ලේක්හවුස් පත්තරයක් ගැසට් පත‍්‍රය කියැවීමේ හෝ ආණ්ඩුවේ මතය දැනගැනීමේ අපේක්ෂාව හැර තොරතුරු දැනගැනීමේ වුවමනාවෙන් කියවන කිසිදු පුද්ගලයෙක් නැත. යහපාලන ආණ්ඩුව පවා ලේක්හවුස් පත්තර වෙනස් කිරීමට හිතුවේ නැත. රැස නම් පුවත්පතක් ආරම්භ කළත් ඒ පුවත්පතද මේ දිනවල කියෙව්වොත් අනෙක්වාට වඩා වෙනසක් නැතැයි අවබෝධ කරගත හැකිය. අතිදැවැන්ත වියදමක් දරා ලේක්හවුස් පවත්වාගෙන යන්නේ කුමකටදැයි අපට කල්පනා කළ හැකිය.

නීතිවිරෝධී ආණ්ඩුව සති කිහිපයක් පමණක් ක‍්‍රියාත්මක විය. මේ වෙද්දී විශ්වාසභංගය සම්මත වීමෙන් ආණ්ඩුව අවසාන වී ඇත. අවැසි නම් තව ටික දිනක් පණ අදිමින් ඉන්නට ඉඩ ඇත. ඒවා කෙසේ වෙතත් දින කිහිපයකට පත්වූ ආණ්ඩුව රාජ්‍ය ආයතනවලට තම හෙංචයියන් ඇතුළුකරගැනීමේ කටයුත්ත යහමට කර තිබුණි. ඇතැම් ආයතන දැනටත් පාලනය වෙන්නේ ඒ ආයතනවල සේවකයන් නොවන පුද්ගලයන් විසින්ය.

මේ කතාව ලේක්හවුස් ආයතනය ගැනයි. ලේක්හවුස් ආයතනය සේවක අතිරික්තය නම් යෙදුමට මනා උදාහරණයකි. බොහෝ සේවකයන් පුවත්පත්වලට කිසිවක් නොලියා වැටුප් ලබමින් සිටියි. ශ‍්‍රමය ඕනෑ තරම් ඇත. ඒ ශ‍්‍රමය වෙනුවෙන් වාර්ෂිකව විශාල මුදලක් වැය කරයි. එසේ තිබියදී ලේක්හවුස් වෙත තව තවත් සේවකයන්ව බඳවාගැනීම සිදුකර තිබුණි. අවසානයේදී යහපාලන ආණ්ඩුව ලේක්හවුස් ආයතනයේ සේවක අතිරික්තයට විසඳුමක් ලෙස සේවකයන් 700 දෙනෙකු ස්වෙච්ඡුාවෙන් විශ‍්‍රාම යවා ඇත. රැුස ආදී පුවත්පත්වලට බඳවාගත් සේවකයන්ද ස්ථීර පදනමෙන් නොමැතිව කොන්ත‍්‍රාත් පදනමෙන් බඳවාගෙන තිබුණි. ඒවාට හේතුව වී තිබුණේ තව තවත් ස්ථීර සේවකයන් බඳවාගෙන, ඔවුන්ට වැටුප් ගෙවන්නට තරම් ආදායමක් ලේක්හවුස් ආයතනයට නොවිමයි. ලේක්හවුස් පුවත්පත් මේ වෙද්දී නිකන්ම ආණ්ඩුවේ මතය ප‍්‍රකාශ කරන ලියැවිලි පමණක් වන නිසා පාඨක පිරිසක් ලේක්හවුස් පුවත්පත්වලට නැත. ඒ නිසා ආයතනයට ප‍්‍රමාණවත් ආදායමක් ලැබෙන්නේ නැත.

කෙසේ වෙතත් පසුගිය සති කිහිපය තුළ නීතිවිරෝධී ජනමාධ්‍ය රාජ්‍ය අමාත්‍යවරයා ලෙස පත්වූ කෙහෙළිය රඹුක්වැල්ල හා මුල් කැබිනෙට්ටුව තිබියදී පත්කළ නිසා නීතිවිරෝධී ජනමාධ්‍ය අමාත්‍යවරයා වන දයාසිරි ජයසේකර ලේක්හවුස් ආයතනය වෙත පැමිණ තිබේ. කෙහෙළිය රඹුක්වැල්ල හා දයාසිරි ජයසේකර විසින් ලේක්හවුස් වෙත සේවකයන් 40ක් පමණ සඳහා පත්වීම් ලබාදී ඇති අතර මෙය ලේක්හවුස් ආයතනයට තවත් වැය බරක් බවට පත්ව තිබේ.

ඒ පත්වීම් පැහැදිලිවම දේශපාලන හෙංචයියන්ට හා හිතවතුන්ට ලබාදුන් පත්වීම්ය. ඒ අනුව අනුර ප‍්‍රියදර්ශන යාපාගේ මස්සිනා වන නාරද සුමනසේකරව ඔක්තෝම්බර් 27 වන දා සිට ජ්‍යෙෂ්ඨ නියෝජය සාමාන්‍යාධිකාරිවරයා ලෙස පත් කර ඇත. මාධ්‍යවේදියෙකු බෙදාහැරීම් කළමණාකරු විදියට පත් කර ඇත. දුරකථන ක‍්‍රියාකරවන්නෙකු ප‍්‍රචාරක කලමණාකාරවරු ලෙස පත් කර ඇත. ශ‍්‍රීලනිප ආසන සංවිධායකවරයෙක් ලෙස කටයුතු කරන පුද්ගලයෙක් ලේක්හවුස්හි කළමනාකරුවෙකු ලෙස පත් කර ඇත.

සමස්තයක් ලෙස නොවැම්බර් 11 දිනයේ පත්වීම් 07ක් ලබාදී ඇත. නොවැම්බර් 12 පත්වීම් 15ක් ලබාදී ඇත. ඔක්තෝම්බර් 26 වැනිදා කුමන්ත‍්‍රණය සිදුවූ දිනයේ සිට මේ දක්වා පත්වීම් 40ක් පමණ ලබාදී තිබේ. මේ පත්වීම් බෙදී ගොස් තිබුණේ හැකියාව මත නොවේ. ශ‍්‍රී ලංකා නිදහස් පක්ෂය හා පොදුජන පෙරමුණ අතරය. මේ කණ්ඩායම් දෙක අතර පත්වීම් 20 බැගින් බෙදී ගොස් ඇත.

මේ තනතුරු බොහොමයක් වෙනුවෙන් පත්කළ පුද්ගලයන් සුදුසුකම් නැති පුද්ගලයන්ය. හැකියාව නැති පුද්ගලයන්ය. මෙවැනි පුද්ගලයන් පත් කරන්නේ ලේක්හවුස් ආයතනය තමන්ට ඕනෑ හැටියට පත්වාගෙන යන්නටය. එහෙත් එවැනි පත්වීම් වලින් ලේක්හවුස් ආයතනයේ සමස්ථ නිලධාරී ක‍්‍රමවේදයම උඩුයටිකුරු වෙයි. ඉහළ වැය බරක් දරන්නට සිදුවෙයි. ඒ සියල්ලට වඩා පොදු මහජන දේපලක් වන ලේක්හවුස් ආයතනය දේශපාලන හෙංචයියන්ගේ කැලෑ පත්තර ගුහාවක් බවට පත්වෙයි. නීතිවිරෝධී ආණ්ඩුවේ ඇමතිවරුන් ලේක්හවුස් වෙත කඩා වැදී කර ඇත්තේ හොඳම කැලෑ පත්තර ගුහාව නිර්මාණය කිරීමට සුදුසුම හෙංචයියන්ව පත්කිරීමයි.