තමන් ආණ්ඩුවට සහයෝගය ලබා නොදෙන නමුත්, තම පක්ෂයේ මන්ත්‍රීවරුන් පිළිබඳ සහතික විය නොහැකි බව සමගි ජන බලවේගයේ පාර්ලිමේන්තු මන්ත්‍රී කණ්ඩායම් රැස්වීමේදී සමස්ත ලංකා මුස්ලිම් කොංග්‍රසයේ නායක රිෂාද් බදියුදීන්  කියා ඇතැයි අනිද්දා සමග අදහස් දැක් වූ සමගි ජන බලවේගයේ සාමාජික පක්ෂයක නායකයෙක් පැවසීය.

සමස්ත ලංකා මුස්ලිම් කොංග්‍රසයෙන් ඔහු හැර පාර්ලිමේන්තු මන්ත්‍රීවරුන් 4 දෙනෙකු තේරී පත් වී ඇති බවත්, එම පුද්ගලයන් පිළිබඳ පාලනයක් තමා සතුව නැතැයි රිෂාද් බදියුදීන් මහතා පැවසූ බවත් අප සමග අදහස් දැක් වූ පක්ෂ නායකයා කීය.

එම නායකයා වැඩිදුරටත් ප්‍රකාශ කළේ රිෂාද් බදියුදීන් මහතා ආණ්ඩුවට එකතු නොවන බව තමා සමග පෞද්ගලිකවද පැවසූ බවයි. ආණ්ඩුව පාර්ශ්වයෙන්ද, තමන්ට ආණ්ඩුවට එකතු වෙන ලෙස ආරාධනාවක් නොලැබුණු බව රිෂාද් බදියුදීන් කීවේයැයි ඔහු පැවසීය.

සමගි ජන බලවේගයේ සාමාජික පක්ෂවල නායකයන් හා ඉහළ පෙළ මන්ත්‍රීවරුන් 20 වැනි සංශෝධනයට පක්ෂව ඡන්දය දීමේ ඉඩක් නැති නමුත්, ඕනෑ පක්ෂයක පසුපෙළ මන්ත්‍රීවරුන් ආණ්ඩුවට සහයෝගය දීමේ ඉඩකඩක් ඇති බවත්, ආණ්ඩුවේ නායකයන් සමගි ජන බලවේගයෙන් තේරී පත් වූ පසුපෙළ මන්ත්‍රීවරුන් සමග සාකච්ඡා කර ඇතැයි පසුගිය කාලයේ දැනගන්නට ලැබුණු බවත් එම පක්ෂ නායකයා කීය.■