රාජ්‍ය මුදල් වැයකරමින් සිදුකරන රාජ්‍ය ආයතනවල රක්ෂණ කටයුතු රජයට අයත් රක්ෂණ සමාගම්වලින් කරගන්නා ලෙස මීට දශකයකට පෙර තීරණය කරනු ලැබූයේ එම රක්ෂණ කටයුතුවලින් උපයන ලාභය නැවත වරක් රජය සතුකර ගැනීමේ අරමුණෙනි. ඒ මගින් රජයේ මුදල් විදේශයන්ට ඇදීයෑමත්, පෞද්ගලික ව්‍යවසායකයන්ට ලැබීමත් වැළකුණි.

එම තීරණයටත් පෙර ජාතික රක්ෂණ භාර අරමුදල ඇතිකරනු ලැබුයේද ප‍්‍රතිරක්ෂණයේදී විදේශගත වන මුදල් යම් ප‍්‍රමාණයක් රටතුළ රඳවා තබාගැනීමේ අරමුණෙනි. දැන් ජාතික රක්ෂණ භාර අරමුදල එම මුල් අරමුණට අමතරව අනෙකුත් රක්ෂණ කටයුතු සිදුකරන රාජ්‍ය රක්ෂණ ආයතනයක් බවටද පත්වී ඇත.

මුදල් අමාත්‍ය මංගල සමරවීර අමාත්‍ය සජිත් පේ‍්‍රමදාස ජනාධිපති අපේක්ෂකත්වයට තල්ලූ කරගෙන යෑම වැනි කථාබහට ලක්වන අමුතු තීරණයක් ඉහත කී රක්ෂණ කොන්දේසිය සම්බන්ධයෙන් මේ වනවිට ගෙන ඇත.

ඒ 2019 අගෝස්තු 15 දින සහිතව මුදල් අමාත්‍යාංශය නිකුත් කර ඇති 06/2019 චක‍්‍රලේඛය මගින්ය. එම චක‍්‍රලේඛය අනුව රාජ්‍ය අංශයේ රක්ෂණ කටයුතු පෞද්ගලික රක්ෂණ සමාගම්වලින්ද ඉටුකර ගැනීමේ දොරටු විවෘත කර ඇත.

මෙම නව තත්වය රාජ්‍ය මුදල් විදේශයන්ට හා පෞද්ගලික සමාගම්වලට ඇදී යෑමට අමතරව රාජ්‍ය ආයතනවල ඉහළ නිළධාරීන්ට පෞද්ගලික රක්ෂණ සමාගම්වලින් අතයට කොමිස් ලබාගැනීමටද මඟ පාදන්නකි. මන්ද රක්ෂණ ගනුදෙනු යනු බොහෝ විට නිල හා නිලනොවන කොමිස් ගනුදෙනු මත සිදුවන්නක් නිසාය.

මීට පෙර 2009 වසරේදී රාජ්‍ය මුදල් 437 දරන මුදල් අමාත්‍යාංශ චක‍්‍රලේඛයෙන් රාජ්‍ය ආයතනවල රක්ෂණ කටයුතු රාජ්‍ය රක්ෂණ ආයතනවලට සීමා කිරීමේදී නිලධාරීන්ට කොමිස් මුදල් ලබාගැනීමට ඇති හැකියාව අහෝසි කිරීමද අරමුණක් වී තිබුණා වන්නට පුළුවන.

කොහොමත් රාජ්‍ය රක්ෂණ ආයතනවලට නිල කොමිස් මුදල් මිස නිල නොවන අත යට කොමිස් මුදල් රක්ෂණ ගණුදෙනුවකදී ලබාදිය නොහැකිය. ඒ නිසා පෞද්ගලික සමාගමක් රාජ්‍ය රක්ෂණ ආයතනයකින් රක්ෂණයක් කළද නිල කොමිස් මුදල් මිස අත යට කොමිස් මුදල් එම පෞද්ගලික සමාගම්වල ඉහළ නිලධාරීන්ට ලැබෙන්නේ නැත.

එම 2009 වර්ෂයේ චක‍්‍රලේඛය අනුව සියලූම රාජ්‍ය හා අර්ධ රාජ්‍ය ආයතන සමුද්‍රීය රක්ෂණ, ගිනි රක්ෂණ, මෝටර් රථ රක්ෂණ, සාමාන්‍ය අනතුරු රක්ෂණ, දේපළ රක්ෂණ, සෞඛ්‍ය රක්ෂණ අනිවාර්යයෙන්ම ජාතික රක්ෂණ භාර අරමුලෙන් හෝ ශ‍්‍රී ලංකා රක්ෂණ සංස්ථාවෙන් කරගත යුතු බවට නියෝග පනවා තිබුණි.

ඉහත සඳහන් රක්ෂණ ක‍්‍රමවලට අමතරව සියලූ රක්ෂණ ආවරණයන් ශ‍්‍රී ලංකා රක්ෂණ සංස්ථාවෙන් පමණක් ලබාගත යුතු බව එම චක‍්‍රලේඛයේ දක්වා ඇත.

එහිදී ඒ ඒ රාජ්‍ය ආයතනයට අභිමත පරිදි පිරිවැය හා සේවා ලබාගැනීමට ඇති පහසුව සලකා බලා වාසිදායක ලෙස ශ‍්‍රී ලංකා රක්ෂණ සංස්ථාවෙන් හෝ ජාතික රක්ෂණ භාර අරමුදලෙන් සිදුකර ගත හැකි බව එහි දක්වා ඇත. එසේම මේ සියලූම රක්ෂණ කටයුතුවලදී රක්ෂණ නියෝජිතයන්ගේ සේවය ලබා නොගත යුතු බවද අවධාරණය කර ඇත.

රාජ්‍ය ආයතනවල රක්ෂණ කටයුතු පෞද්ගලික අංශයට විවර කිරීමේ මුදල් අමාත්‍යාංශ පළමු චක‍්‍රලේඛයෙන් පසු එය තවදුරටත් 2019 සැප්තැම්බර් 12 වැනි දින මුදල් අමාත්‍යාංශ 06/2019(1* දරන චක‍්‍රලේඛයෙන් සංශෝධනය කර තිබුණි. එහිදී ශ‍්‍රී ලංකා රක්ෂණ නියාමන කොමිසමේ ලියාපදිංචි රක්ෂණ නියෝජිතයන්ට හා බ්‍රෝකර්වරුන්ටද රාජ්‍ය ආයතනවල රක්ෂණ කටයුතු සම්බන්ධයෙන් මැදිහත්වීමට අවසර ලබාදී ඇත.

මේ නම් රාජ්‍ය ආයතන සතු රක්ෂණ කටයුතුවලදී වැයවන රාජ්‍ය මුදල් අතරමැදියන් හරහාද අවභාවිත කිරීමට අවසර ලබාදීමකි. රාජ්‍ය ආයතනවල රක්ෂණ කටයුතු පෞද්ගලික අංශයට විවර කිරීමේ මේ නවතම කාරණයට රක්ෂණ සේවක සංගමය ඇතුළු ශ‍්‍රී ලංකා රක්ෂණ සංස්ථාවට අයත් සියලූම වෘත්තීය සමිති විරෝධය පළකර ඇත. ඔවුන් මෙම නවතම තීරණය ගැන සාකච්ඡුා කිරීමට මුදල් අමාත්‍ය මංගල සමරවීරගෙන් අවස්ථාවක් ඉල්ලා ඇත. ඊට සති දෙකක කාලයක් ගතවීත් පිළිතුරු ලැබී නැත. මුදල් අමාත්‍ය මංගල සමරවීරගේ ප‍්‍රධානතම වගකීම සජිත් පේ‍්‍රමදාස මහතාව එජාපයේ ජනාධිපති අපේක්ෂකයා කිරීම වෙනුවෙන් ? දිවා වෙහෙසීම නිසා ඔහුට මේ දිනවල සිය අමාත්‍යාංශ විෂයට අයත් කාර්යයන් සඳහා වෙලාවක් නැතිවාට සැක නැත.

රක්ෂණ සංස්ථාවේ වෘත්තීය සමිති ඒකාබද්ධව මේ පිළිබඳව සැප්තැම්බර් 6 දින සහිතව ජනාධිපතිවරයාටද ලිපියක් යවමින් දන්වා ඇත. එම ලිපියෙන් ශ‍්‍රී ලංකා රක්ෂණ සංස්ථාවේ වෘත්තීය සමිති රාජ්‍ය ආයතනවල රක්ෂණ කටයුතු පෞද්ගලික අංශයට විවර කිරීමේ යහපාලන ආණ්ඩුවේ ආරම්භක පියවරක් ගැනද සඳහන් කරයි. 2015/01 නැමැති මුදල් අමාත්‍යාංශ චක‍්‍රලේඛයක් මගින් 2015 වර්ෂයේදී රාජ්‍ය ආයතනවල රක්ෂණ කටයුතු පෞද්ගලික අංශයට විවර කරන්නට උත්සාහ කර ඇත. එහෙත් එම තීරණය නිවැරදි නොවන බවට වෘත්තීය සමිති කරුණු පෙන්වාදීමෙන් පසු 2015/04 දරන චක‍්‍රලේඛය මගින් එවක මුදල් ඇමතිවරයා එම තිරණය ආපසු හරවා ඇත.

එමෙන්ම එම ලිපියේ තවත් විශේෂ කරුණක් සඳහන්ය. ඒ මෙම නව තීරණයට අදාල චක‍්‍රලේඛය ගැන ශ‍්‍රී ලංකා රක්ෂණ සංස්ථාවේ කළමණාකාර අධ්‍යකක්ෂ දුෂ්‍යන්ත බස්නායකගෙන් හා ප‍්‍රධාන විධායක නිළධාරී චන්දන අලූත්ගමගෙන් කරන ලද විමසීම්වලදී ලැබුණ පිළිතුරුය. මෙම චක‍්‍රලේඛය මුදල් අමාත්‍යවරයා හෝ මුදල් අමාත්‍යාංශ ලේකම්වරයාගේ අනුදැනුමකින් තොරව ජනාධිපතිවරයාගේ තීරණයක් මත ක‍්‍රියාත්මක වී ඇතිය යන්න එයය.

එය ඇත්තක් නම් ජනාධිපතිවරයා සිය විධායක බලය මුදල් අමාත්‍යාංශයේ කටයුතු සඳහාද අත්තනෝමතික ලෙස අවභාවිතා කරන බව ඔප්පු වේ. එමෙන්ම ජනාධිපතිවරයාගේ එවැනි අත්තනෝමතික නියෝගදීම් හමුවේ මුදල් අමාත්‍ය මංගල සමරවීර ඊට ඉඩදී බලා සිටියානම් එයද සැළකිය යුත්තේ කෙසේද.

ශ‍්‍රී ලංකා රක්ෂණ සංස්ථාවේ වෘත්තිය සමිතිවලට එහි ප‍්‍රධානීන් කියා ඇති මේ කථාව සමහරවිට ඇත්තක් විය හැකිය. ඊට එක් හේතුවක් වන්නේ ජාතික ව්‍යාපෘති සම්බන්ධයෙන් මුදල් අමාත්‍යාංශය මගින් සිදුකරන ප‍්‍රචාරයන්ට ජනාධිපතිවරයා කරන මැදිහත්වීම්වලට ඉඩදීමේ ප‍්‍රතිපත්තියක් මුදල් අමාත්‍යාංශය අනුගමනය කරන බව අප දන්නා නිසාය. එමෙන්ම මුදල් අමාත්‍යවරයා ජනමාධ්‍ය විෂයද හොබවන කාලයේ විශේෂයෙන් ජාතික රූපවාහිනියේ සභාපතිනිය වෙනස් කිරීම සඳහා ගත් උත්සාහයන් ජනාධිපතිවරයාගේ විරුද්ධත්වය නිසා හකුළාගත් නිසාය.

අනෙක මෙම චක‍්‍රලේඛයට පෙර අධ්‍යාපන අමාත්‍යාංශය මෙහෙයවන පාසැල් දරුවන්ගේ සුරක්ෂා රක්ෂණාවරණය අලියොන්ස් රක්ෂණ සමාගමට ලබාදීම සඳහා අභියාචනා තත්වයක් නොතිබියදී ජනාධිපති අභියාචනා කමිටුව රඟදැක්වූ සෙල්ලම නිසාය.

ඒ නිසා රාජ්‍ය ආයතනවල රක්ෂණ කටයුතු පෞද්ගලික ආයතනවලට විවර කිරීමේ මේ තීන්දුව කාගේදැයි මුදල් අමාත්‍යවරයා හා ජනාධිපතිවරයා රටට කිව යුතුය.