විසිවැනි සංශෝධනය සම්මත නොකළ යුතු බවත්, රටට හිතකර නව ව්‍යවස්ථාවක් සකස් කළ යුතු බවත් ප්‍රකාශ කරමින් ඒකාබද්ධ සංඝ ප්‍රකාශයක් නිකුත් කිරීම සඳහා රාමඤ්ඤ නිකායේ සහ අමරපුර නිකායේ ප්‍රධාන හිමිවරුන් අතර සාකච්ඡාවක් පවත්වා ඇතැයි වාර්තා වේ.

එම සාකච්ඡාව ඔක්තෝබර් 05 වැනිදා රාමඤ්ඤ නිකායේ ඇල්විටිගල මාවතේ පිහිටි මූලස්ථානයේදී පවත්වා ඇත.

කොටස් වශයෙන් ව්‍යවස්ථා අවශ්‍ය නොවන බවත්, නව ව්‍යවස්ථාවක් සකස් කරන ලෙසත්, එයට සංඝයා වහන්සේගේ සහයෝගය හිමිවන බවත් ප්‍රකාශ කිරීම එම සාකච්ඡාවේ පදනම වූ බවත් ආරංචි මාර්ග පවසයි. විසිවැනි සංශෝධනයෙන් ප්‍රජාතන්ත්‍රවාදය අනතුරේ හෙළන බවත් එම සාකච්ඡාවේදී කතාබහ කර ඇත.

එහිදී සියම් නිකායේ මල්වතු සහ අස්ගිරි පාර්ශ්වයන්ට අයත් මහානායක හිමිවරුන් සමගද සාකච්ඡා කොට, ත්‍රෛනිකායික හිමිවරුන්ගේ ඒකාබද්ධ නිවේදනයක් නිකුත් කළ හැකිදැයි සාකච්ඡා කිරීමට එකඟ වී තිබේ.

එම සාකච්ඡාවලට සම්බන්ධ වී ඇති  රාමඤ්ඤ නිකායේ අධිකරණ සංඝ නායක අත්තංගනේ රතනපාල නායක හිමිගෙන් කළ විමසීමකදී එහිමියන් මෙසේ පැවසීය. ‘තුන් නිකායේම හිමිවරුන් මේ ගැන සාකච්ඡාවක් කරන්න බලාපොරොත්තු වෙනවා. ස්වාමීන් වහන්සේලා බහුතරයකගේ අදහස තියෙන්නේ විධායකය ශක්තිමත් කිරීම ප්‍රජාතන්ත්‍රවාදයට අනතුරක් කියලයි. විස්ස සංශෝධනය සුදුසු නැති බව තමයි අපි කියන්නේ. නව ව්‍යවස්ථාවක් හැදීම තමයි වඩා වැදගත්.’

මේ අතර වාර්තාවන්නේ අස්ගිරි සහ මල්වතු පාර්ශ්වයන්ට අයත් ප්‍රධාන හිමිවරුන් රැස් වී 20 වැනි සංශෝධනය සම්බන්ධයෙන් සාකච්ඡා පවත්වා ඇති බවත්, විසිවැනි සංශෝධනය වෙනුවට අලුත් ව්‍යවස්ථාවක් ගෙන ආ යුතු බව එම සාකච්ඡාවලදීත් එකඟ වූ බවත්ය. එම සාකච්ඡා සඳහා පාර්ශ්ව දෙකේ නායක හිමිවරුන් පාදක කරගෙන ඇත්තේ හිටපු කථානායක කරු ජයසූරිය 20 වැනි සංශෝධනයෙන් ඇති වන බලපෑම පිළිබඳ සකස් කරන ලද වාර්තාවක් බවද වාර්තා වෙයි. අස්ගිරි පාර්ශ්වයේ ලේඛකාධිකාරි මැදගම ධම්මානන්ද හිමියන් මාධ්‍යවේදීන් සමඟ දේශපාලන නායකයන් පැමිණෙන අවස්ථාවලදී ප්‍රකාශ කරන්නේ එම මතය බවද වැඩිදුරටත් වාර්තා වෙයි.■