අනිද්දා නියෝජ්‍ය කර්තෘ ලසන්ත රුහුණගේ මැතිවරණ කොමිෂන් සභාවේ සභාපතිවරයා වෙත පැමිණිල්ලක් කළේය. රාජපක්ෂ පවුලේ සාමාජිකයන් පිරිසකගේ නම් ශ‍්‍රී ලාංකික පුරවැසිභාවය නොමැතිව 2005 ජනාධිපතිවරණයේදී ඡුන්ද හිමි නාමලේඛනයට ඇතුළත් කිරීම පිළිබඳව පරීක්ෂණයක් කරන ලෙස එම පැමිණිල්ලෙන් ඉල්ලා ඇත.


පැමිණිල්ල කළේ අගෝස්තු 13 වැනිදාය. මැතිවරණ කොමිෂන් සභාවේ සභාපති මහින්ද දේශප‍්‍රියට එම පැමිණිල්ල කර ඇත. පැමිණිල්ලෙහි පිටපත් මැතිවරණ කොමිසමේ අනෙක් සාමාජිකයන් දෙදෙනා වන මහාචාර්ය එස්. රත්නජීවන් හූල්, ජනාධිපති නීතිඥ එන්.ජේ. අබේසේකර මහත්වරුන්ටද යොමුකර ඇත.


මැතිවරණ දෙපාර්තමේන්තුව ප‍්‍රකාශයට පත්කර ඇති 2005 වර්ෂයට අදාල ඡුන්ද හිමි නාමලේඛනයේ මුල්කිරිගල මැතිවරණ කොට්ඨාසයේ වීරකැටිය මැදමුලන ප‍්‍රදේශයේ අංක 114 ලිපිනය යටතේ ශ‍්‍රී ලංකා පුරවැසියන් නොවන පිරිසක් ඡුන්ද හිමියන් වශයෙන් ලියාපදිංචි වී ඇති බව එම පැමිණිල්ලෙන් පෙන්වාදී ඇත.


පි130 අංකය යටතේ රාජපක්ෂ නන්දසේන ගෝඨාභය, ගැ 131 අංකයෙන් රාජපක්ෂ අයෝමි, ගැ132න් රාජපක්ෂ පුෂ්පා, පි133න් රාජපක්ෂ ඩඞ්ලි පියසිරි, පි139න් රාජපක්ෂ බැසිල් රෝහණ යන ශ‍්‍රී ලංකාවේ පුරවැසියන් නොවන පිරිසකගේ නම් ඡුන්දහිමි නාමලේඛනයට ඇතුළත් කර තිබෙන බව එම පැමිණිල්ලෙන් පෙන්වාදී ඇත.


මේ ආකාරයට ශ‍්‍රී ලංකා පුරවැසියන් නොවන පිරිසක් සාවද්‍ය ලෙස ඡුන්දහිමි නාමලේඛනයේ ලියාපදිංචි වී සිටීම පිළිබඳ පරීක්ෂණයක් කර එම වැරදි ලියාපදිංචි කිරීම් කළ ගෘහමූලිකයාට එරෙහිව අවශ්‍ය පියවර ගන්නා ලෙස එම පැමිණිල්ලෙන් අනිද්දා නියෝජ්‍ය කර්තෘවරයා ඉල්ලා ඇත. 2005 ජනාධිපතිවරණයේදී එම නම් සඳහන් ශ‍්‍රී ලංකා පුරවැසියන් නොවන පිරිස ඡුන්දය භාවිත කළාද නැද්ද යන්න පිළිබඳ පරීක්ෂණයක් කරන ලෙසත්, හිමිකමක් නොමැති ඡුන්ද භාවිත කිරීමක් කර ඇත්නම් එම අයට විරුද්ධව ගත හැකි පියවර ගන්නා ලෙසත් එම පැමිණිල්ලෙන් ඉල්ලා ඇත.


මෙලෙස ඡුන්දහිමි නාමලේඛනයට නම් ඇතුළත් කරන්නේ නිවෙසක ගෘහමූලිකයා සම්පූර්ණ කොට ග‍්‍රාම නිලධාරී වෙත බාරදෙන තොරතුරු අනුවය. එම තොරතුරු ඇතුළත් කර, එම තොරතුරු සත්‍ය බවට අත්සන් තබන්නේ නිවෙසක ගෘහමූලිකයායි. මෙම ලිපිනයෙහි ඡුන්දහිමි නාමලේඛනයේ ඉහළින් තිබෙන නම චමල් රාජපක්ෂගේය. ගෘහමූලිකයා විය යුත්තේ ඔහුය. ජනාධිපතිවරණ අපේක්ෂකයෙකු වූ පර්සි මහේන්ද්‍ර රාජපක්ෂගේ නමත් එම ඡුන්දහිමි නාමලේඛනයේම ඇත.


ඉරිදා පුවත්පතක නියෝජ්‍ය කර්තෘවරයෙකු මෙවැනි පැමිණිල්ලක් කිරීමට හේතුව කුමක්දැයි කෙනෙකු විමසන්නට ඉඩ තිබේ. හේතුව සරලය. එවැනි පැමිණිලි සිදු නොකොට ක‍්‍රියාකාරී වීමේ නොහැකියාවක් මැතිවරණ කොමිෂන් සභාව වැනි ආයතනවලට ඇත. එය මැතිවරණ කොමිෂන් සභාවට කරන චෝදනාවක් නොවේ. ලංකාවේ බොහෝ ආයතනවල ක‍්‍රියාකාරීත්වය එබඳුය. මාධ්‍යවලින් හෙළිදරව් කොට සමාජයේ දැවැන්ත සාකච්ඡුාවට ලක්වන මාතෘකාවක් ගැන වුව පියවර ගන්නේදැයි විමසද්දී අපට ‘පැමිණිල්ලක්‘ ලැබී නැති බව එවැනි ආයතනවලින් පිළිතුරු ලෙස ලැබෙයි. ඒ නිසා මෙම සිදුවීම ගැන වාර්තා කිරීමෙන් එහාට ගොස් පැමිණිලි කිරීමට සිදුවිය. අපට අවශ්‍ය වන්නේ රටේ බලවත් පවුලක් ඡුන්ද හිමි නාමලේඛනයට අදාලව කූට ලේඛන සැකසීම වැනි බරපතළ සිදුවීමක් පිළිබඳව මැතිවරණ කොමිසම ගන්නා පියවර කුමක්දැයි නිරීක්ෂණය කිරීමටය.


අවුරුදු 14කට පෙර ඡුන්දයකදී වූ ‘සුළු‘ සිදුවීමක් ගැන අප මේ තරම් කෑගසන්නේ මන්දැයි කෙනෙකු විමසන්නට ඉඩ ඇත. එහෙත් මැතිවරණයකදී ඡුන්ද හිමි නාමලේඛනයට අදාලව වංචා කිරීම යනු ලෙහෙසි පහසු අපරාධයක් නොවේ. කූට ලේඛන සැකසීම අපරාධයකි. විශේෂයෙන්ම රටේ අනන්‍යතාවන්ට අදාළ ලිපිලේඛනවලදී කූට ලෙස ක‍්‍රියාකිරීම බරපතළය. තවත් බොහෝ අපරාධවල ආරම්භය වන්නේ රජයේ විවිධාකාර ලේඛන කූට ලෙස සකස් කිරීමයි. විවිධාකාර අනන්‍යතාවලින් කූට ලෙස පෙනී සිටීමයි.


අනෙක් අතට රටේ ජනාධිපතිවරණයට ඉදිරිපත් වූ අපේක්ෂකයෙකුගේ හා එවකට රටේ අගමැතිවරයාගේ නිවසේදීම ඡුන්ද හිමි නාමලේඛනයට ව්‍යාජ තොරතුරු ඇතුළත් කිරීම ඉතා භයානක තත්වයකි. ඒ නිසා එය ඉතා බරපතළ ලෙස සැලකිය යුතු තත්වයකි. මැතිවරණයකදී එකම එක ඡුන්දයක් වුව අවභාවිත කර ඇත්නම් එය ගැටලූවක් බව තේරුම්ගත යුතුය. එම අවභාවිත කර ඇත්තේ ජනාධිපතිවරණ අපේක්ෂකයෙකුගේ නිවසේදී නම් එය තවත් බරපතළය. මෙවැනි සිදුවීමක් ගැන පියවර නොගතහොත්, එය ඉදිරියේදී මෙවැනි වංචාවල දහස් ගණනකට පූර්වාදර්ශයක් විය හැකිය.


මැතිවරණ කොමිෂන් සභාව මෙම පැමිණිල්ලට අදාලව කුමන පියවරක් ගනු ඇතිදැයි අපි බලා සිටින්නෙමු. රටේ හිටපු ජනාධිපතිවරයෙකු, කථානායකවරයෙකු, ප‍්‍රබල අමාත්‍යවරයෙකු, ආරක්ෂක අමාත්‍යාංශ ලේකම්වරයෙකුව සිට ඉදිරි ජනාධිපතිවරණයට ඉදිරිපත් වීමට බලාපොරොත්තු වන බව කියන පුද්ගලයෙකු පදිංචිව සිටි පවුලක් වන නිසා එම පුද්ගලයන් නීතිය කැඞීම ගැන පියවර නොගනීවිදැයි අප දන්නේ නැත. ලංකාවේ ප‍්‍රධාන පෙළේ ආයතන බොහොමයක්, රටේ අනෙකුත් පුරවැසියන්ට වඩා වෙනස් ලෙස රාජපක්ෂ පවුලට සලකන ආකාරය අපි දැක ඇත්තෙමු. මැතිවරණ කොමිසමේ ප‍්‍රතිපත්තියත් එයමදැයි අපට නිරීක්ෂණය කළ හැකිය. ස්වාධීන ආයතනයක් වන මැතිවරණ කොමිෂන් සභාව රාජපක්ෂ පවුල නම් ලංකාවේ බලවත්ම පවුල ඉදිරියේ නිහඬව සිටිනු ඇතිදැයි අප දන්නේ නැත. කෙසේවෙතත් මැතිවරණ කොමිෂන් සභාවේ ක‍්‍රියාකාරීත්වය මැනගැනීමට අවස්ථාවක් අප ඉදිරියේදී ඇත.


මැතිවරණ කොමිසම මේ සම්බන්ධයෙන් කුමන හෝ පියවරක් ගෙන කුමක් හෝ පිළිතුරක් ලබාදුනහොත්, ඒ ගැන ප‍්‍රජාතන්ත‍්‍රවාදය ගැන පතන පුද්ගලයන්ට සෑහීමට පත්විය නොහැක. මේ අපරාධයේ බරපතළකම ගැන කොමිසම තේරුම්ගත යුතුය. ඔවුන් අලස හා මන්දගාමී ලෙස ක‍්‍රියාකරනු ඇතිද, වේගවත්ව ක‍්‍රියාකරනු ඇතිද යන්න නිරීක්ෂණය කිරීම වැදගත්ය. නොකෙරෙන වෙදකමට කෝඳුරු තෙල් හත් පට්ටයක් ඉල්ලනු ඇතිද කියාත් නිරීක්ෂණය කිරීම වැදගත්ය.


ඇතැම්විට මෙයට පිළිතුරු ලෙස රාජපක්ෂ පවුල කිව හැකි එක් කාරණයක් ඇත. ලංකාවේ ජීවත්වෙන උදවිය විදේශගත වෙන අවස්ථා ඇතත්, ඔවුන්ගේ නම් මැතිවරණ නාමලේඛනයට ඇතුළත් කිරීම සාමාන්‍යයෙන් සිදුවන බව ඔවුන් කියනු ඇත. විදේශ රැුකියා සඳහා මැද පෙරදිග, දකුණු කොරියාව වැනි විවිධාකාර රටවලට යන ශ‍්‍රී ලාංකිකයන්ගේ නම් ඡුන්ද හිමි නාමලේඛනයට ඇතුළත් කිරීම සිදුවේ. මැතිවරණයේදී එම විදේශ රැුකියා නියුක්තිකයා ලංකාවට ආවොත්, ඡුන්දය පාවිච්චි කරයි. එසේ නැතිවුණොත් ඡුන්දය පාවිච්චි කරන්නට ක‍්‍රමයක් නැත. එය සම්පූර්ණයෙන්ම නීත්‍යනුකූලය. (එවැනි අය විදේශගතව සිටියදීම තානාපති කාර්යාලවලදී ඡුන්දය පාවිච්චි කරන්නට ක‍්‍රමයක් සැකසීම වටී. ඡුන්දය ඔවුන්ගේ අයිතියකි.* ඒ අනුව ගෝඨාභය රාජපක්ෂලාගේ නම් ඡුන්ද හිමි නාමලේඛනයට ඇතුළත් කිරීම සාමාන්‍ය තත්වයක් බව රාජපක්ෂ පවුලේ උදවිය හඟවනු ඇත. එහෙත් එය එසේ නොවේ. ගෝඨාභය රාජපක්ෂ රැුකියාවකට විදේශගත වී සිටින ලාංකිකයෙකු පමණක් නොවේ. ඔහු ඇමෙරිකන් පුරවැසිභාවය ලැබූ, ලාංකික පුරවැසිභාවය අත්හරින ලද ඇමෙරිකානුවෙකි. ඔහු ශ‍්‍රී ලංකාවේ උපත ලද්දෙක් වුව ශ‍්‍රී ලාංකිකයෙක් නොවේ.


මෙම පැමිණිල්ල සම්බන්ධයෙන් ගන්නා පියවර කුමක්දැයි අප කළ විමසීමකදී මැතිවරණ කොමිෂන් සභාවේ සභාපති මහින්ද දේශප‍්‍රිය පැවසුවේ එම පැමිණිල්ල අදාල අංශවලින් තමන්ගේ අතට ලැබුණේ අගෝස්තු 14 වැනිදා බවයි. එය මේ වෙද්දී නීති අංශයට යොමු කර ඇති බවද ඔහු කීය. ඉන්පසුව එය කොමිෂන් සභා සාමාජිකයන් අතර සාකච්ඡුාවට ලක්කොට ගන්නා පියවර ගැන සාකච්ඡුා කරන බව ඔහු කීය. බෝලය ඇත්තේ කොමිසම අතේය. එයට කෙලෙස ප‍්‍රතිප‍්‍රහාර දෙනු ඇතිදැයි අපි බලා සිටින්නෙමු.