පි‍්‍රයදර්ශනී ආරියරත්න

ඇමරිකානු ඩොලරයට සාපේක්ෂව රටවල් බොහෝ ගණනක මුදලේ අගය අඩු වෙමින් තිබේ. ශී‍්‍ර ලංකාවේ එය 7% ක් වැනි අගයක් ගන්නා අතර ඉන්දියාව පාකිස්ථානය ,ජපානය තායිලන්තය චීනය වැනි ආසියාතික රටවල ද අපට වඩා අඩු වැඩි අගයන්ගෙන් තම රටේ මුදල් ඒකකය බාල්දු වී ඇත. ලෝක ආර්ථික බලය ආසියාව දෙසට ඉදිරියේදී තල්ලූ‍ වෙතැයි ද චීනය, ඉන්දියාව, ඉන්දුනීසියාව හා ජපානය යන ආසියානු රටවල් ලෝක ආර්ථික බලවතුන් දස දෙනා අතර සිටිනු ඇතැයි ද uk.businessinsider.comවෙබ් අඩවිය පවසයි. මෙම රටවල් හතරම දැඩි මූල්‍ය විනයක් හා ස්ථිර ආර්ථික ප‍්‍රතිපත්ති රාමුවක් මත කටයුතු කරති. එවන් රටවලට පවා සිය මුදල අවප‍්‍රමාණය වීමෙන් ගැළවීමට නොහැකි නම් අප ගැන කවර කථාද? සමහරු තමන්ගේ නොදැණුවත් කමට හෝ ජනතාව රවටන්නට රුපියල අවප‍්‍රමාණය වීම පිළිබඳව වර්තමාන රජයට දොස් පවරති. එහෙත් සත්‍ය වශයෙන්ම රජයට දොස් පැවරිය යුත්තේ මෙම තත්වය තුලින් වාසි අත් කර ගැනීමට හෝ එසේත් නැත්නම් රටට වන අගතිය අවම කර ගැනීමට අපොහොසත් වන්නේ නම් පමණි.

රටක මුදලේ අගය අඩු වෙමින් යන හා එය ගෝලීය ප‍්‍රවණතාවක් වන විටක එකී රට ට ගත හැකි හොඳම විකල්පය වන්නේ ඒ හරහා වාසි ලබා ගත හැකි ආකාරයට තම ආර්ථිකය කලමනාකරණය කර ගැනීමයි. ඒ සඳහා ක්ෂණිකව ගත යුතු ක‍්‍රියාමාර්ග ඇති අතර ආර්ථික ස්ථායීකරණය සඳහා පසුව කල යුතු දේ ද බොහෝය. ජනාධිපති තුමා විසින් මෙම ලිපිය ලියන මොහොතේ ද ජාතික ආර්ථික සභාව කැඳවා ඇති අතර මෙම කාරණාව පිළිබඳව එහිදී ද සාකච්ඡා කරනු ඇත.

අපේ රුපියල සීඝ‍්‍රයෙන් අවප‍්‍රමාණය වන මේ අවස්ථාවේදී ආනයනවලට ගෙවිය යුතු රුපියල් ප‍්‍රමාණය වැඩි හෙයින් ක්ෂණික පියවරක් ලෙස අනිවාර්යයෙන්ම ආනයන සීමා කල යුතු අතර රටින් පිටතට ඇදී යන විනිමය ප‍්‍රමාණය අඩු කල යුතුය. නිර්මාණශීලීව විදේශ මුදල් රට තුළට ඇද ගැනීමට කටයුතු කළ යුතුය. එසේම සෑම වසරකම අපගේ ආනයන අපනයනවලට වඩා වැඩිය. මෙම තත්ත්වය ද රටට ඉතාම අහිතකරය. එනිසා අප ආනයන සීමා කිරීමේත් අපනයන වැඩි කිරීමේත් ක‍්‍රියාදාමයකට හෝ එසේත් නැතහොත් ආනයන එසේම තිබියදී අපනයන වැඩි කිරීමේ ක‍්‍රියාදාමයකට හෝ යා යුතු මය.

වර්තමානයේ අපගේ ප‍්‍රධාන ආනයන වන්නේ; ප‍්‍රති අපනයනය සඳහා ඇඟලූ‍ම් නිෂ්පාදනයට අවශ්‍ය රෙදි, රත‍්‍රං, ඛණිජ ද්‍රව්‍ය හා තෙල්, ආහාර , යන්තෝපකරණ, වාහන හා ප‍්‍රවාහනයට අදාළ උපකරණ යනාදියයි. ආහාරද්‍රව්‍ය, තෙල් වැනි දේවල් ආනයනය ක්ෂණිකව කපා හැරිය නොහැක. දැනට මාස කීපයකට පෙර රත‍්‍රං ආනයනය සීමා කිරීම සඳහා කටයුතු කල අතර මේ අවස්ථාවේදී ආනයන වියදම අවම කිරීම සඳහා ක්ෂණිකව කල හැකි වඩාම කාර්යක්ෂම කටයුත්ත වාහන ආනයනය සීමා කිරීමයි. අනෙක් අතට ඩොලරයේ අගය හා ගැට ගැසී ඇති මිල සූත‍්‍රය නිසා වන ඉන්ධන මිල වැඩිවීම නිසා වාහන පාවිච්චිය වියදම් කාරී වන හෙයින් වාහන වෙළෙඳපොළට වන බලපෑම මත ඉදිරියේදී රට තුළ ම කාර් රථ ඉල්ලූ‍ම අඩු වනු ඇත. එනිසා වාහන ආයනය අඩු වුවද ඉල්ලූ‍ම සැපයුමට සමපාත වනු ඇත. එහෙත් සුඛෝපභෝගී හෝ අත්‍යාවශ්‍ය නොවන දේ ලෙස තීන්දු තීන්දු කර ආනයන සීමා කර ඇති ශීතකරණ, රෙදි සෝදන යන්ත‍්‍ර වැනි ඒවා නම් කාලය හා සටන් කරන බොහෝ දෙනෙකුට අත්‍යාවශ්‍ය ඒවාය.

ශ‍්‍රී ලංකාව ආසියාවේ දැණුම් කේන්ද්‍රය බවට පත් කිරීමේ රජයේ සංකල්පයක්ද ඇති අතර ඒ අනුව කටයුතු කරන්නේ නම් අධ්‍යාපන කටයුතු සඳහා විදේශ විනිමය ඇදීයාම අඩු කර ගත හැකි වනු ඇති අතර විදේශ විනිමය උපයා ගැනීමටද හැකි වනු ඇත. අධික මිලක් ද ගෙවා ප‍්‍රමිතිය පිළිබඳවද සමහර විට සහතිකයක් නොමැතිව පිටරට වලින් ලබා ගන්නා වෛද්‍ය උපාධි වැනි ප‍්‍රථම උපාධි හා විවිධ පශ්චාත් උපාධි යනාදියත් මෙරටේ දීම ලබා ගැනීමට පහසු කම් සැලසීම අපහසු නැත. ශී‍්‍ර ලංකා වරලත් ගණකාධිකාරී ආයතනය ඉතාමත් ඉහළ ප‍්‍රමිතියක් පවත්වාගෙන යන ආයතනයකි. ඒ හරහා පිට වන ගණකාධිකාරීන් මෙන් කීප ගුණයක පිරිසක් විශාල මුදලක් ද ගෙවා ඊට සමාන සුදුසුකම් බි‍්‍රතාන්‍ය ආයතන වලින් ලබා ගනිති. නීති උපාධිද එසේමය. රට තුළ ඇති එවැනි ආයතන පුළුල් කිරීම අපහසු නැත. එසේම අත්‍යාවශ්‍ය නොවන විදේශීය උපදේශන සේවා, බුරැුතු පිටින් යන සංචාර, පුද්ගල හෝ පවුල් අවශ්‍යතා මත කෙරෙන ව්‍යාපෘති අවම කිරීම, පහසුවෙන් නිපදවිය හැකි දේ හා දේශීය කර්මාන්ත වලට පහර වැදෙන දේ ආනයනය නොකිරීම වැනි ක‍්‍රියාමාර්ගයන්ද ගත යුතු බව පෙනේ. සංචාරක ව්‍යපාරය ප‍්‍රවර්ධනය සඳහා රුපියල අවප‍්‍රමාණය වීමම යහපත් සාධකයක් ලෙස ගත හැකිය. වැඩිහිටි සත්කාර මධ්‍යස්ථාන හෝ ගම්මාන වැනි ඒවා ඇති කිරීම හා එවැනි අයට පුරවැසි භාවය හෝ ගී‍්‍රන් කාඞ් ලබාදීම වැනි ක‍්‍රමවේද හරහා විශාල ලෙස විදේශ විනිමය උපයා ගත හැකිය. විදේශ ගත ශී‍්‍ර ලාංකිකයන්ට රටේ මුදල් ආයෝජනය දිරිමත් කිරීම සඳහා දැනට කෙරෙන ක‍්‍රමවේදවලට අමතරව කල හැකි තවත් දේ මොනවාදැයි සොයා බැලිය යුතුය. විදේශීය සෘජු ආයෝජන ඇද ගැනීම සඳහා අවශ්‍ය පරිසරය රට තුළ නිර්මාණය කල යුතුය.

මෙකී හා නොකී ආකාරයට කාර්යක්ෂමව ආර්ථිකය කළමනාකරණය කළහොත් රුපියල අවප‍්‍රමාණය වීම රටට එතරම් බරපතල ගැටළුවක් නොවනු ඇත.

පි‍්‍රයදර්ශනී ආරියරත්න