අරුණ ජයවර්ධන

පසුගිය මාර්තු මාසයේ රටේ විවිධ ප‍්‍රදේශවල මුස්ලිම්වරුන්ට එරෙහිව ඇති කළ ප‍්‍රචණ්ඩ ක‍්‍රියා මාලාවේදී, ආනමඩුවේ ගිනිබත් කැරුණු මුස්ලිම් ජාතිකයාගේ වෙළෙඳසැල ගිනි තැබීමට කුමන්ත‍්‍රණය කළ හා එය මෙහෙයවූ ප‍්‍රධාන සැකකරු අත්අඩංගුවට නොගෙන, සැකකාර ලැයිස්තුවලින්ද ඉවත් කර, ඔහුට ගැලවී යන්නට ඉඩ සලසා දී ඇතැ’යි වාර්තා වෙයි.
තීක්‍ෂණ නමැති මේ පුද්ගලයා ආනමඩුවේ එක්සත් ජාතික පක්‍ෂ තරුණ සංවිධානයේ ක‍්‍රියාකාරිකයකු වන අතර රාජ්‍ය අමාත්‍ය පාලිත රංගේ බණ්ඩාරගේ සමීපතමයෙකි. රාජ්‍ය ඇමතිවරයාගේ මැදිහත්වීම මත මේ පුද්ගලයා මුදා හැරීමට කටයුතු කර ඇති බවට වාර්තා වන අතර ඒ සඳහා මැදිහත්වී ඇත්තේ පුත්තලම ප‍්‍රදේශය භාර නියෝජ්‍ය පොලිස්පති චම්පික සිරිවර්ධන බවද දැනගන්නට තිබේ.
මේ හා සම්බන්ධ පැමිණිල්ල පුත්තලම අධිකරණයේදී විභාගයට ගත් අවස්ථාවේදී අධිකරණය, තීක්‍ෂණ හෙවත් ප‍්‍රධාන සැකකරු අත්අඩංගුවට නොගෙන ඇත්තේ මන්දැයි විමසූ විට ආනමඩුව පොලිසිය කියා ඇත්තේ, ඔහුට විරුද්ධව සාක්‍ෂි නොමැති නිසා අත්අඩංගුවට නොගත් බවයි. එවිට අධිකරණය පවසා ඇත්තේ සාක්‍ෂි තිබේද නැද්ද යන්න ගැන බලන්නේ අධිකරණය බැවින්, වහාම මෙම පුද්ගලයා අත්අඩංගුවට ගෙන ඉදිරිපත් කළ යුතු බවයි.
කෙසේ වෙතත්, ආනමඩුව පොලිසියේ පිළිතුරට පටහැනිව, වෙළෙඳසැල ගිනි තැබීම සම්බන්ධයෙන් පොලිසිය සටහන් කරගත් පුද්ගල ප‍්‍රකාශවලදී, තීක්‍ෂණ නමැති මේ පුද්ගලයා ගිනි තැබීමට කුමන්ත‍්‍රණය කළ බවත්, ගිනි තැබීම මෙහෙයවූ බවත් ඇසින් දුටු පුද්ගලයන් විසින් ප‍්‍රකාශ කරනු ලැබ තිබේ.