එක්සත් ජාතික පක්ෂයේ නායකත්වයෙන් යුතුව එක්සත් ජාතික පෙරමුණ පිහිටුවන ඉදිරි ආණ්ඩුවක් තුළින් ජාතික ප්‍රශ්නයට දේශපාලන විසඳුමක් ලබා දෙන බව අග්‍රාමාත්‍ය රනිල් වික්‍රමසිංහ එන්ටර්ප්‍රයිස් ශ්‍රී ලංකා ප්‍රදර්ශනයට සහභාගි වෙමින් යාපනයේදී ප්‍රකාශ කර ඇත.
එජාප නායකත්වයෙන් යුත් එජාප පෙරමුණු ආණ්ඩුවක් යටතේ පළාත් සභාවලට වැඩි බලතල ලබා දෙන බවද ඔහු එහිදී කියා ඇත.


නව ව්‍යවස්ථාවක් සැකසීම සඳහා වු ආණ්ඩුක්‍රම ව්‍යවස්ථා මණ්ඩලයට පළාත් සභාවලට වැඩි බලතල ලබා දීමේ යෝජනා ඉදිරිපත් කළ බවත් වත්මන් පාර්ලිමේන්තුව තුළ සිය පක්ෂයට බහුතර මන්ත්‍රී සංඛ්‍යාවක් නොමැති නිසා එය ක්‍රියාත්මක කිරීමට නොහැකි බවත් රනිල් වික්‍රමසිංහ මහතා එහදී වැඩිදුරටත් කියා ඇත.


ඉදිරි අවුරුදු පහක කාලයේදී යාපනය ගොඩනගන ආකාරය ගැනද දැනට යාපනය ගොඩනැගීමට යොදවා ඇති මූල්‍ය ප්‍රතිපාදන ගැනද එහිදි කියා ඇත.
මේ සියල්ලෙන්ම අගමැති රනිල් වික්‍රමසිංහ යාපනයේ ජනතාවගෙන් හා එහි දේශපාලන නායකත්වයෙන් ඉල්ලා ඇත්තේ යළි බලයට පත්වීම සඳහා ඔහුට සහය ලබා දෙන ලෙසයි.
ජාතික ප්‍රශ්නයට දේශපාලන විසඳුමක් ලබා දීමත් පළාත් සභාවලට වැඩි බලතල ලබා දීමත් අවශ්‍ය බව ඔහුට මතක් වී ඇත්තේ ඉදිරි මැතිවරණ සමයක් ඔන්න මෙන්න කියා තිබියදීය. එන්ටර්ප්‍රයිස් ශ්‍රී ලංකා ඇතුළු ආණ්ඩුවේ සියලු සංවර්ධන වැඩසටහන් දැන් ක්‍රියාත්මක කරන්නේ ඉදිරි මැතිවරණ ඉලක්ක කරගෙනය.


බලයට පත්වී වසර හතරක කාලයක් තුළ මේ රටේ ජාතික ප්‍රශ්නයක් තිබේ කියාවත් විධායක ජනාධිපති ධුරය අහෝසි කර පරිධියට බලය බෙදිය යුතුය ක්‍රියාවත් ඔහුට සිතී තිබුණේ නැත.එසේ සිතුණා නම් ආණ්ඩුවක් ලෙසත් පාර්ලිමේන්තුවේ බලය හිමි පක්ෂයේ නායකයා ලෙසත් ඒ සම්බන්ධයෙන් ඔහු කරන්නට උත්සාහ කළ දෙයක් තිබිය යුතුය.


පාර්ලිමේන්තුවේ බහුතරයක් නැහැ යැයි කීම නොකෙරෙන වෙදකමට කෝඳුරු තෙල් හත්පට්ටයකුත් තව ටිකක් යන උපහැරණයට සමානය. යහපාලන න්‍යාය පත්‍රයේ කෙරුණු ප්‍රතිසංස්කරණ වුයේද බාධා මධ්‍යයේ බහුතරය නොමැතිවය. රනිල් වික්‍රමසිංහ ඇතුළු ආණ්ඩුවට දැන් කියන බලය බෙදීම පිළිබඳව කාරණය ගැන වුවමනාවක් තිබුණේ නැත.
මේ කතා සියල්ල ඔහු සිදු කරන්නේ ඡන්දය ඉලක්ක කර ගනිමින්ය. ඉතිහාසය යළි යළිත් අපට මුණගස්සවා ඇති බලය ලබා ගැනීම සඳහා වු පොරොන්දු දේශපාලනය මෙයය.
පළාත් සභාවලට බලය බෙදීම යනු රටේ ජාතික ප්‍රශ්නයට දිය හැකි එක් විසඳුමක්ය. එමෙන්ම දෙමළ හා මුස්ලිම් ජනතාව බහුතරයක් වෙසෙන උතුරු හා නැගෙනහිර පළාත් සම්බන්ධයෙන් ගත් කල පළාත් සභා අකර්මණ්‍ය නොවී පවත්වා ගෙන යෑම වැඩිපුර බලය ලබා දීමට පෙර විය යුත්තක්මය.


එහෙත් පළාත් සභා අකර්මණ්‍ය නොවී පවත්ගෙන යාමට අග්‍රාමාත්‍ය රනිල් වික්‍රමසිංහටද උවමනාවක් තිබුණේ නැත. සංශෝධිත පළාත් සභා මැතිවරණ නීතිය යටතේ සකස් කරන ලද සීමා නිර්ණය වාර්තාව පරාද කිරීමට ආණ්ඩු බලය හිමි ඔහුගේ පක්ෂයද ඡන්දය දුන්නේය. එම වාර්තාවේ අඩුපාඩුවක් තිබුණේ නම් එය සකස් කිරීම සඳහා ඊළඟ විසදුම ලෙස කතානායකවරයා පත් කරන ලද අග්‍රාමාත්‍ය රනිල් වික්‍රමසිංහගේ ප්‍රධානත්වයෙන් යුත් සමාලෝචන කමිටුවද සිය වාර්තාව පාර්ලිමේන්තුවට ලබා දුන්නේ නැත. මෙම කමිටුව පත් කරන ලද්දේ 2018 අගෝස්තු 28 වෙනිදාය. කමිටුවේ කටයුතුවලට මාස දෙකක කාලයක් ලබා දී තිබුණි. ඒ අනුව කමිටුවට කාලය තිබුණේ ඔක්තෝබර් 28 දක්වා පමණි. 2018 ඔක්තෝබර් 26 වෙනිදා ජනාධිපතිවරයාගේ ව්‍යවස්ථා කුමන්ත්‍රණය සිදු වුණි. ඒ කමිටුවට ඇති කාලයට දින දෙකකට පෙරය. නමුත් ඇත්ත තත්වය වන්නේ ඒ වන විටත් ඉදිරිපත් කිරීමට වාර්තාවක් කමිටුව සතුව නොතිබුණ බවයි. ඊට හේතු වී තිබුණේ එම වැදගත් කමිටුව මාස දෙකක කාලයකදී රැස් වී තිබුණේ දෙවතාවක් පමණක් වීමය.


රටේ වැදගත් ප්‍රශ්න පිළිබඳව අග්‍රාමාත්‍ය රනිල් වික්‍රමසිංහගේ ඇත්ත වුවමනාව එයාකාරයය.