්ල කළ ප්‍රහාර පිළිබඳව හදවත කම්පනය වන තොරතුරු රාශියක් මෙම ගොනුව තුළ අන්තර්ගතය. එම ප්‍රහාර ඇසින් දුටු සාක්ෂිකරුවන් එම බිහිසුණු ප්‍රහාර විස්තර කරන ආකාරය කියවීමේදී හද සසල වේ.


මෙම අවසන් යුද්ධයේ තොරතුරු වලට අමතරව 1988/1989 දකුණේ පැවති ජන සංහාරය ගැනද ඔවුන් තොරතුරු ඉදිරිපත් කරන්නේය. එහිදී එම වාර්තාව කියන්නේ එම ඝාතනයන් ද රාජ්‍ය අනුග්‍රහය යටතේ සිදුවුණ බවය. 60000ක් පමණ මෙම සංහාරයේදී මරාදමනු ලැබ ඇතැයි විශ්වාසය පළකරන වාර්තා කියන්නේ, මෙම අවධියේදී ශවේන්ද්‍ර සිල්වා ගෝඨාභය රාජපක්ෂ යටතේ එවක මාතලේ ප්‍රදේශයේ, ගජබා රෙජිමේන්තුව යටතේ වැඩ කළ බවය. මාතලේ සමූහ මිනීවළ පිළිබඳව සඳහන් කරන වාර්තාව ප්‍රකාශ කරන්නේ 154 දෙනෙකුගේ සිරුරු එයින් සොයාගෙන ඇති බවය. මේ නිසා මාතලේ ප්‍රදේශයේ එවක ක්‍රියාත්මක වූ මෙම අපරාධ සඳහා මෙම හමුදා නිළධාරීන් වඟකිව යුතු බව එම වාර්තාව කියයි.


මාතලේ ශාන්ත තෝමස් විද්‍යාලයෙන් මුලික අධ්‍යාපනය ලැබ 1984 වසරේදී කැඩෙට් නිලධාරියකු ලෙස යුද හමුදා සේවයට එක්වූ මේ නිළධාරියා, හමුදාව තුළ 34 වසරක වෘත්තීය ජීවිතයක් ගතකර ඇත. අවසන් යුද්ධයෙන් පසුව මොහු 2010 – 2015 කාලය තුළ එක්සත් ජාතීන්ගේ නිත්‍ය නියෝජ්‍ය තානාපති ධුරය හෙබවීය. එම අවධියේදී ද මොහුට වරින් වර යුද අපරාද චෝදනා එල්ල වූ අතර 2012 වර්ෂයේදී දකුණු අප්‍රිකාවේ නියෝජ්‍ය මහකොමසාරිස් ධුරය සඳහා යෝජනා වුණත් එරට තුළින් එයට බලවත් විරෝධයක් පළවීම නිසා, ඔහුට එම තනතුර අහිමි විය. මෙනිසා මේ හමුදා නිළධාරියාට මේ එල්ලවෙන යුද අපරාධ චෝදනා අද ඊයේ දේවල් නොවන බවද කිවයුතුය.

ප්‍රශ්නය තිබෙන්නේ ලංකා රජය මෙම චෝදනා පිළිබඳව නිවැරදි පරීක්ෂණයක් කර රටට ලෝකයට ඇත්ත ප්‍රකාශ නොකිරීමය. වැරද්දක් කර ඇත්නම් නීතියට අනුව දඬුවම් ලබා නොදීමය.
එම ක්‍රියා නොකරන ආණ්ඩුව එම චෝදනාලාභී පුද්ගකයින් තෝරා ඔවුන්ට රටේ ඉහළම වඟකිවයුතු තනතුරු ප්‍රධානය කිරීම බරපතළ ප්‍රශ්නයක් ය. මෙම ක්‍රියා නිසා අන්තර්ජාතිකව හෑල්ලුවට ලක්වෙන්නේ ශ්‍රී ලංකාවය. ■