නුගේගොඩ, එපිටමුල්ල පාරේ පිහිටි නිවසක සිට රජය දුරකථන සංවාදවලට සවන් දෙන බව රිවිර පුවත්පත තමන්ගේ මුල් පුවත ලෙස වාර්තා කළේය. නවීනතම තාක්ෂණික උපකරණ ඒ සඳහා රජය විසින් ලබාගෙන ඇති බව එම වාර්තාවෙහි සඳහන්ව තිබුණි. ඒ සමඟ ඩලස් අලහප්පෙරුම මන්ත‍්‍රීවරයාද ඒ පිළිබඳව මාධ්‍ය සාකච්ඡුාවකදී ප‍්‍රකාශ කර තිබුණි. මේ වෙද්දී දුරකථන සංවාද පටිගත කිරීමේ සාකච්ඡුාව යටපත්ව ගොස්ය. එහෙත් බිය බරපතළ ලෙස වර්ධනය වී ඇත. මාධ්‍යවේදීන්, රාජ්‍ය නිලධාරීන්, දේශපාලනඥයන් මාධ්‍ය සමඟ අදහස් පළකිරීමේදී දුරකථන සංවාදවලට ඇහුම්කන් දෙන බවට සැකයෙන් කතාබහ කරන අතර පොලිස් නිලධාරීහු, දැන් දුරකථනවලට ඇහුම්කන් දෙන්නේයැයි විශ්වාසයෙන් පවසන්නෝය. ඉතින්, රිවිර හෙළිදරව්ව ඇත්තක් නොවුණත් ආණ්ඩුව සංවාදවලට ඇහුම්කන් දෙන්නේයැයි සැකය නිසා පුරවැසියන්ගේ නිදහස සීමා වී ඇත. එහෙත් ආණ්ඩුව ඒ පිළිබඳව කිසිම ප‍්‍රතිචාරයක් දැක්වූවේ නැත.

එපිටමුල්ල පාරේ නිවසක්
රිවිර හෙළිදරව්වට ටික දිනකට පෙර ‘අනිද්දා’ටද මේ පිළිබඳව තොරතුරු ලැබී තිබුණි. එහෙත් එම තොරතුරු තහවුරු කරගැනීමේ උත්සාහයක අනිද්දා කණ්ඩායමද සිටි අතර මේ වන විට අනිද්දා පුවත්පතටද දුරකථන සංවාද ටැප් කිරීමේ කතාව නාමිකව පෙනීසිටීමට අකැමති ඉහළ පොලිස් නිලධාරීන් කිහිපදෙනෙකු හරහා විශ්වාසදායක ආරංචිමාර්ගවලින් තහවුරු කරගත හැකිවී තිබේ. ත‍්‍රස්ත විමර්ශන ඒකකය සතුව තිබෙන නුගේගොඩ, එපිටමුල්ල පාරේ නිවෙසක මෙම ඒකකය පවත්වාගෙන යන බවද එම විශ්වාසදායක ආරංචි මාර්ග අනිද්දා සමඟ කීය.

දුරකථන ටැප් කිරීමේ කතාව සමඟ අපට සිහිපත් වෙන්නේ ජනාධිපති මෛත‍්‍රීපාල සිරිසේන මහතා කළ ප‍්‍රකාශයකි. මේ ප‍්‍රකාශය සිදුකළේ වත්මන් ආණ්ඩුව බලයට පත්ව මාස තුනකට පසුව 2015 අපේ‍්‍රල් 23 වැනිදාය.

‘ජනවාරි 8 වැනිදාට පෙර සාමාන්‍යයෙන් අපේ ප‍්‍රාදේශීය සභා මන්ත‍්‍රී‍වරුන් එක්ක කතා කළාම කෑ ගහනවා කතා කරන්න එපා දුරකථන ටැප් කරනවා කියා. රාජ්‍ය නිලධාරීන් දුරකථනයෙන් නිදහසේ කතා කළේ නැහැ. රටේ සාමාන්‍ය පොදු මහජනතාව නිදහසේ කතා කළේ නැහැ. ත‍්‍රිවිධ හමුදාවේ, පොලිසියේ පහළ ශ්‍රේණිවල නිලධාරීන් දුරකථනයෙන් නිදහසේ කතා කළේ නැහැ. මේ හැම කෙනෙකුටම අඩුම වශයෙන් දුරකථනයෙන් නිදහසේ කථා කරන්න නිදහසක් තිබුණේ නැහැ. මේ මාස 3 තුළ ඒ නිදහස ශක්තිමත් වෙලා තිබෙනවා.’
මෛත‍්‍රීපාල සිරිසේන මහතා ඒ ප‍්‍රකාශය කළේ තමා ජනාධිපති තනතුරට පත්වීමෙන් පසුවය. ඔහු එවැනි ප‍්‍රකාශයක් කළේ දුරකථනවලට ඇහුම්කන්දීමේ ඒකක පිළිබඳව පැහැදිලි දැනුමකින් විය යුතුය. එහෙත් ජනාධිපති මෛත‍්‍රීපාල සිරිසේන එකල තිබුණු දුරකථනවලට සවන්දීමේ උපකරණ ප‍්‍රසිද්ධියේ පෙන්වා, ඒවා නැවත පාවිච්චි නොකරන බව ජනතාවට සහතික කළේ නැත. මේ වෙද්දී තමන්ගේ දුරකථනවලට සවන් දෙන්නේදැයි ජනතාව අතර නැවත සැකයක් ඇතිව තිබේ.

ත‍්‍රස්ත විමර්ශන ඒකකය
එහෙත් පොලීසියේ නියෝජ්‍ය පොලිස්පතිවරුන්ගේ විශ්වාස කටයුතු ආරංචි මාර්ග හරහා කියැවෙන්නේ නුගේගොඩ, එපිටමුල්ල පාරේ දුරකථන සංවාද පටිගත කිරීම් කෙරෙන බවය. අනිද්දා අපට ඒ නිවසෙහි ලිපිනයද ලැබුණු අතර නිවසෙහි ජල හා විදුලි බිල්පත් ගෙවන්නේ පොලිස් ත‍්‍රස්ත විමර්ශන ඒකකය විසින් බවද තහවුරු කරගැනීමට ලැබුණි. පසුව අනිද්දා කළ විමසීමකදී, ඒ නිවස පොලිස් ත‍්‍රස්ත විමර්ශන ඒකකය සතු නිවසක් බව, පොලිස් මාධ්‍ය ප‍්‍රකාශක රුවන් ගුණසේකර මහතා පිළිගත්තේය.

‘නුගේගොඩ, එපිටමුල්ල පාරේ තියෙන මේ නිවස ත‍්‍රස්තවාදීන් සතුව තිබුණු නිවසක්. ඒ අනුව 2013දී අධිකරණයෙන් මේ නිවස රාජසන්තක කරනවා. ඉන්පසුව ඒ නිවස පොලීසියට බාරදුන්නා. රාජසන්තක කිරීමෙන් පසුව පොලීසිය බාරගත් එවැනි දේපළ ඕනෑ තරම් තියෙනවා. ඒවා රාජසන්තක කිරීමේ සම්පූර්ණ කාර්යභාරය කළේ ත‍්‍රස්ත විමර්ශන ඒකකයෙන්. ඒ නිසා ඒක ත‍්‍රස්ත විමර්ශන ඒකකයට බාර දී තියෙනවා. 2013 ඉඳලා මේ නිවාසය ත‍්‍රස්ත විමර්ශන ඒකකයෙන් පාවිච්චි කළා. ඒක ලේඛනාගාරය විදියටයි පාවිච්චි කළේ. ෆයිල් එහෙම තැබීමයි කෙරුණේ. ඊට අමතරව උසාවි අංශය විදියට පාවිච්චි කළා. එතැන ඉන්න පොලිස් පරීක්ෂකවරුන්ගේ නේවාසිකාගාරයක් විදියටත් පාවිච්චි කෙරෙනවා. පසුව 2015 වසරේදී නීතිය හා සාමය පිළිබද අමාත්‍යාංශයේ ලේකම් කේ.බී. තෙන්නකෝන් මහතාට නිල නිවාසයක් ලෙස පාවිච්චි කිරීමට ලබාදී තිබෙනවා. ඔහු ඒ නිවසෙන් ගියාට පසුව නැවත ත‍්‍රස්ත විමර්ශන අංශයට ලබාදුන්නා. දැන් ඒ නිවසෙහි ත‍්‍රස්ත විමර්ශන අංශයේ පෙර කී කටයුතුම කරනවා.

එහෙත් ඒ ගොඩනැගිල්ලේ ඔය කියන විදියේ දුරකථන සංවාදවලට ඇහුම්කන්දීමක් කරන්නේ නැහැ. ඒ සම්බන්ධයෙන් උපාංග ඇත්තේත් නැහැ. අපට ඒ වගේ උපාංග තියෙනවා නම් ඒවා මිලියන ගණන් වටින උපාංග විය යුතුයි. ඒ තරම් මිල අධික උපාංග පොලීසියට ගෙනල්ලා නැහැ.’

රිවිර වාර්තාවෙහි සඳහන්ව තිබුණේ දුරකථනවලට ඇහුම්කන්දීම සඳහා මෙතෙක් බලය තිබුණේ රාජ්‍ය නායකයා සහ බුද්ධි අංශවලට පමණක් බවත්, දැන් පොලීසියේ ඉහළ නිලධාරියෙකු තමන්ගේ පෞද්ගලික වුවමනා වෙනුවෙන් දුරකථනවලට ඇහුම්කන් දෙන බවත්ය. එම වාර්තාවෙන් වක‍්‍රාකාරව ජාතික ආරක්ෂාව වෙනුවෙන් දුරකථනවලට ඇහුම්කන් දීම ගැටලූ‍වක් නැති බව පෙන්වන්නට උත්සාහ කර ඇත්තේය. එහෙත් පෞද්ගලික දුරකථන සංවාදවලට ඇහුම්කන්දීමේ අයිතිය කිසිම හේතුවක් මත කිසිදු පුද්ගලයෙකුට ලැබිය යුතු නොවන්නේය.

රාජපක්‍ෂ පාලනය
දුරකථන සංවාද පටිගත කිරීම රාජපක්ෂ පාලන සමයේදීත් සිදුවූ බව අප සමඟ තහවුරු කළේ රාජපක්ෂ ආණ්ඩුවේ සිටි ප‍්‍රබලම ඇමතිවරයෙකු විසින්ය. ඔහු රාජපක්ෂ ආණ්ඩුවේ සමීපතමයෙකි. ඊට අමතරව හිටපු ආරක්ෂක අමාත්‍යාංශ ලේකම් ගෝඨාභය රාජපක්ෂගේ සමීපතමයෙකු ලෙස පෙනීසිටින උදය ගම්මන්පිල මන්ත‍්‍රීවරයා ප‍්‍රසිද්ධියේ කීවේ, රාජපක්ෂ පාලන සමයේදී ජාතික ආරක්ෂාව පිණිස දුරකථන ඇමතුම්වලට සවන් දුන් බවය. ඒ ප‍්‍රකාශය මහින්ද රාජපක්ෂ හෝ වෙනත් නායකයෙකු ප‍්‍රතික්ෂේප කර නැත.
ගම්මන්පිල මහතා කියා තිබුණේ ස්ථාවර දුරකථනවලට සවන්දීමේ තාක්ෂණය රාජපක්ෂ රජයට නොතිබුණු බවයි. දුරකථනයකට සවන්දීමට නම් මීටර් සීයක් දුරින් සිටිය යුතු වූ බව ඔහු කියා තිබුණි.

ජංගම දුරකථන
එහෙත් අනිද්දා සමඟ නිර්නාමිකව අදහස් දැක්වූ හිටපු ඇමතිවරයා කීවේ, ජංගම දුරකථනවලට සවන්දීමේ තාක්ෂණය රාජපක්ෂ ආණ්ඩුවටද තිබුණු බවයි. රාජපක්ෂ ආණ්ඩුව සමයේදී රාජ්‍ය බුද්ධි අංශ ප‍්‍රධානී චන්ද්‍රා වාකිෂ්ඨ යටතේ දුරකථන සංවාදවලට සවන්දීම සිදුකර ඇත. ඔහු පෙන්වාදුන් ආකාරයට චන්ද්‍රිකා බණ්ඩාරනායක පාලන සමයේදී පවා දුරකථන සංවාද පටිගත කිරීම රජය විසින් සිදු කරන ලදි. එම උපකරණ වත්මන් රජයද අත්හැර නොදමා පාවිච්චි කරන්නේය. ඊට අමතරව නවීන තාක්ෂණික උපකරණ කිහිපයක්ද ලබාගෙන ඇති බව එම ආරංචි මාර්ග කියන්නේය. විශේෂයෙන්ම නවීන ස්මාට් ජංගම දුරකථන උපාංගවලින් කෙරෙන සන්නිවේදනයන් පිළිබඳ තොරතුරු සෙවීමට අවශ්‍ය උපාංග එලෙස ලබාගෙන ඇත.

ආරංචි මාර්ග පවසන ආකාරයට 2017 පෙබරවාරි 27 වැනිදා ශ‍්‍රී ලංකාවට ජපාන ජනරජයෙන් ලැබුණු ජපන් යෙන් 250ක (රුපියල් මිලියන 332ක් පමණ) ආධාරවලින් මෙම නව උපකරණ ලබාගෙන ඇත. ත‍්‍රස්තවාදයට එරෙහිව සටන්කිරීම සහ පොදු ආරක්ෂාව වර්ධනය සඳහා මෙම ජපාන ආධාර මුදල ලැබී තිබුණි.

තීරණය කාගේද?
එහෙත් ගැටලූ‍ව වන්නේ ජාතික ආරක්ෂාවට දුරකථන සංවාදවලට සවන්දීමේ කටයුත්ත පිළිබඳ තීරණය කරන්නේ කවුරුන් විසින්ද යන්නයි. දේශපාලන නායකයන් විසින්ද, හමුදා නායකයන් විසින්ද, පොලීසියේ නායකයන් විසින්ද යන්නයි. ඔවුන්ට ඕනෑම කෙනෙකුගේ පෞද්ගලික ජීවිතයට එබී බැලීමේ නිදහසක් ජනතාව ලබා දී තිබෙන්නේද? ඔවුන් ජාතික ආරක්ෂාවට අදාළ ඇමතුම්වලට පමණක් ඇහුම්කන් දෙනු ඇතිද? ජාතික ආරක්ෂාව යන කාරණාවම ඒ ඒ පුද්ගලයන් විග‍්‍රහ කරගන්නේ කෙසේද? යන්න ගැටලූ‍වකි. අනිද්දා සමඟ නිර්නාමිකව අදහස් දැක්වූ ඉහත කී අමාත්‍යවරයා කීවේ, දුරකථන ඇමතුම්වලට සවන්දීමේ බලය තිබුණු, හිටපු ආණ්ඩුවක එක්තරා බලවතෙකු විසින් එවකට සිටි දේශපාලන බලවතුන්ගේ පෞද්ගලික පේ‍්‍රම සම්බන්ධතාවලට අදාළ දුරකථන ඇමතුම්වලට සවන්දුන් බවය. මිනිසුන්ගේ ජීවිතවලට එබී බැලිය හැකි තරම්, දේව බලයක් ලෙස හැඳින්විය හැකි අන්දමේ බලයක් අතට ලැබුණු පසුව එය අවභාවිත නොකර සිටින්නට තරම් කිසිදු පෘථග්ජන පුද්ගලයෙකු පරිණත වේයැයි අපි විශ්වාස නොකරන්නෙමු. ඒ නිසා ගම්මන්පිල මහතා ප‍්‍රසිද්ධියේ පිළිගත් ජාතික ආරක්ෂාවට දුරකථන ටැප් කිරීම අහිංසක නොවන බවත් ලියා තබන්නෙමු.
තමන්ගේ ඇමතුම් විස්තර පිළිබඳ සොයා බැලීමට කිසිවෙකු එකඟ නොවනු ඇත. කිසිම පුරවැසියෙකු, කිසිම හේතුවක් මත තමන්ගේ පෞද්ගලිකත්වයේ අයිතිය රජයට බිලිදීමට සූදානම් නැත.

පොලිස් කොමිසමට පැමිණිලි
පසුගිය වසරේ අග කාලයේදී අපරාධ පරීක්‍ෂණ දෙපාර්තමේන්තුව භාර ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න වෙත දුරකථන අංක කිහිපයක ඇමතුම් වාර්තා ලබාදෙන ලෙස සඳහන් කරමින් පොලිස්පති පූජිත් ජයසුන්දර විසින් නියෝගයක් ලබාදී තිබුණි. එම දුරකථන අංක අතර තමා ඇතුළු ජ්‍යෙෂ්ඨ නියෝජ්‍ය පොලිස්පතිවරුන් කිහිපදෙනෙකුගේ දුරකථන අංකද ඇති බව රවී සෙනෙවිරත්න මහතා දැනගන්නේ ඇමතුම් වාර්තා ලබාගැනීමේ කටයුත්ත බාරදුන් පහළ නිලධාරියාගෙනි. පසුව අනවසරයෙන් පෞද්ගලික ඇමතුම් තොරතුරු ලබාගන්නා බවට රවී සෙනෙවිරත්න මහතා විසින් පොලිස් කොමිෂන් සභාවට පැමිණිලි කරනු ලැබ ඇත.
එම අවස්ථාවේදීද, මේ අවස්ථාවේදීද පොලීසියේ ඉහළ නිලධාරීන් විසින් දුරකථන සංවාදවලට සවන්දීම ගැන මාධ්‍යවලට තොරතුරු ලබාදුන්නේ තමන්ගේ දුරකථනවලටද සවන්දෙන බව ඉහළ පොලිස් නිලධාරීන්ට දැනගන්නට ලැබී ඇති නිසාය.
අමෙරිකානු රජය පෞද්ගලික දත්තවලට ඇතුළුවීමේ කටයුතුවල ඉදිරියෙන්ම සිටින්නේය. එඞ්වර්ඞ් ස්නෝඩන්ගේ හෙළිදරව් කිරීම්, ඇන්ජෙලා මාර්කල්ගේ දුරකථන ටැප් කිරීමේ සිදුවීම ඇතුළු චෝදනා රැුසක් අමෙරිකාවට එල්ලවී ඇත. බොහෝ සිදුවීම් මාධ්‍ය විසින්ද හෙළිදරව් කර ඇත. ඉන්දීය රජය, එක්සත් රාජධානියේ රජය දුරකථනවලට සවන්දීම පිළිබඳ චෝදනා ලත් වෙනත් ප‍්‍රබල ප‍්‍රජාතන්ත‍්‍රවාදී රාජ්‍යයන්ය. ඊට අමතරව චීනයේ සහ රුසියාවේ පාලකයන් දුරකථනවලට සවන්දෙන බව ප‍්‍රසිද්ධ කාරණයකි.
එම රටවල පුරවැසියන් අතර තමන්ගේ නිදහස සීමා කිරීම පිළිබඳ දැවැන්ත සංවාදයක් ඇතිව තිබුණි. පුරවැසියන්ගේ පෞද්ගලික සංවාදවලට ඇහුම්කන් දීමේ කිසිදු අයිතියක් රජයකට නැති බව එම සංවාදවලදීද පිළිගෙන ඇති දියුණු ආකල්පයයි.

ආණ්ඩුව කතාකළ යුතුයි
රජය දුරකථන සංවාදවලට සවන්දීමේ චෝදනාව පිළිබඳව විවෘතව අදහස් පළ කළ යුතුය. වත්මන් ආණ්ඩුවේ ජනාධිපතිවරයා ප‍්‍රමුඛ ඇමතිවරුන් බලයට පත්වූ පසුව රාජපක්ෂ රජයෙන් දුරකථනවලට සවන්දී ඇති බව කිහිප වතාවක් ප‍්‍රසිද්ධියේ කියා ඇත. ඉහතින් උපුටාගත්තේ එක් ප‍්‍රකාශයක් පමණි.
එලෙස දුරකථනවලට සවන්දීමට පාවිච්චි කළ උපකරණ පිළිබඳව ආණ්ඩුව වහා හෙළිදරව් කළ යුතුය. ඒ උපකරණ අත්හැර දමා තිබෙනවාද, පාවිච්චි කර තිබෙනවාද යන කාරණා ප‍්‍රසිද්ධියේ කිව යුතුය. එසේ නොවන තාක් කල් පුරවැසියන් අතර තමන්ගේ පෞද්ගලිකත්වය පිළිබඳව සැකයක් සමඟ ජීවත්වෙන්නට සිදුවනු ඇත. එය ප‍්‍රජාතන්ත‍්‍රවාදී රටක ලක්ෂණයක් නොවන්නේය.