රේන්ජ් රෝවර් කිව්වාම අද දවසේ ගොඩක් දෙනෙකුගේ ඔළුවේ මැවෙන්නේ සමහර ක‍්‍රීඩකයන්ගේ බෙල්ලට අවුව වැටුණාම ඇහැ ගිනිකණ වැටෙන්න දිලිසෙන මාල වගේ තැන් තැන්වලින් දිස්නේ ගහන, බැලූබැල්මට මේ ආත්මේ නම් ගෙවලා ඉවර කරන්න බැහැ කියලා හිතෙන ප‍්‍රයිස් ටැග් එක තියන වාහනයක්.


ඇත්තටම 1969දී රේන්ජ් රෝවර් එක ලෝකෙට බිහිවුණේ, ට‍්‍රැක්ටරයක් වගේ වෙච්චි ලෑන්ඞ් රෝවර් එකේ යනවාට වඩා පොඞ්ඩක් සනීපෙට යන්න කැමති, ඒත් මඩ ගෑවෙන්නේ නැතුව ගමනක් යන්න නොදන්න මිනිස්සුන්ට, ආපහු ගෙදර ඇවිත් වාහනේ එළියයි ඇතුළයි දෙකම හෝස් ගාලා හෝස් එක අල්ලලා හෝදන්න පුළුවන් වාහනයක් විදිහට බව දන්නේ ටික දෙනායි.


50 දශකයේදී ලෑන්ඞ් රෝවර් එක ලෝකෙට බිහිවුණු කාලේ ඉඳන්ම, ඒකේ නිර්මාතෘවරුන් වුණු ස්පෙන්සර් විල්ක්ස් සහ මොරිස් විල්ක්ස් සහෝදරවරුන්ට අදහසක් තිබුණා කැළේකොළේ යන්න විතරක් නෙමෙයි කොන්දේ අමාරුව හදාගන්නේ නැතුව පාරේ තොටේ යන්නත් පුළුවන් වාහනයක් හදන්න. ඒත් වැඬේ ඇත්තටම කරන්න පුළුවන් වුණේ එයාලාගේ ඥාති පුත‍්‍රයෙක් වුණු, ඉස්සර රෝල්ස් රොයිස් එකේ ඩිසයිනර් කෙනෙක් වෙලා හිටපු චාල්ස් ස්පෙන්සර් කිං 1960 දශකයේ අන්තිම හරියේදී මේ ප්‍රොජෙක්ට් එකට එකතු වුණාට පස්සේ.


ඒ කාලේ හැටියට, කැළේ යන්නයි කාපට් පාරේ යන්නයි දෙකටම හරියන වාහනයක් හදනවා කියන එක කොක්කු නැතුව අහසින් යන්න පුළුවන් ඉබ්බෙක් හදනවා වගේ වැඩක්.


මුලින් ආවේ දොර දෙකේ රේන්ජ් රෝවර් විතරයි. පර්මනන්ට් ෆෝ-වීල් ඩ‍්‍රයිව් සිස්ටම් එකක් මේවායේ තිබුණා. සස්පෙන්ෂන්වලට ආවේ කොයිල් ස්ප‍්‍රින්ග්ස්. ඒ වගේම ඩිසික් බ්‍රේක්ස් පවා තිබුණා. එන්ජිම රෝවර් සමාගමේ හදපු වී8 පෙට‍්‍රල් එන්ජිමක්. ගියර් බොක්ස් එක ෆෝ-ස්පීඞ් මැනුවල්.


මේක තමයි ඇත්තටම වර්තමාන එස්යූවී සංකල්පයේ ආරම්භය. අද දවසේ ගොඩක් වෙලාවට එස්යූවී පාවිච්චි වෙන්නේ ළමයි ඉස්කෝලේ ඇරලවන්න සහ සුපර් මාකට් ගිහින් හාල් ගේන්න වගේ දේවල්වලට විතරක් වුණත්, රේන්ජ් රෝවර් එක ඇත්තටම බිහිවුණේ ‘රිංගන්න අමාරු තැන්වල අමාරුවක් නැතුව රිංගන්න‘ අවස්ථාව දෙන වාහනයක් විදිහටයි.


ඒ කාලේ හැටියට මේක ඉතාම සුවිශේෂ සංකල්පයක් නිසා, රේන්ජ් රෝවර් ප්‍රොජෙක්ට් එකේ හිටපු අය මුලින්ම හදපු ප්‍රොටොටයිප්ස්වලට පාවිච්චි කළේ ඪැක්ර කියන නම. ඒක ඉතාලි භාෂාවේ ඪ්ක්රු කියන වචනෙන් බිඳුණු එකක්. ඪ්ක්රු කියන්නේ ‘වේල් පටකින් වැසුණු’ කියනවා වගේ දෙයක්. වාහනේ මොකක්ද කියන ලෝකෙට නොතේරෙන විදිහට මුල් කාලේ හොර රහසේ ප්‍රොටොටයිප්ස් ටෙස් කරපු නිසා ඒ නම පාවිච්චි කළා කියනවා.


මාකට් එකට ආවාට පස්සේ කාලයක් යද්දී රේන්ජ් රෝවර් එක කොච්චර පෙරළිකාරී හඳුන්වාදීමක් බවට පත්වුණාද කිව්වොත්, ඒක ඉතාම ඉක්මනට සමාජ තත්ත්වය හඟවන දෙයක් හෙවත් ස්ටේටස් සිම්බල් එකක් පවට පත්වෙන්න ගත්තා. කොටින්ම එංගලන්තේ රජ පවුලට අයිති ක්ලැසික් රේන්ජ් රෝවර් එකක් ගැන ලස්සන කතා පවා අපට ඉන්ටර්නෙට් එකෙන් ලේසියෙන් හොයාගන්න පුළුවන්. කොහොම වුණත් ස්පෙන්සර් කිං තමන්ගේ නිර්මාණය මේ ආකාරයට සමාජ තත්ත්වය පෙන්නන දෙයක් බවට පත්වීම ගැන හිටියේ තරහෙන් සහ කනස්සල්ලෙන්. එයාගේ තරහ කොච්චරද කියනවා නම්, 2004 අවුරුද්ද සම්මුඛ සාකච්ඡුාවකදී එයා ඉස්කෝලෙට ළමයි එක්කගෙන යනවා වගේ වැඩවලට 4ං4 වාහන අරගෙන යන අයව හැඳින්වූවේ, ලොකුකම් දාන මෝඩයෝ විදිහට. තමන් කවදාවත් රේන්ජ් රෝවර් ඩිසයින් කළේ අයිතිකාරයන්ගේ ආත්ම අභිමානය පුම්බගන්න භාවිත කරන්න නෙමෙයි කියන එක එයා කිව්වා. අද වෙනකොට වාහන තදබදය අධික නගරවල රේන්ජ් රෝවර් වගේ දැවැන්ත වාහන පාවිච්චි කිරීම ප‍්‍රායෝගික නොවීම සහ ඒවායින් සිද්ධ වෙන පරිසරය ¥ෂණය වගේ දේවල් ගැනත් නොයෙක් විවාද ඇතිවෙලා තියනවා.


මොනවා වුණත්, අලෙවිය පැත්තෙන් ගත්තාම වගේම, අලූත් සමාජ ප‍්‍රවණතාවක් නිර්මාණය කළ වාහනයක් විදිහට, රේන්ජ් රෝවර් එකට ඉතිහාසය තුළ ලැබෙන පිළිගැනීම අපට අවතක්සේරු කරන්න බැහැ. මේ හේතුව නිසා ඔරිජිනල් ක්ලැසික් රේන්ජ් රෝවර් ජෙනරේෂන් එක 1970 ඉඳන් 1996 වෙනකල්ම නිෂ්පාදනය වුණා.


ඔරිජිනල් රේන්ජ් රෝවර් එක කියන්නේ 70 දශකය ආරම්භයේදී බොහෝ දෙනෙක් හීනෙන්වත් නොහිතපු අන්ත දෙකක් යාකළ පාලමක්. මෙහෙම පාලම් තමයි කාර් සංස්කෘතියේ ස්වර්ණමය සන්ධිස්ථාන සනිටුහන් කරන්නේ.

  • තරිඳු ශ‍්‍රී ලොකුගමගේ