පාර්ලිමේන්තු මන්ත්‍රී නලින්ද ජයතිස්ස

නව ව්‍යවස්ථාව ගැන ජවිපෙ අදහස වෙනස් වෙලාද?
අපේ රටට අලු‍ත් ව්‍යවස්ථාවක් ඕනෑ. ඒත් ජනතාවගේ අනුමැතියක් නැතිව ව්‍යවස්ථාවක් හදපු ජේ.ආර්. ජයවර්ධන ජනාධිපතිවරයා ව්‍යවස්ථා සංශෝධන ක්‍රියාවලියත් අමාරු කරලයි තියෙන්නේ. එහෙත් දැන් රටේ තියෙන තත්වය අනුව අලු‍ත් ව්‍යවස්ථාවක් කියන වචනය විසින්ම ලොකු දේශපාලන කැළඹීමක් ඇති කරනවා. උදාහරණයක් විදියට 2015 දී බලය අහිමිව ගිය රාජපක්ෂ කණ්ඩායම ව්‍යවස්ථාව කියන වචනයට මුවා වෙලා ලොකු භීතියක් වපුරමින් යනවා. පහුගිය සති‍යේ පාර්ලිමේන්තුවට විශේෂඥ කමිටු වාර්තාව ඉදිරිපත් කිරීමට පෙර දිනයේ රාත්‍රිය දක්වාම මහින්ද රාජපක්ෂත්, සහචර කල්ලියත් පන්සල් ගානේ ගිහිල්ලා සහ මාධ්‍ය ඉස්සරහා කිව්වේ මෙන්න රට බෙදන ව්‍යවස්ථාවක් එනවා කියලා. රට නවයකට කැඩෙනවා, බුද්ධාගමට තැන නැතිවෙනවා. පොලීසි නවයක් හැදෙනවා කිව්වා. ඒ කියපු අය දැක්කාම හිතෙනවා මේ අය ව්‍යවස්ථා කෙටුම්පත දැකලාද කතා කරන්නෙ කියලා. ඒ වුණාට ජනවාරි 11 වැනිදා ඒ විශේෂඥ කමිටු වාර්තාව ඉදිරිපත් කරපු අවස්ථාවේ මහින්ද රාජපක්ෂ මහතාගේ පාර්ලිමේන්තුවේ හැසිරීමෙන් පෙන්නුම් කළේ එවැනි කෙටුම්පතක් තබා ඉදිරිපත් කරපු වාර්තාව කියවා තේරුම් ගන්නවත් ඔහුට හැකියාවක් නැහැ කියලයි. රාජපක්ෂ නඩය සූදානම් වෙලා ඉන්නේ ව්‍යවස්ථාවට අදාල කවර ලියැවිල්ලක්, සංශෝධනයක්, වාර්තාවක් ගෙනාවත් එය රට බෙදන එකක් බවට භීතියක් මවන්න. බුද්ධාගමට තැන නැතිවෙනවා කියලා භීතියක් මවන්න. ඒකෙන් තමන් ගොඩයන්න.

ඒත් ජවිපෙත් පහුගිය දවස්වල ව්‍යස්ථා සම්පාදන ක්‍රියාවලියට එරෙහිව අදහස් පළකරලා තිබුණා නේද?
රටට නව ව්‍යවස්ථාවක් ඕනැ වුණත් මේ පාර්ලිමේන්තුවෙන් ඒ ව්‍යවස්ථාව සම්මත කරගන්න බෑ. අවුරුදු තුනහමාරක් තිස්සේ ක්‍රියාත්මක වුණ ව්‍යවස්ථා මණ්ඩලයත්, මෙහෙයුම් කමිටුවත්, විශේෂඥ කමිටුවත්, අනුකමිටුත් දැන් වැඩක් නැති දේවල් බවට පත්වෙලා. දැන් ඒ සියල්ල අහෝසි වෙන්න ඕනෑ. මේ තිබෙන පාර්ලිමේන්තු සංයුතිය මත සහ ඉතිරිවෙලා තිබෙන කාලය අනුව අලු‍ත් ව්‍යවස්ථාවක් සඳහා අවස්ථාවක් නැහැ. ඊළඟට රාජපක්ෂ නඩය විසින් පතුරවපු බොරුවට අමතරව රනිල් වික්‍රමසිංහගේ උදාසීනකම හා බෙලහිනකම බලපාලා තියෙනවා. ඔහු අවුරුදු තුනහමාරක් තිස්සේ ව්‍යවස්ථාවක් හැදීමට අවශ්‍ය ජනවරමට අනුව කටයුතු කලේ නැහැ. ව්‍යවස්ථාවක් හැදීම සඳහා ජනවරමට අනුව ඔහු කටයුතු කළේ නැහැ. ව්‍යවස්ථාවක් හදනවා කියන කතාන්දරය ජාත්‍යන්තරයෙන් ආරක්ෂා වෙන්න හා පක්ෂයට එන චෝදනාවලින් ආරක්ෂා වෙන්න පාවිච්චි කළා. මෛත්‍රීපාල සිරිසේන ජනාධිපතිවරයාගෙන් නම් නව ව්‍යවස්ථාවක් බලාපොරොත්තු වෙලා වැඩක් නැහැ. ඔහු තමන්ට ලැබුණු ජනවරම ගැන අවබෝධයකින්වත් ඉන්නවාද කියලා දන්නෙ නැහැ. ඔහුට ජනතා පරමාධිපත්‍යය වගේ දේවල් තේරෙන්නෙත් නැහැ, වගවීමකුත් නෑ. කෙසේ වෙතත් අපි කියන්නෙ රාජපක්ෂලාට මේ රටේ ජනතාව ගොනාට අන්දවන්න ආයුධ තව තවත් නොදි, ව්‍යවස්ථා සම්පාදනය ගැන ක්‍රියාවලිය අවසන් කළ යුතුයි.

ජාතිවාදය අවදි වීම නිසා මහජනතාව දෙකට බෙදිලා තියෙන බව පෙනෙනවා. ඒක එජාපෙ හා රාජපක්ෂ කණ්ඩායම කියන දෙපිළටම වාසිදායකයි නේද?
රාජපක්ෂලාව ගමුකො. ඔවුන්ට ඊළඟ මැතිවරණයකදී අමුතු දේවල් කියන්න බැහැ කියලා දන්නවා. රටේ ආර්ථිකය හදන්නම් කියලා බලය ගන්න බැහැ. මේ රටේ ආර්ථිකයට ඔවුන් කරපු විනාශය රටේ ජනතාව ගන්නවා. ව්‍යාපෘතිවලින් මහා කොමිස් ගසාකෑවේ මේ රටේ ජනාධිපති ලේකම්වරයාගේ ඉඳලාම රාජ්‍ය සේවය දූෂණයට ලක් කළේ රාජපක්ෂලා. ඒ නිසා දූෂණය නැති කරන බව රාජපක්ෂලාට කියන්න බැහැ. දහඅටවැනි සංශෝධනය නැතිකරපු, අයිතිවාසිකම් ඉල්ලූ මිනිස්සුන්ට වෙඩි තියපු, මාධ්‍යවේදීන්ට පහරදුන්න රාජපක්ෂලාට ප්‍රජාතන්ත්‍රවාදය ගැන කතාකරන්නත් බෑ. ඔවුන්ට බලය ලබාගැනීම සඳහා පහසු, ඇඟ නොරිදෙන ක්‍රමය තමයි මේ රට ජාතිවාදී විදියට ධ්‍රැවීකරණය කිරීම. ඒක තමයි ඔවුන් කරමින් ඉන්නේ. ඒකට පාවිච්චි කරන්න පුලු‍වන් සියල්ල පාවිච්චි කරනවා. ව්‍යවස්ථාවට සම්බන්ධ ලියැවිල්ලක් ගෙනාවත් විරුද්ධ වෙන්නෙ ඒ නිසා. ව්‍යවස්ථා සම්පාදනය වෙනුවෙන් අදහස් ලබාගැනීමට පත් කරපු විශේෂඥ කමිටු වාර්තාවත් ඔවුන් ව්‍යවස්ථාවක් විදියට අර්ථ දක්වනවා. කාගේ හරි ඔලු‍වේ ඇක්‍ෂෙන මනස්ගාත ලියැවිල්ලක් පාර්ලිමේන්තුවට ඉදිරිපත් කරපු පමණින් එය ව්‍යවස්ථාවක් වෙන්නෙ නැහැ කියලා 1970 ඉඳන්ම පාර්ලිමේන්තුවේ හිටපු මහින්ද රාජපක්ෂ දන්නවා. ඒත් එල්ලෙන්න තියෙන එකම පිදුරු ගහ ජාතිවාදය නිසා ඔවුන් ඒකේ එල්ලෙනවා. ඒ නිසා කොහේ හෝ බුදුපිළිමයක් කැඩුවත් ඒක බලය ලබාගැනීමේ න්‍යායපත්‍රයට දාගන්නවා.
ඒ වගේම තමයි එජාපයත්. රාජපක්ෂලාට ජාතිවාදය වපුරන්න දීලා, එයින් බියට පත්වෙන දෙමළ මුස්ලිම් ජනතාව හා සිංහල මධ්‍යස්ථ ජනතාවගේ ඡන්ද කඩාගැනීමේ යටිකූට්ටු අරමුණක ඔවුන් ඉන්නවා. මං හිතන්නෙ රනිල් වික්‍රමසිංහත් අන්තවාදයට කැමතියි. මේ දෙන්නාම දැනුවත්වම මේ රටේ ජාතිවාදය වපුරමින් හා ජාතිවාදයට ඉඩ දෙමින් කරන හානිය ඉතාම බරපතළයි. ඒ නිසා තමයි රටක් හැටියට අපට ඉදිරියට යන්න බැරි. අවුරුදු හැත්තෑවක් තිස්සෙ රට දියුණු කරගන්න බැරිවුණේ මාරුවෙන් මාරුවට මේ පක්ෂ දෙක ජාතිවාදය පාවිච්චි කරපු නිසා.

මේ පාර්ලිමේන්තුවෙන් විධායක ජනාධිපති ක්‍රමය අහෝසි කරගන්න පුලු‍වන් බව විශ්වාස කරනවාද? 20 සංශෝධන යෝජනාවේ තත්වය කොහොමද?
අපි බලාපොරොත්තු වුණා නව ව්‍යවස්ථාවක් හරහා විධායක ජනාධිපති ක්‍රමය අහෝසි කරන්න පුලු‍වන් වේවි කියලා. එහෙත් ඒ කටයුත්ත අසාර්ථක වුණා. ඒ නිසා අපි හිතුවා පුද්ගලික මන්ත්‍රී යෝජනාවක් හැටියට විධායක ජනාධිපති ක්‍රමය අහෝසි කරන්න. ඒ කටයුත්ත දැන් බොහෝදුරට ගිහින් තියෙන්නෙ. නීතිපති දෙපාර්තමේන්තුව හා ශ්‍රේෂ්ඨාධිකරණයේ කටයුතු ඉවරයි. දැන් තියෙන්නේ පාර්ලිමේන්තුවේ තුනෙන් දෙකක බලය ලබාගන්නයි. ජවිපෙට ඉන්නෙ මන්ත්‍රීවරුන් හයදෙනයි. ඉතින්, එජාපය සහ රාජපක්ෂ නඩය ඒකට උදව් කළ යුතු වෙනවා. අපට පෙනෙන්නෙ නැහැ මැතිවරණවලදී දුන්න පොරොන්දු අනුව ඒ කණ්ඩායම් දෙක කටයුතු කරනවා කියලා. රනිල් වික්‍රමසිංහගේ ඇල්මැරුණු ස්ථාවරයත්, රාජපක්ෂලාගේ ස්ථාවරයත් නිසා විධායක ජනාධිපති ක්‍රමය අහෝසි කිරීම යට යමින් තියෙනවා. ඔවුන් උත්සාහ කරන්නෙ ඊළඟ ජනාධිපතිවරණයකින් බලය ලබාගන්නයි. මේ හැමෝම ජනවරම ගැන තුට්ටුවකට මායිම් කරන්නෙ නැහැ. තමන්ගෙ බල ව්‍යාපෘතිය ගැන විතරයි හිතන්නෙ. ජනවරමට නිග්‍රහ කරන මෙවැනි නායකයන්ට පාඩම් ඉගැන්විමේ බලය තියෙන්නෙ ජනතාවට. තමන්ට තිබෙන පරම අධිපතිභාවයත් දේශපාලන නායකයන් කෙළෙසනකොට ඔවුන්ටම ආවඩාගෙන ජනතාව යනවානම් එවැනි රටක් කාලකණ්නි වීම හැර වෙන දෙයක් වෙන්නෙ නැහැ.

වාසුදේව නානායක්කාර වැනි අය කියන්නේ විධායක ජනාධිපති ක්‍රමය මේ වෙලාවේ අහෝසි කිරීම රනිල් වික්‍රමසිංහට වාසියි කියලා. ඒත් ඔවුන් විධායක ජනාධිපති ක්‍රමය අහෝසි කිරීමට පක්ෂයි. මෙවැනි කණ්ඩායම් එක්ක සාකච්ඡා කරනවාද?
වාසුදේව නානායක්කාර මහත්තයා මොන තරම් වාමාංශික දේශපාලන පත පොත කියවලා තියෙනවාද කියලා මම දන්නෙ නැහැ. නමුත් දැන් නම් ඔහුගේ දෘෂ්ඨිකෝණය රනිල් වික්‍රමසිංහගෙන් එහාට නැහැ. ඔහු සියලු‍ දේශපාලන තීන්දු ගන්නේ රනිල් වික්‍රමසිංහ කේන්ද්‍රීය සාධකය විදියට තියාගෙන.
අපි 20 සංශෝධනය ඉදිරිපත් කළ අවස්ථාවේත් ඉන් පස්සේත් සමහර කණ්ඩායම් එක්ක සාකච්ඡා කළා. සමහර අයගෙන් සාධනීය ප්‍රතිචාර ලැබුණා. සමහර අය නායකයා මොනවද කියන්නෙ කියලා බලාගෙන ඉන්නවා. මම කියන්නෙ මේ යෝජනාව ජවිපෙ ගෙනාපු නිසා කවුරුවත් විරුද්ධ විය යුතු නැහැ. විධායක ජනාධිපති ක්‍රමය අහෝසි කිරීමේ යෝජනාව කවර පාර්ශ්වයෙන් ගෙනාවත් අපි සහයෝගය දෙන්න ලෑස්තියි. ඒ වගේම අපි විවෘතව කිව්වා 20 වන සංශෝධනයට සංශෝධන තියෙනවානම් බාරගන්න ලෑස්තියි කියලා. එහෙත් විධායක ජනාධිපති ක්‍රමය අහෝසි කරන්නට කොන්දේසි ඉදිරිපත් කරන්නෙ තම තමන්ගෙ පටු බල අරමුණු නිසායි. ඔවුන් කියන්නෙ ලෙඬේ හොඳ කරන්න කෝඳුරු තෙල් හත්පට්ටයකුයි තව චුට්ටකුයි ඕනෑ වගේ කතාව. එක්කෝ අපේ යෝජනාවට සහයෝගය දීම හෝ වෙන යෝජනාවක් ගේන එක තමයි කරන්න තියෙන්නෙ. මෛත්‍රීපාල සිරිසේන ජනාධිපතිවරයා තමන්ගේ මන්ත්‍රී කණ්ඩායම ලවා විධායක ජනාධිපති ක්‍රමය අහෝසි කිරීමේ යෝජනාවක් ගේනවානම් අපි ලෑස්තියි සහයෝගය දෙන්න. මොකද ඒක කරන්න ඕනෑ ඔහුයි.

පළාත් සභා මැතිවරණය සම්බන්ධයෙන් කෙටි පනතක් ගෙනල්ලා ඡන්දය ඉක්මනින් පවත්වන බව කියනවා නේද?
පළාත් සභා ඡන්දය මේ වෙනකොටත් ඉවර කිරීමේ හැකියාව තිබුණා. ෆයිසර් මුස්තාෆා ඇමතිවරයා විසින් පාර්ලිමේන්තුවට ගෙනෙන ලද සීමා නිර්ණය වාර්තාව පාර්ලිමේන්තුවේ තුනෙන් දෙකකින් සම්මත කළානම් මේ වෙනකොට ඡන්දය තියලා අලු‍ත් පාර්ලිමේන්තුව පත්වෙලා. ඒත් ඒ වාර්තාව යූඇන්පි එක, ශ්‍රිලනිපය හා රාජපක්ෂ කල්ලිය එකතුවෙලා පරාජය කළා. ඛේදවාචකය තමයි ඒක ඉදිරිපත් කරපු ෆයිසර් මුස්තාෆාත් ඒකට විරුද්ධව ඡන්දය දුන්නා. ඒ හැමෝම දන්නවා මේක පරාජය කළාම ඡන්දය කල්යනවා කියලා. පළාත් සභා ඡන්දය තියන්න ලැබුණු අවස්ථාව මඟහැරලා වෙන වෙන ඩීල් දාලා, දැන් පළාත් සභා ඡන්දය කල්යනවා කියලා කෑගහලා වැඩක් නැහැ. අපි කියන්නෙ ජනතාව තමයි මනාප වලින් තොර ඡන්ද ක්‍රමයක් ඉල්ලු‍වේ. ජනතාව තමයි කොට්ඨාශයට වගකියන්න පුලු‍වන් මන්ත්‍රීවරයෙක් ඉල්ලු‍වේ. ඒ අනුව තමයි පළාත් පාලන මැතිවරණ ක්‍රමය වෙනස් කළේ. ඒ අනුව තමයි පළාත් සභා මැතිවරණ ක්‍රමය වෙනස් කළේ. ජනතාවගේ වුවමනාව අනුව පාර්ලිමේන්තුවේ තුනෙන් දෙකකින් ඡන්ද ක්‍රමයක් සම්මත කළාම ආණ්ඩුවේ වගකීම තමයි ඒ ක්‍රමයට අනුව වැඩ කිරීම. එජාප මන්ත්‍රීවරුන් පවා අද හිතනවා ජනතාව විසින් ඉල්ලපු නව මැතිවරණ ක්‍රමයට ගියොත් එහෙම තමන්ට ගෝලයෝ හැටියට වැඩ කරගන්න පළාත් සභා මන්ත්‍රීවරුන් ප්‍රමාණය අඩු වෙනවා කියලා. ඒකයි දැන් වෙන්නෙ. දැන් උත්සාහ කරන්නෙ පැරණි මනාප ක්‍රමයට නැවත යන්නයි. ජවිපෙ නම් මනාප ක්‍රමය යටතේ අපේ දේශපාලන සදාචාරය ආරක්ෂා කරගත්තා. යම් හෙයකින් අපි සම්මත කරපු මැතිවරණ ක්‍රමය වෙනස් කරනවානම්, ඒකෙන් අදහස් වෙන්නේ ජනතාවගේ බහුතර ඉල්ලීමට මේ පාර්ලිමේන්තුව පිටුපානවා කියන එකයි.

දින 51 කුමන්ත්‍රණය පරාජය කිරීම වෙනුවෙන් ජවිපෙ මැදිහත්වීමක් කළා. වත්මන් ආණ්ඩුව යළි බලයට පත්වෙන්නත් ඒ මැදිහත්වීම හේතුවුණා. එහෙම පත්වෙච්ච එජාපය අද ඇමතිධූර බෙදාගන්නට බැරිව දඟලනවා….
දින 51 කාලය තුළදී එජාපය රට පුරා පෝස්ටරයක් ගහලා තිබුණා ඔවුන්ගේ වෑයම තනතුරු වෙනුවෙන් නොවේ, අනතුරෙන් රට බේරාගැනීමටයි කියලා. ඒ පෝස්ටරය සමහර තැන්වල තවම තියෙනවා. සමහර එජාප මන්ත්‍රීවරුන්ගෙ කාර්යාලවල තියෙනවා. දැන් ඒ පෝස්ටරය පිටිපස්සෙ තියාගෙන සමහර මන්ත්‍රීවරු නහයෙන් අඬනවා තමන්ට කැබිනට් ඇමතිකමක් ලැබුණේ නැහැ කියලා. තව සමහරුන්ට ආයතන මදිලු‍. රාජපක්ෂලා බලයට කෑදරකමින් ඔක්තෝබර් 26 කුමන්ත්‍රණය කළා වගේම රනිල් වික්‍රමසිංහ ප්‍රමුඛ එජාප නඩයත් ඒ වෙලාවේදී කුමන්ත්‍රණය පරාජය කරන්න මැදිහත්වුනේ සද්භාවයෙන් නෙවෙයි කියන එක. ඒ නිසා තමයි අපි දිගටම කිව්වෙ රනිල් වික්‍රමසිංහ කියන්නෙ ප්‍රජාතන්ත්‍රවාදයේ හොර මුරකරුවෙක් කියන එක. දැන් රාජපක්ෂලා එලිපිට බලයට කෑදරව දඟලන දැඟලිල්ලත්, එජාපය ඒක වහගන්න උත්සාහ කරමින් සිටියදී එළියට පනින කෑදරකමත් විසින් පෙන්වන්නේ ඒක.

ජනාධිපතිවරණයක් පැවැත්වුවොත් ජවිපෙ කරන්නෙ මොක ක්ද?
ජනාධිපතිවරණය පිළිබඳ සාකච්ඡාවේ ආරම්භකයා මෛත්‍රීපාල සිරිසේන. ඔහු රෙද්දක් ඇඳගෙනද ජනාධිපතිවරණයක් ගැන කතාකරන්නෙ. මහින්ද රාජපක්ෂ යටතේ අගමැතිකමක්වත් නැතිව දේශපාලනයෙන් විශ්‍රාම යන්න හිටපු මනුස්සයාට විධායක ජනාධිපති පුටුවේ ඉඳගන්න ලැබුණේ විධායක ජනාධිපති ක්‍රමය අහෝසි කරන බව ඔහු කිව්ව හින්දා. අඩු තරමේ ඒ කෙළෙහිගුණයවත් තබාගෙන අවුරුදු පහක් උග්‍ර බලතල තිබුණු විධායක ජනාධිපති පුටුවේ වාඩිවෙලා ඉඳලා, විධායක ජනාධිපති ක්‍රමය අහෝසි කරන්න තිබුණා. ඔහු කිව්වා වගේ පොළොන්නරුවේ කුඹුරු කොටන්න තිබුණා. ඔහු කැමතිනම්. ඒත් ජනවාරි 8 වැනිදායින් පස්සෙ අමුතු දැඟලිල්ලක් පටන් අරගෙන තියෙනවා ජනාධිපතිවරණයක් කැඳවන්න. දැන් මහින්ද සමරසිංහ, දයාසිරි ජයසේකර වගේ අයව පාවිච්චි කරලා මෛත්‍රීපාල සිරිසේන නැවත ඉල්ලනවා කියලා කියනවා. ඒකට හරියන්න ගෝඨාභය, චමල්, බැසිල් කියන නම් එළියට ඇවිල්ලා තියෙනවා. රනිල් වික්‍රමසිංහත් හොරගල් අහුලමින් ඉන්නවා. සිරිසේන හා රාජපක්ෂ නම් තියෙන අපේක්ෂකයන් දෙන්නෙක් ඉදිරිපත් වුණොත් ඒකේ වාසිය ලැබෙයි කියලා. 2015 ජනවරම නියෝජනය කරපු සිරිසේන හෝ වික්‍රමසිංහ කියන දෙදෙනාටම යළි ජනාධිපතිවරණයක් ගැන හිතන්නවත් අයිතියක් නැහැ. යම් හෙයකින් ජනාධිපතිවරණයක් ආවොත් ජවිපෙ ජනාධිපතිවරණ අපේක්ෂකයෙක් ඉදිරිපත් කරනවා. ජවිපෙ තරඟ කරන හින්දා, ලේසියෙන්ම ඔටුනු පළඳින්න ඉන්න කොයි කාටත් බරපතල ප්‍රශ්ණයකට මුහුණදෙන්න සිදුවේවි.■