රනිල් වික්‍රමසිංහ මහතා සමඟ රහස් ගනුදෙනුවක් දෙමළ ජාතික සන්ධානයට ඇති බව පවසමින් දකුණේ මාධ්‍ය ආයතන අසත්‍ය ප්‍රචාර ගෙනගියද රනිල් වික්‍රමසිංහ හෝ එක්සත් ජාතික පක්ෂය සමඟ තමන්ට කිසිදු රහස් ගනුදෙනුවක් නොමැති බව ජනවාරි 16 වන දින වඩමාරච්චි ප්‍රදේශයේ පැවැති තෛපොංගල් උත්සවයකදී මාධ්‍ය අමතමින් දෙමළ ජාතික සන්ධානයේ පාර්ලිමේන්තු මන්ත්‍රි එම්.ඒ. සුමන්තිරන් පැවසීය.
පසුගිය වසරේ ඔක්තෝබර් 26 වන දින ඇති වූ දේශපාලන අර්බුදය හමුවේ එක්සත් ජාතික පක්ෂයට දෙමළ ජාතික සන්ධානය සහයෝගය පළ කළේ රහස් ගිවිසුමකට නොවන බවත් එක්සත් ජාතික පක්ෂයට සහය පළ කිරීම පිළිබඳව තීරණයකට එලැඹෙනු ලැබුවේ එජාපය සමග සිදු කළ සාකච්ඡාවකින් පමණක් බවයි. උතුර සහ නැගෙනහිර දෙමළ ජනතාව නියෝජනය කරන ජනතා නියෝජිතයින් සිටින පක්ෂය බැවින් එම සාකච්ඡාවේදී දෙමළ ජනතා සන්ධානය විසින් උතුරේ සහ නැගෙනහිර පළාත් පිළිබඳව යම් කිසි තීරණයක් ගන්නේ නම් තම පක්ෂයෙන් ඒ පිළිබඳව උපදෙස් ලබාගන්නා මෙන් එජාපයෙන් ඉල්ලීමක් පමණක් කර ඇති බව එම්. ඒ. සුමන්තිරන් මහතා එහිදී පැවසීය. ඔහු පැවසුවේ තමන්ට වුවමනා වී තිබෙන්නේ උද්ගත වී ඇති දේශපාලන අර්බුදය අවසන් කිරිමට බවත් දකුණේ බහුතර මාධ්‍යවලට වුවමනා වී තිබෙන්නේ තවත් දේශපාලන අර්බුදයක් නිර්මාණය කිරීමට බවත්ය.
ඔහු පැවසුවේ ජාතිවාදී වර්ගවාදී ලෙස දෙමළ ජනතා සන්ධානය පිළිබඳව ගෙනයමින් පවතින අසත්‍ය ප්‍රවෘත්ති සමාජගත කිරීම සම්බන්ධයෙන් කැපිටල් මහාරාජා ඇතුළු මාධ්‍ය ආයතන කිහිපයකට එරෙහිව නීතී මාර්ගයෙන් කටයුතු කරන බවය.■