මාධ්‍යවේදී ලසන්ත වික්‍රමතුංග ඝාතනය කිරීම සඳහා අණ ලබාදුන්නේ එවක ආරක්ෂක අමාත්‍යාංශයේ ලේකම් ගෝඨාභය රාජපක්ෂ බවට වූ තොරතුර සම්බන්ධයෙන් විශේෂ විමර්ශනයක් අපරාධ පරීක්ෂණ දෙපාර්තමේන්තුව විසින් ආරම්භ කර ඇති බව එම දෙපාර්තමේන්තුව ලසන්ත ඝාතන පරීක්ෂණය සම්බන්ධයෙන් වැඩිදුරටත් කරුණු දක්වමින් අධිකරණයට වාර්තා කර ඇත.
ලසන්ත වික්‍රමතුංගගේ බිරිඳ‍, දියණිය සහ සහෝදරයා ඇතුළු පවුලේ බොහෝ දෙනෙකු මෙම ඝාතනයට ගෝඨාභය රාජපක්ෂ අණදුන්නේයැයි සැකකරන බවද ඔවුන් මෙම ඝාතනයට හේතුව ලෙස මිග් යානා ගනුදෙනුව පිළිබඳව සඳහන් කරන බවද, එම නිසා මෙම පරීක්ෂණය සිදුකරන බවද අපරාධ පරීක්ෂණ දෙපාර්තමේන්තුව අධිකරණයට දන්වා ඇත.
පසුගිය ජනවාරි 16 වැනිදා ගල්කිස්ස මහේස්ත්‍රාත් අධිකරණයේදී ලසන්ත වික්‍රමතුංග ඝාතනය පිළිබඳව නඩුව කැඳවූ අවස්ථාවේ අපරාධ පරීක්ෂණ දෙපාර්තමේන්තුව මෙම විමර්ශනය පිළිබඳව දීර්ඝ කරුණු දැක්වීමක් කර ඇත.
එහිදී ඔවුන් සඳහන් කර ඇත්තේ මෙම සිද්ධියේ දෙවන සැකකරු එස්අයි සුගතපාල විසින්ද එවක නියෝජ්‍ය පොලිස්පති ප්‍රසන්න නානායක්කාර මෙම ඝාතනය ගෝඨාගේ වැඩක් යැයි තමන්ට පැවසීයැයි සාක්ෂියක් ලබාදී ඇති බවය. මෙම පරීක්ෂණ අරම්භක අවස්ථාවේ පොලිසිය හැසිරි තිබෙන ආකාරය සහ යුද්ධ හමුදාව හැසිරී තිබෙන ආකාරය ආදිය විශ්ලේෂණය කරමින් අපරාධ පරික්ෂණ දෙපාර්තමේන්තුව අධිකරණයට කරුණු දක්වා ඇත්තේ එම හැසිරීමට හේතුව එවක ආරක්ෂක අමාත්‍යාංශ ලේකම්වරයාගේ බලපෑම බවය.
මිග් යානා ගනුදෙනුවේ තොරතුරු සහ එවක පොලිස් පරීක්ෂණ අඩාල වීමේ තොරතුරු සහ දැන් පොලිස් පරීක්ෂණ සක්‍රීය වීම ආදි තොරතුරු අධිකරණයට ඉදිරිපත් කරමින් මෙහිදී අපරාධ පරීක්ෂණ දෙපාර්තමේන්තුව ප්‍රකාශ කර ඇත්තේ මෙම ඝාතනයට අණ දුන්නේ ගෝඨාභය රාජපක්ෂ බවට වූ තොරතුර බැහැර කළ නොහැකි බවය. ඒ අනුව මෙම විමර්ශනය ඉදිරියට සිදුකරන බවය. මෙහිදී අධිකරණය පවසා ඇත්තේ පරීක්ෂණ සක්‍රිය කර ප්‍රගතිය අධිකරණයට වාර්තා කරන ලෙසය. පසුගිය 2009 ජනවාරි 08 වැනි දින දෙහිවල අත්තිඩිය ප්‍රදේශයේදී ලසන්ත වික්‍රමතුංග ඝාතනය කරනු ලැබීය.■