ඔක්තෝබර් 30 වැනිදා කොළඹ සුගතදාස ක‍්‍රීඩාංගණයේදී ආරම්භව නොවැම්බර් 03 වැනිදා අවසන් වූ සමස්ත ලංකා පාසල් මලල ක‍්‍රීඩා උළෙල අවසන් වූයේ නව තරග වාර්තා 47ක් බිහිකරමින්ය.


එහිදී වයස අවුරුදු 18න් පහළ බාලක මීටර් 400 ඉසව්ව තත්පර 47.53කින් නිමකළ දංකොටුව වෑකඩ මහා විද්‍යාලයේ රවිඳු බණ්ඩාර ශිෂ්‍යයා දක්ෂතම ක‍්‍රීඩකයා ලෙස සම්මානයට පාත‍්‍ර විය. දක්ෂතම ක‍්‍රීඩිකාව වූයේ වයස අවුරුදු 20න් පහළ මීටර් 200 ඉසව්ව තත්පර 24.48කින් නිමා කළ රාජගිරිය කෝට්ටේ ජාත්‍යන්තර පාසලේ ෂෙලින්ඩා ජැක්සන් ශිෂ්‍යාවය.


සමස්ත ලංකා පාසල් තරගාවලියේ බිහිවූ නව තරග වාර්තා අතරින් වාර්තා 3කට හිමිකම් කීවේ යාපනය පාසල් නියෝජනය කළ ක‍්‍රීඩක ක‍්‍රීඩිකාවෝය. එම ක‍්‍රීඩක ක‍්‍රීඩිකාවන් රිටි පැනීමේ ඉසව්වලදී නව තරග වාර්තා බිහිකරන්නට සමත්වී තිබුණි.


එම දක්ෂතාවන් ධාවන අංශයේ විසිකිරීම් හා අනෙක් පැනීම් අංශවල දක්ෂතා හා සලකා බලද්දී ඇගැයීමට ලක්වී නොතිබුණි. ඊට හේතුව වී තිබුණේ රිටි පැනීමේ ඉසව්වේ ජාත්‍යන්තර දක්ෂතා අගයන් ඉහළ අගයක පැවතීමත්, යාපනය ශිෂ්‍ය ශිෂ්‍යාවන්ගේ දක්ෂතා ඒවා සමඟ සැසª කල බොහෝ ඈතක තිබීමත්ය. ඒ නිසාම මාධ්‍යවල රිටි පැනීමේ යාපනය දක්ෂතාවලට අවකාශය ලැබුණේ නැත.


එසේ වුවද මෙවර සමස්ත ලංකා පාසල් ක‍්‍රීඩා උළෙලේදී රිටි පැනීම ඉසව් 4ම එනම් අවුරුදු 18න් හා 20න් පහළ බාලක බාලිකා ඉසව් යාපනය පාසල්වල ක‍්‍රීඩක ක‍්‍රීඩිකාවන් ජයග‍්‍රහණය කිරීම එම ඉසව්වේ යාපනය පාසල් ආධිපත්‍යය නැවත වරක් පෙන්නුම් කිරීමකි. එය එම ඉසව්වේ පළමු ස්ථානයට පමණක් සීමා නොවීය. දෙවන තෙවන හා පළමු අටදෙනා ඇතුළත බොහෝ ස්ථාන යාපනය පාසල් ශිෂ්‍ය ශිෂ්‍යාවන්ගේ ආධිපත්‍යයට යටත්විය.


අවුරුදු 18න් පහළ රිටි පැනීමේ ඉසව්වේ පළමු ස්ථානය යාපනය අරුණෝදය විදුහලේ එස්. තිසාන්ත් දිනාගනිද්දී, එහි දෙවන ස්ථානය එම විදුහලේම වී. රුෂාන් හා තුන්වන ස්ථානය යාපනය චාවකච්චේරි උසස් විදුහලේ ඒ. පවිතරන් විසින් දිනාගනු ලැබීය. එම ඉසව්වේ 4 වන ස්ථානය වත්තල ලයිසියම් ජාත්‍යන්තර පාසලේ බී. විමලසේන හිමිකර ගනිද්දී පස්වන ස්ථානයත් දිනාගනු ලැබූයේ යාපනය මහජන විදුහලේ එස්. ජැම්සන්ය.


අවුරුදු 18න් පහළ බාලිකා රිටි පැනීමේ ඉසව්වේදී නව තරග වාර්තාවක් සමඟ ජයගෙන තිබුණේ යාපනය මහජන විදුහලේ සී. තීපිකා ශිෂ්‍යාවය. දෙවැනි ස්ථානය නිව්ස්ටඞ් බාලිකා විද්‍යාලයේ තවාසා වික‍්‍රමසේකරට හිමිවී තිබුණි. එම ඉසව්වේ තුන්වන ස්ථානය යාපනය අරුණෝදය විදුහලේ බී. තනුසන්ගරී දිනාගනිද්දී පස්වන ස්ථානයද දිනාගනු ලැබූයේ යාපනය චාවකච්චේරි විදුහලේ එම්. නීලගී ය.


අවුරුදු 20න් පහළ රිටි පැනීමේ බාලක ප‍්‍රථම ස්ථානය යාපනය චාවකච්චේරි හින්දු විදුහලේ ඒ. පවිතරන් නව තරග වාර්තාවක් සමඟ දිනාගනිද්දී එහි දෙවන ස්ථානය යාපනය මහජන විදුහලේ එස්. සුතිදරන් හා තුන්වන ස්ථානය මනිපායි හින්දු විදුහලේ එස්. කබිල්ෂාන් දිනාගනු ලැබීය.


අවුරුදු 20න් පහළ බාලිකා රිටි පැනීමේ ඉසව්වේදී නව තරග වාර්තාවක් සමඟ යාපනය චාවකච්චේරි හින්දු විදුහලේ එන්. දද්සීතා දිනාගනිද්දී එහි දෙවන ස්ථානයත එම විදුහලේම වී. විසෝපිකා විසින් දිනාගනු ලැබීය. එම ඉසව්වේ තුන්වන ස්ථානය මීගගමුව නිව්ස්ටඞ් විද්‍යාලයේ හිමාෂා උදානි ද සිල්වා දිනාගනිද්දී එම ඉසව්වේ හතරවන ස්ථානය දිනාගනු ලැබුවේද යාපනය මහජන විදුහලේ සී. හෙරීනා විසින්ය.


රිටි පැනීමේ බාලක බාලිකා මේ ඉසව් හතරේම දැන් තරග වාර්තාවලට හිමිකම් කියන්නේ යාපනය විද්‍යාලවල ශිෂ්‍ය ශිෂ්‍යාවෝය. මීට පෙරත් එම ඉසව්වල තරග වාර්තා අතරින් යාපනයෙන් පිට තිබුණේ අවුරුදු 18න් පහළ බාලිකා රිටි පැනීමේ ඉසව්වේ වාර්තාව පමණි. ඒ නිව්ස්ටඞ් බාලිකා විදුහල් අයිෂ්වරා වික‍්‍රමසේකර සතුවය. එය මෙවර බිඳවැටී ඇත.


රිටි පැනීමේ ඉසව්වට අදාල ප‍්‍රමිතියෙන් යුතු මෙට්ට ඇත්තේ කොළඹ සුගතදාස ක‍්‍රීඩාංගණයේ හා වාර්තා වන ආකාරයට තවත් කිහිප තැනක පමණය. නාගරිකව ඇති පෞද්ගලික හා රජයේ පාසල්වල ප‍්‍රමිතිගත මෙට්ට ඇතිද යන්න වාර්තා නොවේ. එවැනි තත්වයක් තුළ යාපනයේ ඉහත පාසල්වල රිටි පැනීමේ ප‍්‍රමිතිගත මෙට්ට හා රිටි තිබේද යන්න සැක සහිතය. එවන් තත්වයක් තුළ රිටි පැනීමේ ඉසව්වලින් යාපනය ශිෂ්‍ය ශිෂ්‍යාවන් දක්වන දක්ෂතා ක‍්‍රීඩා බලධාරීන්ගේ අවධානයට යොමුවිය යුතුය යන්න අපගේ අදහසය.